Qhov Zoo Qhov Phem: Yuav Coj Lub Neej Zoo Li Cas?
Vajtswv Yehauvas xav kom peb ua peb lub neej raws li nws tej lus qhia, peb thiaj yuav muaj kev zoo siab tiag tiag.
Vajtswv Yehauvas xav kom peb ua lub neej nyob kaj siab lug.
‘Kuv yog Yehauvas uas yog nej tus Vajtswv, tus uas qhia qhov zoo rau nej thiab coj nej taug txoj kev uas tsim nyog taug. Yog nej ua tib zoo mloog kuv tej lus sam hwm ces tej koob hmoov yuav ntws laub lug los rau nej ib yam li tus dej ntws tsis paub nqhuab li. Nej tej kev vam meej yuav zoo ib yam li hiav txwv ntas.’—Yaxayas 48:17, 18.
Vajtswv yog tus tsim peb thiab nws paub tias peb yuav tsum ua peb lub neej li cas thiaj zoo, nws thiaj xav kom peb coj raws li nws tej lus qhia. Peb yeej tso siab tau tias thaum peb mloog Vajtswv lus, peb lub neej yuav mus zoo thiab peb yuav tau kev kaj siab.
Vajtswv Yehauvas yeej tsis hais kom peb ua tej yam uas peb ua tsis tau.
‘Tej kev cai uas hnub no kuv qhia rau nej, nej tsis txhob xav hais tias nyuaj thiab coj tsis tau.’—2 Kevcai 30:11.
Yuav kom peb ua lub neej uas haum Vajtswv siab, peb yuav tau hloov peb txoj kev xav thiab tej uas peb ua. Vajtswv paub tias peb yeej ua tau xwb, yeej tsis nyuaj dhau rau peb. Thaum koj kawm paub txog Nws ntau zuj zus, koj yuav pom tias ‘Vajtswv tej lus yeej coj tsis nyuaj li.’—1 Yauhas 5:3.
Vajtswv Yehauvas yuav pab tus uas xav ua lub neej kom haum Vajtswv siab.
‘Kuv yog Yehauvas, nej tus Vajtswv; kuv yeej tuav rawv nej sab tes xis, thiab kuv hais rau nej hais tias, “Tsis txhob ntshai kuv yuav pab nej!”’—Yaxayas 41:13.
Vajtswv yuav pab kom peb ua lub neej haum nws siab. Nws muab nws Txoj Lus los pab thiab txhawb peb.
Muaj coob leej ntau tus thoob plaws ntiaj teb pom hais tias thaum lawv coj lawv lub neej raws li phau Vajlugkub qhia, pab tau lawv lawm hov ntau. Koj puas xav kawm ntxiv seb phau Vajlugkub pab tau koj lub neej li cas? Koj kuj kawm tau phau ntawv Nyob Kaj Siab Lug Mus Ib Txhis. Phau ntawv no muaj nyob hauv jw.org/hmn thiab muaj cov zaj kawm no:
Phau Vajlugkub Pab Tau Koj Li Cas?
Txoj Kev Cia Siab Hauv Phau Vajlugkub
Koj Tso Siab Puas Tau Rau Phau Vajlugkub?
Thaum koj kawm phau Vajlugkub, koj yuav pom tias Vajtswv Txoj Lus yeej tseem pab tau peb niaj hnub nim no. (Phau Ntawv Nkauj 111:8) Yog koj coj koj lub neej raws li tej lus hais hauv phau Vajlugkub, koj yuav tau lub neej zoo tshaj plaws. Txawm li los, Vajtswv yeej tsis yuam peb ib leeg twg. (2 Kevcai 30:19, 20; Yausuas 24:15) Peb nyias yuav tsum xaiv nyias seb peb puas coj los tsis coj raws li Vajtswv tej lus qhia.