Tus Tswv Tsim Qhia Nws Tej Lus Cog Tseg Li Cas?

Txij thaum ntuj tsim teb raug los, Vajtswv siv cov tubtxib saum ntuj thiab tibneeg los cev nws tej lus rau sawvdaws. Ntxiv ntawd, nws kuj siv ib co txivneej muab nws tej lus cog tseg sau cia. Cov lus cog tseg no yuav pab kom peb muaj lub neej kaj siab lug lawm yav tom hauv ntej. Yog li ntawd, yuav ua li cas peb thiaj paub Vajtswv tej lus cog tseg ntawd?

Peb mus nrhiav tau tej lus cog tseg ntawd nyob hauv Vajtswv Txojlus. (2 Timautes 3:16) Ua li, Vajtswv ho siv cov cev lus los sau nws tej lus li cas? (2 Petus 1:21) Twb yog Vajtswv tshoov lawv lub siab los sau. Zoo ib yam li thaum ib tug lospav txib kom nws tus tub teev ntawv sau ib tsab ntawv rau nws. Txawm tus tub teev ntawv yog tus sau los, tsab ntawv no yeej tseem yog tus lospav cov lus. Ib yam nkaus li ntawd, txawm Vajtswv yuav tshoov neeg sau los yeej tseem yog nws cov lus.

VAJTSWV TXOJLUS TXHAIS TAWM UA NTAU YAM LUS

Vajtswv Txojlus tseem ceeb heev, nws thiaj xav kom txhua tus paub thiab hnov txog. Niaj hnub no, Vajtswv txoj xov zoo “uas nyob mus ibtxhis” tau muab txhais ua ntau yam lus kom “tsis hais haivneeg twg, xeem twg thiab cov neeg uas hais yam lus twg,” nyeem tau huvsi. (Tshwmsim 14:6) Vim muaj Vajtswv pab, nws Txojlus thiaj li muab txhais tshaj li 3,000 yam lus. Qho yam lus tabtom txhais txog nrab hos qho yam lus twb txhais tiav lawm. Tsis muaj ib phau ntawv twg uas tau muab txhais tawm ntau npaum li no.