Yuav Sib Tham Li Cas Thiaj Ua Rau Yehauvas Tau Ntsej Muag?

1-2. Ib txhia xav li cas thaum tseem sib tham kom sib paub siab?

LUB caij thaum ob tug hluas nkauj hluas nraug tab tom sib tham kom paub siab mas yog ib lub sij hawm muaj kev zoo siab heev. Koj yeej xav kom txhua yam mus rau qhov zoo thaum koj tab tom tham ib tug kom sib paub siab. Nyob rau tej ntwb ntu no, muaj coob leej ntau tus yeej muaj kev kaj siab. Nyob rau teb chaws Ethi-aupias (Ethiopia), muaj ib tug muam npe hu ua Maiv Paja hais tias: “Lub sij hawm uas kuv zoo siab tshaj mas yog lub caij thaum kuv tus txiv wb tseem yog hluas nkauj hluas nraug es sib tham kom sib paub siab. Wb tham txog tej yam uas tseem ceeb hauv wb lub neej thiab tej lub caij wb kuj sib tso dag tso luag. Kuv zoo siab kawg li uas kuv nrhiav tau ib tug hlub hlub kuv thiab kuv los kuj hlub nws heev.”

² Nyob rau teb chaws Nethawlee (Netherlands), muaj ib tug kwv tij hu ua Pov hais tias: “Kuv zoo siab kawg li uas thaum ub kuv nrog kuv tus poj niam sib tham kom paub nws zoo zoo ua ntej wb sib yuav, tiam sis nyob rau ncua sij hawm wb sib tham ntawd, wb kuj muaj ntau yam sib cov nyom.” Nyob rau hauv zaj kawm no peb yuav tham seb thaum ob tug tab tom sib tham kom sib paub siab tej zaum yuav muaj tej kev sib cov nyom twg, thiab muaj tej hauv paus ntsiab lus twg hauv phau Vajlugkub pab tau nkawd rau tej ntwb ntu no. Tsis tas li ntawd, zaj no yuav piav seb cov uas nyob hauv lub koom txoos ho pab txhawb nqa nkawd rau lub caij thaum nkawd sib tham kom paub siab li cas rau li cas.

VIM LI CAS HO SIB THAM KOM SIB PAUB SIAB?

3. Vim li cas ho sib tham kom sib paub siab? (Pajlug 20:25)

³ Txawm tias lub caij sib tham kom sib paub siab ntawd zoo heev los qhov uas ob tug ua hluas nkauj hluas nraug ntawd yuav ua tau rau nkawd sib yuav. Nco ntsoov tias hnub nkawd ua tshoob, nkawd ob leeg yuav tau cog lus tab meeg Yehauvas tias nkawd yuav sib hlub thiab sib hwm mus tas nkawd sim neej. Yog li ntawd, ua ntej yuav cog lus ua ib yam dab tsi, yuav tau muab luj zoo zoo ua ntej tag mam li cog lus. (Nyeem Pajlug 20:25.) Lub caij uas ob tug sib tham kom paub siab ntawd, nkawd yuav tau ua tib zoo txiav txim siab. Tej zaum nkawd kuj txiav txim siab sib sau los ua neej hos muaj tej zaum nkawd ho txiav txim siab tso cia nyias mus nyias. Nco ntsoov tias yog ib khub hluas nkauj hluas nraug twg ho sib tso lawm los tsis yog hais tias nkawd ib tug ho ua tsis zoo rau ib tug. Qhov uas nkawd sib tham seb puas muaj siab ntawd tsuas qhia tau tias nkawd yuav sib yuav los sis tsim nyog nyias mus nyias.

4. Peb yuav tau ua zoo xav li cas thaum pom ob tug sib tham kom muaj siab?

⁴ Yeej tseem ceeb heev rau ob tug sib tham seb nkawd puas sib muaj siab. Qhov no qhia tias kom tsis txhob cia li lam tham ib tug twg uas yus tsis xav yuav ua txij ua nkawm. Tsis yog cov tsis tau muaj txij nkawm thiaj yuav xav li no xwb tiam sis txhua leej txhua tus yuav tsum tau nco ntsoov tias kev sib tham yog li cas rau li cas. Xws li ib txhia xav tias ob tug sib tham lawm ces nkawd yuav sib yuav. Yog xav li no yuav ua puas tsuas rau cov tsis tau muaj txij nkawm li cas? Nyob rau hauv Yunaithim Xatej (United States) muaj ib tug muam tsis tau muaj txij nkawm hu ua Mim hais tias: “Vim sawv daws pom ob tug tsis tau muaj txij nkawm sib tham mas sawv daws pheej xav kom nkawd sib yuav ua txij ua nkawm. Qhov no thiaj ua rau ib txhia lam tau lam sib yuav tab txawm nkawd twb tsis sib haum. Hos tej tug hluas tsis xav nrhiav txij nkawm vim tsis xav kom raug luag tej hais.”

SIB PAUB SIAB KOM ZOO ZOO

5-6. Thaum tab tom sib tham ntawd, ob tug yuav tau sib qhia siab li cas? (1 Petus 3:4)

⁵ Yog hais tias koj tab tom nrog ib tug sib tham kom sib muaj siab, koj yuav ua li cas koj thiaj paub txiav txim tias koj yuav yuav nws ua txij ua nkawm los tsis yuav? Koj yuav tsum paub nws zoo zoo. Puas yog koj twb paub tej yam zoo txog tus tib neeg ntawd ua ntej koj pib tham nws? Tiam sis thaum koj tham nws lawd koj yuav tau ua zoo saib nws “lub siab . . . uas Vajtswv pom hais tias muaj nqis.” (Nyeem 1 Petus 3:4.) Thaum koj tab tom tham nws, koj yuav pom tias nws txoj kev sib raug zoo nrog Yehauvas zoo li cas rau li cas thiab nws tus xeeb ceem thiab txoj kev xav zoo li cas. Ntev mus ntev tuaj koj yuav tau zaum tsaws xav tias: ‘Tus no puas zoo ua txij ua nkawm?’ (Pajlug 31:26, 27, 30; Efexus 5:33; 1 Timautes 5:8) ‘Nws puas hlub thiab xav txog tej uas kuv lub siab xav tau thiab kuv puas hlub nws thiab xav txog tej uas nws nyiam? Yog nws ho ua tau ib qho twg tsis yog, kuv puas muab ntaus loj loj?’ (Loos 3:23) Nco ntsoov tias tsis yog neb coj zoo sib thooj, tiam sis yog qhov uas neb ib leeg puas txawj zam ib leeg.

⁶ Muaj tej twg uas koj yuav tau nug tus uas koj tab tom tham ntawd? Ua ntej koj yuav muab koj lub siab rau tus neeg ntawd, koj yuav tau nug seb nws tej hom phiaj rau yav tom ntej yog li cas rau li cas. Ua li puas tsim nyog rau koj nug txog tej yam xws li nws puas muaj mob muaj nkeeg, puas tiv nuj tiv nqi, los sis nws puas tau raug ib yam twg hauv nws lub neej ua rau nws muaj tus kab mob nyuaj siab? Thaum koj nyuam qhuav pib tham nws, tej zaum tsis zoo rau koj nug nws li ub li no ntau ntau. (Muab piv rau Yauhas 16:12.) Tiam sis yog nws ho yog tus nug koj ntau ntau es koj tsis tau xav qhia rau nws paub txhua yam no los koj mam hais rau nws. Txawm koj tsis tau qhia rau nws los ntev mus ntev tuaj, koj yuav tau hais rau nws paub, nws thiaj paub txiav txim seb nws yuav ua li cas rau li cas. Yog li ntawd txhob zais siab, txawm li cas los koj yuav tau qhia rau nws paub.

7. Yuav ua li cas ib leeg thiaj paub ib leeg thaum ob tug tab tom sib tham kom muaj siab? (Saib lub ntsiab “Tham Ib Tug Nyob Kev Deb.”) (Saib cov duab.)

⁷ Yuav ua li cas koj thiaj paub tus koj tham ntawd zoo zoo? Ib qho uas koj yuav paub yog nug nws li ub li no ces ua tib zoo mloog thaum nws qhia rau koj. Neb ob leeg yuav tsum tau qhia tej uas nyob hauv neb nruab siab thiab ib tug hais lus tseeb rau ib tug. (Pajlug 20:5; Yakaunpaus 1:19) Yuav kom yooj yim rau ib tug qhia siab rau ib tug yog neb ua ub ua no, noj mov, taug kev ntawm tej qhov chaw cuab cuab thaj, thiab mus tshaj tawm ua ke. Tsis tas li ntawd, neb kuj ib leeg nrog ib leeg los tau thaum muaj tej phooj ywg los sis tsev neeg nyob rau ntawd. Tej zaum coj tus koj nyiam ntawd mus ua si nrog tej phooj ywg seb nws tus cwj pwm ho hloov li cas rau li cas. Nyob rau teb chaws Nethawlee, Sawm qhia txog thaum nws tham Ab tias: “Wb mus ua tej yam uas yuav pab kom ib leeg paub ib leeg zoo. Xws li ua zaub ua mov noj los sis tu vaj tu tsev ua ke. Thaum wb ua li no, wb ib leeg thiaj pom ib leeg qhov zoo qhov phem.”

8. Yog kawm Vajlugkub ua ke yuav pab tau ob tug uas sib tham ntawd li cas?

⁸ Yog neb kawm Vajlugkub ua ke, yuav pab tau kom neb ib leeg paub ib leeg zoo zuj zus. Yog neb sib yuav lawm, neb yuav tau teem kom neb tsev neeg pe hawm Vajtswv ua ke kom thiaj muaj Vajtswv nyob rau neb txoj kev txij nkawm. (Tej Lus Qhia 4:12) Yog li ntawd, neb yuav tau lauj sij hawm los xyaum kawm thaum neb tseem tab tom sib tham. Lub sij hawm neb sib tham no, tus kwv tij Khixatias kuj tsis tau yog tus txiv tsev. Txawm li ntawd los qhov uas neb kawm Vajlugkub tsis tu ncua yuav pab kom neb ib leeg paub ib leeg txoj kev sib raug zoo nrog Yehauvas seb ruaj khov npaum li cas. Nyob rau teb chaws Yunaithim Xatej, Mas thiab nws tus poj niam nkawd pom tias kawm Vajlugkub ua ke pab tau nkawd heev. Mas hais tias: “Thaum wb tseem sib tham, wb kawm txog tej ntaub ntawv uas qhia kev sib tham, txij nkawm, thiab tsev neeg. Cov ntaub ntawv no pab tau kom wb tham txog tej yam uas wb tsis muaj cuab kav hais tshwm tim ntsej tim muag.”

LWM YAM UAS YUAV TAU XAV TXOG

9. Thaum ob tug nyuam qhuav pib sib tham, nkawd yuav qhia rau leej twg paub?

⁹ Thaum sib tham, koj yuav qhia rau leej twg paub? Neb ob leeg yuav tau txiav txim siab seb yuav qhia rau leej twg. Tej zaud neb tsuas qhia rau ob peb leeg paub xwb thaum neb nyuam qhuav pib sib tham. (Pajlug 17:27) Tej zaum neb ua li no ces lwm tus yuav tsis txhob los sis nug ntau tsav ntau yam. Tiam sis yog neb ho tsis qhia rau leej twg paub ces lwm tus yuav pab tsis tau neb thiab neb yuav ua tau tej yam yuam kev. Yog li ntawd, zoo rau neb qhia rau ob peb tug uas yuav pab tau neb paub xwv lawv thiaj tsav tau tswv yim pab neb. (Pajlug 15:22) Xws li neb tsev neeg, cov kwv tij nkauj muam uas paub tab los sis cov txwj laus.

10. Ob tug uas sib tham yuav tau ua li cas nkawd thiaj ua tau tej yam uas haum Yehauvas siab? (Pajlug 22:3)

¹⁰ Yuav ua li cas koj thiaj txuag neb txoj kev sib tham kom haum Yehauvas siab? Thaum neb ob leeg sib nyiam zuj zus ces neb yuav xav nrog ib leeg ua ke tas zaj tas zog. Yuav ua li cas koj thiaj tsis ua tej yam Yehauvas tsis nyiam? (1 Kauleethaus 6:18) Tsis txhob hais lus dev lus npua, nyob ob leeg uas tsis muaj neeg, thiab haus dej haus cawv ntau ntau. (Efexus 5:3) Tej uas hais tas no tej zaum yuav ua rau yus sib daj sib deev thiab tswj tsis taus yus lub siab kom ua qhov yog. Neb ob leeg yuav tau zaum tsaws ib sij tham ib zaug seb ib leeg nyiam li cas xwv thiaj ua tau raws li Yehauvas tej kev cai. (Nyeem Pajlug 22:3.) Nyob rau teb chaws Ethi-aupias, Tooj thiab Dawb nkawd hais tias: “Wb mus nyob tej qho chaw uas muaj neeg coob coob los sis wb ho nrog tej phooj ywg ua ke. Wb tsis lam nyob wb ob leeg hauv tsheb los sis hauv tsev. Wb tsis kam ua tej yam uas yuav ua rau kom wb ua yuam kev.”

11. Ob tug uas tab tom sib tham ntawd yuav tau ua zoo xav li cas yog nkawd sib tawb?

¹¹ Ob tug uas sib tham ntawd ib leeg puas tawb ib leeg? Thaum nkawd txoj kev sib hlub loj zuj zus ces nkawd yeej yuav sib tawb tiam sis nco ntsoov ua kom raug ntsej muag. Yuav tsis yooj yim rau nkawd ua qhov yog thaum xav pw ua niam txiv. (Xalumoos Tej Nkauj 1:2; 2:6) Tsis tas li ntawd, yog pheej sib tawb heev heev ces yuav tswj tsis taus lub siab thiab yuav tsis ua tej yam uas haum Yehauvas siab. (Pajlug 6:27) Thaum nyuam qhuav pib sib tham, yuav tau nco ntsoov tham seb neb yuav coj li cas rau li cas thiaj ua haum tej hauv paus ntsiab lus hauv phau Vajlugkub.b (1 Thexalaunikes 4:3-7) Neb yuav tau rov nug neb tus kheej li no tias: ‘Cov tib neeg nyob hauv wb lub zos xav li cas xwb thaum pom wb pheej sib tawb sib zeg? Qhov wb ua li no puas ua rau wb xav pw ua niam txiv?’

12. Yog tias ib khub hluas nkauj hluas nraug twg tsis sib haum, nkawd yuav tau ua zoo xav txog dab tsi?

¹² Koj yuav ua li cas xwb thaum neb tsis sib haum los sis muaj teeb meem? Yog tias muaj qee lub sij hawm neb hais lus tsis sib haum, puas yog neb ib leeg tsis phim yuav ib leeg? Tej thaud qee khub hluas nkauj hluas nraug yeej hais lus tsis sib haum. Qhov uas ib txoj kev txij nkawm yuav nyob ruaj khov khwv kho yog nyob ntawm seb ib leeg puas txawj zam ib leeg thiab ib leeg puas saib taus ib leeg. Qhov uas neb txawj sib kho tam sim no yuav pab tau neb txawj sib kho thaum sib yuav lawm. Neb ob leeg yuav tau tshuaj neb tus kheej li no tias: ‘Wb puas ua siab txias txias thiab ib leeg saib taus ib leeg thaum tham txog tej teeb meem wb muaj? Wb puas lees tej yam uas wb ua tsis yog thiab muab kho kom zoo? Wb ib leeg puas zam ib leeg, ib leeg puas thov txim rau ib leeg, thiab ib leeg zam txim pub rau ib leeg?’ (Efexus 4:31, 32) Tsis tas li ntawd, yog neb pheej tsis sib haum los sis sib ceg tas zaj tas zog thaum neb tseem sib tham ces thaum neb sib yuav tau los tej zaum neb yuav coj tib tug qub cwj pwm. Yog koj paub tias neb tsis sib haum ces zoo rau neb ob leeg sib tso nyias mus nyias.

13. Muaj dab tsi pab tau ib khub hluas nkauj hluas nraug kom txawj txiav txim siab seb yuav sib tham hov ntev?

¹³ Neb yuav sib tham hov ntev li? Thaum peb tsis lauj sij hawm ntev los ua ib yam twg ces tej zaum peb yuav txiav txim tsis tau qhov zoo. (Pajlug 21:5) Yog li ntawd thaum neb sib tham, neb yuav tau sej sij hawm kom ib leeg paub ib leeg zoo zoo. Nco ntsoov tsis txhob sib tham ntev tshaj li tsim nyog. Nyob hauv phau Vajlugkub hais tias: “Qhov uas tsis tau raws li lub siab vam kuj mob siab.” (Pajlug 13:12) Yog sib tham ntev ntev ces neb yuav tswj tsis taus neb lub siab uas xav pw ua niam txiv. (1 Kauleethaus 7:9) Tsis txhob xav txog qhov neb sib tham ntev li cas rau li cas tiam sis yuav tsum xav tias, “Nws tseem tshuav dab tsi kuv haj tseem tsis tau paub txog kom kuv thiaj paub txiav txim siab yuav los tsis yuav nws?’

LWM TUS YUAV PAB TXHAWB NQA NKAWD LI CAS?

14. Lwm tus ho pab tau ob tug uas sib tham ntawd li cas? (Saib daim duab.)

¹⁴ Yog tias peb paub ib khub twg tab tom sib tham, peb yuav pab nkawd li cas? Peb kuj caw tau nkawd tuaj nrog peb noj mov ua ke, pe hawm Vajtswv ua ib tse neeg ua ke, los sis mus ncig ua si. (Loos 12:13) Yog ua li no, yuav pab tau kom nkawd ib leeg paub ib leeg zoo dua. Tej zaud kuj zoo rau koj nrog nkawd mus ub mus no, caij tsheb nrog nkawd, los sis caw nkawd tuaj ntawm koj tsev kom nkawd tsis txhob tau nyob ob leeg xwb. (Kalatias 6:10) Ab hais txog lub caij thaum nws tseem tham Sawm tias: “Wb zoo siab kawg li thaum cov kwv tij nkauj muam hais tias yog wb xav kom lawv pab saib wb tom lawv tsev los tau. Ua li no wb thiaj tsis nyob wb ob leeg.” Yog tias ib khub hluas nkauj hluas nraug twg nug koj kom pab saib nkawd, koj puas xav tias qhov no yog ib txoj hau kev uas koj pab tau koj ob tug phooj ywg? Nco ntsoov tsis txhob cia nkawd nyob nkawd ob leeg xwb, thiab ua neeg paub cai es cia nkawd sib tham kom sib paub.​—Filipis 2:4.

15. Tej phooj ywg pab tau tej khub uas tab tom sib tham li cas? (Pajlug 12:18)

¹⁵ Tej yam peb hais los sis tswj tsis hais yuav txhawb tau ob tug hluas nkauj hluas nraug uas tab tom sib tham ntawd. Muaj qee zaug zoo rau peb tswj peb lub qhov ncauj es tsis txhob hais ub hais no. (Nyeem Pajlug 12:18.) Xws li peb yuav tau tswj tsis txhob maj mus qhia rau sawv daws paub tias nkawd sib tham, tej zaum nkawd kuj xav ua tus qhia rau sawv daws paub. Peb tsis txhob taug xaiv txog nkawd los sis thuam tej yam nkawd ua. (Pajlug 20:19; Loos 14:10; 1 Thexalaunikes 4:11) Tsis tas li ntawd, peb yuav tau tsis txhob nug tej yam ua rau nkawd txaj muag es kom nkawd ho sib yuav. Muaj ib tug muam npe hu ua Ci nco txog thaum nws tus txiv nkawd sib tham. Nws hais tias, “Muaj tej tug nug tias wb rooj tshoob twb npaj tau li cas lawm mas ua rau wb txaj muag kawg li vim wb twb tsis tau tham txog.”

16. Peb yuav ua li cas xwb thaum pom ib khub hluas nkauj hluas nraug sib tso?

¹⁶ Ua li yog ob tug sib tham ntawd ho txiav txim siab sib tso, peb yuav pab txhawb nkawd li cas? Peb yuav tau nco ntsoov tsis txhob nug tej yam ua rau nkawd txaj muag los sis liam tias yog tim ib tug. (1 Petus 4:15) Muaj ib tug muam hu ua Liag hais tias: “Mob kuv siab kawg li thaum kuv hnov tib neeg pheej hais tias ua cas wb lam sib tso lawm.” Nco ntsoov tias yog ib khub hluas nkauj hluas nraug twg sib tso, tsis yog tias nkawd tsis paub txiav txim siab. Qhov nkawd sib tso qhia tau tias nkawd ib leeg yeej paub ib leeg thiab xam pom tias nkawd tsis sib haum. Tej zaud qhov nkawd sib tso no yuav ua rau nkawd tu siab thiab kho siab. Yog li ntawd, peb yuav tau txhawb nkawd ob leeg.​—Pajlug 17:17.

17. Khub uas tab tom sib tham ntawd yuav tau ua li cas?

¹⁷ Raws li peb tau kawm tag los no, peb xam pom tias thaum muaj ob tug sib tham, nkawd yeej yuav ntsib teeb meem thiab yuav muaj kev zoo siab. Kab hais tias: “Qhov tseeb, thaum sib tham ntawd mas muaj ntau yam uas yuav tau ua kawg li. Tiam sis kuv zoo siab uas wb lauj sij hawm los sib paub kom zoo.” Yog ib khub twg tseem tab tom sib tham, kav tsij lauj sij hawm kom sib paub. Yog nej ua li no yuav pab tau kom nej txawj txiav txim siab seb yuav ua li cas thiaj zoo.