Koj Yeej Muaj Taus Kev Kaj Siab

1. Peb txoj kev zoo siab yog nyob ntawm peb vam khom Vajtswv li cas?

TXOJ tseem kev zoo siab yeej kav tau ib tug neeg tiam neej. Yexus tau cev ib zaj lus qhuab qhia saum roob tias: “Cov uas pom tias lawv yuav tsum vam khom Vajtswv yog cov uas zoo siab.” (Mathais 5:3) Yexus yeej paub ntsoov tias Vajtswv Yehauvas yeej muab txoj kev ntshaw teev tiam thiab xav paub Vajtswv tso rau hauv tib neeg lub siab lub ntsws. Yehauvas yog tus Vajtswv uas muaj kev zoo siab ces cov uas teev tiam nws los yeej muaj kev zoo siab.​—1 Timautes 1:11.

2-3. (1) Raws li Yexus tau hais, leej twg kuj muaj taus kev zoo siab? (2) Nyob rau hauv zaj kawm no yuav piav txog dab tsi, thiab vim li cas ho yuav tau piav?

² Puas yog peb tsis muaj teeb meem rau hauv peb lub neej peb thiaj muaj kev zoo siab? Tsis yog. Nyob rau Yexus zaj lus qhuab qhia, nws tau hais tias “cov uas nyuaj siab ntxhov plawv,” txawm lawv tej kev txhaum los sis tej teeb meem ua rau lawv nyuaj siab los lawv yeej muaj taus kev kaj siab. Yexus cov lus no kuj hais cob coos rau “cov uas raug tsim txom vim ua ncaj ua ncees” thiab “cov uas raug thuam” vim lawv xyaum coj lub neej li Yexus lub. (Mathais 5:4, 10, 11) Tiam sis vim li cas raug tej no ho muaj taus kev zoo siab?

³ Yexus qhia rau peb tias tsis yog peb tsis muaj teeb meem es peb thiaj muaj kev kaj siab tiam sis yog peb yuav tau vam khom Yehauvas thiab muaj kev sib raug zoo nrog Nws peb thiaj muaj taus kev zoo siab. (Yakaunpaus 4:8) Nyob rau hauv zaj kawm no, yuav piav txog peb yam kom pab tau peb muaj kev kaj siab.

NYEEM THIAB KAWM PHAU VAJLUGKUB

4. Thawj yam uas pab tau peb muaj kev kaj siab yog li cas tiag? (Phau Ntawv Nkauj 1:1-3)

⁴ YAM 1: Yuav kom peb muaj taus kev kaj siab, peb yuav tau nyeem thiab kawm Vajtswv Txoj Lus. Yexus muab Vajtswv Txoj Lus piv rau tej zaub mov. Tib neeg thiab tsiaj txhu yeej yuav tsum muaj zaub mov noj thiaj ciaj taus. Tiam sis tsuas yog tib neeg xwb thiaj nyeem tau Vajtswv Txoj Lus. Yog li ntawd, peb yuav tsum tau nyeem xwv thiaj pab tau peb. Yexus thiaj li hais li no tias: “Tsis yog zaub mov xwb thiaj cawm tau neeg txoj sia, tiam sis neeg yuav tsum coj raws li txhua lo uas Vajtswv Yehauvas hais thiaj cawm tau.” (Mathais 4:4) Yog li ntawd, tsis txhob cia ib hnub dhau mus tag es tsis nyeem Vajtswv Txoj Lus. Tus uas sau phau ntawv nkauj tau hais li no tias: “Cov uas tau kev kaj siab yog cov uas hwm [Yehauvas] txoj Kevcai thiab kawm txoj kevcai ntawd nruab hnub hmo ntuj.”​—Nyeem Phau Ntawv Nkauj 1:1-3.

5-6. (1) Peb khaws tau li cas thaum nyeem Vajlugkub? (2) Tej lus nyob hauv phau Vajlugkub txhawb tau peb li cas?

⁵ Yehauvas hlub tshua peb sawv daws, nws qhia tseg cia rau hauv phau Vajlugkub kom peb thiaj txawj ua peb lub neej. Thaum peb nyeem, peb thiaj pom tias peb lub neej muaj ntsiab rau, peb thiaj li paub los nrog nws sib raug zoo, thiab paub tias nws zam tau peb tej kev txhaum. Tsis tas li ntawd, peb paub tias nws tseem npaj tseg ib lub neej zoo zoo rau peb yav tom ntej. (Yelemis 29:11) Tej yam zoo zoo peb paub no ua rau peb ua neej nyob sov siab so.

⁶ Nyob rau hauv phau Vajlugkub, yeej puv ntia tej lus qhuab ntuas kom txawj ua neej. Yog peb mloog tej lus qhuab ntuas ntawd, peb yuav ua neej nyob kaj siab lug. Thaum twg yog peb muaj kev nyuaj siab ntxhov siab hauv lub neej, cia li kav tsij nyeem Yehauvas Txoj Lus thiab zaum tsaws xav txog tej lus ntawd. Yexus hais tias: “Cov uas hnov Vajtswv tej lus thiab coj raws nraim thiaj yog cov uas tau nyob kaj siab lug.”​—Lukas 11:28.

7. Yam uas pab tau koj thaum nyeem phau Vajlugkub yog dab tsi?

⁷ Thaum koj nyeem Vajtswv Txoj Lus, maj mam ua tib zoo nyeem mus nyeem los. Muab ua piv txwv tias muaj ib tug tab tom ua ib pluag mov uas koj xis xis noj rau koj noj. Tiam sis vim koj maj maj hauj lwm los sis koj lub siab tsis nyob ntawd, koj txawm cia li muab cov zaub mov ntawd nqos pes lum tag lawm. Tom qab koj noj tag, koj txawm xav zoj tias ua cas koj ho muab nqos tsawg tsuag tag thiab tsis nco qab hais tias cov zaub mov ntawd qab li cas rau li cas. Zoo ib yam li ntawd, yog peb nyeem Vajlugkub tsawg tsuag kom tag xwb ces tej zaud peb yuav tsis nco qab tej lus uas Yehauvas hais qhia rau peb. Maj mam ua tib zoo nyeem phau Vajlugkub seb lub caij koj nyeem txog ntawd ho zoo li cas, tej suab los sis tej lus nrov zoo li cas, thiab muab tag nrho tej koj nyeem ntawd coj los ua zoo zaum tsaws xav. Yog koj nyeem ntawv li no, yuav ua rau koj txaus siab heev.

8. “Tus qhev ncaj thiab ntse” ua nws tes hauj lwm li cas? (Saib cov lus hauv qab taw qhia.)

⁸ Yexus tsa “tus qhev ncaj thiab ntse” kom pub tej yam yuav tsav tau peb txoj kev ntseeg kom raws caij raws nyoog thiab peb yeej noj seem noj so.b (Mathais 24:45) Tus qhev ncaj thiab ntse siv tej lus nyob hauv phau Vajlugkub coj los luam tawm rau peb tau nyeem, saib, thiab mloog. (1 Thexalaunikes 2:13) Vim nws qhia li no, peb thiaj paub tias Yehauvas xav li cas rau li cas tiag. Peb thiaj li nyeem Phau Tsom Faj, phau Tsim Dheev! thiab lwm cov ntaub ntawv nyob rau hauv lub vej xaij jw.org. Peb thiaj npaj tau ua ntej peb mus kev sib txoos txhua lub lim tiam thiab saib Yehauvas Cov Tim Khawv Tshooj TV txhua lub hlis uas muaj tshwm. Yog peb ua li no, yuav txhawb tau kom peb nyob kaj siab lug.

COJ YEHAUVAS TEJ KEV CAI

9. Yam ob uas pab tau peb muaj kev kaj siab yog li cas tiag?

⁹ YAM 2: Yuav kom peb muaj taus kev kaj siab, peb yuav tau coj Yehauvas tej kev cai. Tus sau phau ntawv nkauj hais tias: “Cov neeg uas mloog [Yehauvas] lus thiab ua raws li [Yehauvas] tej lus samhwm yog cov uas tau kev kaj siab.” (Phau Ntawv Nkauj 128:1) Qhov uas peb mloog Yehauvas yog peb hwm thiab saib taus nws, peb thiaj li nco ntsoov ua tej yam uas haum nws siab xwb. (Pajlug 16:6) Peb yeej yuav ua npaum li peb ua tau los coj Yehauvas tej kev cai uas hais hauv phau Vajlugkub tias qhov twg zoo qhov twg tsis zoo. (2 Kauleethaus 7:1) Peb yuav nyob kaj siab lug yog hais tias peb coj tej yam uas Yehauvas lub siab nyiam thiab ntxub tej uas Yehauvas ntxub.​—Phau Ntawv Nkauj 37:27; 97:10; Loos 12:9.

10. Raws li Loos 12:2, peb tes hauj lwm yog li cas tiag?

¹⁰ Nyeem Loos 12:2. Txawm ib tug tib neeg twg paub tias Yehauvas nyiam qhov twg ntxub qhov twg los nws yuav tau txiav txim siab seb nws puas xav ua raws li Yehauvas pom zoo. Xws li muaj ib tug tib neeg yeej paub ntsoov nom tswv tej kev cai tias kom tsav tsheb ceev npaum li cas. Tiam sis nws yuav tau txiav txim siab seb nws puas xav ua raws li ntawd. Yog nws tsis xav ces nws yuav tsav tsheb ceev dua qhov uas nom tswv tso cai kom tsav. Zoo ib yam li ntawd, yog peb twb paub Yehauvas tej kev cai lawd ces peb yuav tau qhia tias peb xav ua raws li ntawd vim yuav tsav tau peb lub neej. (Pajlug 12:28) Daviv yeej xav ib yam li ntawd, nws thiaj hais li no txog Yehauvas: “Koj yuav qhia txojkev uas mus tau txojsia rau kuv, koj nrog nraim kuv ua rau kuv txaus siab thiab zoo siab mus ibtxhis.”​—Phau Ntawv Nkauj 16:11.

11-12. (1) Yog peb txhawj xeeb los sis nyuaj siab txog ib yam twg, peb yuav tau ceev faj li cas? (2) Cov lus nyob hauv Filipis 4:8 yuav pab kom peb txawj txiav txim siab li cas txog tej peb saib, nyeem thiab mloog?

¹¹ Thaum peb muaj kev txhawj xeeb thiab nyuaj siab, tej zaum peb yuav ua ub ua no kom thiaj tsis nco qab txog peb tej teeb meem. Txawm peb ua li ntawd los nco ntsoov tias tsis txhob mus ua tej yam uas Yehauvas ntxub.​—Efexus 5:10-12, 15-17.

¹² Nyob rau hauv tsab ntawv uas Paulus sau rau cov ntseeg nyob hauv lub nroog Filipis, nws txhawb kom lawv ua tej yam uas “ncaj ncees, . . . dawb huv, . . . ntxim hlub, . . . [thiab] zoo kawg nkaus.” (Nyeem Filipis 4:8.) Txawm Paulus tsis sau tsi tsees txog tej kev lom zem uas tib neeg ua los nws tus nru lus yeej pab tau kom peb txawj xaiv tej yam peb yuav ua. Cia li xyaum li no: Thaum twg pom lo lus “yam” ces muab lo lus “tej nkauj,” “tej yeeb yaj kiab,” “tej neej neeg,” los sis “tej nkees (games)” coj los hloov. Yog peb xyaum ua li no, yuav pab tau kom peb txawj xaiv tej yam uas haum Yehauvas siab vim peb xav kho peb lub neej kom tau raws li Yehauvas tej kev cai. (Phau Ntawv Nkauj 119:1-3) Ua li no peb lub siab thiaj yuav tsis rov nkaug peb thiab peb thiaj yuav ua tau raws li yuav hais tom ntej no xwv peb thiaj muaj kev kaj siab.​—Tes Haujlwm 23:1.

NCO NTSOOV TEEV TIAM YEHAUVAS

13. Yam peb uas pab tau peb muaj kev kaj siab yog li cas tiag? (Yauhas 4:23, 24)

¹³ YAM 3: Nco ntsoov tias txoj kev teev tiam Yehauvas tseem ceeb tshaj hauv peb lub neej. Yeej tsim nyog rau peb teev tiam Yehauvas vim nws yog tus tsim peb. (Tshwmsim 4:11; 14:6, 7) Yog li ntawd, tseem ceeb heev uas peb yuav tau teev tiam Yehauvas yam li nws lub siab nyiam, kom “[raws li lub hwj huam] thiab qhov tseeb.” (Nyeem Yauhas 4:23, 24.) Peb yuav tau cia Vajtswv lub hwj huam dawb huv tshoov peb xwv peb thiaj teev tiam tau Yehauvas raws li sau tseg nyob hauv Nws Txoj Lus. Txawm raug txwv npaum twg los xij peem, peb yuav tau nco ntsoov teev tiam Yehauvas. Tam sim no muaj li 100 tawm leej kwv tij nkauj muam ntseeg raug ntes coj mus kaw yeeb vim yog lawv teev tiam Yehauvas.c Txawm muaj li no los lawv kub siab lug thov, kawm, thiab qhia lwm tus kom paub txog Vajtswv thiab nws txoj kev kav. Thaum peb raug thuam los sis raug tsim, peb yeej zoo siab tias muaj Yehauvas nyob peb tog thiab nws yeej yuav muab nqi zog rau peb.​—Yakaunpaus 1:12; 1 Petus 4:14.

IB TUG YAM NTXWV

14. Muaj li cas los raug ib tug kwv tij hluas hauv teb chaws Thatsikaxatees, thiab vim li cas?

¹⁴ Peb ib co kwv tij nkauj muam ntseeg tau raug ntau yam tiam sis lawv yeej muaj kev kaj siab vim lawv coj raws li peb yam uas peb tau hais tag los lawm. Xws li nyob hauv teb chaws Thatsikaxatees (Tajikistan), muaj ib tug kwv tij uas hnub nyoog 19 xyoos npe hu ua Ntsovidas Npanpahanaus (Jovidon Bobojonov) tsis kam mus ua tub rog. Thaum lub 10 Hli tim 4 xyoo 2019, muaj neeg tuaj nyiag nws hauv nws lub tsev coj mus kaw tau ntau ntau lub hlis thiab suav nws tam li ib tug tub sab. Txoj kev tsis ncaj ncees uas nws raug no nrov mus txog qho lub teb chaws. Lawv tshaj tawm tias nws raug ntaus thiab quab yuam kom mus ua ib tug tub rog thiab hnav tej tsoos ua rog. Muaj ib tug txiav txim hais tias nws ua tsis yog thiab muab nws rau txim. Lawv muab nws xa mus ua cev qhev hauv ib lub yeej mus txog thaum tus nom hauv lawv lub teb chaws zam nws lub txim thiab tso nws tawm. Txawm Ntsovidas raug tej no los nws yeej tuav rawv nws txoj kev ntseeg thiab nyob kaj siab lug vim nws yeej ua ntau yam kom tsav tau nws txoj kev ntseeg.

15. Thaum Ntsovidas raug kaw, nws ua dab tsi xwv thiaj pab tau nws txoj kev ntseeg?

¹⁵ Thaum Ntsovidas raug kaw, nws kub siab lug kawm txog Yehauvas tab txawm nws tsis muaj Vajlugkub los sis ib qho ntaub ntawv. Nws kawm li cas thiaj kawm tau? Vim muaj cov kwv tij nkauj muam ntseeg pheej xa zaub xa mov tuaj rau nws noj thiab sau qhov niaj hnub tshawb nrhiav rau ntawm lub hnab kom nws tau nyeem. Yog li ntawd, nws thiaj nyeem tau phau Vajlugkub thiab zaum tsaws xav rau txhua hnub. Tom qab lawv tso nws tawm hauv nkuaj los lawm, nws tau txhawb cov uas tsis tau raug yam li nws hais tias: “Cheem lub sij hawm nej nyob no tsis muaj kev txob kev txhawj dab tsi, kav tsij nyeem Vajtswv Txoj Lus thiab tej ntaub ntawv kom nej thiaj paub Yehauvas zoo zoo.”

16. Ntsovidas xav ntsoov txog dab tsi xwb?

¹⁶ Ntsovidas coj Yehauvas tej kev cai. Nws tsis xav txog tej yam qias vuab tsuab thiab tsis kam ua tej yam phem. Nws tsuas xav txog Yehauvas thiab tej yam uas Yehauvas saib muaj nqis. Ntsovidas xav txog tej Yehauvas tau tsim. Txhua tag kis, nws hnov tej me noog quaj zom zaws. Hmo ntuj, nws ntsia lub hli thiab tej hnub qub. Nws hais tias: “Txhua yam Yehauvas tau muab no ua rau kuv zoo siab thiab txhawb tau kuv lub zog kawg li.” Thaum peb pom txhua yam Yehauvas tsim thiab mloog tej Yehauvas tau qhia rau peb hauv phau Vajlugkub, peb yuav muaj kev zoo siab thiab yuav pab peb thev taus txhua yam.

17. Cov lus hauv 1 Petus 1:6, 7 yuav pab tau tej tug uas raug tib yam li Ntsovidas li cas?

¹⁷ Ntsovidas txoj kev teev tiam Yehauvas tseem ceeb tshaj rau hauv nws lub neej. Nws paub hais tias nws yuav tsum tuav rawv nws txoj kev ntseeg rau tus tseem Vajtswv. Yexus hais tias: “Nej yuav tsum pehawm [Yehauvas] uas yog nej tus Vajtswv tib leeg thiab ua nws tes haujlwm xwb!” (Lukas 4:8) Cov thawj tub rog thiab tej tub rog xav kom Ntsovidas muab nws txoj kev ntseeg tso tseg. Tiam sis txhua hnub txhua hmo, nws thov Yehauvas tsis so kom pab nws tuav rawv nws txoj kev ntseeg. Txawm nws raug tej yam tsis zoo los Ntsovidas yeej tsis tso Yehauvas tseg. Ntsovidas txoj kev ntseeg yim huab loj ntxiv tuaj xwb vim nws txoj kev ntseeg raug sim lawm.​—Nyeem 1 Petus 1:6, 7.

18. Yuav ua li cas peb thiaj muaj taus kev kaj siab?

¹⁸ Yehauvas paub tias yuav ua li cas peb thiaj muaj taus kev zoo siab. Yog tias koj coj raws li peb yam uas hais tas los no, koj yuav muaj kev kaj siab tab txawm koj muaj ntau yam kev nyuaj siab ntxhov plawv. Ntxiv ntawd koj yuav hais tias: “Haiv neeg uas lawv tus Vajtswv yog [Yehauvas] yuav tau nyob kaj siab lug.”​—Phau Ntawv Nkauj 144:15.