Xyaum Cov Uas Cev Vajtswv Lus Tus Qauv—Mikha
1. Tej zaum Mikha tau xav txog lo lus nug twg thiab Mikha cov lus ho tau muaj tseeb li cas?
1 Thaum Mikha tus uas cev Vajtswv lus mus tshaj Yehauvas txojkev txiav txim rau Yixayee thiab Yuda, tej zaum nws kuj tau xav tias: ‘Thaum twg lub sim ceeb phem no mam li dua mus?’ Txawm Mikhas xav li ntawd los, tsis ntev xwb tau muaj tshwm sim li nws tshaj tawm lawm tiag. Rau qhov nyob rau xyoo 740 U.Nt.Y. uas Mikha tseem ua neej nyob, lub nroog Xamali raug rhuav tshem raws li tej lus uas Yehauvas kom Mikha hais. (Mkh. 1:6, 7) Tom qab no Yeluxalees kuj raug rhuav tshem rau xyoo 607 U.Nt.Y. lawm thiab. (Mkh. 3:12) Peb xyaum tau Mikha tus qauv li cas lub sijhawm peb tos Yehauvas hnub txiav txim?
2. Thaum peb tos Yehauvas hnub, peb yuav tsum ua dabtsi thiab yog vim li cas?
2 Ua Siab Ntev: Mikha tau sau tias: “Kuv li kuv yuav ntsia ntsoov [Yehauvas], kuv yuav tos rawv Vajtswv uas cawm kuv dim.” (Mkh. 7:7) Txawm Mikha hais li ntawd los, nws tsis nyob tos rawv kom Yehauvas hnub txiav txim los xwb tiamsis nws rau siab ntso ua Yehauvas txoj haujlwm. Peb los kuj tib yam thiab, qhov uas peb tos rawv Yehauvas hnub yog peb yuav tsum “ua lub neej dawb huv thiab hwm Vajtswv.” (2Pt. 3:11, 12) Yehauvas ua siab ntev xwv txhua tus thiaj muaj sijhawm ntxeev dua siab tshiab. (2Pt. 3:9) Yog li ntawd, cia peb khaws Vajtswv tej lus ntuas rau nruab siab es xyaum ua siab ntev li cov uas cev Vajtswv lus.—Yknp. 5:10.
3. Vim li cas peb yuav tsum thov kom Yehauvas pub lub hwjhuam dawb huv rau peb?
3 Tso Siab Plhuav Rau Yehauvas: Txawm tias Mikha tau ib txoj haujlwm nyuaj heev los, nws yeej tso siab plhuav tias Yehauvas yuav pab nws ua tes haujlwm ntawd kom tiav. (Mkh. 3:8) Yehauvas yeej paub tias peb cheem tsum nws pab peb, yog li nws thiaj txhawb kom peb tso siab rau nws. Nws zoo siab hlo pub dag pub zog rau cov uas tsaug leeg kom lawv ua tau nws tes haujlwm tiav. (Nt.Nk. 84:5, 7; Yxy. 40:28-31) Thaum koj ua Yehauvas tes haujlwm, koj puas tau pom Yehauvas pub dag pub zog rau koj? Koj puas thov Yehauvas tsis tu ncua kom nws cia nws lub hwjhuam dawb huv los pab koj?—Lk. 11:13.
4. Mikha tso tau tus qauv twg rau peb xyaum?
4 Mikha tau ua raws li Yehauvas lub siab nyiam tas nws sim neej. Txawm muaj kev phem kev tsis ncaj ncees nyob puag ncig nws los, nws yeej tuav rawv txojkev ncaj ncees tsis tso li. Tib yam li ntawd, txawm peb yuav raug kev sim siab txhua hnub los, cia peb txiav txim siab “tuav [Yehauvas] uas yog peb tus Vajtswv lub npe ua neej mus ib txhis tsis kawg.”—Mkh. 4:5.