Cov Tub Hluas, Nej Puas Xav Ua Tes Haujlwm Zoo?
1. Thaum twg thiaj zoo rau ib tug tub hluas ua raws li hauv 1 Timaute 3:1?
1 “Yog leejtwg xav ua tes haujlwm . . . , kuj yog tus ntawd xav ua tes haujlwm zoo.” (1Tmt. 3:1) Cov lus no txhawb kom cov kwvtij kub siab xwv thiaj tsim nyog lawv los tuav tej haujlwm hauv lub koom txoos. Puas yog cov laus thiaj tuav tau tej haujlwm no xwb? Tsis yog. Yog koj pib thaum koj tseem hluas ces hajyam zoo, rau qhov koj yuav tau txais kev cob qhia kom koj tsim nyog ua ib tug tub leg num. (1Tmt. 3:10) Yog koj yog ib tug tub hluas uas twb raus dej lawm thiab xav tuav haujlwm hauv lub koom txoos, koj yuav tau ua li cas?
2. Koj yuav tau sib zog npaj thiab zoo siab hlo pab lwm tus li cas?
2 Yuav Tau Sib Zog: Nco ntsoov tias tes haujlwm uas koj xav ua yog ib tes haujlwm zoo, tsis yog ua kom tau meej mom. Yog li ntawd, koj yuav tau npaj li cas? Koj yuav tau xyaum Yexus tus qauv es zoo siab hlo pab cov kwvtij nkauj muam. (Mth. 20:28; Yh. 4:6, 7; 13:4, 5) Thov Yehauvas pab kom koj xam pom lwm tus. (1Khl. 10:24) Koj puas pab tau cov laus lossis cov muaj mob muaj nkeeg hauv lub koom txoos? Koj puas mus pab txiav nyom, yawm daus pov tseg, lossis tu ib ncig lub Tsev Nceeg Vaj? Koj puas npaj hloov ib tug twg uas ua tsis tau nws zaj lus qhia rau hmo Kawm Kev Tshaj Tawm? Yog koj zoo siab hlo pab lwm tus li ntawd yuav ua rau koj muaj kev xyiv fab.—Ttx. 20:35.
3. Kev ntseeg tseem ceeb npaum li cas thiab koj yuav tau ua li cas koj thiaj muaj kev ntseeg?
3 Muaj Kev Ntseeg: Hauv lub koom txoos, tseem ceeb heev rau ib tug uas teev tiam Yehauvas muaj kev ntseeg dua li muaj peev xwm. Rau qhov tus uas muaj kev ntseeg muaj Yehauvas thiab Yexus txojkev xav. (1Khl. 2:15, 16) Thiab nws muaj tej yeeb yam uas lub hwj huam tau pub. (Klt. 5:22, 23) Nws yog ib tug uas kub siab ua Yehauvas tes haujlwm thiab muab lub Nceeg Vaj tso ua ntej hauv nws lub neej. (Mth. 6:33) Koj muaj tau cov yeeb yam no yog koj teem sijhawm los nyeem phau Vajlugkub txhua hnub, nyeem txhua phau The Watchtower thiab Awake!, thiab npaj rau tag nrho tej kev sib txoos. (Nt.Nk. 1:1, 2; Hnpl. 10:24, 25) Hais txog qhov no, Povlauj tau txhawb tus tub hluas Timaute tias: “Cia li ua tib zoo saib . . . tej uas koj qhia.” (1Tmt. 4:15, 16) Yog li, koj yuav tau kub siab npaj txhua zaj uas koj yuav tham rau hmo Kawm Kev Tshaj Tawm. Koj yuav tau npaj ua ntej koj mus tshaj tawm txoj xov zoo thiab mus tsis tu ncua. Koj yuav tau npaj tej hom phiaj ntawm sab kev ntseeg, xws li ua ib tug tho kev, mus Npe-ee, los yog mus rau txojkev Kawm Vajlugkub Rau Cov Kwvtij. Yog koj muaj txojkev ntseeg no, yuav pab tau koj “khiav ntawm tej kev phem uas cov hluas ntshaw.”—2Tmt. 2:22.
4. Tus neeg ncaj ncees thiab tso siab tau tseem ceeb npaum li cas?
4 Ncaj Ncees Thiab Tso Siab Tau: Nyob rau thawj 100 xyoo cov kwvtij uas faib zaub faib mov rau cov txom nyem yog tib co “muaj koob meej zoo” uas tuav haujlwm ncaj ncees thiab tso siab tau. Vim muaj cov kwvtij no, cov tubtxib thiaj tsis txhawj txog tes haujlwm faib zaub faib mov xwv lawv thiaj zoo leg tej haujlwm uas tseem ceeb. (Ttx. 6:1-4) Yog koj tau tuav ib tes haujlwm hauv lub koom txoos, rau siab ntso ua tes haujlwm ntawd. Xyaum coj li Nau-a, thaum nws txua lub nkoj, nws ua txhua yam raws li Yehauvas tau hais. (Ch.K. 6:22) Yehauvas saib tus uas tuav haujlwm ncaj ncees muaj nqes heev, vim nws yog ib tug uas muaj kev ntseeg.—1Khl. 4:2; mus saib lub ntsiab me “Kev Cob Qhia Tseem Ceeb Heev.”
5. Vim li cas cov tub hluas cheem tsum los tuav haujlwm hauv lub koom txoos?
5 Yehauvas tau faj lem tias nws yuav coj tibneeg coob heev los teev tiam nws. (Yxy. 60:22) Niaj hnub no tau muaj raws nraim li ntawd, rau qhov txhua xyoo muaj li 250,000 tus los ua kevcai rau dej. Vim muaj tibneeg coob heev los teev tiam Yehauvas, cheem tsum tau cov txivneej uas muaj kev ntseeg los leg tej haujlwm hauv lub koom txoos. Tsis tas li ntawd xwb, niaj hnub no los Yehauvas muaj haujlwm ntau kawg li rau peb ua. (1Khl. 15:58) Yog li ntawd, cov tub hluas, nej puas xav los tuav haujlwm hauv lub koom txoos? Yog nej xav, nej yuav tau tuav tes haujlwm zoo heev!
[Cov lus rho hauv zaj no, nyob sab 4]
Vim muaj neeg coob heev los teev tiam Yehauvas, cheem tsum tau cov txivneej uas muaj kev ntseeg los leg tej haujlwm hauv lub koom txoos
[Ntsiab me nyob sab 4]
Kev Cob Qhia Tseem Ceeb Heev
Thaum cov txwj laus muab haujlwm rau cov tub hluas ua, yog lawv cob qhia thiab pab cov tub hluas kom txawj ua haujlwm. Muaj ib zaug, thaum tus saib xyuas thaj tsam tabtom nrog ib tug tham saum lub sam thiaj tom qab kev sib txoos, nws pom ib tug tub hluas sawv ntawm nkawd ib sab. Nws thiaj nug seb puas yog tus hluas ntawd tos xav nrog nws tham. Tus tub hluas teb tias nws tes haujlwm yog nqus lub sam thiaj tom qab kev sib txoos. Nws niam nws txiv twb yuav mus tsev, tiamsis nws tsis tau xav mus vim nws tes haujlwm tsis tau tiav. Yog li ntawd, tus saib xyuas thaj tsam thiaj li txav rau nws nqus, thiab nws thiaj hais tias: “Cov txwj laus hauv lub koom txoos ntawd kub siab cob cov tub hluas kom txawj ua haujlwm. Vim li no, thaum kuv mus xyuas lub koom txoos ntawd, thiaj yoojyim rau cov txwj laus qhia tias tus tub hluas twg yog tus uas lawv pom tias tsim nyog ua ib tug tub leg num.”