Npaj Tej Lus Xub Hais Kom Raug Siab
1. Tej lus peb xub nrog tibneeg tham tseem ceeb npaum li cas?
1 Tej khoom txom ncauj ua rau tibneeg nqhis zaub mov. Tib yam li ntawd, cov lus peb xub nrog tibneeg tham yuav rub tau lawv lub siab xav mloog peb. Yog li ntawd, peb yuav tau ua tib zoo npaj tej lus peb xub nrog tibneeg tham kom raug lawv siab li tej zaub mov qab qab uas siv sijhawm npaj. (P.L. 15:28) Thaum peb xub nrog tibneeg tham, peb yuav hais li cas thiaj raug lawv siab?
2. Peb yuav npaj li cas thiaj npaj tau tej lus uas raug tibneeg siab?
2 Xaiv Tej Ntsiab Uas Raug Siab: Peb yuav tsum hais tej lus raug tibneeg siab thaum peb xub nrog lawv tham. Yog peb hais tsis raug tus tswv tsev siab, nws yuav tsis xav nrog peb tham. Yog li ntawd, thaum peb npaj, peb ua tib zoo xav seb tej neeg zej zog nyiam tham txog dabtsi xwb. Lawv puas nyiam tham txog kev nom kev tswv, lub cuab lub yig, lossis kev thaj yeeb nyab xeeb? Tibneeg feem coob yeej tsis zais siab, lawv yeej xav kom lwm tus paub tej uas lawv xav thiab. Yog li, peb yuav tau ua tib zoo npaj mus nug seb lawv xav li cas. Koj puas tau siv cov qauv uas nyob hauv daim Tes Num Rau Lub Nceeg Vaj uas phim koj koog los qhia tibneeg? Hmo uas tsev neeg pe hawm Vajtswv ua ke, nej kuj xyaum seb nej yuav xub nrog tibneeg tham li cas thiaj raug lawv siab.
3. Peb yuav tau hloov tej lus uas peb xub hais li cas kom phim tej kab ke thiab hom neeg peb ntsib?
3 Paub Lawv Tej Kab Ke Thiab Lawv Hom Neeg: Muaj tej hom neeg thaum peb nrog lawv tham, lawv xav kom tham tsuag tsuag. Tiamsis qee hom, peb yuav tau xub nug seb lawv noj li cas nyob li cas thiab seb peb yog leejtwg tso thiaj yog peb saib taus lawv. Muaj tej thaj chaw uas tsis txwv kev ntseeg, thaum peb xub qhia cia li siv phau Vajlugkub los qhia. (Ttx. 2:14-17) Tiamsis tej thaj chaw uas tibneeeg tsis coj txojkev ntseeg Khixatia lossis tsis coj ib txojkev ntseeg twg li, tej zaum zoo rau peb tsis txhob qhia Vajlugkub rau tibneeg thawj zaug peb ntsib lawv, zoo rau peb tos thaum peb rov mus xyuas lawv tso.—Ttx. 17:22-31.
4. Peb yuav npaj tej lus uas peb xub hais li cas?
4 Tej Lus Peb Xub Hais: Ua tib zoo npaj tej lus uas peb xub hais. Zoo dua yog peb tsis txhob tham ntev tham ntau thiab hais cov lus nyuaj to taub. Cov lus peb xub hais tseem ceeb heev. Yog li ntawd, peb yuav tsum tham yam kub siab lug. Hais lus luag ntxhi tsis txhob ntshai kom tus tswv tsev thiaj pom tias tej peb hais tseem ceeb tiag. Yog peb npaj tau li no, yuav pab tau tej lus uas peb xub hais kom zoo li tej khoom txom ncauj uas ua rau tibneeg xav “noj [Yehauvas] rooj mov.”—1Khl. 10:21.