Cia Luag Pab Tuav Tswv Yim

1. Yuav ua li cas peb thiaj txawj txiav txim thiab tej peb npaj tseg thiaj ntws tau zoo zoo? (Pajlug 13:10; 15:22)

PEB txhua tus yeej xav kom peb txawj txiav txim thiab peb xav kom txhua yam peb npaj tseg lawm puav leej ntws tau zoo zoo. Vajtswv Txoj Lus qhia rau peb seb yuav ua li cas rau li cas thiaj li muaj tau li no.​—Nyeem Pajlug 13:10; 15:22.

2. Yehauvas cog lus li cas rau peb?

² Yehauvas thiaj yog tus uas tsim nyog rau peb mus nrhiav kev txawj ntse thiab nrhiav tswv yim. Nws cog lus rau peb li no tias: “Kuv yuav qhia koj thiab ua koj tus tuavxam.” (Phau Ntawv Nkauj 32:8) Yehauvas cog lus tias nws yuav tsav tswv yim rau peb thiab yuav pab kom peb txawj muab siv rau hauv peb lub neej.a

3. Nyob rau hauv zaj kawm no peb yuav tham txog dab tsi?

³ Nyob rau hauv zaj kawm no peb yuav siv Vajtswv Txoj Lus los teb plaub lo lus nug no: (1) Kuv yuav tau coj cwj pwm li cas luag tej tswv yim thiaj pab tau kuv? (2) Leej twg thiaj yog tus tsav tau tswv yim rau kuv? (3) Yuav ua li cas kuv thiaj yog ib tug neeg qhib siab mloog lwm tus? (4) Vim li cas tsis zoo rau kuv cia lwm tus txiav txim siab rau kuv?

KUV YUAV TAU COJ CWJ PWM LI CAS?

4. Yuav kom luag tej tswv yim pab tau peb, peb yuav tsum muaj tus cwj pwm zoo li cas?

⁴ Peb yuav tau txo hwj chim luag tej tswv yim thiaj pab tau peb. Peb yuav tau zeem tias peb tsis muaj tswv yim txaus los mus txiav txim rau txhua yam peb ua. Yog peb tsis txo hwj chim ces Yehauvas yuav pab tsis tau peb thiab txawm peb nyeem nws Txoj Lus npaum li cas los yuav nkag ib sab pob ntseg tawm ib sab pob ntseg xwb. (Mikhas 6:8; 1 Petus 5:5) Tiam sis yog peb txo hwj chim ces peb yuav tos tsis hnyu hnov thiab yuav muab tej lus hauv phau Vajlugkub siv rau hauv peb lub neej.

5. Tej yam twg ua tau rau Vaj Ntxwv Daviv khav theeb?

⁵ Cia peb mus tham txog Vaj Ntxwv Daviv. Yog nws xav khav theeb los yeej tau vim nws txawj ntau yam. Ua ntej nws los ua vaj ntxwv, nws yog ib tug tub txawj ntaus nkauj heev. Luag kuj caw kom nws mus ntaus nkauj rau vaj ntxwv mloog. (1 Xamuyees 16:18, 19) Tom qab Yehauvas xaiv Daviv ua vaj ntxwv, Yehauvas muab nws lub hwj huam dawb huv rau Daviv. (1 Xamuyees 16:11-13) Tib neeg qhuas Daviv heev thaum nws tua tau tej yeeb ncuab thiab tua tau tus Filitees hu ua Nkauli-am tuag. (1 Xamuyees 17:37, 50; 18:7) Yog Daviv khav theeb mas nws yeej tsis yuav ib tug twg tuav tswv yim rau nws vim nws ua tau ntau yam heev. Tiam sis Daviv tsis zoo li ntawd, nws yog ib tug neeg txo hwj chim heev.

6. Ua li cas peb ho paub tias Daviv mloog lwm tus lub tswv yim? (Saib daim duab ntawm lub khaum.)

⁶ Tom qab Daviv ua vaj ntxwv, nws xaiv ib co phooj ywg kwv luag los pab nws tuav xam. (1 Xwmtxheej Vajntxwv 27:32-34) Txawm ua ntej thaum Daviv tsis tau ua vaj ntxwv los nws yeej ib txwm mloog thaum luag qhia tswv yim zoo rau nws. Nws kuj tsis yog mloog txiv neej hais xwb tiam sis nws kuj mloog tus poj niam Anpinkayis hais thiab. Anpinkayis yog Nanpas tus poj niam. Nanpas saib tsis taus leej twg, tsis ris leej twg txiaj ntsig thiab khav theeb heev. Daviv kuj txo hwj chim mloog Anpinkayis hais, nws lub siab thiaj txias thiab tsis ua txhaum.​—1 Xamuyees 25:2, 3, 21-25, 32-34.

7. Peb khaws tau li cas los ntawm Daviv tus yam ntxwv? (Tej Lus Qhia 4:13) (Saib cov duab.)

⁷ Cia peb muab Daviv tus yam ntxwv ua chaw kawm. Xws li tej zaud peb kuj txawj ntau yam los sis muaj hwj chim tswj hwm lwm tus. Txawm li ntawd los peb tsis txhob xav hais tias peb paub txhua yam lawm peb tsis yuav leej twg hais li. Zoo ib yam li Daviv, peb yuav tau qhib pob ntseg mloog thaum lwm tus qhia peb tej tswv yim zoo, tsis hais nws yuav laus yuav hluas los sis muaj los pluag. (Nyeem Tej Lus Qhia 4:13, 14.) Yog peb mloog ces tej zaum peb yuav zam tau tej teeb meem uas yuav ua rau peb los sis lwm tus raug kev nyuaj siab.

LEEJ TWG THIAJ TSAV TAU TSWV YIM RAU KUV?

8. Vim li cas Yaunathas ho qhia tau tswv yim rau Daviv?

⁸ Peb khaws tau ib yam ntxiv los ntawm Daviv tus yam ntxwv thiab. Nws ua tib zoo mloog cov uas nrog Yehauvas sib raug zoo thiab to taub tej uas nws raug ntawd. Xws li thaum Daviv xav paub tias nws puas txhim kho tau Vaj Ntxwv Xa-ules nkawd txoj kev sib raug zoo, nws thiaj li mloog seb Yaunathas yuav hais li cas. Yaunathas yog Xa-ules tus tub. Ua li Yaunathas puas yuav qhia tau rau Daviv paub tiag? Nws yeej qhia tau vim nws nrog Yehauvas sib raug zoo thiab nws kuj paub Xa-ules zoo heev. (1 Xamuyees 20:9-13) Zaj no ho qhia peb li cas?

9. Piav seb peb yuav mus nug leej twg pab peb tuav tswv yim. (Pajlug 13:20)

⁹ Thaum peb xav kom lwm tus pab peb tuav tswv yim, peb kuj mus nrog tau tus uas nrog Yehauvas sib raug zoo thiab nws kuj paub zoo txog tej uas peb raug ntawd tham.b (Nyeem Pajlug 13:20.) Muab ua piv txwv li no tias muaj ib tug kwv tij hluas xav nrhiav ib tug poj niam. Leej twg thiaj li pab tau nws tuav tau tswv yim? Yog nws mus nug ib tug uas ib txwm tsis tau yuav poj niam dua, tej zaud tus ntawd yuav siv tej tswv yim hauv phau Vajlugkub los hais rau nws. Tiam sis yog tus kwv tij ho mus nug ib khub txij nkawm uas mob siab teev tiam Yehauvas thiab kuj paub nws zoo ces nkawd yuav qhia tau tswv yim zoo dua rau nws.

10. Zaum no peb ho yuav mus tham txog dab tsi?

¹⁰ Peb tau tham txog tias peb yuav tau coj cwj pwm li cas thiab leej twg thiaj muab tau tswv yim zoo rau peb. Cia peb ho mus tham txog seb vim li cas peb ho qhia tau tias peb xav tau tswv yim thiab vim li cas tsis zoo rau peb cia lwm tus txiav txim siab rau peb.

YUAV UA LI CAS KUV THIAJ QHIB SIAB MLOOG?

11-12. (1) Peb yuav tau tseg tsis txhob ua dab tsi? (2) Thaum Lehaunpau-as yuav tau txiav txim siab, nws ua dab tsi xwb?

¹¹ Muaj tej thaud muaj tej tug tib neeg ua txuj coj li nws xav kom luag pab tswv yim tiam sis qhov tseeb tiag, yog nws xav kom luag teb raws li nws twb tau txiav txim siab lawm xwb. Tej tug tib neeg coj yam li no nws yeej tsis xav tau tswv yim tiag tiag. Tej tug no yuav tau nyeem txog Vaj Ntxwv Lehaunpau-as seb ho muaj li cas los raug nws.

¹² Lehaunpau-as tau sawv ua vaj ntxwv thaum nws txiv Xalaumoos tuag. Thaum Lehaunpau-as ua vaj ntxwv, cov pej xeem noj seem noj so tiam sis lawv nroo tias Xalaumoos muab tej hauj lwm hnyav heev rau lawv ua. Lawv txawm thov kom Lehaunpau-as muab lawv tej hauj lwm txo kom sib zog. Lehaunpau-as hais kom lawv cia sij hawm rau nws xav tso nws mam li qhia rau lawv paub. Nws thiaj li mus nug cov laus neeg uas pab nws txiv Xalaumoos seb yuav ua li cas. (1 Vajntxwv 12:2-7) Thaum cov laus neeg qhia rau nws, nws tsis yuav lawv lus. Vim li cas nws ho coj li no? Puas yog nws twb npaj tseg lawm tias nws yuav ua li cas es nws tsuas nrhiav kom lwm tus txaus siab nrog nws xwb? Tej zaud muaj tseeb li ntawd, nws thiaj li yuav cov hluas uas nrog nws ib phaum lus. (1 Vajntxwv 12:8-14) Lehaunpau-as teb cov pej xeem raws nraim li nws cov phooj ywg kwv luag qhia rau nws. Qhov no thiaj li ua rau lub teb chaws tawg thiab Lehaunpau-as muaj ib qho teeb meem tag ib qho teeb meem tuaj.​—1 Vajntxwv 12:16-19.

13. Ua li cas peb thiaj paub tias peb qhib siab mloog lwm tus qhia?

¹³ Lehaunpau-as tus yam ntxwv qhia li cas rau peb? Thaum peb nug tswv yim ntawm ib tug twg, peb yuav tsum qhib siab los mloog. Ua li cas peb thiaj paub hais tias peb qhib siab mloog? Peb yuav tau rov tshuaj peb tus kheej li no tias, ‘Puas yog kuv nug kom luag muab tswv yim rau kuv tiam sis hauv kuv lub siab kuv twb tsis kam yuav tej tswv yim ntawd lawm vim tsis raws li kuv xav tau?’ Cia peb muab ua piv txwv li yuav hais tuaj no.

14. Piav seb peb yuav tau nco ntsoov li cas thaum luag pab tswv yim rau peb. (Saib daim duab.)

¹⁴ Muab xav li no tias ib tug kwv tij tau txais ib txoj hauj lwm uas nws nyiam heev. Ua ntej nws yuav lees mus ua txoj hauj lwm ntawd, nws nug kom ib tug txwj laus pab tswv yim seb nws yuav ua li cas. Tus kwv tij qhia rau tus txwj laus tias txoj hauj lwm no nws yuav tau ncaim nws tsev neeg ntau hnub. Tus txwj laus thiaj li pab kom tus kwv tij nco ntsoov phau Vajlugkub tej hauv paus ntsiab lus tias tus txiv tsev txoj hauj lwm tseem ceeb tshaj yog saib xyuas nws tsev neeg txoj kev ntseeg. (Efexus 6:4; 1 Timautes 5:8) Tus kwv tij tsis yuav li tus txwj laus qhia rau nws, nws thiaj li mus nug ib tug dhau ib tug hauv lub koom txoos seb tus twg thiaj li hais raug li nws lub siab nyiam kom mus ua txoj hauj lwm. Raws li hais no puas yog tus kwv tij xav tau tswv yim los yog nws twb yeej txiav txim siab ua ntej tias nws yuav ua li cas lawm? Peb yuav tau nco ntsoov tias peb lub siab txawj dag ntxias heev. (Yelemis 17:9) Muaj tej thaud lub tswv yim zoo mas yog lub uas peb tsis xav hnov.

PUAS ZOO RAU KUV CIA LWM TUS TXIAV TXIM SIAB RAU KUV?

15. Peb yuav tau ceev faj tsis txhob ua dab tsi, thiab vim li cas?

¹⁵ Peb txhua tus nyias yuav tau ris nyias lub nra rau tej kev txiav txim siab uas nyias ua. (Kalatias 6:4, 5) Raws li peb tham tag los lawm, tus neeg ntse nws yuav nrhiav tswv yim hauv Vajtswv Txoj Lus thiab nrhiav tswv yim ntawm cov Khixatias uas paub tab ua ntej nws yuav ua ib yam dab tsi. Nco ntsoov tsis txhob nug kom lwm tus txiav txim siab tias peb yuav tau ua dab tsi. Muaj tej tug cia li mus nug cov neeg lawv saib taus tias, “Koj yuav ua li cas yog tias koj yog kuv?” Hos ib txhia cia li qog lwm tus xwb es tsis xav tom ntej tom qab txog tej yam uas lawv txiav txim siab ua hlo li.

16. Cov Khixatias nyob hauv Kauleethaus yuav tau txiav txim siab li cas txog tej nqaij uas tau muab fij rau mlom lawm? (1 Kauleethaus 8:7; 10:25, 26)

¹⁶ Cia peb mus tham txog cov Khixatias nyob thawj 100 xyoo hauv Kauleethaus seb lawv ho txiav txim li cas txog tej nqaij uas tau muab fij rau mlom lawm. Povlauj sau li no rau lawv tias: “Peb paub tias tej mlom yeej tsis muaj qab hau dab tsi, thiab tsuas muaj tib tug Vajtswv xwb.” (1 Kauleethaus 8:4) Muaj ib txhia hauv lub koom txoos txiav txim siab tias lawv kuj noj tau tej nqaij uas luag coj tuaj muag hauv tej kiab tej khw tom qab luag muab fij rau mlom tag lawm. Hos ib txhia lub siab tsis kheev lawv noj tej nqaij ntawd. (Nyeem 1 Kauleethaus 8:7; 10:25, 26.) Thaum zoo li no nyias yuav tau txiav txim siab rau nyias tus kheej seb yuav noj los tsis noj. Povlauj tsis tau hais kom cov Khixatias hauv Kauleethaus txiav txim siab rau lwm tus los sis qog lwm tus ua. Povlauj hais tias “Vajtswv yuav txiav txim rau txhua leej txhua tus raws li nyias tes hauj lwm.”​—Loos 14:10-12.

17. Piav seb yog peb cia li lam qog lwm tus tej kev txiav txim siab yuav zoo li cas. (Saib cov duab.)

¹⁷ Niaj hnub nim no los ho muaj tej yam twg tshwm sim rau peb thiab? Cia peb mus tham txog tej feem ntshav. Txhua tus Khixatias nyias yuav tau txiav txim rau nyias tus kheej seb nyias yuav txais yuav tej feem ntshav los tsis txais yuav.c Tej zaud peb yuav tsis nkag siab zoo txog lub ntsiab no tiam sis peb nyias yuav tau txiav txim siab rau nyias tus kheej txog tej yam no. (Loos 14:4) Yog peb pheej tos lwm tus txiav txim siab rau peb xwb ces peb yuav tsis paub txiav txim rau peb tus kheej. Peb yuav tau cob peb lub siab kom txawj txiav txim siab thiab siv tej lus hauv phau Vajlugkub los pab peb. (Henplais 5:14) Ua li thaum twg thiaj zoo rau peb nug ib tug Khixatias uas paub tab kom pab peb tuav tswv yim? Peb yuav tau mus tshawb nrhiav kom txaus tso es yog peb tsis nkag siab tias qhov hauv paus ntsiab lus hauv phau Vajlugkub hais dhos rau peb lub neej li cas ces peb mam li mus nug.

NRHIAV TSWV YIM KAM TIAG

18. Yehauvas tau ua dab tsi rau peb?

¹⁸ Yehauvas cia peb txiav txim siab rau peb tus kheej vim nws tso siab rau peb kawg nkaus li. Nws kuj muab nws Txoj Lus los pab peb thiab nws kuj pub tej phooj ywg uas muaj tswv yim pab kom peb nkag siab phau Vajlugkub tej hauv paus ntsiab lus. Qhov no qhia tau tias Yehauvas hlub tshua peb tam li ib Leej Txiv. (Pajlug 3:21-23) Peb yuav ua li cas thiaj qhia tias peb ris nws txiaj ntsig?

19. Yuav ua li cas peb thiaj ua rau Yehauvas zoo siab mus li?

¹⁹ Cov niam txiv xav pom lawv cov me nyuam teev tiam Yehauvas, ua neeg paub tab, txawj xav, muaj tswv yim, thiab paub pab lwm tus. Zoo ib yam li ntawd, Yehauvas zoo siab heev thaum nws pom peb tsav peb txoj kev ntseeg, nug tswv yim, thiab txawj txiav txim siab kom tsis txhob ua rau nws poob ntsej muag.