1921—Tau 100 Xyoo Lawm

NYOB rau hauv Phau Tsom Faj lub 1 Hlis xyoo 1921 muaj ib los lus nug rau cov Tub Kawm Vajlugkub hais tias: “Peb yuav tau maj nrawm nroos ua dabtsi rau xyoo no?” Phau Tsom Faj piav ntxiv tias nyob rau hauv Yaxayas 61:1, 2, hais kom mus tshaj tawm txoj moo zoo. ‘Yehauvas tau xaiv kuv coj txojmoo zoo mus qhia rau cov neeg pluag . . . , twb txog lub sijhawm uas Yehauvas yuav cawm nws haivneeg, thiab nws ntaus yeej lawv cov yeeb ncuab lawm.’

UA SIAB TAWV QHAWV MUS TSHAJ TAWM

Cov Tub Kawm Vajlugkub yuav tau ua siab tawv qhawv. Lawv tsis yog mus tshaj tawm “txojmoo zoo” rau cov siab mos muag xwb tiamsis yuav tshaj tawm hnub Vajtswv “ntaus yeej” nws cov yeeb ncuab.

Nyob hauv tebchaws Kanada (Canada) muaj ib tug kwvtij npe hu ua Yauhas Heelis Hakees (John Henry Hoskin), ua siab tawv qhawv mus tshaj tawm rau tibneeg tab txawm tias nws raug kev tawm tsam. Nyob rau xyoo 1921, kwvtij Hakees mus tshaj tawm ntsib ib tug xibhwb. Nws hais rau tus xibhwb tias: “Tsis txhob ua siab deb. Wb tham phau Vajlugkub, txawm tias wb hais tau siab tau qes los tsis txhob khaws chim.” Tiamsis txhua yam tsis mus raws li Kwvtij Hakees xav tseg. Nws piav ntxiv tias: “Kuv nrog tus xibhwb tham tau ob peb feeb xwb nws txawm siv ntsawm qhov rooj nrov pig poog ua rau tej qhov rais nrov ntseeg nkaws.”

Tus xibhwb txawm nthe nqho tias: “Peb twb ntseeg naj. Koj kav tsij mus qhia rau cov tsis ntseeg.” Kwvtij Hakees tswj nws tus kheej ua siab txias txias. Nws thiaj xav twj ywm rau nruab siab tias tus xibhwb no tsis coj li ib tug ntseeg Vajtswv.

Hnub tom qab tus xibhwb txawm txwv nws pawg ntseeg kom tsis txhob mloog Kwvtij Hakees. Kwvtij Hakees piav ntxiv tias: “Tus Xibhwb hais rau nws pawg ntseeg tias tej lus kuv qhia yog lus dag xwb thiab tsim nyog muag kuv tua pov tseg.” Txawm li ntawd los Kwvtij Hakees rau siab ntso mus tshaj tawm tsis tseg tsis tu thiab nrog tau coob leej ntau tus tham. Kwvtij Hakees hais tias: “Kuv nyiam mus tshaj tawm rau ntawm thaj tsam ntawv kawg nkaus li. Ib co tibneeg kuv ntsib txawm hais tias, ‘Koj thiaj li yog ib tug ntseeg Vajtswv tiag tiag.’ Lawv tos txais kuv zoo heev.”

TEJ ZAJ KAWM KOM NKAG SIAB VAJLUGKUB

Cov Tub Kawm Vajlugkub luam tej ntaub ntawv zoo li phau Tsim Dheev! uas peb siv niaj hnub niam no los kawm Vajlugkub. Phau ntawv no muaj tej zaj kawm los pab cov niam txiv thiab lawv cov menyuam kawm Vajlugkub ua ke. Tsis tas li ntawd cov niam txiv kuj muab siv los pab lawv cov menyuam tshawb nrhiav phau Vajlugkub thiab teb cov lus nug uas muaj nyob rau hauv. Ua li no yuav pab tau cov menyuam kom kawm tau Phau Vajlugkub yooj yooj yim xws li seb phau Vajlugkub muaj pes tsawg phau ntawv? Ntxiv ntawd haj tseem muaj tej lub nug xws li, “Puas yog txhua tus Khixatia yuav raug kev tsim txom?,” los pab cov hluas ua siab loj siab tawv.

Cov uas paub phau Vajlugkub zoo zoo lawd kawm tau zaj hu ua Kawm Ntawm Tej Nqe Vajlugkub (Studies in the Scriptures). Tiamsis thaum lub 12 Hlis tim 21 xyoo 1921, sawvdaws hnov lus tshaj tawm tias yuav tsis sau tej zaj kawm no ntxiv lawm mas ua rau sawvdaws xav tsis thoob vim hais tias lawv nyiam nyeem tej zaj kawm no kawg nkaus li.

IB PHAU NTAWV TAWM TSHIAB!

Phau ntawv *The Harp of God*

Daim kom tswj

Daim ntawv muaj lus nug thiab lus teb

Nyob hauv lub koom haum cov uas ntaus thawj nrhiav tswvyim seb yuav ua li cas thiaj pab tau kom muaj neeg kawm Vajlugkub zuj zus ntxiv. Nyob rau lub 11 Hlis xyoo 1921, lawv thiaj luam tawm phau ntawv uas lus Askiv hu ua The Harp of God, los pab kom tus nyeem thiaj nkag siab phau Vajlugkub thiab nkag siab Vajtswv lub homphiaj tias tibneeg muaj peev xwm nyob taus mus ib txhis. Ua li phau no yuav muab kawm li cas tiag?

Ib tug twg uas txais phau ntawv no yuav tau txais ib daim ntawv kom tswj qhia seb yuav nyeem txog qhov twg rau txhua lub lim tiam. Thiab txhua lub lim tiam nws txais ib daim ntawv uas muaj lus nug lus teb txog tej yam uas nws tau nyeem, tsis tas li ntawd hauv daim ntawv qhia seb nws yuav nyeem qhov twg rau qhov twg rau lub lim tiam yuav tuaj tom ntej.

Tus tswv tsev nyob ze rau lub koom txoos twg, ces lub koom txoos ntawd mam xa daim kom tswj thiab cov ntawv lus nug lus teb rau nws txwm 12 lub lim tiam. Feem ntau yog cov laus lossis cov mus tsis taus ib lub tsev rau ib lub tsev yog cov uas npaj tej ntaub ntawv no xa tawm. Xws li nyob tebchaws Amelikas, lub xeev Pheexauvenyia (Pennsylvania), hauv lub zos Me-vaus (Millvale), muaj ib tug muam hu ua Ana Khathaulee Nkawnaws (Anna Katherine Gardner), tau hais tias: “Thaum phau The Harp of God tawm, kuv tus niam laus Taub (Thayle) mus tsis taus kev, nws thiaj pab npaj tej ntaub ntawv xa tawm.” Thaum tus neeg txais tau phau ntawv mus nyeem tag lawm, ces mam li muaj dua ib tug hauv lub koom txoos mus xyuas thiab kawm Vajlugkub nrog nws.

TSEEM TSHUAV HAUJLWM NTAU NTXIV

Kwvtij Yauxej Luthafaw (Joseph F. Rutherford) sau ib tsab ntawv mus rau tagnrho cov koom txoos. Nws hais tias: “tsis tau muaj ib zaug uas yuav muaj tibneeg tshaj tawm txog Yehauvas coob npaum li xyoo no.” Nws hais ntxiv tias: “Peb tseem tshuav haujlwm ntau heev. Kav tsij txhawb kom lwm tus nrog nej ua tes haujlwm tshwj xeeb no kam tiag.” Cov Tub Kawm Vajlugkub yeej ua raws nraim li tau hais no. Nyob rau xyoo 1922, lawv yeej ua siab loj siab tawv mus tshaj tawm txog Yehauvas txojkev kav.

Cov Tseem Kwvtij

Cov Tub Kawm Vajlugkub hlub tshua lawv ib zej tsoom kwvtij. Lawv thiaj yog cov tseem kwvtij sib “pab thaum muaj kev txomnyem.”—Pajlug 17:17.

Nyob rau thaum lub 5 Hlis tim 31, xyoo 1921, muaj kev ntxub ntxaug loj heev nyob hauv tebchaws Amelikas, lub xeev Auklahaumas (Oklahoma), ntawm lub zos Thauxam (Tulsa). Muaj ib tug txivneej dub tawv raug iab liam tias nws ntaus ib tug pojniam tawv dawb. Tom qab ntawd muaj tshaj li 1000 tus txivneej dawb tawv txawm tuaj muab ib pab txivneej dub tawv ntaus. Qhov no ua rau koog tsev hu ua Nkalee Vawm (Greenwood) muaj kev kub ntxhov qas hnyo. Muaj 1,400 lub tsev thiab tej tsev lag luam puavleej kub hnyiab lossis raug muab tsoo pob tag. Tsis tas li ntawd luag niam hais tias muaj li 36 leej tuag tiamsis tiag mas tej zaum muaj kwvlam li 300 tus tuag rau hnub ntawd. Hnub kev ntxub ntxaug no thiaj siav npe hu ua Thauxam Lej Maxakhawm (Tulsa Race Massacre).

Muaj ib tug Tub Kawm Vajlugkub uas yog neeg dub tawv hu ua Litshaj Yauxej Hauj (Richard Joseph Hill), nyob hauv koog tsev Nkalee Vawm. Nws piav li no tias: “Hmo ntawv yog ib hmo uas peb tuaj sib txoos ua ke. Tom qab peb sib txoos tas peb txawm hnov suab phom nrov pig poog nyob rau puag tom plawv zos tuaj. Muaj neeg tua phom ib hmo nkaus tsis ntsiag li.” Thaum lub 6 Hli tim 1 uas yog ob peb hnub tom qab ntawd, los haj tseem muaj kev kub ntxhov tsis tseg tsis tu. Kwvtij Litshaj hais ntxiv tias: “Tej tibneeg zej zog tuaj qhia rau peb tias yog peb xav nrhiav chaw nkaum ces peb yuav tsum khiav mus rau hauv lub tsev loj loj nyob hauv zos.” Yog li ntawd Kwvtij Litshaj txawm coj nws pojniam thiab menyuam khiav mus nkaum hauv lub tsev loj loj ntawm lub zos Thauxam. Hauv lub tsev ntawd, tseem fwv Amelikas tau xa tub rog tuaj zov tej pejxeem, muaj kwvlam li 3,000 tus txivneej thiab pojniam dub tawv.

Nyob rau lub sijhawm ntawd, Kwvtij Athaw Kholauj (Arthur Claus), uas yog ib tug neeg dawb tawv ua siab loj nteev txeem mus xyuas seb Kwvtij Litshaj thiab nws tsevneeg nyob li cas lawm. Nws thiaj hais tias: “Thaum kuv hnov tias muaj ib pab neeg tuaj tsoo thiab hlawv tsev hauv koog tsev Nkalee Vawm, ces kuv thiaj khiav zoj mus xyuas Kwvtij Litshaj seb nws noj nyob li cas.”

Kwvtij Athaw Kholauj siv phau The Harp of God, los qhia ib pab menyuam

Thaum Kwvtij Athaw mus txog ntua ntawm Kwvtij Litshaj lub tsev nws txawm ntsib dheev ib tug txivneej dawb nqa rawv ib rab phom. Tus txivneej no thiab Kwvtij Litshaj nkawv ob lub tsev nyob sib npuab. Nws xav tias Athaw yog ib tug ntawm pab neeg tsoo thiab hlawv vaj hlawv tsev. Tus txivneej nthe nqho tias: “Vim li cas koj ho tuaj txog ntawm lub tsev no”.

Kwvtij Athaw piav ntxiv tias: “Yog tias kuv tsis ua siab txias txias qhia nws tias vim li cas kuv tuaj rau ntawd mas ntshe nws twb xuas tib phom rau kuv vau nrov poog lawm ntag. Kuv maj mam piav zoo zoo rau nws tias kuv yog Kwvtij Litshaj ib tug phoojywg kwvluag thiab kuv twb tuaj xyuas nws ntau ntau zaus lawm.” Athaw thiaj nrog tus txivneej ntawd zov Kwvtij Litshaj lub tsev.

Tau tsis ntev tom qab ntawd Athaw hnov tias Kwvtij Litshaj thiab nws tsevneeg khiav mus nkaum rau hauv ib lub tsev loj loj lawm, nws thiaj mus rau tod. Nyob rau ntawd lawv qhia Athaw tias txhua tus yuav tsum tau tus thawj tub rog npe hu ua Npalim (Barrett) tso cai ua ntej. Athaw hais tias: “Tsis yooj yim mus thov tus thawj tub rog no hlo li. Thaum kuv qhia tias kuv yuav ua li cas ces nws txawm nug kuv tias: ‘Koj puas saib xyuas tau tsev neeg no tiag tiag li maj?’ Kuv lees rau nws tias kuv yuav saib xyuas lawv.”

Thaum lawv muab daim ntawv tso cai rau Athaw ces nws txawm maj nrawm nroo nkag mus rau hauv lub tsev loj loj ntawd. Nws thiaj muab daim ntawv tso cai rau tus tub rog uas nyob zov ntawd saib. Tus tub rog txawm hais tias: “Ua cas daim ntawv no lam muaj yawg hlob lub npe sau nyob rau hauv? Koj puas paub tias koj yog thawj tug neeg uas tuaj tos tau tibneeg?” Tus tub rog thiab Athaw nkawv txawm mus nrhiav tau Kwvtij Litshaj thiab nws cov niam tub, ces lawv sawvdaws txawm zaum sib txiv qev hauv Athaw lub tsheb mus lawm.

Kwvtij Athaw yeej saib ntshis Kwvtij Litshaj thiab nws tsev tibneeg zoo zoo. Coob leej ntau tus thiaj qhuas tias peb cuab kwvtij txawj sib hlub sib pab kawg nkaus li. Athaw hais tias: “Tom qab no, tus txivneej nyob npuab Kwvtij Litshaj lub tsev saib taus Yehauvas Cov Timkhawv heev. Tsis tas li ntawd vim peb tsis xaiv ntsej xaiv muag thiaj li muaj coob leej ntau tus pib kawm Vajlugkub nrog Cov Timkhawv. Peb ib tsoom kwvtij yeej txawj sib hlub sib pab tiag tiag li. Sawvdaws teev tiam Vajtswv tib yam nkaus xwb, tsis muaj ib tug yuav loj dua ib tug li.”