Siv jw.org Thaum Mus Qhia Vajlugkub​—“Ua Yehauvas Tus Phoojywg”

Hauv jw.org, yog mus rau “Bible Teachings,” hauv ntu rau cov menyuam, muaj ib lub ntsiab hu ua “Ua Yehauvas Tus Phoojywg.” Lub ntsiab no muaj nkauj, yeeb yaj kiab, thiab duab rau menyuam kos. Koj puas tau siv tej no thaum mus qhia Vajlugkub? Yog koj qhia Vajlugkub rau ib tug uas muaj tej menyuam yaus, koj kuj qhia kom nws siv tej no. Yog ua li no yuav pab tau nws xav mus saib lwm yam hauv peb lub Vej xaij thiab.

Thaum tseb daim Lub Nceeg Vaj Zaj Xov Xwm 38, ib tug kwvtij tau tseb ib daim rau ib leej niam, nws txawm muab nyeem kiag tamsim ntawd. Nws cov menyuam los kuj xav paub seb hais li cas thiab. Tus kwvtij txawm piav mentsis txog daim ntawv thiab qhia lawv txog peb lub Vej xaij uas nyob rau sab kawg. Tus pojniam nyiam heev, yog li ntawd, tus kwvtij thiaj siv nws lub twj ntawm tes tso Koob Meej cov yeeb yaj kiab ib zaj rau nws thiab nws cov menyuam saib.

Kuj muaj ib tug muam qhia ib tug uas nrog nws ua haujlwm txog peb lub Vej xaij thiab tej uas lub Vej xaij muaj los pab tsev neeg. Tus pojniam thiab nws cov menyuam thiaj mus saib lub Vej xaij. Tsis ntev tom qab ntawd, tus pojniam hais rau tus muam tias nws cov menyuam mas tsuas pom hu zaj nkauj “Preach the Word” tas mus li xwb. Zaj nkauj no nyob rau hauv lub ntsiab “Ua Yehauvas Tus Phoojywg.”

Zoo rau peb paub tej uas nyob hauv peb lub Vej xaij. Muab cov yeeb yaj kiab, cov nkauj, thiab cov duab rau menyuam kos theej tawm rau tej twj ntawm tes. Yog koj ua li no ces thaum koj mus qhia Vajlugkub, koj yuav siv tau los qhia lwm tus. Lub Vej xaij yog ib yam twj zoo heev rau peb ua tus Tswv tes haujlwm.​—Ttx. 20:19.