1925​—Tau 100 Xyoo Lawm

UA TIAG TOS

Xyoo 1925, Cov Tub Kawm Vajlugkub ib txhia xav hais tias nyob rau xyoo ntawd lub ntiaj teb yuav ua ib lub Vaj Kaj Siab. Vim li cas lawv ho xav li no? Kwv Tij Alanpaw Saudaws (Albert Schroeder) uas yog ib tug ntawm Pab Uas Ntaus Thawj hais tias: “Peb xav hais tias cov xaiv tseg yuav mus nyob saum ntuj ceeb tsheej hos cov uas kub siab teev tiam Yehauvas zoo li Anplahas thiab Daviv yuav sawv los saib xyuas lub ntiaj teb no.” Thaum tsis muaj raws li no mas ib co kwv tij nkauj muam chim kawg li.​—Pajlug 13:12.

Txawm tsis mus raws li lawv lub siab xav los ib txhia haj tseem kub siab lug mus tshaj tawm txoj xov zoo. Lawv xam pom hais tias mus tshaj tawm txog Yehauvas tseem ceeb dua. Cia peb mus tham seb lawv siv xov tooj cua los tshaj tawm rau coob leej ntau tus tib neeg li cas.

MUAJ XOV TOOJ CUA NTAU ZUJ ZUS

Xyoo 1924, muaj coob leej ntau tus tib neeg mloog lub xov tooj cua WBBR. Xyoo 1925, Cov Tub Kawm Vajlugkub ua dua ib lub xov tooj cua hauv lub xeev Ilinos (Illinois) uas nyob ze ntawm lub nroog Sikhankaus (Chicago). Lub xov tooj cua no ncha mus deb dua thiab hu ua WORD. Tus uas pab tsim tsa lub xov tooj cua no npe hu ua Lauj Lefaws (Ralph Leffler) hais tias: “Thaum lub caij ntuj no, tej hmo uas no no los lub xov tooj cua no haj tseem nrov txhua qhov rau tib neeg.” Xws li muaj ib tse neeg nyob hauv lub xeev Alaxakas (Alaska) ntawm lub nroog Phailes Xateseem (Pilot Station) uas nyob deb li 5,000 kilumev (3,000 mais) ntawm lub xov tooj cua los haj tseem nrov txog. Tom qab tsev neeg no mloog tag, lawv sau ib tsab ntawv tuaj ua tsaug tias cov lus uas tshaj tawm ntawd txhawb tau lawv lub zog kawg li.

Phau Tsom Faj lub 12 Hlis tim 1 xyoo 1925 piav tias vim li cas muaj tib neeg coob heev thiaj li hnov lub xov tooj. Nws hais tias: “WORD yog ib lub xov tooj cua uas muaj zog heev nyob rau hauv Yunaithim Xatej (United States). Txawm koj yuav nyob hnub tuaj hnub poob hauv Yunaithim Xatej los yeej hnov tag nrho. Cov uas tsis tau hnov txog Vajtswv Txoj Lus es yog lawv mloog lub xov tooj cua no ces kuj ua rau lawv xav kawm Vajlugkub.”

Nyob rau tib lub ncua sij hawm ntawd, Cov Tub Kawm Vajlugkub xav siv lub xov tooj cua no tshaj tawm txoj xov zoo mus rau teb chaws Kanada (Canada). Nyob rau xyoo 1924, thiaj li tsim tsa lub xov tooj cua CHUC hauv lub xeev Sakatshavas (Saskatchewan) ntawm lub nroog Sakatoos (Saskatoon). Nov yog thawj lub xov tooj cua uas tshaj tawm kev ntseeg nyob rau hauv Kanada. Xyoo 1925, yuav tau muab lub xov tooj cua no tshais chaw. Yog li ntawd, lawv thiaj li muab txauv los nyob rau ntawm ib lub tsev qub qub uas thaum ub luag saib yeeb yaj kiab. Yehauvas lub koom haum thiaj yuav lub tsev no thiab muab kho dua.

Vim muaj lub xov tooj cua no coob leej ntau tus tib neeg, tsis hais nyob yaj sab los sis tej me nyuam zos puav leej hnov txoj xov zoo hauv lub xeev Sakatshavas. Xws li muaj ib lub me nyuam zos, muaj ib tug niam tsev hu ua Nkehas (Graham) sau ib tsab ntawv tias tom qab nws hnov tag nws xav tau cov ntaub ntawv. Kwv Tij Ntsauj Nais (George Naish) hais tias, “Tus poj niam no xav xav tau cov ntaub ntawv ces peb thiaj li xa tag nrho cov ntawv uas kawm txog phau Vajlugkuba mus rau nws.” Tsis ntev tom qab ntawd, tus niam tsev no mus tshaj tawm txoj xov zoo txog lub Nceeg Vaj rau txhua leej txhua tus.

PEB KAWM TAU IB YAM TSHIAB

Nyob rau hauv Phau Tsom Faj lub 3 Hlis tim 1 xyoo 1925, muaj ib zaj kawm hu ua “Ib Haiv Neeg Uas Yug Tshiab”.b Vim li cas zaj kawm no ho tseem ceeb ua luaj? Cov Tub Kawm Vajlugkub paub hais tias Xatas kav tej dab, kev ntseeg cuav, nom tswv thiab tej lag luam hauv ntiaj teb no. “Tus qhev ncaj thiab ntse” pab kom cov kwv tij nkauj muam nco ntsoov tias Yehauvas kuj muaj ib lub koom haum uas tsis muaj feem xyuam nrog Xatas thiab tsis koom tes nrog Xatas. (Mathais 24:45) Ntxiv ntawd, tus qhev ncaj thiab ntse qhia tias Vajtswv lub Nceeg Vaj sawv los kav xyoo 1914, thiab muaj “kev tsov kev rog saum ntuj ceebtsheej.” Xatas thiab nws cov dab thiaj raug muab cuam saum ntuj ceeb tsheej lawm ces lawv los rau hauv ntiaj teb no.​—Tshwmsim 12:7-9.

Cov Tub Kawm Vajlugkub ib txhia tsis txaus siab rau qhov kev nkag siab tshiab no. Nyob rau hauv zaj kawm ntawd thiaj hais tias: “Yog leej twg tau nyeem Phau Tsom Faj no thiab tsis txaus siab ces lawv yuav tau ua siab tus tus thiab tso siab rau tus Tswv es rau siab teev tiam nws.”

Muaj ib tug tho kev npe hu ua Thos Es (Tom Eyre) nyob rau teb chaws Askiv piav li no txog Cov Tub Kawm Vajlugkub ib txhia tias: “Cov kwv tij zoo siab kawg li thaum piav txog Tshwmsim 12. Thaum peb paub hais tias lub Nceeg Vaj twb kav saum ntuj lawm ces ua rau peb kub siab lug mus tshaj tawm txoj xov zoo rau lwm tus. Tej no pab kom peb phwb tes tsog ua Yehauvas tes hauj lwm thiab pab tau peb pom tias Yehauvas tseem yuav ua ntau yam zoo tuaj rau yav tom ntej.”

UA TIM KHAWV TXOG YEHAUVAS

Yehauvas Cov Tim Khawv niaj hnub nim no yeej paub zoo txog nqe Vajlugkub hauv Yaxayas 43:10 tias: “Nej yog Kuv cov timkhawv; Kuv xaiv nej los ua Kuv cov tubtxib.” Ua ntej xyoo 1925, nqe Vajlugkub no yeej tsis tshua tshwm ntau pes tsawg nyob rau hauv peb tej ntaub ntawv. Tiam sis tom qab xyoo 1925, kuj hloov lawm. Nyob rau hauv 11 Phau Tsom Faj, txhua txhua phau kuj tham txog Yaxayas 43:10 thiab 12!

Thaum lub 8 Hli xyoo 1925, Cov Tub Kawm Vajlugkub mus lub rooj sib txoos hauv lub xeev Eedi-ana (Indiana) ntawm lub nroog Eedia-apolis (Indianapolis). Nyob rau hauv daim kom tswj ntawm lub rooj sib txoos, muaj Yauxej Luthafaw (Joseph Rutherford) cov lus tos txais tias: “Peb tuaj lub rooj sib txoos no kom tus Tswv thiaj tsav peb lub dag zog kom kub siab lug ua tim khawv txog nws.” Yim hnub ntawm lub rooj sib txoos puav leej yog los mus txhawb cov uas tuaj koom kom mus ua tim khawv txog Yehauvas rau txhua lub caij nyoog.

Hnub 6 (Saturday) uas yog lub 8 Hli tim 29, Kwv Tij Luthafaw tham tias kom rau siab mus ua tim khawv txog Yehauvas. Nyob rau hauv nws zaj lus qhuab qhia piav tias tseem ceeb npaum li cas rau peb mus tshaj tawm. Nws hais tias: “Yehauvas hais rau nws cov tib neeg tias: ‘Nej yog Kuv cov timkhawv; . . . Kuv tibleeg xwb thiaj yog Vajtswv.’ Yehauvas sam hwm cov lus no khov khov tias: ‘Tsa ib tsab cai rau cov tib neeg coj.’ Cov uas ua tim khawv rau tus Tswv yog cov uas tus Tswv muab nws lub hwj huam rau.”​—Yaxayas 43:12; 62:10.

Tom qab nws zaj lus qhuab qhia, nws nyeem ib tsab ntawv hu ua kev vam kev cia siab.c Cov uas tuaj mloog ntawd yeej pom zoo rau cov lus nyob rau hauv tsab ntawv tias tsuas yog Vajtswv lub Nceeg Vaj xwb thiaj li muab tau kev thaj yeeb, kev vam meej, kev noj qab haus huv, txoj sia, kev ywj pheej, thiab yuav ua rau peb muaj kev kaj siab mus ib txhis.” Cov lus no kuj tau muab txhais ua lwm yam lus tso rau hauv tej daim ntawv me me uas tau muab luam tawm kwv lam li 40 plhom daim coj mus tseb rau tib neeg nyeem.

Cov Tub Kawm Vajlugkub kawm txog nqe Vajlugkub no tiam sis lawv tseem tsis tau siv lub npe Yehauvas Cov Tim Khawv. Txawm li ntawd los lawv nkag siab tias lawv yuav tau ua tim khawv txog Yehauvas.

ROV MUS XYUAS COV UAS NYIAM KAWM VAJLUGKUB

Vim Cov Tub Kawm Vajlugkub coob zuj zus nyob qhov txhia qhov chaw, Yehauvas lub koom haum txhawb kom rov mus xyuas cov tib neeg uas nyiam txoj xov zoo. Tom qab lawv tseb daim ntawv me txog txoj kev vam kev cia siab, daim Npuletees (Bulletin)d txhawb tias: “Rov qab mus xyuas cov tib neeg uas nej tso daim ntawv me me tseg rau lawv.”

Daim Npuletees lub 1 Hlis xyoo 1925, ib tug Tub Kawm Vajlugkub uas nyob hauv lub xeev Thexav (Texas) ntawm lub nroog Plano hais tias: “Peb xav tsis thoob li thaum peb rov mus xyuas es tib neeg nyiam kawg li. Ib lub me nyuam zos nyob rau ntawm peb koog mas kaum xyoo xwb peb twb mus qhia txog li tsib lwm lawm. Tsis ntev tas los no tus muam Henris (Hendrix) thiab kuv niam nkawd rov mus qhia ntawm lub zos ntawd dua mas nkawd tseem tseb ntawv tshaj li yav tas los thiab.”

Nyob rau teb chaws Panama, muaj ib tug tho kev sau tias: “Muaj coob leej ntau tus uas tsis kam mloog thaum kuv qhia thaum chiv thawj kuj hloov siab mloog thaum kuv rov tuaj dua zaum ob los sis zaum peb. Kuv yeej siv kuv lub sij hawm ntau dua mus qhia rau cov uas kuv twb ntsib dua los lawm mas zoo kawg li.”

NTSIA NTSOOV RAU YAV TOM NTEJ

Nyob rau hauv tsab ntawv uas txwm xyoo rau cov tho kev, Kwv Tij Luthafaw piav txog seb lawv tau ua dab tsi rau dab tsi nyob rau xyoo ntawd thiab yuav muaj dab tsi yav tom ntej. Nws hais tias: “Xyoo tas los no nej kuj mus nplig cov uas muaj kev nyuaj siab. Tes hauj lwm no kuj ua rau nej muaj kev zoo siab heev. Xyoo yuav tuaj no nej yuav muaj lub cij fim los ua tim khawv txog Vajtswv thiab nws lub nceeg vaj thiab ua qhia tias leej twg thiaj yog cov uas teev tiam nws. Cia peb sib koom siab qhuas peb tus Vajtswv thiab peb tus Vaj Ntxwv.”

Thaum xyoo 1925 yuav xaus, cov kwv tij pom zoo yuav ua kom lub Npe-ee nyob hauv Npluavlees (Brooklyn) nthuav dav zuj zus ntxiv. Xyoo 1926, tsis tau muaj ib zaug uas Yehauvas lub koom haum yuav kho vaj kho tsev loj npaum li no.