Kev Tsis Ncaj Ncees

1-2. Tib neeg feem coob xav li cas txog tej kev tsis ncaj ncees thiab tej thaud peb ho xav li cas thaum peb pom tej kev tsis ncaj ncees?

TAM SIM no peb nyob rau ib lub qab ntuj uas tsis muaj kev ncaj ncees hlo li. Tib neeg ib leeg ua saib tsis taus ib leeg. Xws li cov muaj saib tsis taus cov pluag, txiv neej thiab poj niam ib leeg saib tsis taus ib leeg, thiab ib haiv neeg ntxub ib haiv neeg. Muaj coob leej ntau tus tib neeg raug kev txom nyem vim tej neeg ua lag ua luam los sis nom tswv coj tsis ncaj thiab lawv tsuas xav txog nyiaj txiag xwb. Tej kev tsis ncaj ncees no yeej raug ib tsoom sawv daws huv tib si.

² Niaj hnub nim no muaj coob leej ntau tus chim siab heev thaum lawv pom tej kev tsis ncaj ncees. Peb yeej xav nyob rau ib lub qab ntuj uas ib leeg saib taus ib leeg thiab sawv daws nyob sov siab so. Yog li ntawd, ib txhia thiaj li siv zog ntsos kho tej teeb meem nyob rau hauv lawv lub teb lub chaw. Xws li lawv kos npe hloov kev cai, mus tsa paib tawm tsam nom tswv, thiab txhawb nqa cov nom tswv uas cog lus yuav kho kom muaj kev ncaj ncees. Tiam sis Yehauvas cob qhia kom nws cov tib neeg “tsis koom nrog lub qab ntuj neeg” thiab tos nws lub Nceeg Vaj los kho tej kev tsis ncaj ncees. (Yauhas 17:16) Txawm li ntawd los muaj tej thaud peb kuj chim thaum pom ib tug twg raug kev tsis ncaj ncees. Tej zaud peb yuav xav tias: ‘Kuv yuav ua li cas yog muaj li no tshwm sim? Kuv puas yuav kho tau tej kev tsis ncaj ncees tam sim no?’ Cia peb mam li mus kawm seb Yehauvas thiab Yexus nkawd xav li cas txog tej kev tsis ncaj ncees uas tib neeg raug.

YEHAUVAS THIAB YEXUS NTXUB KEV TSIS NCAJ NCEES

3. Vim li cas peb ho chim heev thaum peb pom tej kev tsis ncaj ncees? (Yaxayas 5:7)

³ Nyob hauv phau Vajlugkub qhia tias vim li cas peb thiaj tsis nyiam tej kev tsis ncaj ncees. Twb yog Yehauvas tsim peb kom muaj nws tus yam ntxwv vim nws “nyiam kev ncajncees thiab qhov tseeb.” (Ntawv Nkauj 33:5; Chivkeeb 1:26) Yeej tsis muaj ib zaug uas nws yuav coj tsis ncaj li thiab nws tsis xav pom ib tug twg coj tsis ncaj rau lwm tus! (2 Kevcai 32:3, 4; Mikhas 6:8; Xekhaliyas 7:9) Xws li nyob puag thaum Yaxayas tiam, Yehauvas hnov ib txhia Ixayees tej suab “quaj qw” vim lwm cov Ixayees ua tsis ncaj rau lawv. (Nyeem Yaxayas 5:7.) Yehauvas thiaj li tau rau txim rau cov uas xib tim tsis mloog nws tej kev cai thiab ua tsis ncaj rau lwm tus.​—Yaxayas 5:5, 13.

4. Yexus xav li cas xwb thaum ib tug twg raug kev tsis ncaj? (Saib daim duab.)

⁴ Yexus zoo ib yam li Yehauvas. Nws nyiam kev ncaj ncees thiab ntxub kev tsis ncaj ncees. Muaj ib zaug thaum Yexus tseem nyob hauv ntiaj teb no, nws pom ib tug txiv neej uas qhuav tes. Yexus hlub tus txiv neej ntawd heev, nws thiaj kho tus txiv neej ntawd phab tes. Tiam sis thaum cov thawj coj pom li no lawv chim kawg li. Lawv tsuas txhawj txog hnub Xanpataus tej kev cai dua li pab tus txiv neej ntawd. Ua li Yexus xav li cas txog lawv xwb? Nws “tu siab tias lawv tsis muaj siab hlub leej twg li.”​—Malakaus 3:1-6.

5. Vim li cas peb yuav tau tsis txhob chim mus li thaum pom kev tsis ncaj ncees?

⁵ Yeej tsis txhaum yog peb chim thaum pom kev tsis ncaj ncees vim Yehauvas thiab Yexus nkawd yeej chim tib yam nkaus. (Efexaus 4:26) Txawm li ntawd los nco ntsoov tias peb tsis muaj rab peev xwm yuav kho tau tej kev tsis ncaj ncees ntawd. Yog peb pheej chim tas zaj tas zog ces yuav ua mob ua nkeeg rau peb thiab peb yuav tsis muaj ntsej muag luag. (Ntawv Nkauj 37:1, 8; Yakaunpaus 1:20) Yog li ntawd thaum peb pom tej kev tsis ncaj ncees, peb yuav ua li cas xwb? Cia peb mus kawm seb Yexus ho coj li cas.

YEXUS COJ LI CAS THAUM POM KEV TSIS NCAJ NCEES?

6. Muaj tej kev tsis ncaj ncees twg nyob rau Yexus tiam? (Saib daim duab.)

⁶ Thaum Yexus tseem nyob hauv ntiaj teb no nws pom kev tsis ncaj ncees ntau heev. (Mathais 23:2-4) Nws pom cov nom tswv Loos ua saib tsis taus lawv tej pej xeem. Muaj coob tus Yudais xav kom dim ntawm cov nom tswv Loos. Muaj tej txhia sawv tawm tsam cov nom tswv Loos. Txawm li ntawd los Yexus tsis nrog ib pawg twg sawv tawm tsam cov nom tswv. Thaum nws hnov hais tias lawv yuav muab nws tsa ua ib tug vaj ntxwv, nws kuj khiav mus nyob nws tib leeg ntsiag to.​—Yauhas 6:15.

7-8. Vim li cas Yexus ho tsis muab tej kev tsis ncaj ncees tshem tawm thaum nws los rau hauv ntiaj teb? (Yauhas 18:36)

⁷ Thaum Yexus tseem nyob hauv ntiaj teb, nws tsis koom tes nrog nom tswv kho tej kev tsis ncaj ncees. Vim li cas Yexus ho tsis kam koom tes? Rau qhov nws paub hais tias tib neeg tsis muaj rab peev xwm thiab tsis muaj cai kav tib neeg. (Ntawv Nkauj 146:3; Yelemis 10:23) Tsis tas li ntawd, tib neeg tshem tsis tau qhov uas chiv tej kev tsis ncaj ncees tawm. Lub qab ntuj no yog Xatas kav. Nws yog ib tug uas tua neeg thiab nws nyiam siv nws lub hwj chim los zes kom tsis muaj kev ncaj ncees. (Yauhas 8:44; Efexaus 2:2) Ntxiv ntawd, vim tib neeg yog noob txaug neeg txhaum ces tab txawm lawv xav kho txhua yam kom zoo los thaum kawg lawv haj tseem coj tau tsis zoo quj qees.​—Tej Lus Qhia 7:20.

⁸ Yexus paub hais tias tsuas yog Vajtswv txoj kev kav xwb thiaj tshem tau qhov uas chiv tej kev tsis ncaj ncees tawm. Yog li ntawd, nws thiaj siv tag nrho nws lub sij hawm thiab dag zog “mus tshaj tawm txoj xov zoo txog Vajtswv txoj kev kav.” (Lukas 8:1) Nws hais rau “cov uas ntshaw kev ncaj ncees” tias tshuav tsis ntev txoj kev tsis ncaj ncees yeej yuav kawg xwb thiaj tag. (Mathais 5:6; Lukas 18:7, 8) Tib neeg tej nom tswv yuav kho tsis tau, tsuas yog Vajtswv txoj kev kav thiaj kho tau xwb. Thiab Vajtswv txoj kev kav ntawd “tsis txuam nrog qab ntuj neeg.”​—Nyeem Yauhas 18:36.

XYAUM YEXUS THAUM TSIS MUAJ KEV NCAJ NCEES

9. Vim li cas koj thiaj ntseeg tias Vajtswv txoj kev kav xwb thiaj tshem tau tej kev tsis ncaj ncees?

⁹ Niaj hnub nim no peb pom kev tsis ncaj ncees heev tshaj li thaum ub Yexus pom. Tej kev tsis ncaj ncees ntawd yog los ntawm Xatas thiab tej tib neeg uas nws tswj hwm. (2 Timautes 3:1-5; Tshwmsim 12:12) Zoo ib yam li Yexus, peb paub hais tias Vajtswv txoj kev kav thiaj yuav tshem tawm tau tej kev tsis ncaj ncees mus xwb. Vim li ntawd peb thiaj tsis mus txhawb nqa tib neeg taug kev tsa paib thiab txhawb tej koom haum uas tib neeg tsa los mus pab kho tej kev tsis ncaj ncees. Cia peb mus tham txog ib tug muam npe hu ua Xis.a Ua ntej nws los ntseeg Yehauvas, nws yeej txhawb nqa thaum tib neeg mus tsa paib tawm tsam kev tsis ncaj ncees. Tiam sis nws txawm thim xav txog tej yam nws ua. Nws hais tias: “Thaum kuv mus tawm tsam ntawd, kuv pheej xav tias kuv puas txhawb nqa sab uas yog tiag. Tam sim no kuv txhawb nqa Vajtswv txoj kev kav lawm ces kuv paub tias kuv txhawb tau sab yog lawm tiag. Kuv paub tias kuv tshem tsis tau tej kev txom nyem yam li Yehauvas.”​—Ntawv Nkauj 72:1, 4.

10. Raws li Mathais 5:43-48, vim li cas tsis zoo rau peb pheej xav kom hloov tej kev cai los sis hloov nom tswv? (Saib daim duab.)

¹⁰ Niaj hnub no muaj coob leej ntau tus tib neeg koom tej pab tej pawg mus tsa paib kom nom tswv hloov lawv tej kev cai. Thaum mus ntawd, ua rau lawv chim heev, tsis mloog tej kev cai, thiab ua rau lwm tus raug mob. Yexus tsis tau qhia kom peb ua li no. (Efexaus 4:31) Muaj ib tug kwv tij npe hu ua Tswb tau hais tias: “Kuv paub hais tias txawm lawv mus tsa paib rau qhov zoo xwb los tib pliag ntshis txhua yam kuj hloov mus ua phem thiab nyiag ub nyiag no.” Yexus qhia kom peb hlub txhua leej txhua tus, tab txawm lawv tsis ntseeg li peb thiab tsim txom peb. (Nyeem Mathais 5:43-48.) Peb uas yog ib tug Khixatias yuav tau ua kom tag peb lub dag lub zog raws li Yexus qhia kom peb ua.

11. Vim li cas tej thaum ho nyuaj rau peb xyaum Yexus tus yam ntxwv?

¹¹ Txawm peb paub hais tias yav tom ntej Vajtswv txoj kev kav yuav kho txhua yam kev tsis ncaj ncees los yeej nyuaj rau peb xyaum Yexus tus yam ntxwv thaum peb raug kev tsis ncaj ncees. Cia peb mus tham txog ib tug muam hu ua Ntsa Iab uas raug kev xaiv ntsej muag. Nws hais tias: “Kuv chim los chim, mob los mob siab mas ua rau kuv xav pauj kua zaub ntsuab. Kuv xav mus tsa paib tawm tsam kev xaiv ntsej xaiv muag. Kuv xav tias mus pab li no tej zaum yuav ua rau kuv siab nqig lawm hov ntau tuaj.” Ntev mus ntev tuaj Ntsa Iab xam pom tias nws yuav tau hloov nws tej kev xav. Nws hais tias: “Kuv cia lwm tus txw kuv kom tso siab rau tib neeg dua li tso siab rau Yehauvas. Kuv thiaj li tseg tsis mus nrog tej pab tej pawg uas tawm tsam kev xaiv ntsej muag ua ke lawm.” Txawm tias peb chim siab vim peb raug kev tsis ncaj ncees los sis pom tib neeg raug kev tsis ncaj ncees los peb yuav tau ceev faj tswj peb lub siab kam tiag xwv peb thiaj tsis txuam nrog lub qab ntuj no.​—Yauhas 15:19.

12. Vim li cas peb yuav tau ceev faj txog tej uas peb nyeem, saib los sis mloog?

¹² Dab tsi thiaj li yuav pab tau peb kom tsis txhob chim txog tej kev tsis ncaj ncees? Muaj ib txhia ua tib zoo xaiv tej uas lawv nyeem, mloog, thiab saib xwv thiaj pab tau lawv. Muaj tej zaj uas tib neeg tso tawm saum huab saum cua yog los mus zes kom tib neeg chim xwv lawv thiaj xav hloov tej kev cai hauv lawv lub teb chaws. Feem ntau tej tib neeg uas tshaj tawm xov xwm nyiam qhia raws li lawv xav xwb, tsis raws li qhov tseeb. Txawm lawv tshaj tawm qhov tseeb los qhov uas peb pheej xav tas zaj tas zog txog tej kev tsis ncaj ncees puas ntxiv dab tsi rau peb? Yog peb pheej lauj sij hawm mloog thiab saib tej xov xwm ntawd ntau ntau ces tsuas tsub kev ntxhov siab thiab txo peb lub zog xwb. (Pajlug 24:10) Ntxiv ntawd, haj tseem yuav ua rau peb tsis nco qab txog tias Vajtswv txoj kev kav thiaj kho tau tej kev tsis ncaj ncees no.

13. Vim li cas nyeem Vajlugkub ho pab tau peb thev tej kev tsis ncaj ncees?

¹³ Yog peb lauj sij hawm los nyeem phau Vajlugkub txhua txhua hnub thiab xav txog tej uas peb nyeem ntawd ces yuav pab kom peb paub thev tej kev tsis ncaj ncees. Muaj ib tug muam npe hu ua Lia ntxhov siab heev thaum nws pom cov neeg zej zog raug kev tsis ncaj ncees. Tsis tas li ntawd, cov neeg ua phem los dim dawb dim do xwb. Nws hais tias: “Kuv zaum tsaws xav zoo zoo thiab nug kuv tus kheej tias, ‘Kuv puas ntseeg tiag tiag hauv nruab siab tias Yehauvas yeej kho tau tej teeb meem no?’ Thaum lub sij hawm ntawd kuv txawm nyeem Yauj 34:22-29. Cov nqe no qhia tias Yehauvas pom txhua yam. Tsuas yog Yehauvas tib leeg xwb thiaj paub tias qhov twg thiaj ncaj ncees thiab tsuas yog nws xwb thiaj kho tau txhua tus tej teeb meem.” Cheem peb tseem tos Vajtswv txoj kev kav los kho tej kev tsis ncaj ncees, peb ho ua tau dab tsi?

TEJ YAM UAS PEB UA TAU

14. Ib yam uas peb ua tau tam sim no yog dab tsi? (Kaulauxis 3:10, 11)

¹⁴ Peb tswj tsis tau tej uas lwm tus ua tiam sis peb tsuas tswj tau tej yam peb ua xwb. Raws li peb tau kawm, qhov uas peb xyaum Yexus yog hlub lwm tus. Txoj kev hlub no pab kom peb ua zoo rau lwm tus tab txawm lawv ua tsis ncaj rau peb. (Mathais 7:12; Loos 12:17) Yehauvas txaus siab heev thaum nws pom peb ua ncaj ua ncees thiab ua zoo rau lwm tus.​—Nyeem Kaulauxis 3:10, 11.

15. Peb pab tau tib neeg li cas thaum peb mus qhia Vajlugkub rau lawv?

¹⁵ Thaum muaj tej kev tsis ncaj ncees, qhov uas peb ua tau yog mus tshaj tawm txoj xov zoo rau lwm tus. Vim li cas peb ho ua li ntawd? Vim thaum tib neeg kawm txog Yehauvas ces yuav hloov tau lawv kom lawv ua tib neeg zoo thiab nyiam kev thaj yeeb. (Yaxayas 11:6, 7, 9) Muaj ib tug txiv neej npe hu ua Tub. Ua ntej nws kawm Vajlugkub, nws mus nrog ib pawg uas tawm tsam nom tswv ua ke. Nws hais tias: “Yus yuam tsis tau tib neeg. Thaum kuv kawm Vajlugkub ces kuv hloov xwb.” Tej yam uas Tub kawm tau hauv phau Vajlugkub pab tau kom nws tsis txhob mus tawm tsam nom tswv. Yog li ntawd, thaum peb qhia tib neeg qhov tseeb hauv phau Vajlugkub ces peb yuav pab tau kom lawv tsis txhob ua tej yam uas yuav ua tau rau lwm tus raug mob.

16. Vim li cas koj ho xav qhia tib neeg txog Vajtswv txoj kev kav?

¹⁶ Cia peb xyaum Yexus es kub siab lug qhia tib neeg txog Vajtswv txoj kev kav uas thiaj yuav tshem tau tej kev tsis ncaj ncees tiag tiag. Txoj kev vam kev cia siab no yuav pab tau cov uas raug kev tsis ncaj ncees. (Yelemis 29:11) Xis hais tias: “Qhov uas kuv los paub Yehauvas pab tau kuv thev tej kev tsis ncaj ncees uas kuv pom thiab raug. Yehauvas siv cov lus nyob hauv phau Vajlugkub los nplig tib neeg siab.” Tiam sis koj yuav tau ua tib zoo npaj ua ntej xwv koj thiaj paub muab Vajtswv Txoj Lus coj mus nplig lwm tus uas raug kev tsis ncaj ncees. Yog koj ntseeg tej lus hauv phau Vajlugkub tiag tiag ces koj thiaj yuav muab coj mus pab tau rau lwm tus, tsis hais hauv tsev kawm ntawv los sis ntawm qhov chaw ua hauj lwm.b

17. Yehauvas pab kom peb paub thev tej kev tsis ncaj ncees li cas?

¹⁷ Cheem Xatas tseem yog tus “kav lub qab ntuj no” ces peb yeej yuav raug tej kev tsis ncaj ncees. Tiam sis peb muaj kev cia siab thiab muaj Yehauvas pab mus txog hnub Xatas raug “ntiab tawm mus.” (Yauhas 12:31) Nyob hauv phau Vajlugkub, Yehauvas tsis yog qhia tias ua cas muaj kev tsis ncaj ncees tiam sis nws kuj qhia tias nws xav li cas txog tej kev tsis ncaj ncees uas ua rau peb nyuaj siab ntxhov plawv. (Ntawv Nkauj 34:17-19) Yehauvas siv Yexus qhia rau peb tias peb yuav tsum coj li cas thaum muaj kev tsis ncaj ncees thiab Nws txoj kev kav yuav rhuav tshem tag nrho tej kev tsis ncaj ncees tawm mus. (2 Petus 3:13) Cia peb kub siab lug tshaj tawm txoj xov zoo txog Vajtswv txoj kev kav thiab peb tos tsis hnyu rau thaum lub ntiaj teb tsuas pom muaj kev ncaj ncees lawm xwb.​—Yaxayas 9:7.