Zaj 7: Xyaum Qhia Kom Tus Kawm Vajlugkub Loj Hlob
Thov Vajtswv Thaum Kawm Vajlugkub
1. (a) Vim li cas thaum peb qhia Vajlugkub rau ib tug twg, tsim nyog peb thov Vajtswv thaum pib thiab thaum xaus? (b) Peb yuav pab li cas kom tus uas kawm pom tias tsim nyog peb thov Vajtswv?
1 Yuav tsum yog Yehauvas ua tus foom koob hmoov mas cov kawm Vajlugkub txojkev ntseeg thiaj loj hlob. (1Khl. 3:6) Yog li ntawd, thaum peb qhia Vajlugkub rau ib tug twg, tsim nyog peb thov Vajtswv thaum pib thiab thaum xaus. Thaum peb ntsib ib tug uas nyiam Vajtswv, thawj zaug uas peb qhia Vajlugkub rau nws, peb thov Vajtswv los tau. Tiamsis cov uas tsis tau nyiam Vajtswv, peb yuav tau tos seb thaum twg zoo sijhawm peb mam li pab kom lawv pom tias tseem ceeb rau peb thov Vajtswv. Yuav pab lawv li cas? Koj muab Ntawv Nkauj 25:4, 5 thiab 1 Yauhas 5:14 los pab kom tus kawm Vajlugkub pom tias tsim nyog peb thov Vajtswv thiab muab Yauhas 15:16 los piav tias tseem ceeb rau peb tuav Yexus lub npe thov Yehauvas.
2. Yog ib tug muam coj ib tug kwvtij uas twb raus dej lawm nrog nws mus qhia Vajlugkub, leejtwg yuav ua tus thov Vajtswv? Tiamsis yog tias tus txivneej yog ib tug tshaj tawm uas tsis tau raus dej, leejtwg yuav ua tus thov Vajtswv?
2 Thaum qhia Vajlugkub rau ib tug twg, tsim nyog leejtwg ua tus thov Vajtswv? Tej zaum ib tug muam yuav coj ib tug kwvtij uas twb raus dej lawm nrog nws mus qhia ib tug twg. Txawm tus muam kauv taubhau, thiab ua tus qhia los, tus kwvtij yuav tsum ua tus thov Vajtswv. (1Khl. 11:5, 10) Yog tias tus txivneej yog ib tug tshaj tawm uas tsis tau raus dej, ces tus muam mam li thov Vajtswv. Tiamsis nws yuav tsum kauv taubhau thaum nws thov Vajtswv thiab thaum nws qhia Vajlugkub.
3. Thaum qhia Vajlugkub rau ib tug twg, peb yuav thov txog tej yam zoo li cas?
3 Peb Yuav Thov Txog Dabtsi? Thaum nrog ib tug twg kawm Vajlugkub, tsis tas yuav thov Vajtswv ntev ntev, tsuas thov tsi ntsees rau yam uas tabtom yuav kawm txog xwb. Tsis yog thov Vajtswv foom koob hmoov rau txojkev kawm Vajlugkub thiab ua nws tsaug tias peb paub qhov tseeb lawm xwb, tiamsis tsim nyog peb qhuas Yehauvas ua tus cob qhia peb sawvdaws. (Yxy. 54:13) Tsis tas li ntawd xwb, peb cov lus thov yuav tsum qhia tias peb yeej mob siab txog tus uas kawm Vajlugkub, thiab qhia tias peb nco txiaj ntsig rau Yehauvas lub koom haum. (1Thxk. 1:2, 3; 2:7, 8) Thiab zoo rau peb thov kom Yehauvas foom koob hmoov rau tus uas kawm Vajlugkub, kom nws coj tau raws li nws tau kawm. Yog peb thov li ntawd, tus kawm yuav pom tias nws yuav tau ‘xyaum coj raws li Vajtswv txojlus’ tiag.—Yknp. 1:22.
4. Thaum pib thiab thaum xaus kev kawm Vajlugkub, yog peb thov Vajtswv yuav pab tau peb li cas?
4 Yog peb thov Vajtswv pab tau peb li cas? Vajtswv yuav foom koob hmoov rau peb. (Lk. 11:13) Kev thov Vajtswv qhia tias txojkev kawm Vajlugkub tseem ceeb heev. Thaum tus kawm mloog peb thov Vajtswv, nws yuav paub thov thiab. (Lk. 6:40) Tsis tas li no xwb, yog tias peb thov Vajtswv tawm hauv nruab siab tuaj, qhuas txog Yehauvas tej yeeb yam zoo kawg nkaus, ces tus kawm Vajlugkub yuav xav nrog Yehauvas sib raug zoo thiab.