Zoo Siab Rau Koj Tes Haujlwm
1. Thaum peb mus qhia Vajlugkub, dabtsi ua rau peb qaug zog?
1 Vajtswv tsim kom peb “tau kev zoo siab ntawm tej haujlwm” uas peb ua. (L.Tsy. 2:24) Tiamsis thaum peb mus qhia Vajlugkub yog tias tsis muaj neeg cuab pob ntseg mloog, yuav ua rau peb qaug zog heev. Yuav ua li cas thiaj txhawb tau peb lub zog?
2. Vim li cas peb yuav tsum nco ntsoov tias tsawg tus thiaj mloog xwb?
2 Tsawg Tus Thiaj Mloog Xwb: Nco ntsoov tias tsawg tus thiaj mloog Yexus tej lus qhia xwb. Txawm li ntawd los Yexus tes haujlwm yeej tawg paj txi txiv zoo. (Yh. 17:4) Hauv Yexus zaj lus piv txwv txog tus uas tawm mus tseb noob, Yexus twb qhia lawm tias, coob leej ntau tus yuav tsis pub txoj xov zoo txog lub Nceeg Vaj, nrhau cag hauv lawv lub siab. (Mth. 13:3-8, 18-22) Txawm tias tsawg tus thiaj mloog xwb los, yog tias peb siv zog ua haujlwm peb yuav ua tau ntau yam haujlwm tiav.
3. Txawm tias tsis muaj neeg los ntseeg Yehauvas los, peb tes haujlwm tawg paj “txi” txiv li cas?
3 Peb Tawg Paj Txi Txiv Li Cas: Raws li Yexus zaj lus piv txwv, cov uas mloog txoj xov zoo yuav tawg paj “txi” txiv. (Mth. 13:23) Yuav txi txiv li cas? Tom qab ib tsob nplej txhawv lawm, tsob nplej xub rau txhuv, pib daj qab hnab mam li siav los ua ib re nplej muaj hnab heev. Tsob nplej tsis yog cia li txi kiag ua ib tsob tshiab. Ib yam li ntawd, tej txiv uas cov Khixatia txi yog qhov uas peb tshaj tawm txoj xov zoo txog lub Nceeg Vaj, tsis yog peb yuav tsum pab tau tibneeg los ntseeg es thiaj tawg paj txi txiv xwb. Txawm tibneeg yuav ntseeg los tsis ntseeg, peb zoo siab rau peb tes haujlwm vim peb twb tshaj tawm txog lub Nceeg Vaj, thiab txhawb Yehauvas lub npe kom dawb huv lawm. (Yxy. 43:10-12; Mth. 6:9) Peb zoo siab tau los nrog Vajtswv koom ua haujlwm. (1Khl. 3:9) Thaum peb “xyeem tej lus ntawm lub qhov ncauj” lossis siv peb lub qhov ncauj mus qhuas Yehauvas, yeej ua rau nws txaus siab kawg li.—Hnpl. 13:15, 16.
4. Tes haujlwm tshaj tawm txoj xov zoo yuav pab tau tibneeg li cas yav tom hauv ntej?
4 Tsis tas li ntawd xwb yog peb siv zog ua haujlwm, yuav pab tau tibneeg lawm yav tom hauv ntej. Tej zaum kuj muaj ib txhia twb tau hnov Yexus tshaj tawm txoj xov zoo, tiamsis tom qab uas Yexus twb mus saum ntuj lawm, lawv mam li los ua nws ib tug thwjtim. Ib yam li ntawd thiab, thaum peb tseb noob tas lawd, tej zaum lub noob yuav nyob hauv nruab a dhau ob peb cim teb, lub noob mam nrhau cag tuaj kaus tawg paj txi txiv zoo. Yog li ntawd, peb tes haujlwm yeej yuav pab tau coob leej ntau tus. Yog li, cia peb “tawg paj txi txiv,” thiab ua pov thawj rau zej tsoom pom tias peb yeej yog Yexus cov thwjtim tiag.—Yh. 15:8.