LUB NEEJ KHIXATIA
Tshaj Tawm Thiab Cob Qhia Tseem Ceeb Heev
Yexus sam hwm kom mus coj tibneeg los ua nws cov thwjtim. (Mth. 28:19) Yuav kom ua tau li no, Yexus cov thwjtim yuav tsum tau mus tshaj tawm thiab cob qhia lwm tus. Zoo rau peb xav li no: ‘Kuv yuav ua li cas kuv thiaj yimhuab txawj tshaj tawm thiab cob qhia kom lwm tus los ua Yexus ib tug thwjtim?’
TSHAJ TAWM
Peb yuav tsum rau siab ntso mus nrhiav cov uas “tsim nyog” es txhob tos lawv tuaj nrhiav peb. (Mth. 10:11) Yog li ntawd, thaum peb mus tshaj tawm, peb puas nrhiav kev los nrog txhua tus uas peb “niaj hnub ntsib” tham? (Ttx. 17:17) Povlauj tau tso ib tug qauv zoo heev rau peb xyaum. Vim nws kub siab tshaj tawm, nws thiaj pab tau Lidia los ua Yexus ib tug thwjtim.—Ttx. 16:13-15.
“Thaum tagkis cia li tseb koj tej noob, thiab thaum tsaus ntuj tsis txhob nkaum tes” (L.Tsy. 11:6)
SAIB ZAJ YEEB YAJ KIAB NIAJ HNUB TSHAJ TAWM “TSIS TSO TSEG LI”—THAUM MUS UB MUS NO THIAB TSEV RAU TSEV, TOM QAB NTAWD TEB COV LUS NUG NO:
Samuel [xa·mu·yee] niaj hnub qhia qhov tseeb rau lwm tus li cas?
Vim li cas peb yuav tsum ua siab ntev thaum peb mus tshaj tawm?
Koj qhia tau txoj xov zoo txog lub Nceeg Vaj rau leejtwg?
COB QHIA
Puas yog peb tseb ntaub ntawv rau cov uas peb ntsib xwb ces lawv cia li los ua Yexus cov thwjtim? Tsis yog. Peb yuav tsum ua ntau tshaj ntawd. Yuav kom pab tau cov peb ntsib loj hlob ntawm sab kev ntseeg, peb yuav tsum rov mus xyuas thiab qhia Vajlugkub rau lawv. (1Khl. 3:6-9) Yog peb kub siab lug mus qhia tiamsis lawv tsis hloov, peb yuav ua li cas xwb? (Mth. 13:19-22) Peb yuav tsum mus nrhiav dua lwm tus uas zoo li tej noob poob rau “thaj av zoo.”—Mth. 13:23; Ttx. 13:48.
“Kuv yog tus cog, Apaulau yog tus ywg dej tiamsis Vajtswv ua kom loj hlob” (1Khl. 3:6)
SAIB ZAJ YEEB YAJ KIAB NIAJ HNUB TSHAJ TAWM “TSIS TSO TSEG LI”—TEEB ROOJ TEEB LAUB THIAB COJ NEEG LOS UA THWJTIM, TOM QAB NTAWD TEB COV LUS NUG NO:
Solomon [xa·lau·moo] thiab Mary [ma·lis] nkawd qhia Vajlugkub rau Ezekiel [e·xe·khee] thiab Abigail [a·npi·nkaus] li cas?
Thaum mus teeb rooj teeb laub lossis siv lwm txojkev mus qhia Vajlugkub, peb lub hom phiaj yog dabtsi?
Peb yuav ua li cas thiaj qhia tau qhov tseeb rau lwm tus?