Koj Puas Cia Yehauvas Qhia Koj?
1. Yehauvas puas xav kom peb txawj ntse?
1 Yehauvas, uas yog “tus xibhwb” txawj qhia tshaj plaws, xav kom peb txawj ntse. (Yxy. 30:20) Tom qab nws tsim tau nws tus tub hlob nws txawm pib qhia tus tub ntawd. (Yh. 8:28) Txawm tom qab Adas tau fav xeeb rau Yehauvas los, Yehauvas tseem hlub tibneeg thiab qhia lawv ua neej.—Yxy. 48:17, 18; 2Tmt. 3:14, 15.
2. Niaj hnub no Yehauvas qhia tibneeg li cas?
2 Niaj hnub no, Yehauvas muaj ib txojkev kawm zoo tshaj plaws rau tibneeg. Zoo li Yaxaya tau faj lem, muaj tsheej plhom tus thoob ntiajteb sau nthwv tuaj rau saum “lub roob uas muaj [Yehauvas] lub tuam tsev.” (Yxy. 2:2) Vim li cas coob tus ho sau nthwv tuaj rau saum lub roob ntawd? Lawv tuaj kawm Vajtswv txojkev! (Yxy. 2:3) Rau xyoo 2014, Yehauvas Cov Timkhawv tau siv li 1,900 plhom teev los mus qhia Vajlugkub. Tsis tas li ntawd xwb, muaj tshaj li 115,000 lub koom txoos tuaj sib txoos kawm Vajtswv txojlus txhua lub lim tiam thoob ntiajteb, thiab tus qhev ncaj thiab ntse kuj npaj tej ntaub ntawv Vajlugkub ua 700 tawm yam lus.
3. Tej uas Yehauvas qhia peb pab tau koj li cas?
3 Rau Siab Ntso Kawm: Yehauvas qhia peb zoo heev! Peb tau kawm tias Vajtswv muaj ib lub npe thiab nws mob siab peb. (Kh.D. 3:14, hauv qab taw qhia; 1Pt. 5:6, 7) Peb tau kawm txog cov lus nug tseem ceeb no: Vim li cas tibneeg ho raug kev txom nyem thiab kev ploj kev tuag? Yuav ua li cas kuv thiaj nrhiav tau kev zoo siab tiag? Ua li cas ho muaj tibneeg? Yehauvas muaj kev cob qhia zoo heev los pab peb ua neej kom peb “thiaj li vam meej.”—Ys. 1:8.
4. Peb ua tau tej haujlwm twg rau Yehauvas, thiab vim li cas peb yuav tsum cia Yehauvas qhia peb?
4 Tsis tas li ntawd xwb, Yehauvas muaj ntau txojkev kawm los pab nws cov tub qhe kom paub ua nws tes haujlwm. Phau Tsom Faj lub 9 Hlis tim 1, 2014, sab 29 tham txog tej haujlwm puv ntoob uas peb ua tau. Tej zaum yuav muaj tej ub tej no los khuam peb kom peb ua tsis tau txhua yam haujlwm puv ntoob ntawd, txawm li ntawd los, cia peb ua cov uas peb ua tau. Vim tej xibhwb qhia ntawv pheej hais tas zog kom peb cov menyuam mus kawm ntawv qeb siab, peb puas txhawb lawv kom muaj hom phiaj ntawm sab kev ntseeg es mus tej kev kawm uas Yehauvas tau npaj tseg rau nws cov tibneeg? Tej kev kawm no zoo tshaj tej kev kawm ntawv qeb siab hauv lub qab ntuj no rau qhov Yehauvas, uas yog tus xibhwb txawj qhia tshaj plaws, yog tus qhia. Yog peb cia Yehauvas qhia peb, peb yuav muaj ib lub neej zoo tamsim no thiab yav tom hauv ntej.—Nt.Nk. 119:105; Yh. 17:3.