Tos Txais Sawvdaws!
1. Lub caij twg zoo rau peb ua timkhawv txog Yehauvas thiab ua cas thiaj hais li no?
1 Thaum txog lub caij ua kevcai nco txog Yexus txojkev tuag, yuav muaj coob leej ntau tus tuaj nrog peb koom. Xyoo no yuav muaj kwvlam li 10 tawm plhom leej, tuaj nrog peb koom. Yog lub caij zoo rau peb ua timkhawv txog Yehauvas. Cov uas tuaj koom peb yuav pom tias twb yog Vajtswv Yehauvas thiab Yexus hlub peb kawg nkaus li, Yexus thiaj tuag txhiv peb. (Yh. 3:16; 15:13) Lawv yuav kawm tias tus nqe txhiv qheb kev rau lawv los txais ntau yam koob hmoov. (Yxy. 65:21-23) Tus kwvtij uas cev zaj lus qhuab qhia yuav qhia ntau yam rau sawvdaws mloog. Tiamsis peb kuj muaj feem qhia lawv thiab. Yog tias peb zoo siab tos txais cov tuaj tshiab, peb tus qauv zoo yuav qhuas tau Yehauvas.—Loos 15:7.
2. Peb yuav tos txais cov uas tuaj tshiab li cas?
2 Thaum peb mus txog tom qhov chaw sib txoos, peb tsis txhob zaum ntsiag to ntawm lub rooj xwb. Peb yuav tau nrog cov neeg uas zaum ze peb tham. Nco ntsoov tias thaum yus mus xyuas ib qho chaw tshiab, yus yeej txaj muag thiab tsis pom qab nyob. Yog li ntawd, thaum peb pom cov uas tuaj tshiab, peb yuav tsum hu lawv thiab nrog lawv tham pem. Nug seb puas yog lawv nyuam qhuav tuaj sib txoos thawj zaug xwb, thiab nug seb lawv puas paub cov kwvtij nkauj muam hauv lub koom txoos ib tug twg. Yog tias zoo caw ces hais kom nws los nrog koj zaum, koj thiaj zoo nthuav Vajlugkub thiab nthuav nkauj rau nws saib. Yog tias sib txoos hauv lub Tsev Nceeg Vaj ces coj nws mus ncig ib lwm, nws thiaj pom tias lub Tsev Nceeg Vaj zoo li cas. Tom qab zaj lus qhuab qhia, yog tias nws muaj lus nug ces siv sijhawm los teb nws. Tiamsis yog muaj ib lub koom txoos yuav tuaj ua qab, ces teem sijhawm mus xyuas nws rau lwm lub caij. Cov txwj laus yuav tsum saib seb puas muaj cov uas tsis tshaj tawm txoj xov zoo tau ntev loo lawm tuaj koom thiab, xwv lawv thiaj tau mus txhawb cov ntawd.
3. Vim li cas hmo uas peb ua kevcai nco txog Yexus txojkev tuag, ho tseem ceeb ua luaj rau peb tos txais cov uas tuaj tshiab?
3 Feem coob cov uas tuaj tshiab yeej tsis tau nrog Yehauvas cov Timkhawv sib txoos ua ke dua li. Lawv yuav pom tias lub koom txoos muaj kev thaj yeej nyab xeeb heev, cuag li twb nyob hauv lub vaj kaj siab lawm. (Nt.Nk. 29:11; Yxy. 11:6-9; 65:13, 14) Peb vam thiab cia siab tias sawvdaws yuav zoo siab hlo tos txais cov tuaj tshiab.