“Nej cia li los nyob ze Vajtswv, Vajtswv thiaj yuav los nyob ze nej.”—Yakaunpaus 4:8
Vajtswv Puas Teb Nej Tej Lus Thov?
Nej puas tau xav dua los lawm tias: “Cas kuv twb phua hlo kuv lub siab lub ntsws rau Vajtswv los ntuj teb ntsiag to xwb?” Muaj coob leej twb thov thov los lawv tej kev nyuaj siab haj tseem nyob li qub. Puas yog Vajtswv nyiam tus twg ces nws teb tus ntawd? Phau Vajlugkub teb tias, yog peb thov raws li Vajtswv lub siab nyiam ces nws yeej yuav cuab pob ntseg mloog. Cia peb mus nyeem ob peb nqis ntawd ua ke.
VAJTSWV YEEJ CUAB POB NTSEG MLOOG.
“Rau qhov koj teb peb tej lus thov lawm. Tej neeg nyob txhua qhov yuav los cuag koj.”—Phau Ntawv Nkauj 65:2.
Muaj tej txhia pom luag lwm tus thov Vajtswv ces lawv lam npais mus npais los raws luag qab. Lawv ua li no kom lawv siab tus, tiamsis puag hauv lawv nruab siab nruab plaw, twb tsis muaj Vajtswv. Nco ntsoov tias, kev thov Vajtswv tsis yog lam ua kom peb lub siab kaj xwb. Phau Vajlugkub qhia meej meej tias Yehauvasa “nyob ze txhua tus uas thov nws, thiab txhua tus uas muab siab npuab nws. . . . nws hnov lawv tej suab thov.”—Phau Ntawv Nkauj 145:18, 19.
Yog li ntawd, Vajtswv Yehauvas xav teb txhua tus uas muaj lub siab xib rau nws tej lus thov xwb. Nws hais tias: “Nej yuav hu kuv, los cuag kuv thiab thov kuv, kuv yuav teb nej.”—Yelemi 29:12.
VAJTSWV XAV KOM NEJ LOS CUAG NWS.
“Thov Vajtswv tsis tseg tsis tu.”—Loos 12:12.
Phau Vajlugkub txhawb kom peb cia li “thov Vajtswv txhua lub sijhawm.” Yog li ntawd, Vajtswv Yehauvas yeej xav kom peb thov hu nws.—Mathais 26:41; Efexus 6:18.
Muab piv txwv li no: Muaj ob txiv tub mus txiav ntoo. Tus tub kwv yav ntoo tiamsis yav ntoo ntawd hnyav hnyav. Nws thiaj thov nws txiv pab nws kwv ib tog. Tib yam li ntawd, thaum muaj kev nyuaj siab, cia li tso siab thiab thov Vajtswv Yehauvas pab nej. Vajtswv yuav txaus siab hlo pab nej.—Pajlug 15:8; Yakaunpaus 4:8.
VAJTSWV YEEJ HMOV TSHUA NEJ.
“Vajtswv yog tus uas niaj hnub tsomkwm nej, yog li ntawd nej cia li muab nej tej kev nyuaj siab huv tibsi tso plhuav rau Vajtswv.”—1 Petus 5:7.
Nej ntsib ntau yam kev nyuaj siab ntxhov plawv. Vajtswv yuav txaus siab hlo pab nej. Kav tsij los cuag nws vim nws hmov tshua nej kawg li.
Nyob hauv phau Vajlugkub, thaum Vajntxwv Daviv ntsib ib yam dabtsi los nws yeej thov Vajtswv Yehauvas pab. (Phau Ntawv Nkauj 23:1-6) Vajtswv hlub tshua Daviv kawg nkaus li, nws thiaj mloog thiab teb Daviv tej lus thov. (Tes Haujlwm 13:22) Zoo ib yam li ntawd, Vajtswv yeej mloog peb tej lus thov vim nws hlub tshua peb tib yam nkaus.
‘KUV HLUB YEHAUVAS, VIM NWS HNOV KUV TEJ LUS’
Tus sau Phau Ntawv Nkauj yog tus hais tej lus no. Nws yeej tso siab thiab ntseeg tias Vajtswv mloog rawv nws tej lus thov. Nws txojkev ntseeg no, pab tau nws nrog Vajtswv sib raug zoo thiab txhawb tau nws lub dag lub zog thaum nws ntsib kev nyuaj siab ntxhov plawv.—Phau Ntawv Nkauj 116:1-9.
Yog peb muaj kev ntseeg yam li tus sau Phau Ntawv Nkauj, peb yuav thov Vajtswv tsis tseg tsis tu. Muaj ib tug txiv tsev hu ua Penraus (Pedro) nyob hauv tebchaws Xapee (Spain). Nws tus tub muaj 19 xyoos ua tsheb sib nraus txawm tuag nthawv nthav. Qhov no ua rau nws ntxhov siab kawg nkaus li nws thiaj tig hlo thov Vajtswv pab. Nws thov tas zaj tas zog. Nws hais tias: “Ib sij huam, cov ntseeg cia li tuaj txhawb kuv pojniam wb lub dag lub zog. Kuv paub tseeb tias twb yog Yehauvas teb kuv cov lus thov ntag.”
Ib sij huam, cov ntseeg cia li tuaj txhawb kuv pojniam wb lub dag lub zog
Tus txiv paub tias tsis tau txog lub caij lub nyoog Vajtswv tsa nkawd tus tub sawv rov muaj sia dua. Yog li ntawd, nkawd thiaj ua hnub ua hmo thov kom Vajtswv pab nkawd nyiaj taus. Tus niam hais tias: “Kev thov Vajtswv pab kom kuv thev taus txojkev tshua kuv tus metub. Tom qab kuv thov tag, kuv lub siab txawm cia li tus yees. Kuv ntseeg tias Vajtswv Yehauvas yeej pom kuv tej kev lwj siab.”
Yog li ntawd, tej sau tseg hauv phau Vajlugkub thiab tej uas sau hauv phau ntawv ntawm no, qhia tias Vajtswv yeej teb tibneeg tej lus thov, tiamsis vim li cas ho tshuav qho yam nws ho tsis teb?
a Vajtswv hu ua Yehauvas.—Khiav Dim 3:14, hauv qab taw qhia.