‘Hu Cov Txwj Laus’

1. Yehauvas tau ua li cas los qhia tias nws cov tib neeg muaj nuj nqis heev rau nws?

YEHAUVAS hlub cov uas teev tiam nws thiab nws yuav saib xyuas lawv ib yam li tus tswv yug yaj saib xyuas nws tej yaj. Nws cia nws tus Tub los tuag txhis lawv thiab nws tso cov txwj laus ua cov saib xyuas lawv. (Tes Hauj Lwm 20:28) Yehauvas xav kom cov txwj laus ua zoo rau nws cov tib neeg. Yog li ntawd, cov txwj laus yeej ua li Yexus hais es muab siab rau ntso txhawb cov kwv tij nkauj muam thiab pab kom lawv kub siab teev tiam Yehauvas.​—Yaxayas 32:1, 2.

2. Yehauvas yim huab xav pab leej twg? (Exekees 34:15, 16)

² Yehauvas yeej txhawj xeeb txog nws cov tib neeg heev thiab nws yim huab xav pab cov uas qaug zog. Ib txhia qaug zog vim lawv ua tau qho yam yuam kev. Yog li ntawd, Yehauvas thiaj li siv cov txwj laus mus nplig lawv. (Nyeem Exekees 34:15, 16.) Thaum peb xav tau kev pab qhov twg rau qhov twg, Yehauvas tuaj yeem hlo pab peb. Nws tsis yog xav kom peb thov nws pab xwb tiam sis nws kuj xav kom peb mus cuag cov txwj laus hauv peb lub koom txoos es nrhiav kev pab.​—Efexaus 4:11, 12.

3. Qhov uas peb paub cov txwj laus tes hauj lwm ho pab tau peb li cas?

³ Nyob rau hauv zaj kawm no yuav qhia tias Vajtswv tau npaj cov txwj laus los mus saib xyuas nws cov tib neeg. Yog li ntawd thaum nws cov tib neeg xav tau kev pab dab tsi, lawv yuav tau mus cuag cov txwj laus. Tsis tas li ntawd, peb yuav tham txog cov lus nug no: Thaum twg zoo rau peb mus cuag cov txwj laus pab? Vim li cas peb ho tau mus cuag lawv? Thiab lawv ho pab peb li cas rau li cas? Txawm peb tsis tau muaj kev nyuaj siab dab tsi los qhov uas peb paub tias yuav ua li cas rau li cas ntawd pab kom peb ris txiaj ntsig rau tej uas Vajtswv tau npaj tseg thiab tsam ib hnub nram ntsis peb ho xav tau kev pab ces thiaj pab tau peb.

THAUM TWG ZOO RAU PEB ‘HU COV TXWJ LAUS’?

4. Vim li cas peb ho paub tias Yakaunpaus 5:14-16, 19, 20 hais txog ib tug neeg qaug zog? (Saib cov duab.)

⁴ Tus thwj tim Yakaunpaus qhia tias Yehauvas siv cov txwj laus pab peb li cas rau li cas. Nws hais tias: ‘Nej leejtwg muaj mob? Tus ntawd ciali hu cov txwj laus uas saib pawg ntseeg tuaj thov Vajtswv pab nws.’ (Nyeem Yakaunpaus 5:14-16, 19, 20.) Yakaunpaus tsis yog hais txog tus neeg muaj mob tiam sis yog nws hais txog tus neeg qaug zog uas yuav tau kho nws txoj kev sib raug zoo nrog Yehauvas rau qhov nqe ntawd, tus neeg mob tsis yog hu kws tshuaj tiam sis hu cov txwj laus. Yakaunpaus kuj hais ntxiv tias thaum zam tus neeg mob lub txim lawm ces nws tus mob kuj zoo du lawm thiab. Qhov uas yuav pab tau tus qaug zog ntawd, zoo thooj li tus neeg muaj mob mus cuag kws tshuaj. Thaum peb muaj mob muaj nkeeg, peb yeej mus cuag kws tshuaj, piav peb tus mob rau nws, thiab tom qab ntawd peb yuav ua raws li nws qhia. Zoo ib yam li ntawd thaum peb qaug zog, peb yuav tau mus cuag cov txwj laus, piav seb muaj li cas rau li cas, thiab yuav ua raws li tej nqe Vajlugkub uas cov txwj laus siv los pab peb.

5. Ua li cas peb thiaj paub tias peb txoj kev sib raug zoo nrog Vajtswv tsuag lawm?

⁵ Nyob hauv Yakaunpaus tshooj 5 txhawb kom peb mus cuag cov txwj laus thaum peb paub hais tias peb txoj kev ntseeg tsuag lawm. Yog ib qho zoo uas peb mus nrhiav kev pab ntawm lawv ua ntej peb muab peb txoj kev sib raug zoo nrog Vajtswv rhuav pov tseg! Nyob hauv phau Vajlugkub ceeb toom peb tias yog peb tsis ceev faj, tej zaud peb yuav xav hais tias Yehauvas haj tseem pom zoo rau tej yam uas peb niaj hnub ua. (Yakaunpaus 1:22) Yav puag thaum ub, yeej tau muaj li hais no txog cov Khixatias uas nyob hauv Xasdis. Yexus qhia rau lawv tias lawv twb ua tsis haum Yehauvas siab lawm. (Tshwmsim 3:1, 2) Ib qho uas peb yuav paub hais tias peb txoj kev ntseeg zoo li cas rau li cas lawm yog peb muab peb txoj kev ntseeg tam sim no piv seb peb puas tseem zoo li thaum peb nyuam qhuav los ntseeg. (Tshwmsim 2:4, 5) Cia peb rov tshuaj peb tus kheej li no tias: ‘Kuv puas haj tseem nyiam nyeem phau Vajlugkub thiab zaum tsaws xav txog tej ntawd? Kuv puas mus kev sib txoos thiab puas npaj rau tej kev sib txoos? Kuv puas haj tseem kub siab lug mus tshaj tawm txoj xov zoo? Kuv puas lauj sij hawm ntshis mus ua si los sis ntshaw tej khoom ub khoom no tshaj li yav thaum ub? Yog koj teb tias koj yeej xav li ntawd ces qhov no qhia tau tias koj txoj kev ntseeg tsuag lawm thiab koj yuav tau nrhiav kev pab ua ntej yuav piam sij tshaj qhov no. Yog tias peb pab tsis tau peb tus kheej los sis peb twb ua tej yam uas Yehauvas tsis pom zoo lawm ces peb yuav tau mus nrhiav kev pab ntawm cov txwj laus.

6. Cov uas tau ua kev txhaum loj lawm yuav tau ua dab tsi?

⁶ Yog ib tug twg tau ua txhaum loj uas tej zaum yuav raug tshem tawm ces nws yuav tau mus cuag ib tug txwj laus. (1 Kauleethaus 5:11-13) Tus uas tau ua txhaum loj ntawd yeej kho tsis tau nws txoj kev sib raug zoo nrog Yehauvas, nws yuav tsum tau nrhiav kev pab. Yuav kom Yehauvas zam tau nws lub txim, nws “tes hauj lwm yuav tsum qhia tias [nws] hloov dua siab tshiab lawm tiag.” (Tes Hauj Lwm 26:20) Ib qho uas qhia tias nws hloov dua siab tshiab yog nws mus qhia rau ib tug txwj laus paub txog nws qhov kev txhaum loj ntawd.

7. Leej twg yog cov uas yuav tsum tau cov txwj laus txoj kev pab?

⁷ Cov txwj laus tsis yog pab cov uas tau ua txhaum loj xwb tiam sis lawv kuj pab cov uas txoj kev ntseeg tsuag lawm thiab. (Tes Hauj Lwm 20:35) Xws li koj tswj tsis taus lub siab uas ntshaw plias mus ua txhaum. Yeej yim huab nyuaj rau koj yog hais tias ua ntej koj los paub Yehauvas, koj yeej yog ib tug neeg quav yeeb quav tshuaj, nyiam saib duab liab qab los sis ua plees ua yis. Nco ntsoov tsis txhob ntshai mus nrhiav kev pab. Xaiv seb koj xav mus nrog tus txwj laus twg tham es nws thiaj li qhib siab mloog koj. Nws mam li qhia koj seb koj yuav ua li cas koj thiaj kov yeej lub siab ntshaw mus ua txhaum, thiab nws yuav pab kom koj xam pom tias Yehauvas yeej zoo siab heev thaum Yehauvas pom koj sib zog ntsos tswj koj tus kheej. (Tej Lus Qhia 4:12) Tej zaum koj yuav ntxhov siab heev vim koj lub siab pheej xib mus ua tej yam tsis zoo. Thaum koj mus nrog cov txwj laus tham, qhia tau tias koj txo hwj chim heev. Lawv yuav pab kom koj xam pom tias koj yeej xav ua qhov zoo thiab xav kho koj txoj kev sib raug zoo nrog Yehauvas.​—1 Kauleethaus 10:12.

8. Puas tsim nyog rau peb mus nrog cov txwj laus tham txog txhua yam uas peb tau ua yuam kev?

⁸ Peb tsis tas yuav mus cuag cov txwj laus rau txhua yam uas peb ua yuam kev. Xws li tej zaum koj ho hais tau tej lo ntsawv siab rau ib tug kwv tij los sis nkauj muam los sis koj ho npau taws vog rau ib tug twg. Yog tias muaj li hais no ces zoo rau koj ua li Yexus cov lus ntuas es mus nrog koj tus kwv tij los sis nkauj muam tham kom sib haum. (Mathais 5:23, 24) Ntxiv ntawd koj kuj mus tshawb nrhiav cov cwj pwm kom ua siab mos siab muag, ua siab ntev, thiab tswj tau koj tus kheej xwv koj thiaj li xyaum coj tej cwj pwm no yav tom ntej. Yog hais tias koj ua li no tag es koj haj tseem muaj teeb meem thiab, ces koj mam li mus nrhiav kev pab ntawm ib tug txwj laus. Nco ntsoov thaum Yu-audias thiab Xitikhes nkawd kho tsis tau nkawd tej teeb meem ces Povlauj nug kom ib tug kwv tij hauv lub koom txoos mus pab nkawd. Yog li ntawd, ib tug txwj laus hauv koj lub koom txoos yeej pab tau koj thiab.​—Filipis 4:2, 3.

VIM LI CAS PEB HO YUAV TAU NROG COV TXWJ LAUS THAM?

9. Vim li cas peb yuav tau tsis txhob cia kev txaj muag txwv peb mus cuag cov txwj laus? (Pajlug 28:13)

⁹ Thaum peb ua tau ib yam txhaum loj twg los sis thaum peb xav hais tias peb tswj tsis taus peb lub siab kom tsis txhob ntshaw plias ua tej yam tsis zoo ces peb yuav tau muaj lub siab tawv qhawv mus nrhiav kev pab ntawm cov txwj laus. Vim li cas peb yuav tau tsis txhob cia peb txoj kev txaj muag ua ib qho chaw tab kaum es tsis mus cuag cov txwj laus? Vim Yehauvas tau npaj kom muaj cov txwj laus los pab peb tuav rawv peb txoj kev sib raug zoo nrog nws. Thaum peb mus nrog cov txwj laus tham ces qhia tau tias peb tso siab rau Yehauvas thiab mloog nws lus. Tsis tas li ntawd, peb xam pom tias peb yuav tsum muaj Yehauvas pab peb ua qhov zoo qhov yog. (Ntawv Nkauj 94:18) Yog peb ho tau ua txhaum ces peb yuav tau qhia rau cov txwj laus paub thiab tseg tsis txhob mus ua qhov txhaum ntawd ntxiv xwv Yehauvas thiaj li yuav zam peb lub txim.​—Nyeem Pajlug 28:13.

10. Yog peb pheej zais peb tej kev txhaum, yuav muaj li cas xwb?

¹⁰ Thaum peb qhia rau cov txwj laus txog tej kev txhaum uas peb tau ua ces Yehauvas yuav zam peb lub txim thiab peb yuav rov qab muaj kev sib raug zoo nrog nws dua. Tiam sis yog peb tsis kam mus nrog cov txwj laus tham ces peb yuav yim huab ntxhov siab ntxiv zuj zus xwb. Thaum Vaj Ntxwv Daviv npog nws tej kev txhaum, nws tsuas nyob ntxhov siab hnyo xwb vim nws txoj kev sib raug zoo nrog Yehauvas tsis zoo li qub lawm. (Ntawv Nkauj 32:3-5) Thaum peb muaj mob los sis raug mob, yog peb pheej tsis kho qhov mob ntawd ces peb tsuas yuav muaj mob muaj nkeeg zuj zus ntxiv. Zoo ib yam li ntawd, thaum peb ua tau ib qho txhaum loj, yog peb tsis mus nrhiav kev pab ntawm cov txwj laus ces peb txoj kev sib raug zoo nrog Yehauvas tsuas yuav piam zuj zus lawm xwb. Yehauvas yeej tsis xav kom muaj tej no los raug rau peb, nws thiaj hais kom peb mus cuag cov txwj laus uas yog cov nws siv los mus pab peb xwv peb thiaj rov qab nrog nws sib raug zoo dua.​—Yaxayas 1:5, 6, 18.

11. Yog peb pheej npog tej kev txhaum loj ces yuav raug rau lwm tus li cas?

¹¹ Yog peb pheej npog tej kev txhaum loj uas peb ua ces yuav raug rau lwm tus thiab. Xws li Yehauvas yuav tsis muab nws lub hwj huam dawb huv los pab peb lub koom txoos ces cov kwv tij nkauj muam yuav tsis muaj lub siab kaj. (Efexaus 4:30) Yog peb paub ib tug twg hauv lub koom txoos tau ua kev txhaum loj lawm ces peb yuav tau txhawb kom tus ntawd kav tsij mus cuag cov txwj laus.a Yog peb nrog tus ntawd npog nws tej kev txhaum ces kuj ib yam li peb ua txhaum thiab. (Levis Kevcai 5:1) Tiam sis vim peb hlub Yehauvas, peb yuav tau qhia rau cov txwj laus paub. Yog peb ua li no ces yuav pab kom lub koom txoos dawb huv thiab peb kuj yuav pab tau tus ua txhaum ntawd kom rov qab muaj kev sib raug zoo nrog Yehauvas.

COV TXWJ LAUS HO PAB PEB LI CAS RAU LI CAS?

12. Cov txwj laus pab cov uas kev ntseeg tsuag lawm li cas rau li cas?

¹² Nyob hauv phau Vajlugkub qhia kom cov txwj laus pab cov uas txoj kev ntseeg tsuag lawm kom rov qab nrog Yehauvas sib raug zoo. (1 Thexalaunikas 5:14) Yog koj ho ua tau ib qho twg yuam kev, tej zaum cov txwj laus yuav nug seb koj ho xav li cas xwv lawv thiaj nkag siab koj. (Pajlug 20:5) Tej zaud yeej tsis yooj yim rau koj qhia rau cov txwj laus vim koj yog ib tug neeg txaj muag, yog ib haiv neeg uas tsis qhib siab rau leej twg los sis txaj muag tham txog tej yam uas koj tau ua ntawd. Tiam sis yog koj qhia rau cov txwj laus ces lawv thiaj li paub pab koj. Tsis txhob txhawj tsam koj ho hais tau tej yam yuam kev. (Yauj 6:3) Cov txwj laus yeej yuav tsis lam tau lam txiav txim rau koj. Lawv yuav ua tib zoo mloog koj piav koj zaj kom tag seb yog li cas tiag tso ces lawv mam li muab tej nqe Vajlugkub coj los pab txhawb koj. (Pajlug 18:13) Cov txwj laus yeej paub tias yuav tau laug sij hawm me ntsis thiaj li pab tau tus uas kev ntseeg tsuag lawm ces tej zaud lawv yuav nrog koj tham li ob peb zaug.

13. Thaum cov txwj laus thov Vajtswv thiab nyeem Vajlugkub rau peb ho pab tau peb li cas? (Saib cov duab.)

¹³ Cov txwj laus yeej tsis xav tsub kev nyuaj siab dab tsi ntxiv rau tej uas koj tau ua los lawm tiam sis lawv yuav thov Vajtswv pab koj. Yehauvas yuav mloog lawv tej lus thov thiab lawv tej lus thov yeej “muajzog heev” vim koj yuav pom tau tias txhawb tau koj lub zog thiab nplig tau koj lub siab lawm hov ntau tuaj. Tsis tas li ntawd, lawv yuav pab “muab roj pleev [koj] hauv [Yehauvas] lub npe.” (Yakaunpaus 5:14-16) Cov “roj” yog hais txog Vajtswv Txoj Lus. Cov txwj laus yuav muab tej nqe Vajlugkub coj los nplig koj thiab pab kom koj rov qab nrog Yehauvas sib raug zoo dua. (Yaxayas 57:18) Cov nqe Vajlugkub no yuav txhawb kom koj rau siab ntso ua qhov zoo qhov yog. Ntxiv ntawd, cov nqe no yuav zoo ib yam li Yehauvas hais lus rau koj tias: “Txoj no thiajli yog txoj yog. Ciali taug txoj no.”​—Yaxayas 30:21.

14. Raws li Kalatias 6:1, cov txwj laus yuav pab tus uas tau ua “txhaum” li cas? (Saib cov duab.)

¹⁴ Nyeem Kalatias 6:1. Ib tug Khixatias uas tau ua “txhaum” tsis ua raws li Yehauvas tej kev cai lawm. Tej zaud tus no nws txiav txim mus ua tau yuam kev los sis ua tau ib qho txhaum loj. Vim cov txwj laus muaj kev hlub, lawv thiaj li “ua lub siabmos siabmuag ntuas tus ntawd kom nws rovqab los ua zoo.” Zoo ib yam li tus kws tshuaj uas maj mam yoog kho tus neeg uas dam pob txha, cov txwj laus los yeej maj mam pab tus Khixatias uas ua yuam kev kom tsis txhob tsub kev nyuaj siab ntxiv rau nws. Nyob hauv nqe ntawd kuj qhia kom cov txwj laus “ceevfaj, nyobtsam [lawv] yuamkev ua txhaum thiab.” Thaum cov txwj laus pab ib tug twg los lawv yeej nco ntsoov tias lawv yog noob txaug neeg txhaum ces lawv yeej ua tau qho yam yuam kev. Ces lawv yeej ua zoo ceev faj es tsis tsav lawv lub hwj chim kom siab dua tus uas lawv pab ntawd tiam sis lawv yuav tau txo hwj chim kom qis qis thiab muaj kev hlub tshua.​—1 Petus 3:8.

15. Peb yuav tau ua li cas yog tias peb muaj teeb meem?

¹⁵ Peb yeej tso siab tau rau cov txwj laus hauv peb lub koom txoos. Yehauvas lub koom haum yeej cob qhia kom yog lawv paub ib yam dab tsi txog peb lub neej los txhob muab piav rau ub rau no. Thaum lawv qhuab ntuas los kom nco ntsoov siv tej lus hauv phau Vajlugkub es tsis txhob siv lawv lub tswv yim. Ntxiv ntawd yog peb muaj ib yam kev nyuaj siab twg los lawv yuav pab ev peb lub nra kom sib me ntsis. (Pajlug 11:13; Kalatias 6:2) Cov txwj laus nyias yeej muaj nyias ib tug xeeb ceem, thiab ib tug kuj paub ntau dua ib tug. Txawm li ntawd los peb mus cuag tus twg los tau. Nco ntsoov peb yuav tau tsis txhob nug ib tug tag ib tug tuaj seb lawv puas hais li peb lub siab nyiam xwb. Yog peb coj li no ces peb zoo ib yam li cov uas “xav mloog kom zoo khaus lawv lub pobntseg” dua li “mloog Vajtswv Txojlus.” (2 Timautes 4:3) Thaum peb mus cuag ib tug txwj laus txog peb tej teeb meem, tej zaum nws yuav nug seb peb puas tau mus nrog ib tug txwj laus twg tham, thiab seb tus txwj laus ntawd ho tau nplig nws li cas. Yog tus txwj laus uas nws mus cuag ntawd txo hwj chim ces tus txwj laus ntawd yuav nug kom lwm tus txwj laus nrog tus txwj laus ntawd sib pab tuav tswv yim.​—Pajlug 13:10.

NYIAS RIS NYIAS LUB NRA

16. Peb feem yog li cas?

¹⁶ Txawm cov txwj laus yog cov uas saib xyuas peb los lawv tsis yog cov uas yuav txiav txim siab rau peb. Peb txhua tus nyias yuav tau ua nyias feem los qhia rau Yehauvas tias peb hlub thiab xav teev tiam nws. Peb nyias yuav tau daws nyias zaj rau Yehauvas. Yog muaj Yehauvas ua tus pab peb lawm ces peb yeej teev tiam tau nws mus li. (Loos 14:12) Vim muaj li no cov txwj laus thiaj li tsis qhia kom peb ua li no los sis ua li tod tiam sis lawv siv phau Vajlugkub los pab kom peb paub tias Yehauvas xav li cas thiab lawv cia peb txiav txim siab rau peb tus kheej. Yog peb mloog tej lus uas lawv qhia hauv phau Vajlugkub rau peb ces peb yuav paub tias Yehauvas nyiam li cas thiab peb yuav txawj txiav txim siab rau peb tus kheej.​—Henplais 5:14.

17. Yehauvas xav kom peb ua dab tsi?

¹⁷ Peb ris Yehauvas txiaj ntsig kawg li tias nws yeej ua tib zoo saib xyuas peb! Yehauvas haj tseem xa Yexus uas yog “tus tswv yaj zoo” los tuag theej peb lub txhoj kom peb thiaj li muaj rab peev xwm tau txoj sia ntev dhawv mus ib txhis. (Yauhas 10:11) Yehauvas tau pub kom muaj cov txwj laus raws li nws tau cog lus tias: “Kuv yuav pub muaj cov [tswv yug yaj] uas mloog Kuv lus rau nej, lawv yuav tswjhwm nej los ntawm lub tswvyim thiab kev thoobtsib.” (Yelemis 3:15) Yog li ntawd thaum peb txoj kev ntseeg tsuag lawm, tsis txhob ua xyem xyav. Cia li kav tsij mus cuag cov txwj laus ces peb thiaj li pom tias vim li cas Yehauvas siv lawv los pab peb.