Cov “Muaj Lub Siab Xib Rau Vajtswv” Yeej Yuav Los Cuag Nws

1. Thaum tib neeg hnov peb tshaj tawm txoj xov zoo, lawv ua li cas xwb? (Tes Hauj Lwm 13:47, 48; 16:14, 15)

MUAJ coob tus tib neeg nyob rau thawj 100 xyoo los ntseeg Yehauvas thaum lawv hnov dheev txoj xov zoo. (Nyeem Tes Hauj Lwm 13:47, 48; 16:14, 15.) Niaj hnub nim no los kuj zoo ib yam li ntawd. Thaum ib txhia hnov dheev txoj xov zoo mas lawv zoo siab heev. Hos muaj dua ib co hnov txoj xov zoo tiam sis lawv ho tsis nyiam ces tom qab no lawv mam los ntseeg. Peb yuav ua li cas xwb thaum peb nrhiav pom cov uas “muaj lub siab xib Vajtswv?”

2. Vim li cas ho muab peb txoj kev mus tshaj tawm piv rau ib tug neeg mus ua teb?

² Cia peb muab tes hauj lwm mus tshaj tawm txoj xov zoo piv rau ib tug uas mus ua teb. Tej zaud tus neeg ua teb muaj ib co txiv uas siav ua ntej. Txawm li ntawd los nws haj tseem mus tu ntshis cov uas tsis tau siav. Zoo ib yam li ntawd thaum peb nrhiav tau ib tug uas xav mloog txoj xov zoo, peb yeej xav pab nws kom nws los ua Khetos ib tug thwj tim sai li sai tau. Peb tsis yog mus pab tus ntawd nkaus nkaus xwb tiam sis peb kuj siv sij hawm mus pab lwm tus los paub Vajtswv. (Yauhas 4:35, 36) Thaum peb paub zoo zoo tias tus twg nyiam thiab tus twg tsis nyiam ces peb thiaj yuav paub pab lawv. Nyob rau hauv zaj kawm no peb yuav tham seb peb yuav ua li cas thaum peb nrog ib tug twg tham thawj zaug es nws xav paub ntxiv txog phau Vajlugkub. Tsis tas li ntawd, peb kuj tham ntxiv tias peb yuav pab tus ntawd kom nws nrog Yehauvas sib raug zoo thiab los teev tiam Yehauvas li cas.

THAUM TIB NEEG XAV MLOOG

3. Peb yuav ua li cas xwb yog peb ntsib tej tug uas nyiam kawm Vajlugkub? (1 Kauleethaus 9:26)

³ Thaum peb nrhiav tau tej tug uas xav kawm Vajlugkub, peb xav pab kom nws paub Yehauvas thiab nrog Yehauvas sib raug zoo sai li sai tau. Yog li ntawd tsis txhob ua siab deb, thawj zaug koj ntsib ib tug uas nyiam Vajlugkub, cia li yaum kom nws kawm Vajlugkub thiab caw kom nws tuaj peb tej kev sib txoos.​—Nyeem 1 Kauleethaus 9:26.

4. Piav txog ib tug uas yeej kam kawm Vajlugkub tam sid.

⁴ Yaum kawm Vajlugkub. Muaj ib txhia tib neeg yeej kam kawm Vajlugkub tam sim ntawd. Xws li nyob hauv teb chaws Kanada (Canada) nyob rau Hnub 4, muaj ib tug poj niam los nqa phau Nyob Kaj Siab Lug Mus Ib Txhis ntawm lub laub. Tus muam ntawm lub laub txawm piav me ntsis txog phau ntawv ntawd thiab yaum kom tus poj niam ntawd kawm Vajlugkub. Tus poj niam ntawd txawm kam thiab muab nws tus xov tooj rau tus muam. Tib hnub ntawd, tus poj niam txawm ntaus ntawv tuaj rau tus muam seb thaum twg nkawd mam li kawm Vajlugkub. Tus muam hais tias cia txog Hnub 6 los sis Hnub 7 tso tiam sis tus poj niam ntawd hais tias: “Koj tuaj tag kis puas tau? Kuv xyeej tag kis.” Nkawd kawm Vajlugkub rau Hnub 5, thiab Hnub 7 tus poj niam kuj tuaj kev sib txoos. Nws haj tseem niaj hnub kawm Vajlugkub.

5. Dab tsi thiaj li yuav pab tau kom peb txawj pib kawm Vajlugkub nrog lwm tus? (Saib cov duab.)

⁵ Tsis yog txhua tus yuav zoo ib yam li tus poj niam ntawd es xav kawm Vajlugkub tam sid. Muaj tej txhia kuj yuav tau laug sij hawm ntev zog. Tej zaud peb yuav tau pib tham txog tej yam uas nws xav paub txog. Yog peb muab txhua yam xav rau qhov zoo thiab rau siab ntso pab nws ces tej zaud tsis ntev xwb nws kuj kawm Vajlugkub. Ua li peb yuav hais li cas nws thiaj kawm Vajlugkub? Cia peb mam mloog ib co kwv tij nkauj muam seb ua cas lawv thiaj txawj pib kawm Vajlugkub nrog lwm tus.

6. Peb yuav hais li cas xwv tus tib neeg ntawd thiaj xav nrog peb tham dua?

⁶ Cov kwv tij nkauj muam piav tias nyob rau tej lub teb chaws, tsis zoo rau peb hais tias “kawm,” “kawm Vajlugkub” los sis “tuaj qhia koj.” Qhov uas tib neeg nyiam hnov mas yog kom hais tias “tuaj tsham koj,” “tuaj saib koj,” thiab “peb nyeem ntawv ua ke.” Yuav kom pab tau tus tib neeg rov qab nrog koj tham dua, koj hais tau li no tias, “Tej yam uas peb xav paub txog puav leej qhia rau hauv phau Vajlugkub” los sis “Phau Vajlugkub tsis yog qhia txog Vajtswv xwb, nws pab tau peb rau txhua fab.” Tom qab ntawd koj kuj hais tau tias: “Tsis noj sij hawm li os. Tsuas siv li 10 rau 15 feeb xwb ces yus twb paub ntau ntau yam los mus tsav yus lub neej.” Koj tsis tas yuav hais rau lawv tias koj yuav “teem sij hawm” nrog lawv los sis tuaj “txhua txhua lub lim tiam.” Qhov no tej zaum yuav ua rau lawv xav tias yog ib qho kev tab kaum lawv xwb ces lawv tsis kam kawm.

7. Thaum twg ib txhia pom tias peb ua li raws li Vajtswv qhia? (1 Kauleethaus 14:23-25)

⁷ Caw lawv tuaj kev sib txoos. Puag thaum uas yog Povlauj lub sij hawm, muaj ib txhia tuaj kev sib txoos thawj zaug mas lawv pom tias cov Khixatias ua raws li Vajtswv qhia. (Nyeem 1 Kauleethaus 14:23-25.) Niaj hnub nim no los yeej zoo ib yam li ntawd. Cov uas nyuam qhuav kawm, lawv yeej ua tau zoo dua yog lawv tuaj kev sib txoos. Yog li ntawd, thaum twg thiaj zoo caij zoo nyoog rau peb caw lawv? Nyob rau hauv phau Nyob Kaj Siab Lug Mus Ib Txhis ntawm zaj kawm 10 tham txog mus kev sib txoos tiam sis koj tsis tas yuav tos txog thaum kawm zaj ntawd es koj mam li caw nws tuaj. Tsis txhob ua siab deb, cia li caw nws tuaj thawj zaug uas koj ntsib nws. Nco ntsoov qhia seb yuav tham txog dab tsi hauv Phau Tsom Faj rau lub lim tiam ntawd thiab lub ntsiab rau zaj lus qhuab qhia.

8. Thaum peb yuav caw ib tug tuaj kev sib txoos, peb yuav tau qhia dab tsi rau nws? (Yaxayas 54:13)

⁸ Thaum peb caw ib tug uas nyiam tuaj rau peb tej kev sib txoos, peb yuav tau ua tib zoo piav qhia rau nws tias peb txawv ntawm lwm txoj kev ntseeg. Muaj ib zaug ib tug kawm Vajlugkub tuaj thawj zaug ces thaum kawm phau Tsom Faj, nws txawm nug tus uas qhia Vajlugkub rau nws tias, “Tus uas coj paub txhua tus lub npe lov?” Tus muam thiaj li piav rau nws tias tib yam li peb paub peb tsev neeg lub npe ces peb yeej cim kom tau cov uas nyob hauv lub koom txoos lub npe. Tus kawm Vajlugkub ntawd xav tsis thoob li vim nws tsis tau pom dua. Muaj coob leej ntau tus pom tias peb tej kev sib txoos txawv dua ntawm lwm txoj kev ntseeg. (Nyeem Yaxayas 54:13.) Peb sib ntsib los teev tiam Yehauvas, kawm txog nws, thiab ib leeg txhawb ib leeg. (Henplais 2:12; 10:24, 25) Vim li ntawd peb tej kev sib txoos thiaj li muaj txheej txheem thiab pab tau peb lub neej, tsis yog mus ua kab lig kev cai. (1 Kauleethaus 14:40) Qhov chaw uas peb sib ntsib ntawd yeej muaj paj teeb ci ntsa thuav kom peb tau zoo kawm. Ntxiv ntawd, peb tsis tuaj ib roog nom tswv twg tog, peb tsis sib cav sib ceg thiab tsis qw ua nqaj ua nqug. Tej zaud ua ntej peb yuav caw ib tug uas kawm Vajlugkub tuaj kev sib txoos, zoo rau peb tso zaj yeeb yaj kiab Mus Ua Dabtsi Tom Tsev Nceeg Vaj? xwv nws thiaj paub tias yuav zoo li cas rau li cas.

9-10. Thaum peb caw ib tug twg tuaj kev sib txoos, peb yuav piav li cas rau nws xwv nws thiaj xav tuaj koom nrog peb dua? (Saib daim duab.)

⁹ Muaj ib txhia tsis kam tuaj tej kev sib txoos vim lawv ntshai tsam lawv ho yuav tau rau npe nrog peb tib yam li lwm txoj kev ntseeg. Yog li ntawd peb yuav tau ua tib zoo piav rau nws tias nws tsuas tuaj mloog xwb, nws tsis tas tsa tes teb. Peb caw tag nrho tsev neeg tuaj, tsis hais cov laus los sis me nyuam yaus huv tib si. Nyob rau ntawm peb tej kev sib txoos, tsis muab cov me nyuam faib mus rau lwm qhov. Ua li no cov niam txiv thiaj paub tias lawv cov me nyuam nyob qhov twg txhua lub sij hawm thiab paub hais tias lawv kawm dab tsi. (2 Kevcai 31:12) Peb tsis sau nyiaj los sis cev hnab los sau nyiaj. Peb ua li Yexus sam hwm tias: “Vajtswv pub dawb dawb rau nej mas nej cia li pub dawb dawb rau lwm tus.” (Mathais 10:8) Ntxiv ntawd, tej zaum zoo rau koj qhia rau tus uas tuaj ntawd tias nws tsis tas yuav tej khaub ncaws kim kim kom nws thiaj tuaj tau. Vajtswv saib tus neeg lub siab, tsis yog tej tsoos nws hnav.​—1 Xamuyees 16:7.

¹⁰ Yog tus koj caw tuaj kev sib txoos, cia li ua tib zoo tos txais nws. Coj nws mus ntsib cov txwj laus thiab ntsib cov kwv tij nkauj muam. Yog nws paub tias sawv daws nyiam nws ces yuav ua rau nws xav tuaj dua. Thaum tseem tab tom sib ntsib ntawd, yog nws tsis muaj Vajlugkub ces muab koj li rau nws saib thiab. Qhia kom nws ua tib zoo saib seb tus tham hais txog dab tsi los sis qhia seb peb kawm li cas rau li cas.

THAUM IB TUG TWG PIB KAWM VAJLUGKUB

11. Yuav ua li cas koj thiaj qhia tau tias koj saib taus tus kawm lub sij hawm?

¹¹ Peb yuav tau nco ntsoov li cas thaum peb qhia Vajlugkub rau ib tug twg? Nco ntsoov tsis txhob tab kaum tus kawm lub sij hawm ntau ntau. Yog koj teem sij hawm nrog nws li cas lawm, mus kom raws li ntawd. Tsis txhob xyaum lwm tus es xav mus thaum twg los tau. Ntxiv ntawd, thaum kawm nrog nws thawj zaug los tsis txhob qhia ntev qhia ntau. Cov kwv tij nkauj muam uas txawj txawj qhia hais tias kom qhia me ntsis xwb tab txawm tus tib neeg ntawd haj tseem xav kawm ntxiv. Tsis txhob txeeb hais lus ntau ntau, tso rau tus koj qhia tham thiab.​—Pajlug 10:19.

12. Thaum peb qhia Vajlugkub rau lwm tus, peb lub hom phiaj yog li cas?

¹² Thaum koj pib kawm nrog ib tug twg, nco ntsoov tias koj lub hom phiaj yog pab kom nws los paub thiab hlub Yehauvas thiab Yexus nkawd. Yuav kom koj ua tau li no koj yuav tau siv phau Vajlugkub qhia nws, tsis yog qhia los ntawm koj lub tswv yim xwb. (Tes Hauj Lwm 10:25, 26) Thaum tus tub txib Povlauj qhia tib neeg, nws qhia txog Yexus Khetos tus uas Yehauvas xa los pab kom tib neeg paub thiab hlub Yehauvas. (1 Kauleethaus 2:1, 2) Povlauj kuj qhia rau cov Khixatias tias tseem ceeb heev uas lawv yuav tau pab cov uas nyuam qhuav los ntseeg kom lawv muaj tej cwj pwm zoo, yam li kub, nyiaj, thiab tej pob zeb uas muaj nqis. (1 Kauleethaus 3:11-15) Ntxiv ntawd, pab kom lawv muaj kev ntseeg, tswv yim, ua neeg thoob tsib, thiab paub hwm Yehauvas. (Ntawv Nkauj 19:9, 10; Pajlug 3:13-15; 1 Petus 1:7) Cia peb nco ntsoov xyaum raws li Povlauj tej lus es pab kom cov uas peb qhia rau muaj kev ntseeg ruaj nreeg thiab muaj kev sib raug zoo nrog Yehauvas.​—2 Kauleethaus 1:24.

13. Peb yuav ua siab ntev thiab ua neeg txawj xav li cas thaum peb pab tej tug uas nyuam qhuav kawm Vajlugkub? (2 Kauleethaus 10:4, 5) (Saib daim duab.)

¹³ Cia peb xyaum Yexus es ua siab ntev thiab ua neeg txawj xav. Tsis txhob nug tej yam ua rau nws txaj muag. Thaum neb kawm Vajlugkub, yog muaj tej yam nyuaj rau nws nkag siab ces kawm txuas ntxiv mus rau qhov tom ntej. Lwm hnub mam rov qab los tham txog qhov ntawd los tau. Tsis txhob yuam kom nws ntseeg yog tias nws tsis tau npaj siab ntseeg. Cia sij hawm ncua mus kom nws paub Yehauvas tob me ntsis tso ces nws mam li hloov nws tus kheej. (Yauhas 16:12; Kaulauxis 2:6, 7) Nyob rau hauv phau Vajlugkub hais tias tej yam uas tib neeg ntseeg uas tsis raws li phau Vajlugkub zoo ib yam li tej cag uas cog tob tob rau hauv neeg lub siab ces peb yuav tau maj mam muab nphau tawm los. (Nyeem 2 Kauleethaus 10:4, 5) Thaum hais txog “cog ruaj cog khov,” nyob hauv cov lus Kilis muab cov lus no piv rau ib tug pej thuam uas yuav tau muab tsoo kom pob tag. Tej zaud yuav tsis yooj yim rau ib tug uas tseem tab tom kawm Vajlugkub muab tej uas nws ib txwm ntseeg tso tseg kiag tam sim ntawd. Yog li ntawd, peb yuav tau pab nws tsa dua ib tug pej thuam uas yog kom nws tso siab rau Yehauvas ces thiaj yuav yooj yim rau nws tso tej yam uas nws ib txwm ntseeg tseg.​—Ntawv Nkauj 91:9.

THAUM MUAJ IB TUG TSHIAB TUAJ KEV SIB TXOOS

14. Peb yuav coj li cas rau cov uas tuaj tshiab rau peb tej kev sib txoos?

¹⁴ Thaum muaj ib tug tshiab tuaj, Yehauvas tsis xav kom peb xaiv ntsej muag, tab txawm nws yuav coj li cas, muaj thiab pluag los sis yog haiv neeg twg. (Yakaunpaus 2:1-4, 9) Yuav ua li cas cov uas tuaj tshiab rau tej kev sib txoos thiaj paub tias peb hlub lawv?

15-16. Yuav ua li cas cov uas tuaj tshiab thiaj li xav tuaj peb tej kev sib txoos dua?

¹⁵ Muaj ib txhia tuaj peb tej kev sib txoos vim lawv xav paub seb peb qhia txog dab tsi los sis tej zaud muaj leej twg txhawb kom lawv tuaj koom. Yog li ntawd, peb tsis txhob ua siab deb es kav tsij mus hu lawv. Thaum peb mus tos txais lawv, peb yeej zoo siab tias lawv tuaj tiam sis tsis txhob ua rau lawv tsis pom qab nyob. Yog lawv tsis paub leej twg, koj kuj caw tau lawv los nrog koj zaum. Pab nthuav Vajlugkub thiab muab tej ntaub ntawv uas peb kawm rau lawv saib los sis muab ib phau rau lawv tuav. Nco ntsoov xav txog lawv. Muaj ib hnub ib tug txiv neej tuaj kev sib txoos ces ib tug kwv tij txawm tos txais nws. Tus txiv neej hais rau tus kwv tij hais tias nws hnav tej tsoos tsis phim sawv daws. Tus kwv tij thiaj li qhia rau nws tias kom tsis txhob xav ntau ntau, Yehauvas Cov Tim Khawv tsis xav li cas. Tom qab no tus txiv neej kuj ua kev cai raus dej thiab nws nco ntsoov qhov uas tus kwv tij hais rau nws. Cia peb nco ntsoov li no thaum nrog cov uas tuaj tshiab tham: Thaum koj nrog ib tug tuaj tshiab tham lus ua ntej los sis tom qab kev sib txoos, koj yuav tau ceev faj tsis txhob nug tej yam ua rau nws txaj muag los sis nug txog tej yam hauv nws lub neej uas nws tsis xav hais tawm.​—1 Petus 4:15.

¹⁶ Thaum peb sib txuas lus, tsa tes teb, thiab muaj lus qhia saum sam thiaj, nco ntsoov xav txog cov uas tuaj tshiab es tsis txhob hais tej lus tub qaug txog cov tib neeg uas tsis tau paub Yehauvas thiab lawv tej kev ntseeg. Tsis txhob siv cov lus uas yuav ua rau cov tuaj tshiab xav yuam kev es tsis kam rov qab tuaj ntxiv. (Titus 2:8; 3:2) Xws li tsis txhob thuam tej uas lawv ntseeg. (2 Kauleethaus 6:3) Thaum cov kwv tij tham lus qhuab qhia, lawv yuav tau nco ntsoov tias kuj muaj cov tuaj tshiab tsis nkag siab qho lo lus uas peb siv ces cov kwv tij yuav tau muab cov lus ntawd txhais kom ua rau lawv paub.

17. Thaum peb nrhiav tau cov uas “muaj lub siab xib rau Vajtswv”, peb qhov zeem muag yog li cas?

¹⁷ Peb nyob rau tiam kawg lawm, peb yuav tau maj nroos tshaj tawm txoj xov zoo kom peb thiaj li coj tau cov uas “muaj lub siab xib rau Vajtswv” los ntseeg. (Tes Hauj Lwm 13:48) Thaum peb ntsib ib tug twg, tsis txhob ua siab deb, kav tsij yaum kom lawv kawm Vajlugkub thiab yaum kom lawv tuaj peb tej kev sib txoos. Yog peb ua li no ces peb pab tau lawv kom los taug “txoj kev me coj mus tau txoj sia.”​—Mathais 7:14.