Tej Uas Pab Kom Peb Txawj Ua Vajtswv Tes Num​—Txawj Xav Txog Lwm Tus

Vim Li Cas Ho Tseem Ceeb: Yexus tsis saib ib tug tseem ceeb dua ib tug. Nws hlub thiab txawj xav txog txhua tus. Muaj ib zaug, muaj neeg coj ib tug lag ntseg tuaj cuag Yexus. Tej zaum Yexus pom tias tus lag ntseg ntawd txaj muag, Yexus txawm coj nws mus rau ib qho chaw uas tsis muaj neeg pom, ces Yexus mam li kho nws. (Mk. 7:31-35) Yexus txawj xav txog nws cov thwjtim, nws paub tej uas lawv ua tau thiab ua tsis tau. Yog li ntawd, thaum nws qhia lawv, nws tsis qhia ntau yam. (Yh. 16:12) Thaum Yexus mus saum ntuj lawm los, nws tseem txawj xav txog lwm tus thiab. (2Tmt. 4:17) Peb yuav tau xyaum li Yexus rau qhov peb yog nws cov thwjtim. (1Pt. 2:21; 1Yh. 3:16, 18) Thaum peb mus qhia Vajlugkub, yog peb txawj xav txog tus tswv tsev es paub tej uas nws nyiam thiab txhawj xeeb txog ces peb yuav txawj pab nws. Tus tswv tsev yuav xav mloog peb dua thaum nws pom tias peb tsis yog lam tshaj tawm txoj xov zoo lossis tseb tej ntaub ntawv xwb, tiamsis peb yeej xav txog nws tiag tiag.