Koj Puas Txaus Siab Rau Tej Yam Koj Muaj?

1. Txaus siab rau tej yam koj muaj yog li cas tiag, thiab tsis yog li cas?

KOJ puas yog ib tug tib neeg uas txaus siab rau tej yam koj muaj? Tus tib neeg uas txaus siab rau tej yam nws muaj yeej kaj siab thiab muaj lub siab tus vim nws txaus siab rau tej yam uas Yehauvas muab rau nws. Nws tsis chim los sis npau taws txawm nws tsis tau qho yam. Tus neeg uas txaus siab rau nws lub neej, tsis tau qhia tias nws tsis tas yuav ua dab tsi ntxiv li lawm. Xws li ib tug Khixatias xav ua ntau yam ntxiv rau Yehauvas. (Loos 12:1; 1 Timautes 3:1) Tiam sis yog nws ho tsis tau txais tes hauj lwm nws xav tau ntawd los nws tseem kub siab lug ua tej yam uas nws ua tau rau Yehauvas.

2. Yuav muaj li cas xwb yog peb tsis txaus siab rau tej yam peb muaj?

² Yog peb tsis txaus siab rau tej peb tau ces peb yuav pib ua tej yam tsis zoo. Xws li peb yuav mus ua hauj lwm ntau heev kom peb thiaj muaj nyiaj mus yuav tej yam uas twb tsis tsim nyog yuav. Muaj ib co Khixatias txawm pib nyiag nyiaj thiab lwm yam uas lawv ntshaw. Tej zaud lawv yuav hais li no tias, ‘Kuv yeej tsim nyog tau tej no,’ ‘Kuv twb tos ntev heev lawm,’ los sis ‘Thaum kuv muaj nyiaj kuv mam them rov qab.’ Txawm peb xav li cas los qhov uas peb muab luag tug ntawd tsis haum Yehauvas siab thiab rhuav nws ntsej muag. (Pajlug 30:9) Hos muaj ib txhia Khixatias tsis tau tes hauj lwm uas lawv xav ua rau Yehauvas ces lawv kuj tsis kam teev tiam Yehauvas lawm. (Kalatias 6:9) Vim li cas ib tug uas teev tiam Yehauvas ho ua tau li no? Tej zaud tos nws ua li no los vim nws tsis txaus siab rau tej yam nws muaj.

3. Peb kawm tau dab tsi hauv Filipis 4:11, 12?

³ Peb txhua tus yeej xyaum tau kom txaus siab rau tej yam peb muaj. Tus tub txib Povlauj sau tias “txawm zoo li cas los [nws] yeej txaus siab rau tej uas [nws] muaj.” (Nyeem Filipis 4:11, 12.) Thaum Povlauj sau cov lus no nws tseem nyob rau hauv tsev loj cuj. Txawm li ntawd los nws haj tseem muaj kev zoo siab vim nws kawm tau kom txaus siab rau tej yam nws muaj. Yog peb pheej tsis txaus siab rau tej peb muaj es ntshaw ub ntshaw no ces Povlauj cov lus thiab tej yam nws raug yuav pab tau kom peb paub txaus siab rau tej yam peb muaj. Peb yuav tau xyaum kom txaus siab rau tej yam peb muaj rau qhov nyob hauv peb lub nruab siab peb yeej muaj lub siab ntshaw ub ntshaw no. Nyob rau hauv zaj kawm no peb yuav tham txog tej cwj pwm zoo uas peb yuav tau muaj xwv peb thiaj txaus siab rau tej yam peb tau.

PAUB NCO TXIAJ NTSIG

4. Vim li cas ris txiaj ntsig ho pab tau kom peb txaus siab rau tej yam peb muaj? (1 Thexalaunikes 5:18)

⁴ Ib tug tib neeg uas ris luag txiaj ntsig yeej txaus siab rau nws lub neej dua. (Nyeem 1 Thexalaunikes 5:18.) Xws li yog peb ris txiaj ntsig rau tej yam uas peb twb muaj lawm ces peb yuav tsis nco qab ntshaw tej yam uas peb xav tau. Thaum peb txaus siab thiab zoo siab rau tes hauj lwm peb tab tom ua rau Yehauvas tam sim no ces peb yuav rau siab ntso ua tej hauj lwm ntawd es tsis ntshaw kom tau dua ib tes hauj lwm tshiab ua rau Yehauvas. Twb yog vim li ntawd Yehauvas paub tias peb yuav tau nco ntsoov ris txiaj ntsig, nws thiaj qhia rau hauv nws Txoj Lus kom peb nco ntsoov ua nws tsaug thaum peb thov nws. Yog peb muaj tus cwj pwm ris txiaj ntsig ces “Vajtswv yuav pub [peb] muaj lub siab tus” thiab “neeg yeej tsis nkag siab txog Vajtswv txoj kev siab tus no.”​—Filipis 4:6, 7.

5. Tsim nyog cov Ixayees ris txiaj ntsig rau dab tsi? (Saib daim duab.)

⁵ Cia peb mus tham txog cov Ixayees seb ua li cas rau lawv. Muaj ntau ntau zaus lawv yws rau Yehauvas tias lawv nqhis tej zaub mov nyob tim Iyiv. (Teev Npe 11:4-6) Cov Ixayees lub neej nyob rau ntawm roob moj sab qhua yeej tsis yooj yim tiam sis muaj dab tsi pab kom lawv txaus siab rau lawv lub neej? Yog lawv ua tib zoo xav txog tej yam uas Yehauvas tau ua rau lawv ces lawv yuav ris txiaj ntsig rau tej yam lawv tau. Xws li thaum lawv nyob tim teb chaws Iyiv, lawv raug ua cev qhev sab heev. Yehauvas haj tseem tau tso kaum qhov xwm txheej los cawm lawv. Tom qab cov Ixayees dim, lawv mus sau tag nrho cov Iyiv tej nyiaj, kub, thiab khaub ncaws rau lawv yuav. (Khiav Dim 12:35, 36) Thaum cov Iyiv caum cov Ixayees, cov Ixayees thiaj mus khuam rau ntawm tus Dej Liab ces Yehauvas txawm ua txuj ci faib tus dej ua ob sab. Thaum cov Ixayees ho mus nyob rau ntawm roob moj sab qhua los Yehauvas kuj tso manas los rau lawv noj. Cov Ixayees twb muaj zaub mov noj es vim li cas lawv ho yws txog zaub mov? Tos lawv yws los vim lawv tsis txaus siab rau tej yam lawv tau thiab tsis ris Yehauvas txiaj ntsig.

6. Yuav ua li cas peb thiaj txawj ris luag txiaj ntsig?

⁶ Dab tsi thiaj li yuav pab tau kom koj txawj ris txiaj ntsig? Ib, lauj sij hawm los xav txog tej yam zoo uas ua rau koj zoo siab. Tej zaud muab ob peb qho uas koj ris txiaj ntsig sau tseg cia. (Nkauj Quaj Ntsuag 3:22, 23) Ob, hais qhia tias koj ris luag txiaj ntsig. Thaum lwm tus ua tau ib yam dab tsi rau koj, nco ntsoov ua lawv tsaug. Tus uas peb yuav tau ua tsaug rau tshaj yog Yehauvas. (Phau Ntawv Nkauj 75:1) Peb, nrog tej phooj ywg kwv luag uas ris luag txiaj ntsig ua ke. Yog peb tej phooj ywg tsis ris leej twg txiaj ntsig ces peb yuav xyaum coj ib yam li ntawd. Hos yog peb cov phooj ywg ris luag lwm tus txiaj ntsig ces peb kuj yuav xyaum tau lawv tus cwj pwm tib yam nkaus. (2 Kevcai 1:26-28; 2 Timautes 3:1, 2, 5) Thaum peb nrhiav kev los ua lwm tus tsaug ces peb yuav tsis nco qab txog tej yam peb ntshaw.

7. Dab tsi thiaj pab tau Atshis txaus siab rau nws lub neej?

⁷ Muaj ib tug muam npe hu ua Atshis (Aci) nyob rau teb chaws Idaunixias (Indonesia). Nws hais tias: Thaum muaj tus kab mob Khaus Viv-19 (COVID-19), kuv pheej muab kuv piv rau lwm tus kwv tij nkauj muam ces kuv txawm pib tsis txaus siab rau tej yam kuv muaj.” (Kalatias 6:4) Ua li dab tsi thiaj li pab tau nws hloov nws txoj kev xav? Atshis hais tias: “Kuv thiaj li pib suav tej koob hmoov uas kuv tau txhua txhua hnub thiab xav txog tej yam zoo uas kuv muaj vim kuv nyob hauv Yehauvas lub koom haum. Tom qab ntawd kuv thiaj li thov Yehauvas thiab ua nws tsaug rau tej ntawd. Qhov no thiaj pab tau kuv txaus siab rau tej yam kuv muaj.” Yog tias koj pib tsis txaus siab rau koj lub neej ces kav tsij xyaum Atshis tus yam ntxwv kom koj thiaj ris txiaj ntsig rau tej yam koj muaj.

TXO HWJ CHIM

8. Tau muaj li cas rau Npalus?

⁸ Npalus tus uas ceev ntawv rau Yelemis txawm pib tsis txaus siab rau nws lub neej. Npalus tes hauj lwm mas yeej tsis yooj yim. Nws yuav tau nrog Yelemis mus qhia tej yam uas yuav muaj tshwm sim rau cov Ixayees vim lawv tsis ris thiab tsis mloog Yehauvas lus. Muaj ib zaug Npalus txawm pib xav txog tej yam uas nws xav ua dua li tej uas Yehauvas kom nws ua. Yehauvas thiaj li siv Yelemis los hais rau Npalus tias: “Koj pheej yuav nrhiav kev tau zoo rau koj xwb no los? Koj tsis txhob ua li ntawd.” (Yelemis 45:3-5) Yehauvas tus nru lus uas hais rau nws yog: “Cia li txaus siab rau tej yam koj muaj.” Npalus thiaj li yuav li Yehauvas hais thiab nws haj tseem nrog Yehauvas sib raug zoo.

9. Raws li 1 Kauleethaus 4:6, 7, yog peb txo hwj chim ces peb yuav xam pom li cas? (Saib cov duab.)

⁹ Muaj tej lub sij hawm, ib tug uas teev tiam Yehauvas yuav xav hais tias nws yuav tsum tau ib tes hauj lwm tseem ceeb ua rau Yehauvas. Tej zaud nws kuj paub ub paub no, rau siab ua hauj lwm, los sis teev tiam Yehauvas tau ntau ntau xyoo lawm. Lwm cov kuj tau tes hauj lwm uas nws xav ua. Yog nws xav li no dab tsi thiaj yuav pab tau nws? Qhov zoo nws yuav tau xav txog Povlauj cov lus hauv 1 Kauleethaus 4:6, 7. (Nyeem.) Txhua yam hauj lwm peb tau ua rau Yehauvas thiab txhua yam uas peb txawj puav leej yog Yehauvas muab rau peb xwb. Tej ntawd tsis yog tsim nyog muab rau peb tiam sis txhua yam uas peb tau yog vim Yehauvas muaj kev hlub nplua mias rau peb.​—Loos 12:3, 6; Efexus 2:8, 9.

10. Dab tsi thiaj pab tau peb kom ua neeg txo hwj chim?

¹⁰ Yuav kom peb ua neeg txo hwj chim, peb yuav tau xav txog Yexus tus yam ntxwv. Xws li hmo uas nws ntxuav nws cov tub txib ko taw. Tus tub txib Yauhas sau hais tias: “Yexus paub tias Leej Txiv twb muab ib puas tsav yam cob rau nws txhais tes lawm, thiab Vajtswv yog tus txib nws los thiab nws yuav rov mus cuag Vajtswv . . . Ces nws . . . pib ntxuav cov thwj tim ko taw.” (Yauhas 13:3-5) Yeej tsim nyog lwm tus ntxuav Yexus ko taw tiam sis nws yeej tsis xav coj lub neej li ntawd. Thaum Yexus tseem nyob hauv ntiaj teb no yeej tsis muaj ib zaug uas nws xav hais tias tsim nyog nws tau ib lub neej muaj txiag nplua nuj thiab tsis txob tsis txhawj txog dab tsi. (Lukas 9:58) Yexus yeej txo hwj chim thiab nws yeej txaus siab rau nws lub neej. Nws tso tseg tau ib tug yam ntxwv zoo heev rau peb xyaum.​—Yauhas 13:15.

11. Kev txo hwj chim pab tau kom Deni txaus siab rau tej yam nws muaj li cas?

¹¹ Muaj ib tug kwv tij npe hu ua Deni (Dennis) nyob rau teb chaws Nethawlee (Netherlands) xyaum txo hwj chim ib yam li Yexus tiam sis yeej tsis yooj yim rau nws. Nws hais tias: “Thaum kuv pom ib tug twg tau ib tes hauj lwm rau Yehauvas uas kuv xav tau mas ua rau kuv chim vim kuv xav tias txoj hauj lwm ntawd yuav tsum muab rau kuv. Thaum muaj li no ces kuv mus tshawb nrhiav txog lub ntsiab txo hwj chim. Nyob rau hauv lub twj JW Library^® kuv twb mus tshawb thiab muab hom tseg qho nqe Vajlugkub txog txo hwj chim kom thaum kuv xav saib los kuv thiaj mus tshawb tau tsawg tsuag. Tsis tas li ntawd, kuv kuj theej tawm cov lus qhuab qhia uas hais txog txo hwj chim thiab kuv kuj muab coj los mloog tsis so.a Kuv kawm tau hais tias txhua yam peb ua rau Yehauvas yog los qhuas nws, tsis yog qhuas peb tus kheej. Peb txhua tus tsuas ua ib nyuag feem me me kom Yehauvas tes hauj lwm tiav xwb.” Yog koj pib tsis muaj kev zoo siab vim koj tsis tau qho yam hauj lwm rau Yehauvas ces koj yuav tau xyaum ua neeg txo hwj chim. Qhov no yuav pab kom koj tuav rawv koj txoj kev sib raug nrog Yehauvas thiab kom koj txaus siab rau tej yam koj muaj.​—Yakaunpaus 4:6, 8.

XAV TXOG YEHAUVAS TEJ LUS COG TSEG

12. Txoj kev vam kev cia siab yav tom ntej twg pab kom peb txaus siab rau tej yam peb muaj? (Yaxayas 65:21-25)

¹² Peb yuav txaus siab rau tej yam uas peb muaj yog tias peb xav txog txoj kev vam kev cia siab uas Yehauvas cog tseg rau yav tom ntej. Nyob rau hauv phau Yaxayas, Yehauvas qhia rau peb tias nws yeej paub tias peb lub neej nyuaj npaum li cas niaj hnub nim no thiab nws cog lus tias nws yuav muab tej teeb meem ntawd tshem tawm mus. (Nyeem Yaxayas 65:21-25.) Tom qab ntawd, peb yuav nyob sov siab so thiab muaj vaj muaj tsev nyob. Peb yuav ua tej yam uas peb xis ua, noj tej zaub mov qab qab thiab zoo zoo mus yug peb lub cev. Peb yuav tsis nco qab txob tsis nco qab txhawj tsam muaj dab tsi phom sij los raug peb tus kheej los sis peb tej me tub me nyuam. (Yaxayas 32:17, 18; Exekees 34:25) Peb lub neej yav tom hauv ntej yuav zoo tiag tiag li thiab yeej yuav muaj xwb thiaj tag!

13. Peb raug dab tsi tam sim no uas peb yuav tau xav ntsoov txog txoj kev vam kev cia siab yav tom ntej?

¹³ Zoo rau peb xav ntsoov txog txoj kev vam kev cia siab yav tom ntej rau qhov peb nyob rau tiam kawg lawm thiab peb tej teeb meem los yeej hnyav kawg ua rau peb thev tsis taus kiag li. (2 Timautes 3:1) Txhua txhua hnub Yehauvas yeej coj, ntxiv dag ntxiv zog, thiab txhawb peb kom peb thev taus. (Phau Ntawv Nkauj 145:14) Tsis tas li ntawd, txoj kev vam kev cia siab uas peb muaj kuj pab peb thaum peb muaj kev nyuaj siab ntxhov plawv. Xws li tej zaud koj kuj khwv tsis txaus los koob koj lub cuab lub yig. Qhov no puas qhia tias koj yuav txom nyem tas mus li? Tsis yog, vim Yehauvas cog lus tias nws yuav muab tej yam tsim nyog koj tau rau koj thiab thaum txog lub Vaj Kaj Siab nws tseem yuav muab ntau tshaj ntawd ntxiv. (Phau Ntawv Nkauj 9:18; 72:12-14) Tej zaud koj kuj muaj mob muaj nkeeg, muaj kev nyuaj siab los sis muaj lwm yam mob. Puas yog koj yuav nyiaj tej no mus li es tsis muaj chaw tawm? Tsis yog, vim kev mob kev nkeeg thiab kev ploj kev tuag yuav dua mus tag nyob hauv lub qab ntuj tshiab. (Tshwmsim 21:3, 4) Txoj kev vam kev cia siab no pab kom peb txaus siab rau tej yam peb tau tam sim no es tsis txhob chim los sis ntsawv siab. Tej thaud peb raug kev tsis ncaj ncees, cov peb hlub tau tag sim neej lawm los sis lwm yam kev sim siab los peb lub siab yeej tus vim peb paub tias “tej nyuag teeb meem me me uas peb raug tsuas nyob ib vuag xwb” thiab thaum txog lub qab ntuj tshiab peb yuav dim plaws txhua yam kev ntxhov siab.​—2 Kauleethaus 4:17, 18.

14. Yuav ua li cas peb txoj kev vam kev cia siab thiaj tsis tsuag?

¹⁴ Yuav ua li cas peb thiaj li tsav tau peb txoj kev vam kev cia siab vim qhov ntawd yuav pab kom peb txaus siab rau tej yam uas peb tau? Muab ua piv txwv tias ib tug tib neeg lub qhov muag plooj plooj. Nws yuav tsum tau coj tsom iav xwv nws thiaj pom tej yam nyob deb deb. Peb los yuav tsum tau tsav peb txoj kev vam kev cia siab kom peb thiaj pom peb tus kheej nyob rau hauv lub Vaj Kaj Siab. Xws li yog peb pheej txhawj txog nyiaj txiag nkaus nkaus xwb, zoo rau peb ua zoo xav txog thaum nyob lub Vaj Kaj Siab, peb yuav tsis siv nyiaj txiag, tsis muaj nuj nqis them, thiab tsis muaj kev txom nyem ntxiv lawm. Hos yog peb pheej txhawj txog tias cas peb tsis tau tes hauj lwm uas peb ntshaw ua rau Yehauvas ces kuj zoo rau peb xav txog tias tej ntawd tsis tseem ceeb dab tsi thaum peb txhua tus tsis muaj kev txaug kev txhaum thiab peb twb teev tiam Yehauvas qas txhiab qas pua xyoo lawm. (1 Timautes 6:19) Tej zaud peb nyuaj nyuaj siab ces twb ua rau peb xav tsis txog yav tom ntej. Tiam sis yog peb pheej xav txog tej uas Yehauvas cog tseg ces yuav yooj yim rau peb xav txog lub neej yav tom ntej dua li peb tej teeb meem.

15. Koj khaws tau dab tsi los ntawm tej uas Khitas hais?

¹⁵ Cia peb mus tham txog Deni tus poj niam npe hu ua Khitas (Christa). Nws hais tias: “Kuv muaj ib tug mob ua rau kuv tej nqaij tsis muaj zog. Kuv yuav tau siv lub laub thiab feem ntau pw saum txaj xwb. Kuv ib ce mob ntsuj ntsuav txhua hnub. Kuv tus kws tshuaj qhia rau kuv tias yeej yuav tsis muaj ib hnub kuv tus mob zoo li. Tam sim ntawd kuv xav tias, ‘Nws txoj kev xav thiab kuv txoj kev xav txog yav tom ntej zoo tsis sib xws.’ Qhov uas pab tau kom kuv muaj lub siab tus yog kuv txoj kev vam kev cia siab. Nyob hauv lub qab ntuj no kuv niaj hnub nyiaj mob ntsuj ntsuav tiam sis kuv lub neej yuav zoo heev thaum nyob hauv lub qab ntuj tshiab!”

TSIS TU NCUA IB YAM DAB TSI LI

16. Vim li cas Vaj Ntxwv Daviv ho sau tias cov uas hwm Yehauvas yuav “tsis tu ncua ib yam dab tsi li”?

¹⁶ Txawm peb txaus siab rau tej yam uas peb muaj lawm los peb haj tseem raug kev nyuaj siab. Xws li Vaj Ntxwv Daviv peb tug me nyuam tau tag sim neej. Tsis tas li ntawd nws haj tseem raug iab liam, ntxeev siab rau, thiab luag muab nws caum tua tau ntau ntau xyoo. Txawm nws raug tej no thiab tab tom raug kev sim siab los nws hais txog Yehauvas li no tias: “Cov neeg uas mloog [Yehauvas] lus yeej tsis tu ncua ib yam dabtsi li.” (Phau Ntawv Nkauj 34:9, 10) Tos nws hais tau li no los vim nws paub tias txawm Yehauvas tsis muab peb tej teeb meem tshem mus los nws paub tias Yehauvas yeej tsis pub peb tu ncua ib yam dab tsi. (Phau Ntawv Nkauj 145:16) Tsis tas li ntawd, peb kuj vam khom Yehauvas pab kom peb thev dhau tej kev sim siab peb raug. Yog li ntawd, peb haj tseem muaj tau lub siab tus thiab txaus siab rau tej peb muaj tab txawm peb yuav raug li cas los xij peem.

17. Vim li cas koj xav kom koj yog ib tug neeg uas txaus siab rau tej yam koj muaj?

¹⁷ Yehauvas xav kom koj txaus siab rau tej yam koj muaj. (Phau Ntawv Nkauj 131:1, 2) Cia li ua npaum li koj ua tau los pab kom koj txaus siab rau tej yam koj tau. Yog koj sib zog ntsos xyaum kom koj ua neeg ris txiaj ntsig, ua neeg txo hwj chim, thiab tsav koj txoj kev vam kev cia siab ces koj yuav hais tau zoo yam nkaus li tus sau phau ntawv nkauj tias koj yeej txaus siab rau tej yam koj muaj.​—Phau Ntawv Nkauj 16:5, 6.