Xyaum Zam Txim Ib Yam Li Yehauvas

1-2. (1) Vim li cas ho tsis yooj yim zam ib tug twg lub txim? (2) Dib zam lwm tus lub txim li cas?

PUAS yooj yim rau koj zam ib tug twg lub txim? Yeej nyuaj heev rau coob leej ntau tus zam cov uas hais los sis ua rau lawv mob siab. Muaj tej yam uas pab tau peb kom tsis txhob chim rau lwm tus thiab zam lawv lub txim. Xws li muaj ib tug muam npe hu Dib.a Nyob rau xyoo 2017, Dib thiab nws tsev neeg tau mus xyuas Yehauvas Cov Tim Khawv lub hauv paus koom haum loj thaum nyuam qhuav qhib. Thaum lawv tsav tsheb rov los mus tsev, muaj ib lub tsheb txawm cia li los tsoo lawv lub. Ua rau Dib tuag ib tsig thiab thaum nws tsim rov qab los nws mam li paub tias nws cov me nyuam raug mob sab sab thiab nws tus txiv tau tag sim neej lawm. Thaum Dib xav txog lub sij hawm ntawd, nws hais tias, “Kuv ntshaus siab thiab tsis pom qab ua zaj twg tsav twg li.” Tom qab ntawd, Dib mam li paub tias tus uas tsav lub tsheb sab tod kuj tsis qaug tshuaj qaug cawv los sis tsis kov ub kov no. Dib thiaj li thov Yehauvas pab kom nws tus kheej muaj lub siab tus.

² Tus txiv neej uas tsav lub tsheb ntawd raug ntes thiab muab lub txim tua neeg rau nws ris. Yog tus txiav txim hais tias nws ua txhaum ces tus txiv neej ntawd yuav raug kaw. Muaj ib tug nyob hauv tsev tu plaub hais rau Dib tias tej lus uas Dib hais rau hnub ntawd yuav muab tus txiv neej tso los sis kaw tau. Dib hais tias: “Thaum rov qab tham txog hnub uas raug tsoo ntawd, kuv saib yam nkaus li muaj ib tug cia li muab kuv tej qhov txhab suam dua thiab muab ntsev nphoo rau.” Tau ob peb lub lim tiam tom qab ntawd, Dib mus zaum rau hauv lub tsev tu plaub thiab nws yuav tau hais nws zaj. Dib thov tus txiav txim kom khuv leej tus txiv neej.b Thaum Dib hais tag, tus txiav txim quaj ib pluag thiab hais tias: “Kuv ua ib tug txiav txim tau 25 lub xyoos no kuv tsis tau hnov li no ib zaug li. Kuv tsis tau pom dua ib tse neeg thov kom khuv leej tus ua txhaum. Kuv tsis tau pom dua ib tug uas muaj kev hlub thiab txawj zam txim li no.”

3. Muaj dab tsi pab tau kom Dib txawj zam txim?

³ Muaj dab tsi pab tau Dib kom txawj ua neeg zam txim? Nws xav txog Yehauvas txoj kev zam txim. (Mikhas 7:18) Thaum peb ris txiaj ntsig rau Yehauvas txoj kev zam txim ces yuav pab tau peb txawj zam lwm tus lub txim.

4. Yehauvas xav kom peb ua dab tsi? (Efexus 4:32)

⁴ Yehauvas xav kom peb zam lwm tus lub txim ib yam li nws twb zam peb lub txim lawm. (Nyeem Efexus 4:32.) Nws xav kom peb npaj peb lub siab lub ntsws zam cov uas tau ua txhaum rau peb. (Phau Ntawv Nkauj 86:5; Lukas 17:4) Nyob rau hauv zaj kawm no peb yuav kawm txog peb yam kom pab peb huab yam txawj ua neeg zam txim.

TSIS TXHOB XAV TIAS TSIS UA CAS

5. Raws li Pajlug 12:18, thaum ib tug twg ua rau peb tu siab peb xav li cas?

⁵ Tej zaud muaj tej tug yuav hais los sis ua tej yam ua rau peb mob siab heev. Tej no yim huab ua rau peb mob siab dua yog hais tias tus tib neeg ntawd yog peb tsev neeg los sis yog ib tug phooj ywg kwv luag. (Phau Ntawv Nkauj 55:12-14) Muaj qee lub sij hawm yuav ua rau peb mob siab mob ntsws yam nkaus li ib tug xuas riam lij peb lub siab ntag. (Nyeem Pajlug 12:18.) Tej zaum peb yuav xav tias puam chawj tsis txhob xav ntau ntau tiam sis yog peb ua li no ces zoo ib yam nkaus li peb muab rab riam ntawd ntxig twj ywm rau hauv peb lub qhov nqaij. Peb yuav tau tsis txhob xav tias tsis ua cas vim lub qhov nqaij yeej yuav txawj nqawm.

6. Peb yuav coj li cas thaum ib tug ua siab ua qis rau peb?

⁶ Thaum ib tug twg ua siab ua qis rau peb, tej zaud thawj yam uas peb ua yog ua npau taws vog rov qab. Nyob hauv phau Vajlugkub hais tias muaj tej zaud peb yuav chim tiam sis kom peb tsis txhob chim tas hnub. (Phau Ntawv Nkauj 4:4; Efexus 4:26) Vim li cas ho hais li ntawd? Yog peb tsis ua zoo xav ces peb yuav kheev ua tau tej yam yuam kev. Tus neeg uas tsis chim sai yuav ua tau qhov zoo qhov yog. (Yakaunpaus 1:20) Nco ntsoov tias thaum ib tug ua siab ua qis rau peb, peb yeej tswj tsis tau peb txoj kev chim tam sid tiam sis peb yeej tswj tau kom tsis txhob chim mus li rau tus neeg ntawd.

7. Peb xav li cas xwb thaum muaj ib tug ua rau peb mob siab?

⁷ Thaum lwm tus ua saib tsis taus peb, tej zaud yuav ua rau peb puas siab puas ntsws tas. Xws li muaj ib tug muam npe hu ua Ab hais tias: “Thaum kuv tseem yau, kuv txiv tso kuv niam tseg mus yuav tus poj niam uas tuaj zov kuv. Ua rau kuv ua ntsuag ciaj. Thaum kuv txiv nkawd muaj me nyuam lawm, zoo yam li kuv twb tsis muaj nuj nqis li. Nyob hauv kuv lub neej yeej tsis muaj neeg xav yuav kuv.” Muaj ib tug muam npe hu ua Ntsuab piav txog thaum nws tus txiv mus ua hluas tias: “Wb ib txwm loj hlob ua si ua ke. Wb ua ob tug tho kev ua ke! Tej nws ua mas ua rau kuv puas siab puas ntsws tag.” Muaj dua ib tug muam npe hu ua Mim hais tias: “Kuv tsis xav tias kuv tus txiv yuav ua rau kuv mob siab tag npaum. Nws qhia rau kuv tias nws zais ntshis saib tej duab liab qab. Tej no ua rau kuv xav tias ua cas nws yuav ntxeev tau siab rau kuv.”

8. (1) Vim li cas peb ho yuav tau zam lwm tus lub txim? (2) Ua neeg zam txim pab tau peb li cas? (Saib lub ntsiab “Peb Yuav Ua Li Cas Yog Muaj Leej Twg Ua Rau Peb Raug Ntshai?”)

⁸ Peb tswj tsis tau tej uas lwm tus ua thiab hais rau peb tiam sis peb yeej tswj tau tej peb hais thiab ua. Qhov uas zoo tshaj rau peb ua yog zam lawv lub txim. Peb ua li no, yeeb vim yog peb hlub Yehauvas thiab Yehauvas xav kom peb ua neeg zam txim. Yog peb pheej khaws chim thiab tsis kam zam txim ces peb yuav ua tau tej yam uas peb xav txog lig thiab yuav ua rau peb muaj mob muaj nkeeg. (Pajlug 14:17, 29, 30) Muaj ib tug muam npe hu ua Khu hais tias: “Thaum kuv chim los sis tu siab, kuv ua ntsej muag mluas mlob. Kuv noj dog noj dig. Pw los pw tsis tsaug zog. Kuv tswj tsis taus kuv lub siab mas yeej tsis yooj yim rau kuv tus txiv thiab lwm tus nrog kuv ua ke li.”

9. Vim li cas peb yuav tau tseg tsis txhob chim?

⁹ Txawm tias tus tib neeg ntawd tsis thov kom peb zam txim rau nws los peb yuav tau ua li cas xwv thiaj tsis ua rau peb puas siab puas ntsws? Ntsuab hais tias: “Tau ntev loo kuv mam li tsis chim rau kuv tus qub txiv. Thaum kuv ua li no ua rau kuv lub siab kaj nrig.” Thaum peb tseg tsis chim ces peb yuav tsis npau taws rau tus ub tus no. Tsis tas li ntawd, peb yuav tsis niaj hnub xav txog tej yam tsis zoo tiam sis peb yuav ua neej nyob luag ntxhi. (Pajlug 11:17) Tiam sis koj ho yuav ua li cas yog tias koj lub siab tsis kam zam lwm tus?

TSEG TSIS TXHOB CHIM

10. Vim li cas peb yuav tau cia lub sij hawm dhau mus kom peb thiaj tsis chim lawm? (Saib cov duab.)

¹⁰ Yuav ua li cas koj thiaj tsis chim? Yuav tau cia sij hawm ncua ntev loo kom thiaj pab tau koj. Zoo ib yam li ib tug neeg raug mob hnyav heev yuav tau ncua sij hawm me ntsis nws thiaj li rov zoo. Peb los zoo ib yam li ntawd, yuav tau cia lub sij hawm ncua ua ntej peb zam txim tau rau lwm tus.​—Tej Lus Qhia 3:3; 1 Petus 1:22.

11. Kev thov Vajtswv pab tau kom koj txawj ua neeg zam txim li cas?

¹¹ Koj yuav tau thov kom Yehauvas pab koj zam lwm tus lub txim.c Ab qhia hais tias thaum nws thov Yehauvas pab tau nws heev. Nws hais tias: “Kuv thov kom Yehauvas zam txim rau txhua yam peb tsev neeg ib leeg tau hais siab hais qis rau ib leeg yav tag los lawm. Tom qab ntawd, kuv sau ib tsab ntawv mus rau kuv txiv thiab kuv niam tshiab tias kuv zam txim rau nkawd lawm.” Ab hais tias thaum nws ua li no mas yeej nyuaj kawg li rau nws. Tiam sis nws hais tias: “Kuv cia siab twj ywm tias qhov uas kuv xyaum Yehauvas txoj kev zam txim yuav pab tau kuv txiv thiab kuv niam tshiab nkawd xav paub txog Yehauvas ntxiv.”

12. Vim li cas peb yuav tau tso siab rau Yehauvas es tsis txhob tso siab rau peb tus kheej? (Pajlug 3:5, 6)

¹² Tso siab tias Yehauvas yeej ua qhov yog. Tsis txhob xav tias tej koj xav yog lawm. (Nyeem Pajlug 3:5, 6.) Yehauvas yeej paub tias qhov twg zoo rau peb. (Yaxayas 55:8, 9) Nws yeej tsis kom peb ua ib yam twg uas yuav ua raug rau peb. Yog li ntawd thaum nws hais kom peb zam txim, peb cia li tso siab tias yuav zoo rau peb. (Phau Ntawv Nkauj 40:4; Yaxayas 48:17, 18) Yog peb ua raws li peb siab xav xwb ces peb yeej yuav tsis zam txim rau ib tug twg li. (Pajlug 14:12; Yelemis 17:9) Mim hais tias: “Thaum thawj kuv xav hais tias kuv tsis tas zam txim pub rau kuv tus txiv vim nws pheej mus saib tej duab liab qab. Kuv ntshai tsam kuv tus txiv rov qab ua rau kuv mob siab los sis nws tsis nco qab tias nws ua rau kuv puas siab puas ntsws tas. Kuv xav tias Yehauvas yuav nkag siab kuv. Tiam sis kuv xam pom tias txawm Yehauvas nkag siab kuv los tsis yog tias nws pom zoo rau kuv chim mus li. Yehauvas paub tias yeej yuav ncua sij hawm ntev me ntsis kuv lub siab mam li nqig tiam sis nws kuj xav kom kuv ua neeg zam txim.”d

XAV RAU QHOV ZOO

13. Raws li Loos 12:18-21, peb yuav tau ua li cas?

¹³ Thaum peb zam txim rau ib tug uas ua siab ua qis rau peb, tsis yog peb cia li xav tias puam chawj. Yog tias tus uas hais siab hais qis ntawd yog ib tug kwv tij los sis nkauj muam Khixatias ces peb yuav tau tham kom rov qab sib haum. (Mathais 5:23, 24) Peb tsis txhob ua npau taws vog tiam sis peb yuav tau khuv leej thiab zam nws lub txim. (Nyeem Loos 12:18-21; 1 Petus 3:9) Yuav ua li cas peb thiaj ua tau li ntawd?

14. Peb yuav tau xyaum dab tsi, thiab yog vim li cas?

¹⁴ Yehauvas tsuas nrhiav tib neeg qhov zoo xwb. Yog li ntawd, peb yuav tau xyaum Yehauvas thiab nrhiav qhov zoo ntawm tib neeg. (2 Xwmtxheej Vajntxwv 16:9; Phau Ntawv Nkauj 130:3) Yog peb tsuas nrhiav qhov phem ntawm tib neeg xwb ces peb yeej yuav pom qhov phem tiam sis yog peb nrhiav qhov zoo ces peb yeej yuav pom qhov zoo ntawm tib neeg. Thaum nrhiav qhov zoo ntawm lwm tus ces yuav yooj yim rau peb zam lawv lub txim. Xws li ib tug kwv tij npe hu ua Zeb hais tias, “Yooj yim dua rau kuv zam ib tug kwv tij yog hais tias kuv xav txog tej yam zoo nws ua dua li qhov nws ua yuam kev.”

15. Vim li cas zoo rau peb qhia rau lwm tus tias peb zam lawv lub txim?

¹⁵ Muaj ib yam uas peb yuav tau ua yog mus qhia tus tib neeg ntawd tias peb zam nws lub txim. Vim li cas? Mim hais tias: “Kuv tus txiv nug kuv tias, ‘Koj puas tau zam txim pub rau kuv?’ Thaum kuv tsa ncauj hlo hais rau nws tias, “Kuv zam txim rau koj,’ mas ua rau kuv lub pob qa tawv tag li. Kuv xam pom tias nyob hauv kuv nruab siab nruab plawv, kuv haj tseem tsis tau zam txim rau nws. Ntev mus ntev tuaj kuv mam li tsa tau ncauj hais rau nws tias, ‘Kuv zam txim rau koj.’ Thaum kuv zam nws lub txim, ua rau nws kua muag ntws si. Wb ob lub siab thiaj li nqig hlo. Kuv rov qab tso siab rau nws thiab wb kuj rov qab sib ncawg dua lawm.”

16. Koj khaws tau li cas txog kev zam txim?

¹⁶ Yehauvas xav kom peb xyaum ua neeg zam txim. (Kaulauxais 3:13) Txawm li ntawd los yeej tsis yooj yim rau peb ib leeg zam ib leeg lub txim. Peb yeej zam tau lwm tus lub txim yog peb tseg tsis chim rau nws. Thaum peb ua li no ces peb yuav pib xav qhov zoo lawm xwb.​—Saib lub ntsiab “Peb Txoj Hau Kev Uas Pab Koj Zam Txim.”

ZAM TXIM YUAV PAB TAU NTAU YAM

17. Zam lwm tus lub txim pab tau peb li cas?

¹⁷ Cia peb mus tham txog ob peb yam uas zoo rau peb zam txim. Thawj yam yog peb xyaum peb Leej Txiv Yehauvas uas yog tus muaj lub siab hlub. (Lukas 6:36) Yam ob, peb qhia tias peb ris txiaj ntsig kawg li uas Yehauvas zam peb lub txim. (Mathais 6:12) Yam peb, peb noj qab haus huv thiab peb tseem nrog lwm tus sib raug zoo.

18-19. Muaj li cas xwb yog peb zam lwm tus lub txim?

¹⁸ Thaum peb zam lwm tus lub txim, tej thaud kuj muaj tej yam zoo uas peb twb tsis ras txog. Xws li Dib tsis paub tias tus txiv neej uas nrau lawv lub tsheb ntawd twb npaj yuav txo nws txoj sia tom qab hais tshaj plaub tag. Tiam sis tus txiv neej ntawd zoo siab kawg li tom qab nws mloog Dib hais Dib zaj tag thiab zam nws lub txim. Qhov no ua rau tus txiv neej pib kawm Vajlugkub nrog Yehauvas Cov Tim Khawv.

¹⁹ Zoo ib yam li Dib, tej thaud peb yuav xav hais tias zam lwm tus lub txim yog ib yam uas tsis yooj yim kiag li. Tiam sis tej thaud kuj yog yam zoo tshaj. (Mathais 5:7) Yog li ntawd, cia peb txhua tus ua npaum li peb ua tau los mus xyaum Yehauvas txoj kev zam txim.