Tej Uas Pab Kom Peb Txawj Ua Vajtswv Tes Num—Yuav Teb Cov Uas Tsis Kam Nrog Peb Tham Li Cas

Vim Li Cas Ho Tseem Ceeb: Muab xav li no, yog koj paub ib qho xwm txheej phem yuav los raug tibneeg sai sai, tiamsis yog lawv tsis khiav ces lawv yuav tuag, koj yeej yuav mus ceeb toom lawv, puas yog? Tiamsis thaum koj mus ceeb toom ib tug neeg twg es nws tseem hais rau koj tias nws tsis xyeej nrog koj tham, koj puas cia li rov mus tsev xwb? Coob tus uas peb mus qhia Vajlugkub rau es tsis kam nrog peb tham twb tsis paub tias txoj xov uas peb coj mus qhia lawv yuav cawm tau lawv txojsia. Tej zaum lub sijhawm peb mus ntawd, tseem muaj lwm yam los tab kaum lawv. (Mth. 24:37-39) Lossis tej zaum lawv hnov lwm tus hais phem txog peb es lawv thiaj tsis kam nrog peb tham. (Mth. 11:18, 19) Lawv xav tias ntshe peb tsuas zoo ib yam li tej kev ntseeg uas tau ua ntau yam kev phem. (2Pt. 2:1, 2) Yog tias thaum xub thawj tus tswv tsev tsis kam nrog peb tham, tsis txhob maj tu siab.

Yuav Teb Li Cas:

Ua ntej koj mus qhia Vajlugkub, zoo rau koj siv mentsis sijhawm los xav seb thaum koj ntsib cov uas tsis kam nrog koj tham, koj yuav teb li cas es thiaj zoo.
Yog tias tus tswv tsev hais lwm yam los txiav koj lus, cia li ua tib zoo teb nws. Xws li, yog tus tswv tsev hais rau koj tias nws twb muaj nws ib txojkev ntseeg lawm, koj kuj teb li no, “kuv zoo siab tias koj kuj nyiam kev ntseeg thiab.” Yog koj ua tib zoo mloog tus tswv tsev, yuav pab tau koj qhia Vajlugkub rau nws ntxiv. Piv txwv, yog tus tswv tsev hais rau koj tias nws tsis khoom, koj kuj hais li no: “Koj tsis khoom los tsis ua li cas. Tiamsis kuv xav muab phau ntawv no rau koj ua ntej kuv mus.” Yog tus tswv tsev hais tias nws tsis nyiam, koj kuj nug li no: “Koj hais li ntawd, puas yog koj tsis nyiam Vajlugkub, los yog tsis nyiam kev ntseeg Vajtswv?”
Peb yuav tsum paub xav. Nco ntsoov tias Yehauvas tsis yuam kom tibneeg mloog nws lus. (Kc. 30:19) Tiamsis Yehauvas cia txhua tus nyias ris nyias lub nra. (Klt. 6:5) Yog tus tswv tsev tsis kam nrog peb tham los, zoo rau peb cia li mus lwm qhov. Yog peb saib taus tus tswv tsev li no, ces tej zaum lwm zaus nws yuav kam nrog cov timkhawv tham.—1Pt. 3:15.

Xyaum Li No Rau Lub Hli No:

Thaum koj mus ntsib ib tug uas tsis kam nrog koj tham, tom qab mus lwm qhov lawm, nug tus uas nrog koj seb lwm zaus yog muaj li ntawd koj yuav teb li cas es thiaj zoo.