Xyaum Cov Uas Cev Vajtswv Lus Tus Qauv—Xefaniya
1. Xefaniya tshaj tawm rau lub caij zoo li cas thiab nws tso tau tus qauv zoo twg rau peb xyaum?
1 Nyob rau lub caij 650 U.Nt.Y., muaj ntau yam phem tshwm sim hauv tebchaws Yuda. Lub sijhawm ntawd tebchaws Yuda fav xeeb rau Yehauvas mus teev tiam tej dab mlom rau txhua qhov. Tus vajntxwv phem uas yog Asmoo los kuj raug nws cov tub teg tub taws muab tua tuag lawm thiab. Tsis tas li ntawd xwb, tus vajntxwv tshiab uas sawv kav tebchaws Yuda uas yog Yauxiya los kuj tseem yau heev. (2VKk. 33:21–34:1) Lub sijhawm ntawd, Yehauvas thiaj tau tsa Xefaniya sawv tshaj tawm nws txojkev txiav txim rau tebchaws Yuda. Txawm Xefaniya yog tub nom tub tswv ntawm Yuda caj ces los, nws tsis ntshai tshaj tawm Yehauvas txojkev txiav txim rau cov thawj coj hauv tebchaws Yuda. Nws yeej tshaj tawm txhua lo tsis tseg ib los li. (Xfny. 1:1; 3:1-4) Peb yuav tau xyaum Xefaniya tus qauv es ua siab tawv tsis txhob cia peb tsev neeg lossis tej txheeb ze txwv peb txojkev pe hawm Yehauvas. (Mth. 10:34-37) Xefaniya tshaj tawm txog dabtsi, thiab thaum kawg puas muaj leejtwg mloog?
2. Peb yuav ua li cas thiaj dim hnub uas Yehauvas npau taws?
2 Nrhiav Yehauvas: Yehauvas thiaj yog tus uas yuav cawm tau tibneeg rau hnub uas nws txojkev npau taws los txog. Yog li ntawd, Xefaniya thiaj txhawb kom cov tibneeg uas nyob hauv tebchaws Yuda nrhiav Yehauvas, nrhiav kev ncaj ncees, thiab nrhiav kev los txo lawv lub siab kom qes ua ntej hnub uas Yehauvas npau taws los txog. (Xfny. 2:2, 3) Cov nyob rau lub caij no los yuav tau ua tib yam li ntawd thiab. Peb yuav tau xyaum Xefaniya es txhawb lwm tus kom los nrhiav Yehauvas. Thiab peb yuav tau txiav txim siab tsis txhob khiav deb ntawm Yehauvas. (Xfny. 1:6) Qhov peb nrhiav Yehauvas yog peb yuav tau ua zoo kawm nws Txojlus thiab thov nws pab peb. Qhov peb nrhiav kev ncaj ncees yog peb ua peb lub neej kom dawb huv. Thiab qhov peb nrhiav kev txo peb lub siab kom qes yog peb mloog lus thiab coj raws li tej uas Yehauvas lub koom haum qhia.
3. Vim li cas peb yuav tsum rau siab tshaj tawm txoj xov zoo?
3 Pab Tau Ib Txhia: Xefaniya tej lus tshaj tawm kuj pab tau ib txhia teev tiam Yehauvas. Ib tug yog Yauxiya. Yauxiya twb pib nrhiav Yehauvas puag thaum nws tseem yau los lawm. Tom qab no, Yauxiya thiaj muab kev teev tiam dab mlom rhuav tshem huvsi hauv tebchaws Yuda. (2VKk. 34:2-5) Niaj hnub no, txawm txoj xov zoo txog lub Nceeg Vaj zoo li cov noob zaub uas ib txhia poob rau saum txojkev, saum thaj av uas muaj pob zeb, thiab rau hauv plawv pos los, kuj muaj tej lub poob rau hauv thaj av zoo thiab kuj txi txiv. (Mth. 13:18-23) Peb tso siab tias Yehauvas yuav foom koob hmoov rau peb yog peb rau siab mus tshaj tawm txoj xov zoo txog lub Nceeg Vaj.—Nt.Nk. 126:6.
4. Vim li cas peb yuav tsum ‘nyob tos Yehauvas’?
4 Ib txhia nyob hauv tebchaws Yuda xav tias hnub uas Yehauvas npau taws yeej yuav tsis los li. Tiamsis Yehauvas cog lus lawm tias nws hnub tseem ceeb twb los yuav txog. (Xfny. 1:12, 14) Tsuas yog cov uas nrhiav chaw nraim cev rau hauv nws thiaj yuav dim xwb. (Xfny. 3:12, 17) Yog li ntawd, lub sijhawm peb ‘nyob tos Yehauvas,’ cia li zoo siab xyiv fab nrog Yehauvas cov tibneeg teev tiam nws.—Xfny. 3:8, 9.