Siv Lub Vej Xaij jw.org/hmn Thaum Koj Mus Qhia Vajlugkub

Peb lub Vej xaij yog ib yam twj zoo heev rau peb siv los tshaj tawm txoj xov zoo kom “thoob qab ntuj kawg.” (Ttx. 1:8) Muaj coob tus tswv tsev yeej tsis paub tias muaj lub Vej xaij jw.org/hmn no li. Thaum muaj ib tug tshaj tawm qhia lub Vej xaij rau lawv, lawv thiaj li paub txog xwb.

Muaj ib tug kwvtij uas ncig xyuas cov koom txoos muab daim yeeb yaj kiab Kawm Vajlugkub Ua Dabtsi? theej tso rau hauv nws lub xov tooj ntawm tes kom thiaj tau tso rau tibneeg saib. Thaum nws mus qhia Vajlugkub ib lub tsev rau tsev, nws hais li no rau tus tswv tsev: “Kuv tuaj xyuas sawvdaws thiab tuaj tham txog 3 lo lus nug no: Ua li cas lub ntiajteb yuav muaj teeb meem ntau ua luaj? Vajtswv yuav kho tej teeb meem ntawd li cas? Thiab peb yuav ua li cas thev dhau tej teeb meem ntawd tamsim no? Daim yeeb yaj kiab luv luv no tham txog 3 lo lus nug no.” Nws cia li tso kiag daim yeeb yaj kiab rau tus tswv tsev saib tamsim ntawd. Nws kuj saib tus tswv tsev seb nws nyiam los tsis nyiam. Ntau zaus tus tswv tsev yeej nyiam saib daim yeeb yaj kiab heev twb tsis nco ntsais muag kiag li. Tom qab saib tas, tus kwvtij uas ncig xyuas cov koom txoos thiaj hais ntxiv tias: “Koj twb hnov tias yog koj xav kawm Vajlugkub ces koj mus rau npe hauv lub Vej xaij. Tiamsis yog koj xav paub seb peb kawm Vajlugkub nrog tibneeg li cas, kuv kuj qhia rau koj los tau.” Yog tus tswv tsev xav paub ces nws siv phau Xov Zoo los qhia seb peb kawm Vajlugkub li cas. Tiamsis yog tus tswv tsev tsis xyeej, nws teem sijhawm rau lwm zaus mam rov mus qhia. Thaum nws mus haus kas fes (coffee) tom tej khw los nws kuj hais ib yam li nws hais saum no rau cov uas nws nrog tham. Ua li koj puas siv lub Vej xaij jw.org/hmn thaum koj mus qhia Vajlugkub?