Huas Ntshis Kev Sib Haum Xeeb Tso Kev Khib Tseg

1. Ua li cas rau Yauxej tsev neeg vim Yauxej cov tijlaug khib nws?

YAKHAUJ yeej hlub tag nrho nws cov tub tiamsis nws hlub nws tus tub Yauxej uas muaj 17 xyoo dua. Yauxej cov tijlaug xav li cas xwb? Lawv khib nws heev thiab txawm pib ntxub nws. Yauxej yeej tsis tau ua ib yam dabtsi kom lawv ntxub nws. Txawm li ntawd los, nws cov tijlaug tseem muab nws muag mus ua qhev thiab dag rau lawv txiv tias ib tug tsiaj qus muab Yauxej tom tuag lawm. Vim lawv khib Yauxej, lawv tsev neeg thiaj muaj kev ntxhov siab thiab ua rau lawv txiv mob siab heev.​—Chivkeeb 37:3, 4, 27-34.

2. Raws li Kalatias 5:19-21, vim li cas peb yuav tsum ceev faj tsis txhob khib luag?

² Vajtswv Txojlus hais tias kev khib xeebb yog ib yam uas “neeg lub siab nyiam ua.” Tus uas khib luag yuav tsis tau tej koob hmoov ntawm Vajtswv lub Nceeg Vaj. (Nyeem Kalatias 5:19-21.) Kev khib xeeb yuav ua rau nws ua nruj ua tsiv, muaj kev cov nyom, thiab chim siab rau lwm tus.

3. Hauv zaj no peb yuav kawm txog dabtsi?

³ Yauxej cov tijlaug tus qauv qhia rau peb tias kev khib xeeb rhuav tau kev sib raug zoo nrog lwm tus thiab ua rau lub cuab lub yig tsis muaj kev sib haum xeeb. Txawm tias peb yeej yuav tsis ua li Yauxej cov tijlaug ua los peb lub siab txawj dag txawj ntxias peb. (Yelemis 17:9) Twb yog vim li no muaj tej zaum thaum peb pom luag tej muaj, peb thiaj li khib. Cia peb mus kawm txog tej qauv hauv phau Vajlugkub seb yog vim li cas peb thiaj li khib luag. Tom qab ntawd peb yuav kawm seb peb yuav ua li cas peb thiaj tsis khib luag thiab txhawb tau sawvdaws nyob sib haum xeeb.

VIM LI CAS PEB THIAJ LI KHIB LUAG?

4. Vim li cas cov Filitees thiaj khib Ixaj?

⁴ Thaum peb pom lwm tus nplua nuj. Cov Filitees khib Ixaj vim nws yog ib tug neeg vam meej thiab nplua nuj heev. (Chivkeeb 26:12-14) Lawv muab Ixaj cov qhov tshij uas nws niaj hnub ntaus dej rau nws cov tsiaj haus txhub av tag. (Chivkeeb 26:15, 16, 27) Niaj hnub no los yeej muaj cov neeg uas khib luag vim luag muaj ntau tshaj lawv. Lawv tsis yog xav tau luag tug xwb tiamsis lawv tseem xav kom luag plam tej uas luag muaj thiab.

5. Vim li cas cov thawj coj thiaj khib Yexus?

⁵ Thaum muaj ib tug uas sawvdaws nyiam heev. Cov thawj coj Yudais khib Yexus kawg li vim muaj neeg coob coob nyiam nws. (Mathais 7:28, 29) Vajtswv xa Yexus los qhia qhov tseeb. Txawm li ntawd los, cov thawj coj tseem taug xaiv hais phem txog Yexus kom nws puas koob puas npe. (Malakaus 15:10; Yauhas 11:47, 48; 12:12, 13, 19) Qhov no qhia peb li cas xwb? Tej zaum muaj ib co kwvtij nkauj muam hauv lub koom txoos coj tau zoo thiab sawvdaws nyiam lawv heev. Peb yuav tsum ua tib zoo xyuas peb tus kheej es tsis txhob khib lawv tiamsis xyaum lawv tus cwj pwm zoo.​—1 Kauleethaus 11:1; 3 Yauhas 11.

6. Di-autefes ua li cas xwb thaum nws khib luag?

⁶ Thaum lwm tus tau ib tes haujlwm hauv lub koom txoos. Nyob thawj 100 xyoo, Di-autefes khib cov kwvtij uas coj lub koom txoos. Nws “ntshaw ua cov ntseeg tus thawj,” nws thiaj hais tej lus phem xyav tus tubtxib Yauhas thiab lwm cov kwvtij moo. (3 Yauhas 9, 10) Yog muaj ib tes haujlwm uas peb ntshaw tiamsis lwm tus ho tau lawm, tej zaum yuav ua rau peb khib nws. Txawm tias peb yuav tsis ua phem npaum li Di-autefes los tej zaum peb yuav khib tias peb paub txoj haujlwm ntawd zoo dua thiab tseem yuav ua tau zoo tshaj nws, ua cas peb ho tsis tau.

7. Yog peb khib luag ces yuav ua li cas rau peb?

⁷ Kev khib xeeb zoo ib yam li nroj tsuag. Thaum tuaj nroj tsuag lawm yeej nyuaj heev rau peb dob kom tu noob. Ib yam li ntawd, yog peb khib lwm tus ces yuav nyuaj heev rau peb muab dob tawm hauv peb lub siab. Yog peb muab hlob thiab tsuas xav txog peb tus kheej nkaus xwb ces yuav ua rau peb hajyam khib luag. Zoo ib yam li nroj tsuag laum tsob paj kom tsis txhob loj, yog peb khib luag ces peb yuav tsis muaj kev hlub, kev khuvleej, thiab tsis ua zoo rau lwm tus. Thaum peb pom nroj tsuag peb yeej muab dob kiag, ib yam li ntawd yog peb pom tias peb pib khib luag peb yuav tsum muab dob tawm hauv peb lub siab tamsim ntawd thiab. Yuav ua li cas peb thiaj tsis khib luag?

XYAUM UA NEEG TXO HWJCHIM THIAB TXAUS SIAB RAU TEJ PEB MUAJ

8. Yuav ua li cas peb thiaj tsis khib luag?

⁸ Yog peb ua neeg txo hwjchim thiab txaus siab rau tej peb muaj ces peb yuav tsis khib luag. Thaum peb txo hwjchim ces peb yuav tsis xav tias peb zoo tshaj luag thiab peb tsim nyog muaj ntau tshaj luag. (Kalatias 6:3, 4) Tus uas txaus siab rau tej nws muaj yuav tsis muab nws mus piv rau lwm tus. (1 Timautes 6:7, 8) Tus neeg uas txo hwjchim thiab txaus siab rau tej nws muaj yuav tsis khib luag tiamsis yuav zoo siab thaum nws pom lwm tus muaj lossis tau ib yam dabtsi.

9. Raws li Kalatias 5:16 thiab Filipis 2:3, 4, lub hwj huam dawb huv yuav pab tau peb li cas?

⁹ Peb yuav tsum muaj Vajtswv lub hwj huam dawb huv pab, peb thiaj tsis khib luag thiab paub txo hwjchim thiab txaus siab rau tej uas peb muaj. (Nyeem Kalatias 5:16; Filipis 2:3, 4.) Yehauvas lub hwj huam dawb huv yuav pab peb tshuaj peb lub siab lub ntsws seb peb zoo li cas. Vajtswv yuav pab kom peb tsis txhob khib tsis txhob ntshaw luag tiamsis muaj lub siab dawb siab zoo. (Phau Ntawv Nkauj 26:2; 51:10) Peb yuav kawm txog Mauxes thiab Paulus nkawd ob tug qauv seb nkawd ua li cas nkawd thiaj tsis khib luag.

10. Mauxes puas khib thaum Yehauvas muab nws lub hwj huam dawb huv faib rau ib pab txwj laus Yixalayees? (Saib daim duab ntawm lub khaum.)

¹⁰ Mauxes yog tus coj Vajtswv cov neeg thiab nws muaj haujlwm ntau heev tiamsis nws tsis vuag tag nrho tej haujlwm no rau nws tib leeg ua xwb. Muaj ib zaug Yehauvas muab nws lub hwj huam dawb huv uas nws pub rau Mauxes faib rau ib pab txwj laus Yixalayees uas sawv ncig lub Tsevntaub sib ntsib. Tom qab ntawd Mauxes hnov tias muaj 2 tug txwj laus uas tsis tuaj tiamsis nkawd kuj tau txais lub hwj huam dawb huv thiab pib coj ib yam li cov cev Vajtswv lus. Yausuas thiaj hais rau Mauxes kom nws mus cheem 2 tug txwj laus ntawd. Mauxes ua li cas xwb? Nws puas khib tias Yehauvas cia 2 tug txwj laus ntawd cev Vajtswv lus thiab? Mauxes tsis khib tiamsis nws zoo siab rau nkawd xwb. (Teev Npe 11:24-29) Mauxes tus qauv qhia peb li cas?

11. Cov txwj laus xyaum tau Mauxes li cas?

¹¹ Yog koj yog ib tug txwj laus, puas tau muaj neeg hais kom koj pab qhia ib tug los ua tes haujlwm uas koj ib txwm nyiam ua? Xws li koj nyiam ua tus coj Kev Kawm Phau Tsom Faj txhua lub lim tiam tiamsis muaj neeg hais kom koj pab qhia ib tug kwvtij los ua tes haujlwm ntawd. Koj puas yuav txhawj tsam yog koj qhia nws ces lwm hnub luag yuav saib koj tsis muaj nqis lawm? Yog koj txo hwjchim ib yam li Mauxes ces koj yuav zoo siab hlo pab koj tus kwvtij kom nws txawj ua tes haujlwm ntawd thiab.

12. Cov Khixatia niaj hnub nimno zoo siab hlo ua dabtsi?

¹² Xav seb cov kwvtij uas laus lawd ho ntsib li cas ntxiv thiab. Cov kwvtij uas ua tus dhia haujlwm ntawm pab txwj laus, thaum lawv muaj 80 xyoo lawm lawv zoo siab hlo tso lawv tes haujlwm rau lwm tus ua. Cov kwvtij saib xyuas thaj tsam uas muaj hnub nyoog 70 xyoo los kuj zoo siab hlo tso lawv tes haujlwm ntawd tseg thiab mus ua lwm yam haujlwm rau Yehauvas. Thiab tsis ntev tas los no muaj coob tus thoob qab ntuj uas ua haujlwm rau Npe-ee los kuj raug xa mus tshaj tawm. Cov kwvtij nkauj muam no yeej tsis khib cov uas los ua lawv tes haujlwm.

13. Puas tsim nyog rau Paulus khib Yexus 12 tug tubtxib?

¹³ Tus tubtxib Paulus los yog ib tug uas txo hwjchim thiab txaus siab rau tej nws muaj. Txawm nws yeej sib zog mus tshaj tawm los nws tseem hais tias: “Kuv yog tus uas muaj lub hwjchim nqis dua cov timthawj [lossis tubtxib] huv tibsi, kuv tsis tsimnyog tau lub npe hu ua timthawj.” (1 Kauleethaus 15:9, 10) Yexus 12 tug tubtxib nrog nraim nws thaum nws mus tshaj tawm tiamsis twb yog tom qab Yexus tuag thiab sawv rov qab los lawm, Paulus mam li los ua ib tug Khixatia. Txawm tias Paulus tau ua ib tug tubtxib “rau lwm Haivneeg” los nws tsis tau ua Yexus 12 tug tubtxib ntawd ib tug. (Loos 11:13; Tes Haujlwm 1:21-26) Paulus puas khib tias nws tsis tau nrog Yexus ua ke li 12 tug tubtxib ntawd thiab ua lawv tes haujlwm? Nws tsis khib tiamsis nws yeej txaus siab rau nws tes haujlwm.

14. Yog peb txo hwjchim thiab txaus siab rau tej peb muaj ces peb yuav ua li cas?

¹⁴ Yog peb txo hwjchim thiab txaus siab rau tej peb muaj ces peb yuav zoo li Paulus es saib taus cov uas Yehauvas muab haujlwm rau lawv ua. (Tes Haujlwm 21:20-26) Txawm lawv zoo tsis tiav los Yehauvas xaiv tsa cov txwj laus los coj lub koom txoos Khixatia. (Efexus 4:11) Yog peb hwm cov uas Yehauvas tsa los ua cov saib xyuas peb thiab txo hwjchim mloog lawv lus ces peb yuav muaj kev sib raug zoo nrog Yehauvas thiab muaj kev sib haum xeeb nrog peb cov kwvtij nkauj muam.

HUAS TEJ UAS YUAV UA RAU SAWVDAWS NYOB SIB HAUM XEEB

15. Peb yuav tsum ua dabtsi?

¹⁵ Yog peb sib khib ces peb yuav tsis muaj kev sib haum xeeb. Peb yuav tsum tsis txhob muaj lub siab khib luag thiab tsis txhob ua kom lwm tus muaj kev sib khib. Tseem ceeb heev rau peb ua li no peb thiaj ua tau li Yehauvas sam hwm kom peb “muab siab rau ua tej uas yuav ua rau sawvdaws nyob sib haumxeeb thiab ua tej uas yuav txhawb tau lwm tus lub zog.” (Loos 14:19) Peb yuav ua li cas pab kom lwm tus tsis txhob sib khib? Thiab peb yuav ua li cas sawvdaws thiaj nyob sib haum xeeb?

16. Peb yuav pab kom lwm tus tsis txhob sib khib li cas?

¹⁶ Lub ntiajteb no xav kom peb khav txog tej uas peb muaj. (1 Yauhas 2:16) Tiamsis yog peb ua li ntawd ces yuav ua rau sawvdaws muaj kev sib khib. Tsis tas li ntawd xwb, lawv yuav xyaum tau peb tus cwj pwm thiab tej peb ua. Yog li ntawd peb yuav tsum ua li cas? Tsis txhob niaj hnub tham txog tej peb muaj lossis tham txog tej peb yuav yuav. Yog peb tuav ib tes haujlwm hauv lub koom txoos los peb yuav tau txo hwjchim. Yog peb pheej tham txog peb tes haujlwm rau lwm tus ces nyob tsam yuav ua rau lawv khib. Tiamsis yog peb xam pom lawv thiab ua lawv tsaug rau tej lawv ua ces lawv yuav zoo siab thiab peb yuav muaj kev sib haum xeeb hauv lub koom txoos.

17. Yauxej cov tijlaug hloov li cas lawm? Thiab qhov uas lawv hloov li ntawd pab tau lawv tsev neeg li cas?

¹⁷ Peb yeej ua tau kom peb txhob muaj lub siab khib luag. Cia peb rov mus tham txog Yauxej cov tijlaug. Ntau xyoo tom qab lawv ua phem rau Yauxej, lawv txawm mus ntsib nws hauv tebchaws Iziv. Ua ntej Yauxej qhia lawv tias nws yog leejtwg, nws sim nws cov tijlaug seb lawv puas tau hloov. Nws ua ib pluag mov rau nws cov kwvtij los nrog nws noj ua ke tiamsis nws muab zaub mov ntau dua rau nws tus kwv ntxawg Npeenyamees. (Chivkeeb 43:33, 34) Txawm nws ua li ntawd los nws cov tijlaug tsis khib Npeenyamees li. Lawv tsuas txhawj txog lawv tus kwv ntxawg thiab lawv txiv Yakhauj xwb. (Chivkeeb 44:30-34) Vim Yauxej cov tijlaug tso tseg tsis muaj kev sib khib lawm, lawv tsev neeg thiaj rov muaj kev sib haum xeeb. (Chivkeeb 45:4, 15) Zoo ib yam li ntawd, yog peb tsis txhob cia kom muaj kev sib khib ces yuav pab tau peb tsev neeg thiab lub koom txoos muaj kev sib haum xeeb.

18. Raws li Yakaunpaus 3:17, 18, yog peb huas ntshis kev sib haum xeeb ces yuav pab tau peb li cas?

¹⁸ Yehauvas xav kom peb tsis txhob khib luag thiab kom peb huas kev sib haum xeeb. Peb yuav tsum sib zog ua kom tau 2 yam no. Raws li peb kawm hauv zaj no, yoojyim rau peb khib luag. Tsis tas li ntawd xwb lub ntiajteb no tsuas txhawb kom peb muaj kev sib khib xwb. Tiamsis yog peb txo hwjchim, txaus siab rau tej peb muaj, thiab paub nco luag txiaj ntsig ces peb yuav tsis muaj kev sib khib. Qhov no yuav pab kom peb huas ntshis kev sib haum xeeb thiab pab tau peb ua neeg ncaj ncees.​—Nyeem Yakaunpaus 3:17, 18.