Cov Niam Txiv Pab Me Nyuam Tuav Rawv Kev Ntseeg

1-2. Yog peb tej me nyuam pib nug txog Vajtswv thiab phau Vajlugkub, peb yuav tau ua li cas?

LEEJ TWG los yeej pom tias kev tu me tub me nyuam tsis yooj yim. Koj puas yog ib leej niam leej txiv uas tab tom tu me nyuam. Yehauvas yeej zoo siab heev rau koj vim koj siv zog cob koj tus me nyuam kom nws muaj kev ntseeg. (2 Kevcai 6:6, 7) Thaum peb tej me nyuam hlob zuj zus tuaj tej zaum lawv yuav pib nug txog tej yam uas peb ntseeg. Xws li, vim li cas Yehauvas tej kev cai ho txwv tsis pub ua yam ub yam no?

² Yog nws pib muaj lus nug, tsis txhob txhawj tias tsam nws tsis muaj kev ntseeg lawm. Thaum nws hlob zuj zus nws yuav tsum muaj lus nug, nws txoj kev ntseeg thiaj ruaj khov. (1 Kauleethaus 13:11) Yog li ntawd, tsis txhob txhawj. Cia li siv lub caij uas nws muaj lus nug no los pab kom nws paub xav, nws txoj kev ntseeg rau Vajtswv thiab phau Vajlugkub thiaj loj hlob.

3. Hauv zaj no peb yuav kawm txog dab tsi?

³ Hauv zaj no peb yuav kawm seb cov niam txiv yuav ua li cas thiaj pab tau tej me nyuam (1) nyias muaj nyias kev ntseeg (2) saib tej kev cai hauv phau Vajlugkub rau nqi, thiab (3) paub piav tej uas lawv ntseeg rau lwm tus. Peb kuj yuav kawm tias vim li cas zoo rau me nyuam muaj lus nug. Tsis tas li ntawd xwb, cov niam txiv yuav kawm tau tej tswv yim uas yuav pab kom lawv txawj nrog me nyuam tham txog kev ntseeg.

PAB KOM ME NYUAM MUAJ KEV NTSEEG

4. Tej zaum me nyuam yuav nug txog dab tsi, thiab vim li cas?

⁴ Txawm cov niam txiv muaj kev ntseeg los tsis tau hais tias me nyuam yuav muaj kev ntseeg ib yam. Thaum yug poob nthav los peb leej twg los yeej tsis muaj kev ntseeg. Yog li ntawd, ntev mus ntev tuaj tej zaum me nyuam yuav nug tias, ‘Ua li cas peb ho paub tias muaj Vajtswv tiag? Kuv puas ntseeg tau tej uas nyob hauv phau Vajlugkub?’ Phau Vajlugkub hais tias yeej zoo rau peb siv “tswv yim,” thiab yuav tau “ua tib zoo tshuaj saib txhua yam.” (Loos 12:1; 1 Thexalaunikes 5:21) Yog li ntawd, koj yuav ua li cas thiaj pab tau koj tus me nyuam muaj kev ntseeg?

5. Cov niam txiv yuav siv dab tsi los pab kom tej me nyuam muaj kev ntseeg rau phau Vajlugkub? (Loos 12:2)

⁵ Txhawb kom me nyuam nrhiav qhov tseeb. (Nyeem Loos 12:2.) Thaum koj tus me nyuam muaj lus nug cia li pab nws siv tej twj uas peb muaj los teb nws tej lus nug. Tej twj zoo li Yehauvas Cov Tim Khawv Phau Ntawv Tshawb Nrhiav Vajlugkub. Mus rau lub ntsiab “Phau Vajlugkub” thiab xaiv lub ntsiab me “Vajtswv Tshoov.” Yog ua li no, yuav pom tej zaj ua pov thawj tias phau Vajlugkub tsis yog tib neeg lub tswv yim, tiam sis yog Vajtswv txoj lus tiag. (1 Thexalaunikes 2:13) Yuav pom tej pov thawj twg? Yog koj tus me nyuam mus tshawb txog lub nroog Ninaves hauv Axilias teb chaws thaum ub, nws yuav pom tias yeej muaj lub nroog ntawd tiag. Yav tas los cov neeg txawj ntse ib txhia uas tsis ntseeg phau Vajlugkub thuam tias tsis muaj lub nroog Ninaves tiag. Tiam sis kwv lam xyoo 1850 tib neeg mus khawb pom lub nroog ntawd thiaj paub tias muaj raws li phau Vajlugkub tau hais tiag. (Xefaniyas 2:13-15) Tsis tas li ntawd xwb, yog koj tus me nyuam xav paub ntxiv txog thaum uas lub nroog ntawd raug rhuav tshem qhia kom nws mus saib zaj “Koj Puas Paub?” hauv Phau Tsom Faj lub 11 Hlis xyoo 2021. Tej uas los raug lub nroog ntawd muaj tiav raws nkaus li phau Vajlugkub tej lus faj lem. Yog koj tus me nyuam muab tej uas nws tshawb nrhiav hauv peb tej ntaub ntawv piv rau tej ntaub ntawv pem tsev kawm ntawv thiab lwm phau uas tej neeg txawj ntse sau tau, yeej yuav txhawb tau koj tus me nyuam txoj kev ntseeg rau phau Vajlugkub.

6. Cov niam txiv yuav ua li cas me nyuam thiaj pom tias phau Vajlugkub qhia meej tiag? Piav txog tus qauv. (Saib daim duab.)

⁶ Qhia me nyuam kom txawj muab coj los xav. Cov niam txiv yuav tau nrhiav tej lub sij hawm los nrog lawv cov me nyuam tham txog phau Vajlugkub los sis txog kev ntseeg Vajtswv. Tej zaum yuav zoo sij hawm rau nej thaum nej mus ncig xyuas tej tsev khaws qub txeeg qub teg, tej chaw zoo zoo nkauj, los sis thaum mus xyuas ib ceg Npe-ee. Xws li yog nej mus ncig xyuas tej tsev khaws qub txeeg qub teg, tsis hais mus saib tim ntsej tim muag los sis saum huab cua, cia li qhia seb yam uas nej pom ntawd ntsig txog phau Vajlugkub li cas. Yog koj ua li no, me nyuam yuav pom tias phau Vajlugkub yeej qhia meej tiag. Xws li, koj tus me nyuam puas paub tias Yehauvas lub npe tau muab txaug rau ib daim pob zeb uas qub heev li 3,000 xyoo lawm? Daim pob zeb ntawd hu ua Pob Zeb Mau-am (Moabite Stone) nyob rau lub tsev khaws qub txeeg qub teg hu ua Luvos (Louvre) hauv lub nroog Paslis, Fab Kis teb. Nim no luag kuj tau tsim dua ib daim pob zeb zoo nkaus li ntawd los ua qauv nyob hauv Yehauvas Cov Tim Khawv lub hauv paus loj, hauv Vaviv (Warwick) xeev Nus Yauj (New York). Yuav pom nyob rau chav “Phau Vajlugkub Thiab Vajtswv Lub Npe.” Daim pob zeb ntawd piav tias cov Mau-am tus Vaj Ntxwv Mesas tawm tsam cov Ixayees. Phau Vajlugkub kuj qhia li ntawd hauv 2 Vajntxwv 3:4, 5. Thaum koj tus me nyuam pom tej pov thawj no, nws yuav pom tias phau Vajlugkub qhia meej tiag ces nws yuav muaj kev ntseeg rau phau Vajlugkub.​—Muab piv rau 2 Xwmtxheej Vajntxwv 9:6.

7-8. (1) Peb kawm tau li cas los ntawm tej uas Vajtswv tsim? Piav cov qauv. (Saib daim duab.) (2) Tej lus nug twg yuav pab me nyuam kom ntseeg tias muaj ib tug Tswv Tsim?

⁷ Txhawb me nyuam kom xav txog tej uas Vajtswv tsim. Thaum nej mus rau tom liaj tom teb los sis taug kev mus pem tej roob, cia li qhia kom lawv saib ib puas tsav yam uas lawv pom. Xws li, vim li cas ho muaj tej yam uas txawj ntswj ua qab qwj? Yuav tsum muaj ib tug ntse heev los tsim thiaj muaj tau. Tej neeg tshawb fawb kawm ntau xyoo txog tej uas txawj ntswj li no. Ib tug yawg hu ua Nikaulas Famelis (Nicola Fameli) piav tias thaum suav seb tej ntawd ntswj li cas, pom tias tej ntawd yeej ntswj raws tib co zauv xwb. Tau muab cov zauv no hu ua Finpaunatshim (Fibonacci). Peb pom muaj ntau yam txawj ntswj li no, xws li tej txhia zeeg ntuj, tej plhaub qwj deg, tej nplooj, thiab tej paj hnub hlis.a

⁸ Thaum me nyuam mus kawm ntawv tej zaum lawv yuav kawm tias muaj ntau yam uas txawj ntswj txawj ncau. Xwv li, tej ntoo uas ncau ceg nyas. Tej ntoo txawj hlav ncau tej ceg loj mam ncau tej ceg me. Qhov uas txawj ncau li no tsis yog pom muaj hauv tej ntoo xwb, tiam sis kuj muaj nyob rau lwm yam thiab. Leej twg yog tus uas tsim kom tej ub tej no txawj ncau? Tej uas peb pom yeej muaj kev cai tswj tib si. Koj tus me nyuam yim xav txog tej no nws yim pom meej tias yeej yog Vajtswv tsim ib puas tsav yam tiag. (Henplais 3:4) Thaum nws hlob zuj zus kuj zoo rau koj piav tias vim li cas thiaj zoo rau peb coj raws li Vajtswv tej kev cai. Nug nws tias, “Yog Vajtswv tsim peb nws puas yuav cob qhia kom peb txawj ua neej kaj siab lug?” Ces piav rau nws tias twb yog Vajtswv muab phau Vajlugkub los qhia kom peb nrhiav tau lub neej kaj siab lug.

NASA, ESA, and the Hubble Heritage (STScl/​AURA)-ESA/​Hubble Collaboration

PAB ME NYUAM SAIB PHAU VAJLUGKUB TEJ KEV CAI RAU NQI

9. Muaj tej zaus vim li cas me nyuam ho nug txog phau Vajlugkub tej kev cai?

⁹ Yog koj tus me nyuam xav paub txog phau Vajlugkub tej kev cai, ua tib zoo mloog seb yog vim li cas nws ho nug txog tej ntawd. Puas yog nws tsis xav coj raws li phau Vajlugkub qhia los yog nws piav tsis tau rau lwm tus es nws thiaj nug xwb. Txawm li cas los yog koj nrog nws kawm phau Nyob Kaj Siab Lug Mus Ib Txhis yuav pab tau koj tus me nyuam pom tias vim li cas thiaj zoo rau peb mloog Yehauvas tej kev cai.b

10. Koj yuav ua li cas pab me nyuam xav txog lawv txoj kev sib raug zoo nrog Yehauvas?

¹⁰ Txhawb kom me nyuam saib nws txoj kev sib raug zoo nrog Yehauvas rau nqi. Thaum koj nrog me nyuam kawm phau Vajlugkub, siv cov lus nug thiab cov duab hauv phau Nyob Kaj Siab Lug Mus Ib Txhis los qhia nws, koj thiaj paub tej uas nws xav hauv nruab siab. (Pajlug 20:5) Xws li nyob hauv zaj kawm 8 tau muab Yehauvas piv rau ib tug phooj ywg uas pab hais peb ua ntej peb yuav mus ntsib teeb meem. Tom qab nyeem 1 Yauhas 5:3 tas nug nws tias, “Vim Yehauvas yog ib tug phooj ywg zoo heev, thaum nws qhia kom peb txhob ua tej ub tej no peb yuav xav li cas xwb?” Tej zaum lo lus nug no yooj yim teb heev, tiam sis yog koj nug li no tej zaum yuav pab tau me nyuam pom tias Yehauvas muab kev cai rau peb twb yog nws hlub peb xwb.​—Yaxayas 48:17, 18.

11. Yuav ua li cas thiaj pab tau me nyuam pom tias zoo rau lawv coj raws li phau Vajlugkub tej hauv paus ntsiab lus? (Pajlug 2:10, 11)

¹¹ Tham txog tej koob hmoov peb txais vim peb ua raws li Yehauvas tej kev cai. Thaum nej nyeem phau Vajlugkub los sis nqe Vajlugkub hauv phau Niaj Hnub Tshawb Nrhiav, tham seb phau Vajlugkub tej hauv paus ntsiab lus tau pab nej tsev neeg li cas. Xws li thaum hais txog kev coj ncaj. Koj tus me nyuam puas pom tias yog yus siv zog ua hauj lwm thiab coj ncaj yus yuav tau nqi zog? (Henplais 13:18) Kuj zoo rau koj piav kom me nyuam paub tias yog peb coj raws li phau Vajlugkub tej hauv paus ntsiab lus yuav tiv thaiv tau peb thiab peb tej kev xav. (Pajlug 14:29, 30) Thaum me nyuam nkag siab tias phau Vajlugkub tej hauv paus ntsiab lus pab tau lawv tiag ces lawv yuav zoo siab hlo coj raws li phau Vajlugkub qhia.​—Nyeem Pajlug 2:10, 11.

12. Ib leej txiv tau ua li cas nws tus tub thiaj ntseeg thiab xav coj li phau Vajlugkub tej hauv paus ntsiab lus?

¹² Ib leej txiv hu ua Xatij (Steve) nyob Fab Kis teb piav tias nws thiab nws poj niam tau pab nkawd tus tub hu ua Iteem (Ethan) li cas. Nkawd tus tub muaj 16 xyoo. Nkawd xav pab kom nws pom tias Yehauvas muab kev cai rau peb vim nws hlub peb. Leej txiv hais tias, “Wb nug nws tias, ‘Vim li cas Yehauvas ho xav kom ua raws li lub hauv npaus ntsiab lus no? Yehauvas tau ua li cas qhia tias nws hlub peb? Yog peb tsis coj li tej hauv paus ntsiab lus no peb yuav zoo li cas?’” Thaum nkawd nrog nkawd tus tub tham li no, pab tau nws ntseeg tias tej uas Yehauvas hais yeej yog lawm. Leej txiv hais ntxiv tias, “Wb xav kom Iteem to taub tias lub tswv yim hauv phau Vajlugkub tob tshaj tib neeg lub.”

13. Lub sij hawm twg zoo rau cov niam txiv qhia kom me nyuam paub coj raws li phau Vajlugkub tej hauv paus ntsiab lus?

¹³ Cob me nyuam kom paub coj raws li phau Vajlugkub tej hauv paus ntsiab lus. Yog koj tus me nyuam yuav tsum nyeem ib phau ntawv pem tsev kawm ntawv, siv lub sij hawm ntawd los qhia nws. Phau ntawv ntawd puas qhuas txog tej tug uas nyiam ua plees ua yi los sis nyiam sib ntaus sib tua? Yog muaj li ntawd, nug nws seb tej hauv paus ntsiab lus hauv phau Vajlugkub ho qhia li cas. (Pajlug 22:24, 25; 1 Kauleethaus 15:33; Filipis 4:8) Yog ua li no, tej zaum yuav pab kom nws paub piav nws txoj kev ntseeg rau tus xib hwb thiab cov me nyuam pem tsev kawm ntawv thaum lawv tham txog phau ntawv ntawd.

PAB ME NYUAM KOM TXAWJ PIAV NWS TXOJ KEV NTSEEG

14. Tej lub ntsiab twg yuav nyuaj rau cov hluas teb, thiab yog vim li cas?

¹⁴ Muaj tej zaum cov hluas ntshai piav lawv txoj kev ntseeg rau lwm tus. Yog lawv kawm pem tsev kawm ntawv tias tib neeg txia los ntawm tej tsiaj xwb tej zaum lawv yuav tsis pom qab teb. Vim li cas? Vim tias tej txhia xib hwb qhia cuag li muaj tseeb tiag. Nej cov ua niam ua txiv yuav pab me nyuam li cas lawv thiaj tuav rawv kev ntseeg?

15. Dab tsi yuav pab tau kom cov hluas tuav rawv kev ntseeg?

¹⁵ Pab me nyuam kom txhob txaj muag rau nws txoj kev ntseeg. Koj tus me nyuam paub tseeb tias muaj ib tug Tswv Tsim tiag, nws tsis tas yuav txaj muag rau tej xib hwb thiab cov me nyuam pem tsev kawm ntawv. (2 Timautes 1:8) Yog vim li cas? Vim tias coob tus neeg tshawb fawb yeej tsis ntseeg tias nyob nyob es cia li muaj tej yam ciaj sia. Lawv pom tias tej yam uas muaj sia yuav tsum muaj ntau yam los dho ua ke thiaj ciaj sia, yuav tsum muaj ib tug tsim xwb. Yog li ntawd, cov neeg tshawb fawb ntawd thiaj tsis ntseeg tej uas tau muab qhia me nyuam pem tsev kawm ntawv thoob ntiaj teb. Ib yam uas yuav pab tau me nyuam tuav rawv kev ntseeg yog kawm seb vim li cas lwm cov kwv tij nkauj muam ho ntseeg tias muaj ib tug tsim txhua yam ciaj sia.c

16. Cov niam txiv yuav ua li cas thiaj pab tau me nyuam txawj teb thaum luag hais tias tsis muaj ib tug Tswv Tsim? (1 Petus 3:15) (Saib daim duab.)

¹⁶ Npaj me nyuam kom txawj teb thaum luag hais tias tsis muaj ib tug Tswv Tsim. (Nyeem 1 Petus 3:15.) Yog mus kawm hauv jw.org/hmn yuav pom ntau zaj ntsig txog tus Tswv Tsim. Thaum nyeem ua ke, cia koj tus me nyuam xaiv seb zaj twg raug lwm tus siab dua. Xyaum ua ke seb koj tus me nyuam yuav teb li cas. Nco ntsoov qhia rau nws kom tsis txhob nrog luag sib cav sib ceg, tiam sis yog lawv xav tham ces nws mam ua tib zoo qhia. Piv txwv li no, yog muaj ib tug hais rau nws tias, “Kuv qhov muag tsis pom mas kuv yeej tsis ntseeg li, kuv thiaj tsis ntseeg Vajtswv.” Koj tus me nyuam kuj teb tau tias, “Yog koj tab tom taug kev hauv ib lub hav zoov es koj los txog ntawm ib lub qhov dej. Koj yuav xav li cas xwb? Puas yog muaj tib neeg khawb lub qhov dej ntawd? Yog muaj ces yuav tsum muaj ib tug tsim thiaj muaj tau lub ntiaj teb thiab txhua yam uas ciaj sia!”

17. Piav seb cov niam txiv yuav pab me nyuam li cas lawv thiaj kub siab qhia Vajlugkub rau lwm tus.

¹⁷ Txhawb me nyuam kom kub siab qhia Vajlugkub rau lwm tus. (Loos 10:10) Zoo rau koj muab qhov uas qhia Vajlugkub piv rau qhov uas xyaum ntaus nkauj. Thaum xub pib, ib tug uas ntaus nkauj nws tsuas ntaus tej zaj yooj yim xwb. Ntev mus ntev tuaj nws yuav txawj ces tsis nyuaj rau nws lawm. Ib yam li ntawd, thaum ib tug hluas xub qhia Vajlugkub nws tsuas hais yooj yim xwb. Nws piav me ntsis ua ntej ces tso ib zaj yeeb yaj kiab rau lwm tus saib. Tej zaum nws yuav hais tias, “Koj puas paub tias tej neeg tshawb fawb saib tej uas nyob puag ncig peb lawv thiaj paub tsim yam ub yam no raws li ntawd? Zaj yeeb yaj kiab no yuav piav ntxiv.” Ces tso ib zaj yeeb yaj kiab ntawm lub ntsiab me Puas Muaj Ib Tug Tsim? rau nws saib. Tom qab ntawd nug tias, “Yog tib neeg twb qhuas cov neeg tshawb fawb uas tsim ub tsim no rau peb siv ces yuav tsum haj yam qhuas tus uas tsim ib puas tsav yam rau lawv xyaum, puas yog?” Tej zaum tej lus nug no yuav ua rau cov me nyuam pem tsev kawm ntawv xav paub ntxiv txog Yehauvas.

PAB ME NYUAM KOM HAJ YAM TUAV KEV NTSEEG

18. Cov niam txiv yuav ua li cas thiaj pab tau me nyuam tuav rawv kev ntseeg Vajtswv?

¹⁸ Lub qab ntuj no feem coob yeej tsis ntseeg Yehauvas. (2 Petus 3:3) Yog li ntawd, cov niam txiv thaum nej nrog nej cov me nyuam kawm Vajlugkub cia li kawm txog tej ntsiab uas yuav pab kom lawv hwm Vajtswv Txoj Lus thiab pom tias tej uas phau Vajlugkub qhia tsuas pab tau lawv xwb. Pab kom lawv txawj muab tej uas Yehauvas tsim tau coj los xav. Qhia kom lawv to taub tej lus faj lem uas twb muaj tiav lawd. Thiab qhov tseem ceeb tshaj, cia li nrog koj cov me nyuam thov Vajtswv ua ke, thiab thov Yehauvas pab lawv. Yog koj ua li no, Yehauvas yeej yuav foom koob hmoov rau koj vim koj txhawb koj cov me nyuam kom tuav rawv kev ntseeg.​—2 Xwmtxheej Vajntxwv 15:7.