Zaj 6: Xyaum Qhia Kom Tus Kawm Vajlugkub Loj Hlob
Thaum Tus Kawm Muaj Lus Nug
1 Thaum ib tug twg pib kawm Vajlugkub lawm, tsis txhob kawm rau ub rau no li tsis muaj zaj, cia li pib qhia ib qho zuj zus ntawm hauv paus tuaj. Yog ua li no yuav pab tau tus kawm paub Vajlugkub zoo thiab nws txojkev ntseeg yuav loj hlob zuj zus. (Khx. 1:9, 10) Ntau zaus thaum kawm Vajlugkub, tus kawm yuav muaj lus nug txog ntau yam. Yog li, yuav ua li cas?
2 Ua Neeg Thoob Tsib: Yog tus kawm muaj lus nug txog zaj uas tabtom kawm, ces cia li teb nws kiag tamsim ntawd. Yog nws nug txog ib yam uas haj tseem yuav kawm txog tom ntej, ces qhia rau nws tias thaum twg kawm txog mam teb nws lo lus nug. Tiamsis yog nws nug txog lwm yam uas tsis nyob hauv zaj tabtom kawm thiab yuav tau tshawb nrhiav ua ntej yuav teb tau nws, ces qhia rau nws tias tom qab kawm xaus mam li teb nws lossis cia rau lwm zaus tso. Ib txhia pom tias yog muab lo lus nug sau cia yuav ua rau tus kawm pom tias nws lo lus nug tseem ceeb, thiab ua li no thiaj tsis tab kaum lub sijhawm kawm Vajlugkub.
3 Peb cov ntaub ntawv tsuas qhia mentsis txog tej uas phau Vajlugkub qhia xwb. Yog tias muaj tej yam uas phau Vajlugkub qhia uas nyuaj rau tus kawm txais yuav los yog nws tseem ntseeg txog tej yam uas cuav ne, ho yuav ua li cas? Tej zaum zoo siv lwm yam ntaub ntawv Vajlugkub uas piav tshab txog zaj ntawd los pab nws. Yog tias ua li no tseem pab tsis tau nws ntseeg thiab, ces cia lwm zaus mam li tham dua es rau siab ntso kawm Vajlugkub ntxiv. (Yh. 16:12) Thaum tus kawm paub Vajlugkub zuj zus thiab nws txojkev ntseeg loj hlob zuj zus lawm, ces nws yeej yuav to taub zaj ntawd xwb.
4 Ua Neeg Txo Hwjchim: Yog tias koj tsis paub yuav teb ib lo lus nug twg, tsis txhob cia li lam tau lam teb raws siab. (2Tmt. 2:15; 1Pt. 4:11) Qhia rau nws tias koj yuav tau tshawb nrhiav tso mam li teb nws. Tej zaum koj kuj siv lub sijhawm ntawd los qhia kom nws paub tshawb nrhiav txog tej uas nws tsis paub. Ua tib zoo qhia kom nws txawj siv tej twj uas Yehauvas lub koom haum npaj tseg rau peb tau siv. Yog koj pab nws li no, nws yuav txawj tshawb nrhiav tej yam uas nws tsis to taub txog.—Ttx. 17:11.