Siv Cov Suab Kaw Li No
1. Hauv jw.org muaj tej ntaub ntawv rau peb nyeem tiamsis kuj muaj dabtsi ntxiv thiab?
1 Coob leej ntau tus nyiam siv jw.org los nyeem tej yam zoo thiab tseeb hauv phau Vajlugkub. (L.Tsy. 12:10) Tiamsis koj puas tau siv cov suab kaw uas nyob hauv jw.org thiab? Tej uas nyob hauv peb lub Vej xaij feem ntau twb muab kaw ua suab lawm kom sawvdaws thiaj tau mloog. Cov suab kaw no pab tau peb li cas?
2. Thaum kawm Vajlugkub peb ib leeg lossis thaum peb tsev neeg pe hawm Vajtswv ua ke, peb siv tau cov suab kaw li cas?
2 Rau Peb Lossis Peb Tsev Neeg Kawm Vajlugkub: Thaum peb tsav tsheb lossis ua ub ua no, peb kuj siv lub caij ntawd los mloog cov suab kaw. Ua li no thiaj yog peb siv peb lub sijhawm kom muaj nuj nqes. (Efx. 5:15, 16) Hmo tsev neeg pe hawm Vajtswv ua ke, peb kuj muab cov suab kaw rau ib phau ntawv twg los mloog thiab muab phau ntawv ntawd los saib raws qab. Thaum peb kawm Vajlugkub peb ib leeg xwb, peb kuj mloog cov suab kaw yog peb xav kom peb hajyam txawj nyeem ntawv lossis yog peb tabtom kawm ib yam lus tshiab.
3. Cov suab kaw tej zaum yuav pab tau cov neeg twg hauv peb thaj tsam?
3 Rau Thaum Mus Qhia Vajlugkub: Cov nyob hauv peb thaj tsam uas hais tias lawv tsis muaj sijhawm nyeem ntawv tej zaum yuav yeem mloog cov suab kaw dua. Lossis thaum peb ntsib cov uas hais lwm yam lus tej zaum lawv yuav xav mloog txoj xov zoo txog lub Nceeg Vaj dua yog lawv hnov txoj xov zoo ua lawv yam lus. (Ttx. 2:6-8) Muaj tej haiv neeg ib txwm tham dab neeg thiab keeb kwm rau cov hluas mloog ib tiam rau tiam xwb. Cov Hmoob yog ib co uas nyiam ua li ntawd. Txawm lawv mloog xwb los lawv yeej nco tau zoo heev. Tsis tas li ntawd xwb, muaj ntau haiv neeg Afika los kuj ua ib yam li ntawd thiab.
4. Peb yuav tau xav txog cov lus nug twg thaum peb mus qhia Vajlugkub rau cov uas nyob hauv peb thaj tsam?
4 Nyob hauv koj thaj tsam, puas zoo rau koj tso cov suab kaw uas yog tus tswv tsev yam lus rau nws mloog? Puas muaj tej tug uas zoo muab cov suab kaw xa hauv e-mail mus rau mloog? Peb puas theej tawm tau cov suab kaw rau ib daim CD es muab nrog phau ntawv rau ib tug tswv tsev uas nyiam Vajlugkub? Txhua zaus uas koj theej tawm ib phau ntawv ua suab kaw rau ib tug twg, koj suav tau tias koj tseb tau ib phau ntawv. Cov suab kaw yog kaw rau peb siv thaum peb kawm Vajlugkub ib leeg thiab kaw rau peb siv mus qhia Vajlugkub rau lwm tus.—1Khl. 3:6.