Yehauvas Yuav Pab Kom Peb Thev Taus Li Cas?

1. Vim li cas peb ho yuav tau thev, thiab leej twg thiaj yuav pab kom peb thev taus? (1 Petus 5:10)

NYOB rau tiam kawg no yeej tsis yooj yim rau Yehauvas cov tib neeg thev txhua yam vim ib txhia muaj mob muaj nkeeg, muaj cov uas lawv hlub tau tag sim neej los sis tej txhia raug lawv tsev neeg los sis nom tswv tawm tsam. (Mathais 10:18, 36, 37) Nco ntsoov tias txawm koj yuav raug li cas los Yehauvas yeej nyob rawv ntawd pab koj thev kom dhau.​—Nyeem 1 Petus 5:10.

2. Vim li cas peb thiaj li thev taus?

² Thev yog peb yuav ua lub siab ntev nyiaj tej kev nyuaj siab, sim siab los sis kev tsim txom. Qhov uas peb thev taus ntawd tsis yog nyob ntawm peb tus kheej tiam sis yog Yehauvas pub “lub hwjchim uas loj kawg nkaus” rau peb thev. (2 Kauleethaus 4:7) Nyob rau hauv zaj kawm no yuav tham seb Yehauvas tau pub dab tsi kom peb thiaj li thev taus thiab seb peb ho yuav siv li cas rau li cas los pab peb.

THOV VAJTSWV

3. Vim li cas kev thov Vajtswv ho yog ib yam tshwj xeeb heev?

³ Qhov uas pab kom peb thev taus yog Yehauvas tau ua ib yam tshwj xeeb heev. Txawm peb yog noob txaug neeg txhaum los nws pub kom peb nrog nws sib txuas lus tau. (Henplais 4:16) Peb xav thov nws txhua lub sij hawm los tau thiab phua hlo peb lub siab qhia rau nws. Nws paub txhua hom lus thiab txawm koj yuav nyob rau qhov twg, tsis hais yaj sab los sis hauv tsev loj cuj los xij peem, nws yeej hnov tag nrho. (Yaunas 2:1, 2; Tes Hauj Lwm 16:25, 26) Txawm hais tias peb ntxhov siab dhau es hais tsis tau ib los tawm los nws yeej paub tias peb xav tau dab tsi. (Loos 8:26, 27) Yog li ntawd, kev thov yog ib yam tshwj xeeb heev uas Yehauvas muab rau peb nrog nws sib txuas lus ua ke!

4. Vim li cas peb ho paub tias thaum peb thov Yehauvas, nws yuav pab peb thev?

⁴ Nyob hauv Vajtswv Txoj Lus hais tias “yog peb thov tej uas raws li Vajtswv lub siab nyiam, Vajtswv yeej yuav mloog peb tej lus thov.” (1 Yauhas 5:14) Qhov no qhia tau tias peb yeej thov tau kom Yehauvas pab peb thev tej uas peb raug. Vim li cas peb ho paub li ntawd? Thaum peb thev kev sim siab ces Yehauvas yuav teb tau tus uas saib tsis taus nws uas yog Xatas. (Pajlug 27:11) Nyob hauv phau Vajlugkub kuj hais tias Yehauvas tos tsis hnyu yuav “ua nws lub hwjchim tshwm los pab cov uas lub siab xib rau nws.” (2 Xwmtxheej Vajntxwv 16:9) Tej no qhia tau tias Yehauvas yeej muaj siab tiag xav pab peb thev.​—Yaxayas 30:18; 41:10; Lukas 11:13.

5. Kev thov Vajtswv ho pab kom peb muaj lub siab tus li cas? (Yaxayas 26:3)

⁵ Nyob hauv phau Vajlugkub hais tias thaum peb thov Vajtswv mas “Vajtswv yuav pub [peb] muaj lub siab tus. Qhov ntawd yuav tsom kwm [peb] lub siab thiab [peb] txoj kev xav.” (Filipis 4:7) Thaum cov tib neeg uas tsis teev tiam Yehauvas muaj kev nyuaj siab, lawv siv ntau yam los mus pab kom lawv muaj lub siab tus. Xws li ib txhia nyob ntsiag to thiab muab lawv tej kev xav tshem huv tib si kom lawv lub siab thiaj tus. Qhov no yog ib yam uas phom sij heev vim thaum tus tib neeg ntawd tswj tsis tau nws tej kev xav lawm ces dab yuav los tswj. (Muab piv rau Mathais 12:43-45.) Txawm thaum tib neeg ua tej yam no tag es lawv muaj lub siab tus los lawv tsis muaj Yehauvas txoj kev siab tus uas zoo tshaj. Thaum peb thov Yehauvas ces twb yog peb qhia tau tias peb tso siab plhuav rau nws thiab nws yuav muab lub siab tus rau peb. (Nyeem Yaxayas 26:3.) Ib yam uas Yehauvas pab tau peb muaj lub siab tus yog nws ua rau kom peb nco txog tej nqe Vajlugkub los nplig peb. Cov nqe Vajlugkub no yuav ua rau kom peb ras dheev tias Yehauvas hlub peb npaum li cas thiab nws xav pab peb tiag ces peb lub siab yuav kaj nrig.​—Phau Ntawv Nkauj 62:1, 2.

6. Koj hais tau li cas thaum koj thov Vajtswv? (Saib daim duab.)

⁶ Tej yam koj ua tau. Thaum koj tab tom thev kev sim siab, cia li muab koj “tej kev nyuaj siab tso” rau Yehauvas thiab thov nws kom koj muaj lub siab tus. (Phau Ntawv Nkauj 55:22) Tsis tas li ntawd, thov kom koj muaj tswv yim xwv koj thiaj li paub tias koj yuav ua li cas rau li cas. (Pajlug 2:10, 11) Nco ntsoov ua Yehauvas tsaug thiab. (Filipis 4:6) Ua zoo xav seb ib hnub dhau ib hnub seb Yehauvas tau pab koj li cas thiab ua nws tsaug rau tej yam zoo uas nws tau muab rau koj. Txawm koj tab tom raug kev nyuaj siab los tsis txhob muab xav ntau ntau es ho tsis nco qab txog tej uas Yehauvas twb tau ua los pab koj lawm.​—Phau Ntawv Nkauj 16:5, 6.

VAJTSWV TXOJ LUS

7. Kawm phau Vajlugkub ho pab tau peb thev li cas?

⁷ Yehauvas kuj pub nws Txoj Lus los pab peb thev. Nyob rau hauv phau Vajlugkub muaj ntau ntau nqe txhawb peb tias Yehauvas txhawb nqa peb es kom peb tsis txhob txhawj. Xws li Mathais 6:8 hais tias: “Koj Leej Txiv yeej paub tej uas koj cheem tsum ua ntej koj thov nws.” Yexus yog tus hais cov lus no thiab nws yeej paub Yehauvas zoo tshaj li lwm leej lwm tus. Yog li ntawd, cia li tso siab plhuav tias thaum peb raug ib yam kev nyuaj siab twg, Yehauvas yeej muaj lub siab xav pab peb. Nyob hauv phau Vajlugkub yeej muaj ntau yam hais thooj li no uas yuav txhawb kom peb thev kam tiag.​—Phau Ntawv Nkauj 94:19.

8. (1) Piav txog ib qho hauv paus ntsiab lus hauv phau Vajlugkub seb ho pab tau peb thev li cas. (2) Dab tsi thiaj li pab tau kom peb nco tau tej hauv paus ntsiab lus los pab peb?

⁸ Tej hauv paus ntsiab lus hauv phau Vajlugkub yeej pab tau kom peb thev taus tej uas peb raug. Tej ntawd yuav pab tsav tswv yim rau peb kom paub txiav txim siab ua qhov zoo qhov yog. (Pajlug 2:6, 7) Xws li nyob hauv phau Vajlugkub txhawb kom peb tsuas xav ib hnub dhau ib hnub xwb es tsis txhob txhawj txog tag kis tsam ho tsis muaj raws li tej peb xav tseg. (Mathais 6:34) Yog peb nyeem Vajlugkub txhua txhua hnub thiab ua tib zoo xav txog tej uas peb nyeem ntawd ces yuav pab tau kom peb nco txog tej uas hais nyob rau hauv thaum peb yuav txiav txim siab ua ib dab tsi twg los sis peb yuav thev peb tej teeb meem li cas rau li cas.

9. Tej zaj uas nyob hauv phau Vajlugkub ho tsav tau peb txoj kev cia siab rau Yehauvas li cas?

⁹ Nyob hauv phau Vajlugkub kuj hais txog ib co tib neeg uas zoo ib yam li peb es tso siab rau Yehauvas thiab nws kuj tau pab lawv. (Henplais 11:32-34; Yakaunpaus 5:17) Thaum peb xav txog cov tib neeg no yuav pab tau kom peb tso siab rau Yehauvas tias nws “yog peb lub chaw nkaum thiab yog peb lub dag lub zog, thaum twg peb muaj kev txomnyem nws npaj txhij pab peb.” (Phau Ntawv Nkauj 46:1) Tsis tas li ntawd, thaum peb nyeem txog lawv txoj kev ntseeg uas lawv npuab siab nraim rau Yehauvas yav tag los lawm mas pab tau kom peb xyaum lawv txoj kev ntseeg thiab ua siab ntev thev tej kev nyuaj siab peb raug.​—Yakaunpaus 5:10, 11.

10. Koj yuav ua li cas phau Vajlugkub thiaj pab tau koj?

¹⁰ Tej yam koj ua tau. Nyeem Vajlugkub txhua txhua hnub thiab muab tej nqe uas pab tau koj cim cia. Muaj coob leej ntau tus nyiam nyeem phau Niaj Hnub Tshawb Nrhiav Phau Vajlugkub thaum qaib qua xwv nqe ntawd thiaj pab tau lawv rau hnub ntawd. Muaj ib tug muam npe hu ua Maiv Lisa niaj hnub ua li hais no vim nws niam thiab nws txiv muaj kheeb xawm thiab tshuav ob peb lub hlis xwb nkawd yuav tso nws tseg. Maiv Lis hais tias: “Txhua txhua tag kis kuv yeej nyeem phau Niaj Hnub Tshawb Nrhiav Phau Vajlugkub thiab muab tej kuv nyeem xav mus xav los. Ua li no pab tau kom kuv tsis txhob xav txog tej yam kuv raug xwb tiam sis xav txog Yehauvas thiab nws lub ntsiab.”​—Phau Ntawv Nkauj 61:2.

COV KWV TIJ NKAUJ MUAM

11. Peb xav li cas xwb thaum peb paub tias cov kwv tij nkauj muam kuj thev kev sim siab ib yam li peb thiab?

¹¹ Yehauvas pub kom peb muaj ib tsoom kwv tij nkauj muam Khixatias ua peb lub chaw cuab zog rau tej yam peb raug. Tsis yog peb tus kheej xwb thiaj raug kev nyuaj siab tiam sis “cov kwvtij ntseeg uas nyob thoob plaws hauv qab ntuj no, lawv tabtom raug kev tsimtxom ib yam li [peb] raug thiab.” (1 Petus 5:9) Qhov no pab tau kom peb nco ntsoov tias yog peb raug ib yam twg ces peb cov kwv tij nkauj muam yeej raug tej yam uas zoo thooj li ntawd thiab. Yog tias lawv thev taus tej uas lawv raug ces peb los yeej thev taus tib yam nkaus!​—Tes Hauj Lwm 14:22.

12. Cov kwv tij nkauj muam pab tau peb li cas thiab peb ho pab tau lawv li cas? (2 Kauleethaus 1:3, 4)

¹² Thaum peb tseem tab tom thev tej uas peb raug, cov kwv tij nkauj muam kuj txhawb tau peb lub zog. Yav puag thaum ub cov kwv tij nkauj muam kuj tau txhawb tus tub txib Povlauj lub dag zog thaum nws raug kaw thiab nws kuj ris lawv txiaj ntsig kawg li. Yog li ntawd thaum nws sau nws tsab ntawv, nws thiaj li tuav lawv ib tug npe zuj zus. Cov kwv tij nkauj muam tau hais tej lus los mus nplig Povlauj thiab pab tej yam nws tu ncua. (Filipis 2:25, 29, 30; Kaulauxais 4:10, 11) Niaj hnub nim no los peb yeej pom hais tias cov kwv tij nkauj muam yeej pab ib yam li ntawd. Thaum peb raug ib yam kev nyuaj siab twg uas peb yuav tau ua siab ntev thev, cov kwv tij nkauj muam yeej tuaj nyob rau ntawd nplig peb siab. Hos thaum lawv ho xav tau ib yam kev nplig twg los peb kuj cev tes hlo pab lawv.​—Nyeem 2 Kauleethaus 1:3, 4.

13. Dab tsi ho pab tau kom Maiv thev tiag?

¹³ Peb ib tsoom kwv tij nkauj muam txhawb tau ib tug muam npe hu ua Maiv uas nyob rau teb chaws Lav Xias (Russia) heev. Nyob rau xyoo 2020, cov nom tswv tuaj tshawb nws lub tsev thiab coj nws mus kom hauv tsev tu plaub vim nws pheej mus tshaj tawm txoj xov zoo. Maiv hais tias: “Lub sij hawm ntawd mas ua rau kuv lub siab ntsws qaug zog zis tiam sis cov kwv tij nkauj muam hu thiab sau ntawv tuaj txhawb kuv tias lawv hlub kuv heev. Kuv yeej ib txwm paub tias lawv zoo tam li ib tse neeg rau kuv tiam sis xyoo 2020 ntawd, kuv yim huab pom tseeb tseeb tias lawv yog kuv tsev neeg tiag tiag, tsis yog lam hais ntawm ncauj xwb.”

14. Koj yuav tau ua dab tsi xwv cov kwv tij nkauj muam thiaj pab tau koj? (Saib daim duab.)

¹⁴ Tej yam koj ua tau. Thaum koj tseem tab tom thev koj tej kev sim siab, nco ntsoov nrog cov kwv tij nkauj muam ua ke thiab tham lus es tsis txhob ua neeg twm zeej. Tsis tas li ntawd, nco ntsoov hais qhia rau cov txwj laus seb koj xav tau kev pab li cas vim lawv zoo li “lub tsev uas thaiv cua thiab lub chaw nkaum cua daj cua dub.” (Yaxayas 32:2) Ntxiv ntawd, cov kwv tij nkauj muam los kuj tab tom raug kev nyuaj siab ib yam li koj. Yog li tsis txhob nkaum tes, koj yuav tau cev tes hlo mus pab lawv thiab. Yog koj ua li no ces koj yuav muaj kev kaj siab thaum koj tab tom thev koj tej kev nyuaj siab.​—Tes Hauj Lwm 20:35.

PEB TXOJ KEV CIA SIAB

15. Kev vam kev cia siab pab tau cov uas ntseeg ruaj nreeg thaum ub thiab Yexus li cas? (Henplais 12:2)

¹⁵ Yehauvas pub kom peb muaj txoj kev vam kev cia siab xwv peb thiaj thev taus tej uas peb raug. (Loos 15:13) Txoj kev vam kev cia siab kuj pab tau kom Yexus thev taus lub sij hawm uas nyuaj tshaj plaws rau nws thaum nws ua neej nyob hauv ntiaj teb no. (Nyeem Henplais 12:2.) Xws li Yexus yeej paub zoo zoo tias yuav kom daws tau Yehauvas lub koob lub npe thiab qhia tias Xatas yog tus dag, nws yuav tau ntseeg Yehauvas ruaj nreeg. Tsis tas li ntawd, nws tos tsis hnyu hnub nws yuav rov qab mus nrog nws Txiv nyob saum ntuj ceeb tsheej thiab kav lub Nceeg Vaj nrog cov 144,000 leej. Zoo tib yam li ntawd, yog peb xav ntsoov txog peb txoj kev vam kev cia siab uas yuav tau nyob mus ib txhis hauv lub qab ntuj tshiab ces yuav pab peb thev tej kev nyuaj siab uas peb raug tam sim no.

16. Kev vam kev cia siab ho pab tau ib tug muam li cas thiab koj ho kawm tau dab tsi los ntawm nws?

¹⁶ Cia peb mus tham txog seb txoj kev vam kev cia siab pab tau ib tug muam npe hu ua Ntsa Iab nyob teb chaws Lav Xias li cas. Nws tus txiv raug muab ntes coj mus kaw hauv tsev loj cuj thiab tseem tos mus hais nws tus txiv tshaj plaub. Ntsa Iab hais tias: “Kuv thov Yehauvas ntau zaus txog txoj kev vam kev cia siab uas nws muab rau peb thiab kuv pheej xav ntsoov txog lub neej yav tom ntej. Ua li no pab tau kom kuv tsis txhob nyob mluas mlob thiab nco ntsoov tias lub neej tsis yog tag li no xwb. Yehauvas yeej yuav kov yeej txhua yam ces peb yuav tau txais tej nqi zog uas nws pub rau peb.”

17. Peb qhia tias peb ris txiaj ntsig rau txoj kev vam kev cia siab uas Yehauvas pub rau peb li cas? (Saib daim duab.)

¹⁷ Tej yam koj ua tau. Lauj sij hawm los zaum tsaws xav txog lub neej yav tom ntej uas Yehauvas twb npaj cia rau peb lawm. Thaum lub ntiaj teb zoo zoo nkauj lawm, xav seb koj yuav ua dab tsi rau dab tsi thiab koj yuav tau txais tej koob hmoov zoo li cas. Muab tej uas koj raug tam sim no piv rau yav tom ntej mas tsuas yog “ib nyuag ntu” xwb. (2 Kauleethaus 4:17) Yog li ntawd, cia li rau siab ntso mus qhia lwm tus txog tej yam Vajtswv yuav muab rau peb yav tom ntej. Nco ntsoov tias lawv lub neej nyob tsaus ntuj nti vim lawv tsis paub tej uas Yehauvas cog lus tseg rau yav tom ntej. Txawm koj tsuas hais tsawg tsuag ob peb los xwb los yeej txhawb tau kom lawv xav paub ntxiv txog Vajtswv lub Nceeg Vaj.

18. Vim li cas peb ho tso siab tias Yehauvas tej lus cog tseg yeej yuav muaj xwb xwb li?

¹⁸ Tom qab Yauj thev dhau ntau yam kev sim siab, nws hais rau Yehauvas tias: “Kuv paub hais tias koj yog tus uas muaj hwjchim loj kawg nkaus; koj xav ua dabtsi, koj yeej ua tau huv tibsi.” (Yauj 42:2) Yauj kawm tau hais tias yeej tsis muaj ib yam dab tsi yuav los txwv txiav tau Yehauvas kom nws tsis txhob ua raws li nws tau cog lus tseg. Cov lus no kuj txhawb tau peb thaum peb tab tom raug peb tej teeb meem thiab. Muab ua piv txwv li no tias muaj ib tug poj niam muaj mob tiam sis ntau tus kws tshuaj kho tsis tau nws li mas ua rau nws puas siab puas ntsws tag. Tiam sis thaum muaj ib tug kws tshuaj uas keej heev paub kho mas ua rau tus poj niam kaj siab lawm hov ntau tuaj tab txawm yuav siv sij hawm me ntsis los kho kom nws zoo. Zaum no tus poj niam txawm muaj kev vam kev cia siab tias nws yuav rov qab zoo ces nws yuav ua tiag thev. Zoo ib yam li ntawd, qhov uas peb cia siab tias lub Vaj Kaj Siab yeej yuav muaj xwb xwb li thiaj tag, yuav pab kom peb ua siab ntev thev kam tiag.

19. Peb yuav tsum tau dab tsi xwv peb thiaj thev taus?

¹⁹ Raws li peb tau kawm, Yehauvas pub kom peb thov tau rau nws, pub nws Txoj Lus, pub cov kwv tij nkauj muam thiab pub txoj kev vam kev cia siab kom peb thiaj li thev taus peb tej kev sim siab. Yog tias peb cia tej uas hais tas no pab peb ces Yehauvas yuav pab kom peb thev taus tej kev nyuaj siab mus txog thaum Xatas lub sim ceeb dua mus tas.​—Filipis 4:13.