The Wonders of Creation Reveal God’s Glory
Coob leej nyiam saib tej uas Yehauvas tau tsim, tiamsis lawv tsis nkag siab tias tej toj roob hauv pes thiab tej hnub qub saum nruab ntug qhuas txog tus Tswv Tsim Yehauvas. (Loos 1:20) Yav thaum ub Davi nyeem Vajtswv Txojlus nws thiaj paub txog Yehauvas. Tiamsis puas yog tas li ntawd xwb? Tsis yog. Davi kuj “tsa muag ntsia” tej uas Yehauvas txhais tes tsim. (Nt.Nk. 8:3, 4) Daim yeeb yaj kiab hu ua The Wonders of Creation Reveal God’s Glory pab peb xyaum li Davi. Yuav pab tau peb tsev neeg thiab cov uas peb qhia Vajlugkub rau, kom peb tsa muag ntsia tej uas Vajtswv tau tsim, seb tej ntawd qhia li cas txog nws tej yeeb yam zoo. Zaj no yuav pab kom peb hajyam txav ze rau peb tus Tswv Tsim. Tom qab koj saib zaj no tas, xav seb koj teb puas tau cov lus nug nram no.
(1) Thaum koj kawm tias lub qab ntuj no loj heev, tsis muaj neeg ntsuas tau, thiab ib puas tsav yam saum nruab ntug, nyias nyob muaj nyias chaw, ua rau koj xav li cas txog Yehauvas? (Yxy. 40:26) (2) Vajtswv tsim kom dej txawj ua li cas? Qhov ntawd qhia li cas txog Vajtswv lub tswvyim? (QTsh. 14:7) (3) Yehauvas muaj tswvyim heev, nws thiaj tsim lub ntiajteb zoo li cas? (4) Vim li cas Yehauvas ho tsim lub hli? (Nt.Nk. 89:37) (5) Yehauvas tsim kom tibneeg txaus siab rau lub ntiajteb li cas? (6) Lo lus Askiv DNA yog txhais li cas? (Nt.Nk. 139:16) (7) Yehauvas tsim tibneeg txawv li cas ntawm txhua yam uas nws tau tsim? (Ch.K. 1:26) (8) Koj xav pom dabtsi hauv lub vaj kaj siab?
Cov Ntsiab Txuas Ntxiv: (9) Vim li cas peb lub qhov muag ho pom ntau tsos, xws li tsos liab tsos dub tsos ntsuab tsos daj? (10) Ua li cas tej ntoo ho nqus tau dej mus nto ntsis? (11) Dej pab tau lub nrog cev li cas? (12) Piav seb, Yehauvas tau tsim kom ib puas tsav yam, tsis hais tej nroj tsuag lossis tej me nas me noog, txawj sib pab li cas. (13) Vim li cas tej tsiaj txhu, tej kab ntsaum, thiab tej nas noog ho txawj sib pab thiab? (14) Piav txog tus qauv uas ua ib lub yis, lossis “golden angle.” Yehauvas tsim tej yam dabtsi muaj raws tus qauv ntawd?
“Cia Li Saib” Tej Uas Yehauvas Tau Tsim: Yexus txhawb kom peb “saib tej nas noog saum nruab ntug” thiab kom peb “tshuaj saib tej paj lilij tom teb.” (Mth. 6:26, 28) Yog tias peb xyaum li ntawd, yuav txhawb tau peb txojkev ntseeg rau peb tus Tswv Tsim. Tsis tas li ntawd xwb, peb yuav pom Yehauvas lub tswvyim, nws lub hwjchim loj kawg nkaus, thiab nws txojkev hlub rau noob neej. Tsis txhob cia tej yam hauv lub qab ntuj no noj tag nrho koj lub sijhawm. Txhob txwm lauj sijhawm mus saib tej uas Yehauvas tau tsim puag ncig peb. Thiab siv sijhawm los xav seb, tej ntawd qhuas txog Yehauvas li cas.—Nt.Nk. 19:1.