Tej Uas Peb Xav Paub
Puas yog Vajtswv lub hwj huam dawb huv tsuas pab peb ua tau 9 yam uas hais hauv Kalatias 5:22, 23 xwb?
Nqi no hais tias lub hwj huam dawb huv yuav ua rau neeg muaj kev hlub, kev xyiv fab, ua siab tus, ua siab ntev, khuvleej, ua zoo, muaj kev ntseeg, ua lub siab mos siab muag thiab paub tswj tus kheej. Tiamsis peb tsis txhob xav hais tias tag rau 9 yam no lawm xwb.
Vim li cas thiaj hais li no? Ua ntej Paulus hais cov lus no, nws hais tias: “Tej uas neeg lub siab nyiam ua, tej ntawd yog li no: kev ua nkauj ua nraug, kev phem kev qias thiab ua dog ua dig, pe dab pe mlom, ua neeb ua yaig, ua yeebncuab, sib ceg sib ntaus, sib khib, sib chim, xav ua tus hlob, sib faib ua pab ua pawg, ntshaw luag tug, quav yeeb, quav tshuaj, quav cawv, qw ua nqaj ua nqug thiab ua ntau yam uas zoo li tej no.” (Kalatias 5:19-21) Tseem tshuav ntau yam uas Paulus tsis hais xws li cov hauv Kaulauxais 3:5. Thaum nws hais txog 9 yam uas lub hwj huam pub, nws hais ntxiv tias: “Yeej tsis muaj ib txoj kevcai yuav txwv tej no hlo li.” Yog li, cov uas Paulus hais ntawd tsis yog tag nrho tej uas lub hwj huam dawb huv pab peb muaj.
Peb yuav to taub zoo txog qhov no yog peb muab tej uas lub hwj huam dawb huv pub piv rau tej uas Paulus sau rau lub koom txoos Efexus. Nws hais tias: “Twb yog qhov pom kev ntawd ua rau nej ua tau txhua yam zoo, ua neeg ncaj ncees thiab hais lus tseeb.” (Efexus 5:8, 9) “Qhov pom kev” pab peb “ua tau txhua yam zoo, ua neeg ncaj ncees thiab hais lus tseeb.” Qhov no kuj yog ib yam uas lub hwj huam dawb huv pab peb muaj thiab.
Tsis tas li ntawd xwb, peb kuj yuav to taub zoo ntxiv yog peb muab tej uas lub hwj huam dawb huv pub piv rau thaum Paulus txhawb kom Timautes “nrhiav txojkev ncaj ncees, kev hwm Vajtswv, kev ntseeg, kev hlub, kev ua siab ntev thev, thiab kev zam xeeb.” (1 Timautes 6:11, TT ) Ntawm 6 yam no muaj 3 yam uas Kalatias 5:22, 23 hais tias lub hwj huam dawb huv pab peb muaj uas yog kev ntseeg, kev hlub, thiab kev ua siab ntev thev. Tiamsis Timautes yuav tsum cia lub hwj huam dawb huv pab kom nws ua tau ib tug neeg ncaj ncees, hwm Vajtswv, thiab muaj kev zam xeeb.—Muab piv rau Kaulauxais 3:12; 2 Petus 1:5-7.
Yog li ntawd, Vajtswv lub hwj huam dawb huv pab kom peb ua tau 9 yam uas hais hauv Kalatias 5:22, 23. Tiamsis nqi no tsis yog hais tag nrho tej uas ib tug Khixatia yuav tsum muaj, tseem tshuav ntau yam ntxiv thiab. Phau Vajlugkub hais tias ib tug Khixatia ‘yuav tsum muab lub siab tshiab los coj. Lub siab tshiab ntawd Vajtswv tsim zoo li Vajtswv tus yam ntxwv, sawvdaws thiaj pom hais tias nws ua nws lub neej ncaj ncees thiab dawbhuv.’—Efexus 4:24.