Yuav Tsum Nrhiav Ua Ntej Koj Mus Tshaj Tawm
1. Vim li cas cov kwvtij ho faib tej koog rau cov koom txoos mus qhia, raws li lawv yam lus?
1 Tom qab Yexus cov thwjtim tau lub hwj huam dawb huv rau hnub Pheethekhoxate 33 T.Q.Y., lawv txawm “pib hais lwm yam lus” rau cov uas tuaj lwm tebchaws tuaj. (Ttx. 2:4) Thaum kawg, tau muaj 3,000 leej los ua kevcai raus dej. Zoo li cov tibneeg no kuj txawj hais lus Henplais thiab lus Kili tibsi. Txawm li ntawd los, Yehauvas xav kom cov thwjtim qhia txog lub Nceeg Vaj ua lawv yam lus. Thaum tibneeg hnov txoj xov zoo ua lawv yam lus, yeej raug lawv siab dua. Twb yog vim li ntawd, niaj hnub no hauv tej nroog uas muaj ntau haiv neeg nyob sib xyaws, cov kwvtij thiaj faib tej koog rau cov koom txoos mus qhia, raws li lawv yam lus. (Organized, sab 107, nqe 2-3) Cov kwvtij yuav tsis tu ib koog rau cov pawg uas hais lwm yam lus mus qhia. Cov pawg ntawd yuav tsum nrog lub koom txoos uas pab lawv thiab cov koom txoos nyob ze lawv, qhia hauv lawv koog xwb.
2. (a) Vim li cas tej lub koom txoos yuav tau mus nrhiav tibneeg? (b) Lwm lub koom txoos yuav pab nrhiav li cas thiab? (c) Peb yuav ua li cas thaum peb mus ntsib ib tug uas hais lwm yam lus es nyiam heev?
2 Yog tias koog uas koj nyob hais tib yam lus xwb ces yoojyim qhia lub tsev rau tsev. Tiamsis yog lub nroog uas koj nyob muaj ntau haiv neeg, ces yuav tau nrhiav seb cov neeg uas hais koj yam lus nyob qhovtwg. Tej zaum muaj cov koom txoos uas hais lwm yam lus, qhia ntawm koog uas koj qhia thiab. Yog tias lawv nrhiav tau cov neeg uas hais koj yam lus, ces lawv mam li muab sau cia rau koj. Tiamsis nco ntsoov tias koj lub koom txoos lossis koj pawg, yuav tau mus nrhiav thiab. (Saib lub ntsiab me “Ib Leeg Pab Ib Leeg.”) Tiamsis yuav nrhiav li cas?
3. Lub koom txoos lossis cov pawg, yuav siv sijhawm ntau npaum li cas mus nrhiav tibneeg, thiab yuav nrhiav qhovtwg?
3 Npaj Nrhiav Tibneeg: Yuav siv sijhawm ntau npaum li cas los nrhiav cov tibneeg uas hais lwm yam lus? Nyob ntawm koj koog xwb. Xav txog cov lus nug no: Puas muaj tibneeg coob hauv koj koog hais yam lus ntawd? Lub koom txoos lossis cov pawg, twb nrhiav tau pes tsawg yim lawd? Puas muaj cov tshaj tawm uas paub yam lus ntawd? Nco ntsoov thaum mus nrhiav tsis tas yuav khob ib lub qhov rooj zuj zus. Tej lub koom txoos mus nrhiav koog uas muaj haiv neeg ntawd nyob coob, thiab qhia tej koog uas nyob tsis deb ntawm lawv. Yog peb ua tib zoo npaj nrhiav, coob leej yuav los paub Yehauvas lub npe.—Loos 10:13, 14.
4. (a) Yuav xaiv leejtwg los saib xyuas tes haujlwm nrhiav tibneeg? (b)Yuav siv dabtsi los nrhiav cov neeg uas hais koj yam lus?
4 Cov txwj laus, xws li tus kwvtij uas saib xyuas kev qhia Vajlugkub, yuav tau npaj thiab saib xyuas tes haujlwm nrhiav tibneeg. Yuav tsum muaj ib tug txwj laus saib xyuas, thiaj tsis muaj ob peb leeg mus tab kaum ib lub tsev. (1Khl. 9:26) Cov txwj laus hauv lub koom txoos uas txhawb ib pawg uas hais lwm yam lus, yuav tau xaiv ib tug txwj laus los yog ib tug tub leg num los saib xyuas pawg ntawd. Ntau lub koom txoos thiab ntau pawg nrhiav tibneeg hauv phau ntawv xov tooj, lossis hauv Is Taws Nej (Internet). Tom qab ntawd, lawv mam li hu cov xov tooj ntawd, lossis mus xyuas seb puas tsim nyog muab sau cia. Yog tias cov txwj laus hauv lub koom txoos uas txhawb pawg ntawd pom zoo, ces tej lub sijhawm kuj zoo teem ib hnub rau tag nrho lub koom txoos mus pab nrhiav tibneeg thiab.—Saib lub ntsiab me “Nrhiav Cov Uas Hais Koj Yam Lus.”
5. (a) Cov uas mus nrhiav tibneeg yuav tsum nco ntsoov txog dabtsi? (b) Peb yuav hais li cas thaum peb nrhiav tau tibneeg?
5 Thaum peb mus nrhiav tibneeg, tsis yog peb lam mus xwb, tiamsis peb yuav tsum muaj ib lub hom phiaj. Qhov uas peb mus nrhiav tibneeg, yog ib feem ntawm peb tes num rau Vajtswv. Yog li ntawd, peb yuav tsum hnav khaub ncaws kom zoo li peb mus tshaj tawm thiab. Coob tus uas kawm lwm yam lus pom tias, thaum lawv mus nrhiav tibneeg yog lawv xyaum hais yam lus ntawd, ua rau lawv hajyam kub siab thiab lawv paub yam lus ntawd zoo dua ntxiv. Peb suav tau sijhawm thaum mus nrhiav tibneeg, tiamsis suav tsis tau sijhawm thaum npaj cov koog thiab cov ntawv qhia kev. Thaum nrhiav tau ib tug uas hais koj yam lus lawm, siv sijhawm los qhia txoj xov zoo rau nws. Txawm nws yuav nyiam thiab tsis nyiam los xij, koj yuav tau muab nws qhov chaw nyob rau tus saib xyuas kev qhia Vajlugkub lossis rau tus uas pab nws, lawv thiaj paub muab sau cia. Tseem ceeb rau peb mus nrhiav tibneeg tiamsis peb tsis yog mus nrhiav tibneeg tas zog xwb, peb yuav tsum mus qhia Vajlugkub rau lwm txojkev thiab.—Saib lub ntsiab me “Yuav Hais Li Cas Thaum Mus Nrhiav Tibneeg.”
6. Ua li cas ho nyuaj nrhiav cov tsis hnov lus?
6 Nrhiav Cov Tsis Hnov Lus: Tsis yoojyim nrhiav cov neeg tsis hnov lus; yuav tau kub siab nrhiav thiaj ntsib. Tsis zoo li thaum koj nrhiav ib haiv neeg twg, es koj saib lawv lub npe lossis lawv hom tsoos tsho xwb ces koj twb paub tias lawv hais yam lus twg lawm. Tsis tas li ntawd xwb, yog ib tse neeg twg muaj ib tug uas tsis hnov lus, ib txhia yuav tsis kam qhia rau peb paub, vim lawv txhawj tsam yus ho ntxias lawv tus neeg yuam kev. Peb yuav ua li cas peb thiaj mus nrhiav tau lawv? Yog peb xyaum li cov qauv nram qab no, peb yuav mus nrhiav tau cov uas tsis hnov lus. Tsis tas li ntawd xwb, cov qauv no kuj pab tau peb nrhiav cov uas hais lwm yam lus thiab.
7. (a) Yuav nug cov neeg zej zos li cas thiaj nrhiav tau cov tsis hnov lus? (b) Peb yuav ua li cas tus tswv tsev thiaj tsis ntshai peb?
7 Thaum cov koom txoos thiab tej pawg uas piav tes mus nrhiav cov tsis hnov lus hauv tej zej zos, lawv kuj nrhiav tau coob tus. Tej zaum koj yuav ntsib tej tug uas paub cov tsis hnov lus. Ib txhia pom cov tsis hnov lus nyob ze lawv, tej zaum lawv kuj ua haujlwm lossis kawm ntawv ua ke. Tej zaum lawv pom tej cim txhos ntawm kev, qhia tias muaj tej menyuam tsis hnov lus tawm hla kev. Tej zaum lawv muaj cov nruab ze uas tsis hnov lus. Tiamsis ib txhia yuav tsis kam qhia tej no rau koj, vim lawv tsis tau paub koj. Yog li ntawd, zoo rau koj hais lus luag ntxhi rau tus tswv tsev, qhia ncaj rau nws tias koj tuaj ua dabtsi, thiab tsis txhob piav ntau tsav ntau yam, nws yuav pom tias koj yog ib tug neeg zoo. Yog tus tswv tsev pom tias koj muaj phau Vajlugkub los yog cov DVD uas piav tes, nws yuav xav pab koj dua. Qhia rau nws paub tias koj xav qhia Vajlugkub rau cov uas tsis hnov lus. Yog tias tus tswv tsev tsis kam qhia, ces muab koj chaw nyob lossis xov tooj, lossis daim ntawv caw tuaj sib txoos rau nws, kom nws muab rau cov uas tsis hnov lus.
8. Cov koom txoos nyob ze yuav pab lub koom txoos piav tes li cas?
8 Ib xyoos twg, cov koom txoos piav tes caw tau ib lub koom txoos hais lwm yam lus uas nyob ze, tuaj pab lawv nrhiav cov tsis hnov lus. Tej zaum yuav siv ib lossis ob hnub mus nrhiav hauv tej nroog loj uas nyob hauv lawv koog. Thaum sib txoos mus tshaj tawm, lub koom txoos piav tes yuav ua tus coj, seb yuav mus nrhiav tibneeg li cas thiab ua ib qho yeeb yam. Txhua pab yuav tsum muaj ib tug uas txawj piav tes nrog lawv mus, thiab lawv yuav tsum coj ib daim ntawv qhia kev, lawv thiaj paub tias yuav qhia rau koog twg.
9. Yuav nrhiav cov tsis hnov lus qhovtwg?
9 Cov uas tsis hnov lus kheev sib sau ua ke noj mov ua si. Zoo rau koj nrhiav tibneeg hauv tej chaw uas lawv sib sau li ntawd thiab. Hnav ris tsho kom phim sawvdaws thaum koj mus tsham lawv. Zoo rau koj nrog ib ob tug tham xwb, txhob nrog tas nrho ib pab tham. Yog koj pom tias muaj cov uas nyiam, mam li muab lawv chaw nyob.
10. Tus tshaj tawm yuav nrhiav cov tsis hnov lus tom tej kiab tej khw li cas?
10 Koj kuj nrhiav tau cov tsis hnov lus tom tej kiab tej khw. Thaum lub koom txoos npaj cov koog thiab cov ntawv qhia kev, zoo rau lawv npaj tej daim uas qhia seb cov khw nyob qhovtwg. Npaj ib daim rau cov chaw sam roj, ib daim rau cov khw noj mov, thiab ib daim rau lwm qhov chaw ua dej num. Yog tias muab faib nyias muaj nyias daim li no, cov kwvtij yuav paub qhia hauv tej chaw ntawd. Lawv siv tib tug qauv qhia xwb los tau. Muab ua piv txwv li no: Koj mus nrhiav cov tsis hnov lus hauv tej tsev so. Zoo rau koj xub mus ntsib tus neeg tos txais qhua. Muab daim DVD piav tes, thiab daim ntawv caw sib txoos tso rau nws, seb nws puas kam muab rau cov tsis hnov lus. Yog tias koj mus qhia hauv tej khw, nug cov neeg ua haujlwm seb lawv puas pom cov piav tes tuaj ywj kiab. Yog tias muaj cov tsev kawm ntawv piav tes hauv koj koog, nug seb lawv puas kam koj tso tej DVD piav tes hauv lawv lub tsev rau ntawv.
11. Vim li cas tes haujlwm mus nrhiav tibneeg tseem ceeb ua luaj?
11 Tes Haujlwm Tseem Ceeb: Tsis yoojyim rau koj nrhiav cov uas hais koj yam lus. Tsis tas li ntawd xwb, tibneeg pheej tsiv rau ub rau no, yog li ntawd yuav tau hloov cov chaw nyob tsis tseg. Txawm tsis yoojyim los, tseem tshuav ntau koog uas peb yuav tsum tau mus nrhiav thiab. Yehauvas tsis xaiv leejtwg ntsej muag li. Nws yog tus muab tes haujlwm mus tshaj tawm no rau peb ua. (Ttx. 10:34) Vajtswv “xav kom ib tsoom neeg sawvdaws tau txais kev dim thiab paub txojkev tseeb.” (1Tmt. 2:3, 4) Yog li ntawd, thov cia peb koom tes nrog Yehauvas mus nrhiav cov neeg hais lwm yam lus uas muaj lub siab “ncaj thiab zoo.”—Lk. 8:15.
[Ntsiab me nyob sab 5]
Ib Leeg Pab Ib Leeg
Yog tias ib lub koom txoos lossis ib pawg twg xav tau kev pab nrhiav tibneeg, lawv yuav ua li cas? Tus saib xyuas kev qhia Vajlugkub yuav tau nug cov txwj laus hauv cov koom txoos nyob ze lawv. Zoo rau nws nug cov koom txoos uas pom cov neeg uas hais nws yam lus ntawd. Thaum cov koom txoos ntawd nrhiav tau tibneeg, lawv mam li muab rau lawv tus saib xyuas kev qhia Vajlugkub. Tus kwvtij ntawd mam li muab tej chaw nyob rau lub koom txoos uas hais yam lus ntawd. Cov kwvtij uas saib xyuas kev qhia Vajlugkub hauv cov koom txoos, yuav tau sib tuav tswvyim thiaj haum sawvdaws. Yog ua li no, sawvdaws yuav qhia thoob lawv koog, thiab cov uas xav kawm yuav paub mus rau tej koom txoos, lossis tej pawg uas hais lawv yam lus.
Yog cov tshaj tawm nrhiav tau cov uas hais lwm yam lus uas xav kawm thiab (lossis tej tug uas tsis hnov lus), lawv yuav tsum sau daim ntawv taug qab hu ua Please Follow Up (S-43-E) thiab muab rau tus ceev ntawv hauv lub koom txoos. Yog koj ua li ntawd, yuav xa tau neeg mus pab nws sai dua.—Mus saib daim km-E 5/11 sab 3.
[Ntsiab me nyob sab 6]
Nrhiav Cov Uas Hais Koj Yam Lus
• Nug cov uas kawm Vajlugkub, nug yus tsev neeg, thiab nug cov uas nrog yus ua haujlwm.
• Nrhiav hauv phau ntawv xov tooj, raws li haiv neeg ntawd tej xeem. Siv Is Taws Nej lossis hauv paus xov tooj (telephone company) los nrhiav lawv tej npe, raws chaw nyob.
• Mus nug ntawm tej chaw sawvdaws kheev tuaj sib sau ua ke, xws li tsev rau ntawv, chaw thov kev pab, thiab tsev kawm ntawv qeb siab.
• Nrhiav hauv tej ntawv xov xwm seb puas muaj tej qhov chaw uas haiv neeg ntawd tuaj sib sau ua ke.
• Mus nrhiav hauv tej kiab tej khw thiab tej chaw ua lag luam, uas hais yam lus ntawd.
• Yog tau kev tso cai, teeb ib lub rooj muaj ntaub ntawv Vajlugkub rau ntawm tej chaw lag luam, tsev kawm ntawv, lossis tej chaw uas muaj cov tibneeg hais yam lus ntawd.
• Yog tej nom tswv tso cai, muas tej yam twj uas yuav pab nrhiav tau tibneeg yoojyim hauv Is Taws Nej.
[Ntsiab me nyob sab 7]
Yuav Hais Li Cas Thaum Mus Nrhiav Tibneeg
Yog koj qhia ncaj rau nws tias koj tuaj ua dabtsi, thiab hais lus luag ntxhi ces tus tswv tsev yuav pom tias koj yog ib tug neeg zoo. Tibneeg kuj tso siab dua, yog lawv pom tias peb muaj tej ntaub ntawv Vajlugkub ua yam lus uas peb mus nrhiav ntawd.
Thaum koj fim nws tas, tej zaum koj hais rau nws tias: “Peb xav nrhiav ․․․․․ koj puas pom lawv nyob ze nov? Peb xav qhia Vajlugkub rau lawv.”
Thaum peb mus nrhiav cov tsis hnov lus, hais li no: “Nyob zoo. Yog koj tsis xav li cas, kuv xav tso ib daim DVD rau koj saib?” [Muab lub tshuab tso DVD thau los thiab tso 1 nqe Vajlugkub rau nws saib los ntawm phau New World Translation.] Piav ntxiv tias: “Qhov uas nws piav no yog ib nqe Vajlugkub. Yog cov Askiv hom lus piav tes. Peb kuj muaj ntau daim DVD los pub dawb rau cov tsis hnov lus, kom lawv paub txog Vajtswv. Koj puas paub leejtwg uas tsis hnov lus lossis txawj piav tes?” Yog nws tsis paub leejtwg li, nug seb nws puas tau pom cov tsis hnov lus thaum mus ua haujlwm, mus kawm ntawv, lossis pom nyob ze nws.