Txawj Siv Tej Uas Muaj Nyob Hauv Phau Vajlugkub Qhia

Thaum ib tug kawm Vajlugkub kawm tau tej uas phau Vajlugkub qhia lawd thiab muab tej ntawd los siv ua nws lub neej ces nws txojkev ntseeg yuav loj hlob thiab tawg paj txi txiv. (Nt.Nk. 1:1-3) Yog peb txawj siv tej uas nyob hauv phau Vajlugkub Qhia ces peb yuav pab tau tus kawm txojkev ntseeg kom loj hlob.

Thawj Cov Lus Nug: Ib tshooj twg muaj ib co lus nug nyob rau ntawm thawj uas tshooj ntawd yuav tham txog. Koj kuj siv cov lus nug ntawd los nug nws kom ua rau nws xav paub ntxiv txog tej uas neb yuav kawm. Lossis koj kuj nug nws seb nws xav li cas txog cov lus nug ntawd. Txawm nws teb tsis raug los koj tsis tas yuav qhia cov lus teb rau nws tamsim ntawd. Koj nug nws vim koj tsuas xav paub seb nws paub npaum li cas xwv koj thiaj paub pab nws xwb.​—P.L. 16:23; 18:13.

Cov Lus Qhia Ntxiv: Yog tus kawm to taub thiab ntseeg tej uas neb kawm hauv ib tshooj twg ces tsis tas neb yuav kawm cov lus qhia ntxiv ua ke, tiamsis txhawb kom nws mus nyeem nws tus kheej xwb. Lwm zaus neb kawm ua ke, koj mam siv mentsis sijhawm los nug nws seb nws puas to taub tej uas nws tau nyeem ntawd. Tiamsis yog koj xav tias yuav pab tau nws dua yog neb nyeem ua ke ces neb kuj siv mentsis sijhawm los nyeem thiab tham cov lus qhia ntxiv thiab nug nws raws li koj tau npaj ua ntej lawm.

“Phau Vajlugkub Qhia Li No”: Tom qab ib tshooj twg, muaj lub ntsiab me “Phau Vajlugkub Qhia Li No” uas muaj cov lus teb rau thawj cov lus nug rau tshooj ntawd. Koj kuj siv tau lub ntsiab no los tham seb tus kawm puas to taub thiab puas piav tau tej uas neb tau kawm. Nyeem cov ntsiab ib lub zuj zus thiab nyeem cov nqe Vajlugkub. Tom qab nyeem ib lub ntsiab twg tas, kom tus kawm siv cov nqe Vajlugkub los piav seb vim li cas thiaj muaj tseeb raws li lub ntsiab ntawd.​—Ttx. 17:2, 3.