Tej Uas Peb Xav Paub
Thaum Yexus ua tus Tswv Pluas Hmo, 70 leej thwj tim uas nws tau txib mus qhia txoj xov zoo dua twg lawm? Puas yog lawv tso nws tseg lawm?
Thaum Yexus ua tus Tswv Pluas Hmo es 70 leej thwj tim tsis nrog lawv ua ke ntawd, tsis tau qhia tias Yexus tsis yuav lawv los sis lawv muab Yexus tso tseg lawm. Yexus tsuas xav nrog nws cov tub txib rau lub sij hawm ntawd xwb.
Yexus yeej yuav tag nrho 12 tug tub txib thiab 70 leej thwj tim. Yexus xub xaiv 12 tug tub txib tawm ntawm tag nrho nws cov thwj tim. (Lukas 6:12-16) Thaum Yexus nyob ntawm Kalilais, nws “hu nws 12 tug tub txib los” thiab “txib lawv mus tshaj tawm txog Vajtswv txoj kev kav thiab kho tib neeg tej mob zoo.” (Lukas 9:1-6) Tom qab ntawd thaum Yexus nyob hauv Yudias, nws “xaiv dua 70 leej thiab txib lawv ib nkawg ib nkawg ua nws ntej mus.” (Lukas 9:51; 10:1) Yexus xa nws cov thwj tim rau qhov txhia qhov chaw mus qhia txoj xov zoo.
Cov Yudais uas los ua Yexus cov thwj tim yeej ua Kev Cai Hla Dhau nrog lawv tsev neeg. (Khiav Dim 12:6-11, 17-20) Tsis ntev ua ntej thaum Yexus tuag, nws thiab nws cov tub txib tau mus rau nram lub nroog Yeluxalees. Nws tsis hu kom tag nrho nws cov thwj tim qhov txhia qhov chaw xws li Yudias, Kailais, thiab Pelia tuaj ua Kev Cai Hla Dhau. Yog li ntawd, Yexus yeej xav nrog nws cov tub txib ua ke xwb. Nws hais rau lawv tias: “Kuv xav xav nrog nej noj pluas hmo ua Kev Cai Hla Dhau no ua ntej kuv raug tsim txom.”—Lukas 22:15.
Tos Yexus ua li no los tshuav tsis ntev nws yuav tuag ua “Vajtswv tus Me Nyuam Yaj uas yuav ris qab ntuj neeg lub txim mus.” (Yauhas 1:29) Nws yuav tuag rau hauv lub nroog Yeluxalees uas yog qhov chaw tib neeg ib txwm tua tsiaj fij rau Vajtswv. Yexus txoj kev tuag yuav cawm tau tib neeg ntawm kev txaug kev txhaum thiab kev tuag thiab ua ntau tshaj qhov uas cov Ixayees tua yaj kom Yehauvas cawm lawv tsev neeg dim ntawm cov Iyiv. (1 Kauleethaus 5:7, 8) Vim Yexus tuag theej tib neeg lub txhoj, nws 12 tug thwj tim thiaj sawv tam li 12 tug ncej tse rau lub koom txoos Khixatias. (Efexus 2:20-22) Lub nroog Yeluxalees uas dawb huv muaj “kaum ob lub pobzeb” uas sau “tus menyuam Yaj kaum ob tug [tub txib] npe.” (Tshwmsim 21:10-14) Cov tub txib no ua ib teg hauj lwm tseem ceeb heev kom muaj raws li Vajtswv lub ntsiab. Yog li ntawd, Yexus thiaj xav kom lawv nrog nws ua Kev Cai Hla Dhau thiab nrog nws noj tus Tswv Pluas Hmo ua ke zaum kawg.
Txawm lwm cov thwj tim thiab 70 leej tsis nrog Yexus noj pluas hmo los lawv yeej tuav rawv lawv txoj kev ntseeg thiab qhov uas Yexus ua rau hmo ntawd kuj pab tau lawv. Tag nrho cov thwj tim uas tom qab no tau rais los ua cov xaiv tseg kuj yuav tau kav hauv lub nceeg vaj uas Yexus tau hais qhia rau nws cov tub txib hmo ntawd. —Lukas 22:29, 30.