Cov Rooj Sib Txoos Loj Ua Pov Thawj Tias Peb Muaj Qhov Tseeb
1. Cov kevcai uas Yehauvas sam hwm rau cov Yixayee coj, pab lawv nco ntsoov dabtsi?
1 Ib xyoos twg, Yehauvas sam hwm kom cov Yixayee ua kevcai peb zaug los pe hawm nws. Muaj lus qhia kom cov txivneej mus koom xwb. Tiamsis coob leej kuj coj lawv tsev neeg nrog lawv mus ua kevcai hauv Yeluxalees thiab. (Kc. 16:15, 16) Cov kevcai ntawd pab kom cov Yixayee nco ntsoov Yehauvas txojkev hlub, thiab nco ntsoov tias Yehauvas yeej tsom kwm nws haiv neeg tiag. (Kc. 15:4, 5) Lawv kuj pom tias tsim nyog tibneeg vam khom Yehauvas, thiab cia nws ua tus coj lawv txoj hau kev. (Kc. 32:9, 10) Thiab tej kevcai ntawd pab kom lawv nco ntsoov tias lawv sawv cev rau Yehauvas. Yog li ntawd, lawv yuav tsum ua ib haiv neeg dawb huv kom phim lub npe ntawd. (Kc. 7:6, 11) Niaj hnub no, cov rooj sib txoos loj pab tau peb ib yam li ntawd thiab.
2. Tej lus qhia rau lub rooj sib txoos loj yuav qhia txog dabtsi xwb?
2 Tej Lus Qhuab Qhia Uas Pab Peb To Taub Qhov Tseeb: Thaum peb mus koom cov rooj sib txoos loj, muaj tej lus qhuab qhia thiab tej yeeb yam zoo uas yuav pab peb hajyam to taub qhov tseeb hauv phau Vajlugkub. (Yh. 17:17) Yehauvas lub koom haum twb npaj ntau yam rau lub rooj sib txoos loj xyoo no lawm. Lawv npaj tej lus qhuab qhia los pab cov uas nyob rau cheeb tsam no, thiab thoob ntiajteb. (Mth. 24:45-47) Peb yeej maj mus koom lub rooj sib txoos loj no heev, puas yog?
3. Peb yuav tsum ua dabtsi, peb thiaj koom tau lub rooj sib txoos loj thiab hnov tej lus qhia?
3 Yuav kom lub rooj sib txoos loj pab tau peb, peb yuav tau mus koom peb hnub tibsi, thiab cuab pob ntseg mloog zoo zoo. Cia li mus hais koj tus los pav tamsim no tias, koj yuav so haujlwm rau lub caij ntawd. Nco ntsoov tias thaum peb mus koom rooj sib txoos loj, tseem ceeb rau peb pw kom txaus txhua hmo, peb thiaj tsis tsaug zog. Tsis tas li ntawd xwb, tsa taubhau ntsia tus uas qhia, thiab nqa ib phau ntawv, koj thiaj tau sau tej ntsiab lus tseem ceeb cia. Muab koj lub xov tooj ntawm tes kaw, thiaj tsis tab kaum lwm tus. Thaum tus kwvtij tabtom qhuab qhia, thov tsis txhob tham pem, ntaus xov tooj, noj mov lossis haus dej.
4. Thaum mus lub rooj sib txoos loj, cov niam txiv yuav pab lawv cov menyuam li cas?
4 Thaum cov Yixayee ua kevcai nyob tsev pheeb suab, sawvdaws yeej sib sau ua ke kawm Mauxe Txoj Kevcai. Leejtwg nrog lawv koom thiab? “Pojniam txivneej menyuam yaus” huvsi. Lawv sib txoos li no sawvdaws “thiaj tau hnov thiab kawm paub ntshai thiab hwm” Yehauvas. (Kc. 31:12) Niaj hnub no, thaum peb mus koom cov rooj sib txoos loj, peb pom tej metub menyuam nrog lawv tsev neeg zaum ua ke. Cov niam txiv pab kom cov menyuam ua tib zoo mloog, lawv thiaj tsis tsaug zog. Qhov ntawd txhawb zog kawg li, puas yog? Txhua hmo, tom qab lub rooj sib txoos, zoo rau tsev neeg siv sijhawm los tham seb lawv tau kawm dabtsi hnub ntawd. Nug seb sawvdaws nyiam zaj lus qhia twg tshaj. Tsis tas li ntawd, cov niam txiv, thov saib nej cov menyuam, tsis hais tus hlob tus yau. Phau Vajlugkub qhia li no: “Txojkev ruam yeej nyob hauv menyuam lub siab.” Yog li ntawd, tsis hais thaum noj sus thiab nyob hauv tsev so, tsis txhob tso lawv “ywj siab.”—P.L. 22:15; 29:15.
5. Yog tias peb coj zoo luag yuav qhuas qhov tseeb li cas?
5 Coj Zoo Luag Thiaj Qhuas Qhov Tseeb: Yog tias peb coj zoo thaum peb mus rooj sib txoos loj, yuav ua rau luag qhuas Vajtswv thiab pom tias peb muaj qhov tseeb. (Tit. 2:10) Cov neeg ua haujlwm hauv tej tsev so kuj pom tias peb coj txawv ntawm lwm pab vim peb paub cai, peb saib taus lawv tej vaj tse, thiab hais lus zoo rau lawv. (Khx. 4:6) Tsaib no, thaum cov kwvtij hauv Npe-ee nrog ib tug pojniam tham txog tus nqe tsev, tus pojniam ntawd qhuas tias: “Peb zoo siab tos txais nej cov tibneeg vim nej coj zoo kawg li. Nej paub cai, thiab hais lus zoo rau peb cov neeg ua haujlwm. Nej kuj pab txuag peb tej vaj tej tsev thiab.”
6. Peb tej ris tsho yuav ua rau luag qhuas qhov tseeb li cas?
6 Thaum peb sawvdaws nyias coj nyias daim ntawv qhia npe, peb yuav paub tias leejtwg yog peb cov kwvtij, thiab lwm tus yuav paub txog peb lub rooj sib txoos loj. Tsis tas li ntawd xwb, cov tibneeg hauv lub nroog yuav pom tias, cov uas coj daim ntawv qhia npe, hnav ris tsho zoo du lug, tsis hnav hle zab hle zuav, lossis pom pom nqaij li tej neeg ntiajteb. Qhov ntawd yuav ua timkhawv zoo rau lawv pom. (1Tmt. 2:9, 10) Yog li ntawd, tseem ceeb rau peb xaiv tej khaubncaws zoo uas phim thiab tsim nyog rau txhua lub sijhawm, tsis hais thaum peb nyuam qhuav tuaj txog ntawm lub tsev so, lossis lwm lub caij. Tsis txhob hnav tej ris luv, lossis tej tsho hnav mus ua si, thiaj tsis muaj chaw thuam. Txawm tias lub rooj sib txoos loj, yuav ua nraum zoov hauv tsev los xij, peb yuav tau hnav tej ris tsho ua phim thiab tsim nyog lub caij tshwj xeeb ntawd. Tom qab sib txoos tas, yog peb xav hloov khaubncaws ua ntej mus noj mov los kuj tau. Tiamsis nco ntsoov tias peb sawv cev rau Yehauvas, tsim nyog peb hnav tej khaubncaws uas zoo saib xwb.
7. Peb yuav tsum npaj li cas peb thiaj muaj kev sib txhawb zog tom cov rooj sib txoos loj?
7 Cov Yixayee, tsis hais cov tuaj deb tuaj ze thiab tuaj txawv tebchaws tuaj, puavleej sib txoos ua kevcai hauv Yeluxalees. Vim lawv tuaj nyob ua ke tuaj sib txhawb zog li no, lawv thiaj muaj kev sib koom siab. (Ttx. 2:1, 5) Thaum peb muaj rooj sib txoos loj, peb kuj pom peb cov kwvtij nkauj muam coob kawg li tuaj sib txoos ua ke. Thaum luag tej pom ntau haiv neeg sib koom siab li ntawd, ua rau lawv qhuas kawg li. (Nt.Nk. 133:1) Yog li ntawd, zoo rau peb ntim mentsis su noj, es txhob tawm mus yuav lwm qhov, peb thiaj tau nrog cov kwvtij nkauj muam uas zaum ib ncig peb, tham pem ua si!
8. Vim li cas ho zoo rau peb pab tu vaj tu tsev?
8 Txhua txhua xyoo, cov kwvtij ua tib zoo coj thiab saib xyuas lub rooj sib txoos loj. Thaum luag pom li ntawd, lawv qhuas kawg li. Lawv xav tsis thoob li, rau qhov sawvdaws sib pab tu vaj tse dawb xwb. Ua li koj puas zoo siab pub koj lub dag lub zog los pab thiab? (Nt.Nk. 110:3) Muaj tej yim txhawb kom lawv tsev neeg tag nrho sib pab tu tsev thaum lawv mus rooj sib txoos loj. Ua li ntawd, lawv cov menyuam thiaj paub pab lwm tus. Yog tias koj xav ntsib tibneeg tshiab tiamsis koj txaj muag heev, zoo rau koj rau npe pab tu tsev. Muaj ib tug muam tau hais li no: “Kuv tsuas paub ob peb tug xwb. Tiamsis thaum kuv pab tu tsev, kuv tau nrog cov kwvtij nkauj muam coob kawg li ua ke. Lomzem heev!” Yog tias muaj lub siab dawb pab tu tsev tom rooj sib txoos loj, peb yuav ntsib coob leej, thiab muaj kev xyiv fab. (2Khl. 6:12, 13) Yog tias koj tsis tau rau npe tu tsev ib zaug li, nug koj cov txwj laus seb koj yuav tsum ua li cas koj thiaj pab tau.
9. Peb yuav caw lwm tus tuaj sib txoos nrog peb li cas?
9 Caw Lwm Tus Tuaj Kawm Txog Qhov Tseeb: Tau ob peb xyoos no, peb siv li peb lub lim tiam ua ntej lub rooj sib txoos loj mus caw tibneeg tuaj koom. Xyoo no peb yuav caw tibneeg tuaj koom dua thiab. Zoo rau cov koom txoos tseb cov ntawv caw kom thoob plaws lawv thaj tsam. (Saib lub ntsiab me, “Kuv Yuav Caw Lwm Tus Li Cas?”) Yog tias seem cov ntawv caw, thov nqa tuaj tom lub rooj sib txoos loj. Thaum sib txoos ua ke, sawvdaws thiaj tau siv mus caw cov uas lawv ntsib tom tej kev.
10. Thaum peb caw tibneeg tuaj rooj sib txoos loj, puas muaj tibneeg tuaj thiab? Piav seb.
10 Yav tas los, puas muaj tibneeg tuaj koom nrog peb thiab? Muaj ib xyoos, ib tug tub ncig num tau pab ob niam txiv nrhiav rooj zaum. Ob niam txiv ntawd hais tias, nkawd tau txais ib daim ntawv caw. Nkawd xav paub ntxiv nkawd thiaj tsav tsheb deb li 200 mais (miles) kev tuaj koom! Muaj dua ib zaug, ib tug muam mus caw tibneeg ib lub tsev rau ib lub tsev. Nws ntsib ib tug txivneej uas xav paub ntxiv txog lub rooj sib txoos loj. Tus muam thiaj siv sijhawm los piav daim ntawv caw rau nws. Ob peb hnub tom qab ntawd, tus muam pom tus txivneej ntawd tuaj tom rooj sib txoos loj thiab. Tus txivneej ntawd tseem coj nws ib tug phoojywg tuaj thiab. Nkawd ib leeg tuav rawv ib phau ntawv uas nyuam qhuav tawm tshiab!
11. Vim li cas tseem ceeb rau peb mus koom cov rooj sib txoos loj txhua txhua xyoo?
11 Tej kevcai uas Yehauvas muab rau cov Yixayee coj pab kom lawv “hwm [Yehauvas] thiab ua koom tu nws tuaj nruab siab tiag tiag.” (Ys. 24:14) Ib yam li ntawd, thaum peb mus koom cov rooj sib txoos loj txhua txhua xyoo, yuav pab kom peb “xyaum raws li txojkev tseeb” thiab. Tsis tas li ntawd xwb, cov rooj sib txoos ntawd yog kev pe hawm Yehauvas ntag. (3Yh. 3) Thov Yehauvas foom koob hmoov rau txhua tus uas nyiam thiab txhawb nqa qhov tseeb, lawv thiaj koom tau lub rooj sib txoos loj thiab muaj kev xyiv fab puv npo!
[Cov lus rho hauv zaj no, nyob sab 4]
Yog tias peb coj zoo thaum peb mus rooj sib txoos loj, yuav ua rau luag qhuas Vajtswv thiab pom tias peb muaj qhov tseeb
[Cov lus rho hauv zaj no, nyob sab 7]
Peb siv li peb lub lim tiam ua ntej lub rooj sib txoos loj mus caw tibneeg tuaj koom
[Ntsiab me nyob sab 3-4, 7-8]
Nco Ntsoov Tej No Rau Lub Rooj Sib Txoos Loj 2012
◼ Sijhawm Pib Thiab Xaus: Yuav qheb qhov rooj rau thaum 8:00 sawv ntxov. Tiamsis lub rooj sib txoos loj yuav pib thaum 9:20 sawv ntxov, tag nrho peb hnub tibsi. Thaum tus kwvtij tshaj tawm tias txog caij tso suab nkauj lawm, thov nrhiav chaw zaum, thiaj pib raws sijhawm. Hnub Tsib (Friday) thiab Hnub Rau (Saturday) lub rooj sib txoos loj yuav xaus thaum 4:55 tsaus ntuj. Hnub Xya (Sunday) yuav xaus thaum 3:40 tsaus ntuj.
◼ Chaw Nres Tsheb: Rau tej lub rooj sib txoos loj, cov kwvtij tau hom chaw rau sawvdaws nres tsheb dawb xwb. Zoo rau peb tuaj ntxov, peb thiaj tau chaw nres tsheb. Muaj chaw nres tsheb rau cov uas cev tsis meej xeeb. Cov uas muaj ntaub ntawv thiaj nres tau xwb. Tsis muaj chaw nres tsheb ntau. Yog li ntawd, thov pab thauj lwm tus tuaj ua ke.
◼ Hom Chaw Zaum: Thov xav txog lwm tus thiab. Nco ntsoov, tsuas pub hom rooj rau cov uas nrog koj caij ib lub tsheb, rau cov uas nrog koj nyob ua ib tse, thiab cov uas koj tseem qhia Vajlugkub rau xwb.—1Khl. 13:5.
◼ Ntim Su: Thov ntim su tuaj noj. Zoo rau peb tsis txhob tawm mus yuav mov lwm qhov. Koj nqa ib lub taub txias uas haum lub qab rooj los tau. Tiamsis tsis pub nqa tej lam hwj, lossis tej taub txias loj loj tuaj.
◼ Pab Nyiaj Siab Dawb: Cov nyiaj uas koj muaj siab dawb pub yuav pab txhawb tes haujlwm tshaj tawm txoj xov zoo thoob qab ntuj. Yog tias koj sau tshev (check) nyiaj, ces sau rau “Christian Congregation of Jehovah’s Witnesses.” Pib xyoo no mus, ntawm txhua lub rooj sib txoos loj, yog tias koj xav siv koj daim debit/credit los pub nyiaj, kuj tau thiab.
◼ Muaj Tej Xwm Ti Tes Ti Taw: Yog tias muaj xwm ti tes ti taw, thov mus cuag ib tug tub ncig num. Tus kwvtij ntawd mam li hais rau Chav Saib Xyuas Mob. Cov kwvtij hauv chav ntawd mam li tshuaj seb yuav pab li cas, thiab puas tsim nyog hu 911. Ua li no, peb thiaj tsis tab kaum cov tub ceev xwm.
◼ Tshuaj: Nco ntsoov tias lub rooj sib txoos loj tsis muaj tshuaj li tej tsev kho mob. Yog tias koj noj ib hom tshuaj twg, thov nqa kom txaus noj. Yog tias koj hno koob tshuaj ntshav qab zib, tom qab siv tas, thov muab pov tseg kom raws kevcai. Tsis pub pov tseg hauv cov thoob txawb puag ncig lub rooj sib txoos loj. Nyob tom tsev so los, yuav tau muab rab koob pov tseg raws kevcai ib yam thiab.
◼ Tej Khau Rau: Ib xyoos twg, muaj coob tus tau ntog lossis raug mob, vim lawv rau tej khau tsis zoo rau. Zoo rau peb xaiv nkawm khau uas zoo saib, thiab zoo mus kev, thiaj tsis nyuaj rau peb nce ntaiv thiab taug tej kev uas tsis xwm yeem.
◼ Tsis Hnov Zoo: Cov kwvtij yuav tso tawm cov lus qhuab qhia hauv xov tooj cua thiab. Yog tias koj xav mloog, nco ntsoov nqa koj lub xov tooj cua nrog koj, thiab nqa txoj hlua mloog ntawm pob ntseg.
◼ Lub Tawb Laub Menyuam Thiab Tej Rooj Tso Pw: Tsis pub nqa lub tawb laub menyuam thiab tej rooj tso pw tuaj rau lub rooj sib txoos loj. Tiamsis, yog menyuam lub rooj zaum haum cov rooj ntawm niam txiv ib sab, ces nqa los tau.
◼ Tshuaj Tsw Qab: Ntau zaus, cov kwvtij sib txoos hauv tej tsev uas siv kiv cua thiab siv cua txias, tsis muaj qhov rais rau cua txeem los hauv tsev. Thov xav txog koj cov kwvtij nkauj muam, es tsis txhob tsuag tshuaj tsw qab ntau ntau, nyob tsam tsis haum lawv.—1Khl. 10:24.
◼ Daim Ntawv Please Follow Up (S-43): Zoo rau koj nqa ib ob daim ntawv hu ua Please Follow Up, nrog koj. Yog tias koj qhia Vajlugkub rau cov neeg uas koj ntsib tom tej kiab tej khw, ces muab lawv npe thiab chaw nyob sau cia rau daim ntawv ntawd. Tom qab ntawd, nqa daim ntawv mus rau Chav Rau Ntawv, lossis nqa mus rau tus ceev ntawv hauv koj lub koom txoos.
◼ Khw Noj Mov: Peb yuav tsum ua neeg paub cai, thiaj qhuas Yehauvas lub npe. Hauv lub tebchaws uas koj nyob, yog tias zoo tseg mentsis nyiaj rau tus neeg ua haujlwm, ces nco ntsoov ua li ntawd.
◼ Hom Chaw Pw:
(1) Thov tsis txhob hom chaw pw ntau tshaj li koj yuav siv, thiab tsis txhob pub tibneeg coob tshaj li tus tswv tsev tso cai, los pw hauv ib chav twg.
(2) Tom qab twb hom chaw pw lawd, tsis txhob lam tau lam hu rov qab mus rho npe. Tsuas yog thaum muaj tej xwm loj uas cheem tsum tiag xwb, mam li rho npe kom sai.—Mth. 5:37, NW.
(3) Ib txhia siv daim debit/credit los hom chaw pw. Ntaus zaus lub tsev so yuav “ceev cia” cov nyiaj hauv koj daim debit/credit. Lawv tsuas ceev ntau npaum li koj yuav siv, thiab kom duav tau yam uas yus ho ua piam xwb. Lub caij uas koj pw hauv lawv, koj siv tsis tau cov nyiaj uas lawv ceev cia. Ob peb hnub tom qab koj mus tsev lawd, koj mam siv los tau.
(4) Cov tsev so muaj tej lub laub phij xab. Yog tias tsis tau siv tamsid, ces txhob coj los. Thiab thaum siv tas lawd, rov qab muab cia nws qhov chaw, luag thiaj tau siv.
(5) Yog tias cov neeg ua haujlwm pab nqa koj cov phij xab, zoo muab mentsis nyiaj pub rau lawv. Thiab yog muaj neeg tu koj chav, zoo tseg mentsis rau cov tu tsev txhua txhua hnub.
(6) Tsuas pub ua zaub ua mov yog tias tus tswv tsev tso cai xwb.
(7) Muaj tej lub tsev so pub tshais, kas fes (coffee), los yog dej khov, rau cov uas so hauv lawv lub tsev. Thov tsis txhob nqa tshaj li koj yuav noj thiab haus.
(8) Ib hnub twg, cov neeg ua haujlwm hauv tsev so yuav tau pab ntau leej. Yog li, peb yuav tsum cia lub hwj huam coj peb txoj hau kev tiag, es ua neeg txawj xav, ua siab ntev, thiab ua zoo rau lawv.
(9) Thaum nyob tom tsev so, zoo rau cov niam txiv zov rawv lawv tej menyuam, tsis hais thaum nyob hauv chav tos txais qhua los yog thaum mus da dej ua si.
(10) Daim ntawv Recommended Lodging List, muaj tus nqe rau txhua lub tsev so uas lub koom haum xaiv tseg. Tus nqe uas nyob hauv yog tus nqe rau txhua txhua hnub. Nco ntsoov koj yuav tau them mentsis se nrog thiab. Yog tias lub tsev so hais kom koj them tshaj li tus nqe uas tau hais tseg lawm, tsis txhob them. Cia li mus hais rau cov kwvtij hauv Chav Saib Xyuas Chaw Pw paub sai li sai tau.
(11) Yog tias koj muaj teeb meem li cas tom tsev so, hais rau Chav Saib Xyuas Chaw Pw paub, xwv lawv thiaj li pab tau koj.
◼ Pab Ua Haujlwm: Yog leejtwg xav pab ua haujlwm rau lub rooj sib txoos loj, mus hais rau cov kwvtij hauv Chav Pab Ua Haujlwm paub. Cov hluas uas muaj 16 xyoo rov hauv, yuav tau nrog lawv niam lawv txiv ua haujlwm ua ke. Yog tias lawv niam lawv txiv tso cai rau lawv ua haujlwm nrog ib tug laus los kuj tau thiab.
[Ntsiab me nyob sab 8]
Kuv Yuav Caw Lwm Tus Li Cas?
Yuav kom peb qhia thoob peb thaj tsam, tej zaum zoo rau peb tsis txhob hais ntau. Hais li no los tau: “Thoob ntiajteb Yehauvas cov Timkhawv tabtom tseb daim ntawv caw no. Kuv xav muab ib daim rau koj thiab. Thov nyeem seb muaj lus tseem ceeb li cas.” Kub siab lug caw sawvdaws. Yog tias koj mus caw tibneeg Hnub Rau thiab Hnub Xya, muab phau The Watchtower thiab Awake! rau lawv los tau thiab.