ZAJ KAWM 40
ZAJ NKAUJ 111 Peb Txojkev Zoo Siab
Yehauvas Yog Peb Txoj “Kev Kajsiab”
“Kuv yuav mus rau ntawm Koj . . . Koj thiaj yog tus uas ua tau rau kuv muaj kev kajsiab.”—NTAWV NKAUJ 43:4.
LUB NTSIAB RAU ZAJ NO
Peb yuav kawm seb dab tsi ua rau peb tsis muaj kev kaj siab thiab yuav ua li cas peb thiaj li rov qab kaj siab tuaj.
1-2. (1) Niaj hnub nim no tib neeg raug dab tsi hauv lub neej? (2) Nyob rau hauv zaj kawm no yuav tham txog dab tsi?
NIAJ HNUB nim no tib neeg feem coob yeej nrhiav nrhw seb yuav ua li cas thiaj muaj kev zoo siab hauv lub neej. Txawm lawv ua npaum li no los lawv tsis muaj kev zoo siab. Muaj coob leej ntau tus tsuas ua neej qhuav siab qhawv thiab ua neej tsaus ntuj nti. Yehauvas cov tib neeg kuj muaj ib txhia xav ib yam li lawv xav thiab. Nco ntsoov tias peb nyob rau tiam kawg lawm ces peb yeej yuav raug tej “kev ntxhovsiab” ntawd.—2 Timautes 3:1.
2 Nyob rau zaj kawm no yuav tham seb dab tsi ua rau peb ntxhov siab hnyo, thiab yuav ua li cas peb thiaj li rov muaj kev kaj siab dua. Ua ntej no cia peb mus kawm txog tus chiv txoj kev zoo siab thiab kev kaj siab.
TUS CHIV TXOJ KEV ZOO SIAB THIAB KEV KAJ SIAB
3. Tej uas Yehauvas tsim qhia li cas txog nws? (Saib cov duab.)
3 Yehauvas yeej ib txwm zoo siab. Nws thiaj xav kom peb zoo siab ib yam li nws. Txhua yam uas Yehauvas tau tsim qhia tias nws muaj kev zoo siab, xws li lub ntiaj teb peb nyob no zoo nkauj heev muaj ntau yam xim hais tsis txhij tsis txhua, muaj tsiaj txhu dhia cus plaws, thiab zaub mov nchuav lug. Vajtswv hlub peb heev, nws xav kom peb txaus siab ua neej nyob!
Tus me nyuam ntxhw: Image © Romi Gamit/Shutterstock; ib hom noog ko taw luv: Vladimir Seliverstov/500px via Getty Images; cov me nyuam tshis: Rita Kochmarjova/stock.adobe.com; Ob tug ntses: georgeclerk/E+ via Getty Images
Tej tsiaj uas dhia cus plaws no qhia tias Yehauvas muaj kev zoo siab (Saib nqe 3)
4. (1) Txawm Yehauvas pom tib neeg raug kev nyuaj siab ntxhov plawv los ua li cas nws ho muaj taus kev zoo siab? (2) Ib yam uas Yehauvas pub rau peb yog dab tsi? (Ntawv Nkauj 16:11)
4 Txawm Yehauvas muaj kev zoo siab los nws yeej nco ntsoov tias tib neeg raug kev nyuaj siab ntxhov plawv. (1 Timautes 1:11) Ntxiv ntawd, nws kuj tsis cia tej kev nyuaj siab no ua rau nws tsis muaj kev kaj siab. Nws paub ntsoov tias tej uas tib neeg raug tsuas nyob ib ntus xwb yuav dua mus, vim nws yog tus teem caij teem nyoog kom tej ntawd txawj dua mus. Nws yeej ua siab ntev tos txog hnub ntawd. Cheem peb tseem tos lub caij nyoog ntawd, Yehauvas yeej paub tej uas peb raug thiab nws yeej xav pab peb. Ua li nws ho pab peb rau txoj ke twg? Ib qho uas nws pab ntawd yog pub kom peb muaj kev kaj siab. (Nyeem Ntawv Nkauj 16:11.) Cia peb kawm seb Yehauvas ua rau Yexus zoo siab li cas.
5-6. Vim li cas Yexus ho muaj kev zoo siab?
5 Tag nrho tej uas Yehauvas tau tsim, Yexus yog tus zoo siab tshaj. Vim li cas ho hais li ntawd? Vim (1) nws “muaj tus yam ntxwv zoo ib yam li Vajtswv” thiab coj ib yam li nws Txiv rau txhua fab. (Kaulauxis 1:15; 1 Timautes 6:15) (2) Yexus yog tus nrog nws Txiv ntev tshaj plaws thiab pom tias nws Txiv muaj kev zoo siab heev.
6 Yexus yeej zoo siab hlo ua txhua yam raws li nws Txiv hais kom nws ua. (Pajlug 8:30, 31; Yauhas 8:29) Vim Yexus tsis tso Yehauvas tseg, Yehauvas thiaj li txaus siab heev rau nws.—Mathais 3:17.
7. Yuav ua li cas peb thiaj muaj kev zoo siab?
7 Yog peb los sib raug zoo nrog Yehauvas tus uas chiv txawm txoj kev zoo siab ces peb yuav muaj taus kev zoo siab thiab. Ntxiv ntawd, yog peb ua nws tes hauj lwm li nws pom zoo ces peb yuav muaj kev kaj siab vim peb paub tias nws zoo siab rau tej peb ua.a (Ntawv Nkauj 33:12) Tiam sis tej thaud vim li cas peb ho tsis muaj kev kaj siab? Puas yog Yehauvas tsis txaus siab rau tej peb ua lawm? Tsis yog! Vim peb yog noob txaug neeg txhaum ces qee lub sij hawm peb yeej yuav muaj kev nyuaj siab, kev tu siab, thiab nyob mluas mlob. Yehauvas yeej paub zoo txog tej no. (Ntawv Nkauj 103:14) Cia peb mus tham txog seb muaj dab tsi ho ua rau peb tsis kaj siab thiab yuav ua li cas peb thiaj rov qab muaj kev kaj siab.
ROV QAB MUAJ KEV KAJ SIAB
8. Tej teeb meem uas peb raug ua tau li cas rau peb?
8 Thaum muaj teeb meem. Puas yog koj tab tom raug kev tsim txom, xwm txheej, kev txom nyem, muaj mob muaj nkeeg los sis kev laus? Tej teeb meem no ua rau peb tsis qab siab ua dab tsi vim peb tav tsis tau los sis tshem tsis tau tej ntawd li. Nyob hauv phau Vajlugkub hais tias: “Thaum lawv ntxhovsiab, lawv ntsejmuag mluasmlob.” (Pajlug 15:13) Muaj ib tug txwj laus npe hu ua Npanpis (Babis). Tau plaub xyoos xwb, nws tus tij laug, nws niam thiab nws txiv tau tag sim neej. Nws hais tias: “Ua rau kuv ntsuag nos heev thiab tsis muaj neeg yuav pab tau kuv li. Yav tas los muaj ntau yam tab kaum kuv mas kuv twb tsis muaj sij hawm nrog kuv tsev neeg ua ke ib chim li ua ntej lawv tag sim neej, nim no thiaj li ua rau kuv puas siab puas ntsws tas.” Zoo ib yam li ntawd, tej teeb meem uas peb raug ua rau peb ntxhov siab hnyo thiab tsis xav ua dab tsi.
9. Tej yam twg pab kom peb rov qab muaj kev kaj siab teev tiam Yehauvas dua? (Yelemis 29:4-7, 10)
9 Dab tsi yuav pab kom peb rov qab muaj kev kaj siab? Peb yuav zoo siab dua yog peb tsis txhawj txhawj txog tej yam peb kho tsis tau thiab txaus siab rau tej yam uas peb muaj. Lub qab ntuj neeg no qhia tias yuav kom peb muaj kev zoo siab, peb lub neej yuav tsum zoo xwb. Tiam sis tej no tsis muaj tseeb rau qhov Yehauvas qhia rau cov neeg Yudais uas poob ua cev qhev tim Npanpiloos tias kom lawv cia li txaus siab rau lub neej uas lawv mus nyob rau tid. (Nyeem Yelemis 29:4-7, 10.) Peb khaws tau li cas los ntawm zaj no? Cia li txais yuav lub neej uas koj tau tam sim no thiab txaus siab rau tej yam uas koj muaj. (Ntawv Nkauj 63:7; 146:5) Efis (Effie) raug mob sab sab thiab ua rau nws mus tsis taus kev. Nws hais tias: “Yehauvas, kuv tsev neeg, thiab lub koom txoos yeej pab thiab txhawb kuv lub zog kawg li. Kuv tsis xav nyob mluas mlob yam li kuv twb tsis ris lawv txiaj ntsig. Kuv xav qhia rau Yehauvas thiab cov kwv tij nkauj muam tias kuv ris lawv txiaj ntsig kawg li.”
10. Thaum peb raug teeb meem, vim li cas peb ho muaj taus kev zoo siab?
10 Txawm peb lub neej tsis zoo npaum li siab xav los sis muaj tej yam tsis zoo los raug peb thiab peb tsev neeg los peb haj tseem muaj taus kev zoo siab.b (Ntawv Nkauj 126:5) Tos peb muaj taus kev zoo siab los tsis yog nyob ntawm peb lub neej. Malias (Maria) uas yog ib tug tho kev hais tias: “Peb Leej Txiv Yehauvas yuav pab kom peb muaj kev zoo siab tab txawm peb txom nyem siab ntsws. Thaum peb raug teeb meem es peb muaj kev zoo siab tsis yog vim peb tsis muaj siab muaj ntsws. Tiam sis yog qhia hais tias peb yeej nco ntsoov Yehauvas tej lus cog tseg.” Nco ntsoov tias txawm yuav nyuaj npaum twg tam sim no los peb tej teeb meem tsuas nyob ib nyuag ntu xwb, zoo ib yam li txhais hneev taw nyob ntawm ntug dej. Thaum dej los ntaus ces twb tsis pom lawm ces thaum Yehauvas muab txhua yam tshem tawm mus ces yuav tsis muaj tej teeb meem ntxiv lawm.
11. Tus tub txib Povlauj tus yam ntxwv txhawb tau koj li cas?
11 Muaj tej lub sij hawm peb xav hais tias peb muaj teeb meem vim Yehauvas tsis txaus siab rau peb. Yog tias peb tau xav li no zoo rau peb xav txog cov uas teev tiam Yehauvas txheej thaum ub uas raug teeb meem. Xws li tus tub txib Povlauj. Yexus xaiv nws los mus tshaj tawm txoj xov zoo “rau lwm haiv neeg, rau tej vaj ntxwv, thiab rau ib tsoom neeg Ixayees.” (Tes Hauj Lwm 9:15) Txawm Povlauj tau qhov koob hmoov no los nws haj tseem raug teeb meem hauv nws lub neej. (2 Kauleethaus 11:23-27) Txawm Povlauj lub neej tsis yooj yim los qhov no tsis yog qhia tias Yehauvas tsis txaus siab rau nws. Qhov uas nws thev taus txhua yam qhia tias Yehauvas pab nws. (Loos 5:3-5) Yog li ntawd, ua zoo xav txog tej uas koj raug. Qhov uas koj thev taus txhua yam kev sim siab qhia tias Yehauvas txaus siab heev rau koj.
12. Ua li cas tej yam peb ua tsis tau li peb npaj siab tseg ho txo tau peb lub zog?
12 Thaum tsis muaj raws li lub siab xav. (Pajlug 13:12) Vim peb hlub Yehauvas thiab ris nws txiaj ntsig, peb xav ua ntau yam rau nws. Yog peb npaj siab ua ib yam twg rau Yehauvas tiam sis peb ho ua tsis tau ces yuav txo tau peb lub zog. (Pajlug 17:22) Muaj ib tug tho kev npe hu ua Holis (Holly) hais tias: “Kuv xav mus txoj Kev Kawm Rau Cov Qhia Lub Nceeg Vaj, mus pab lwm lub teb chaws los sis mus pab tsa tsev hauv Lamapos (Ramapo). Tiam sis kuv lub neej hloov lawm thiab kuv mus pab tsis tau raws li kuv teem tseg mas txo tau kuv lub zog kawg li.” Tsis yog Holis thiaj xav li no xwb, muaj coob tus kuj xav tib yam thiab.
13. Yog peb ua tsis tau li peb npaj tseg, peb ho ua tau dab tsi?
13 Dab tsi yuav pab kom peb rov qab muaj kev kaj siab? Nco ntsoov tias Yehauvas tsis yuam leej twg thiab nws tsis xav kom peb ua tshaj li qhov uas peb ua tau. Yehauvas tsis saib seb peb ua tau ntau los sis tau tsawg tshaj lwm tus. Yehauvas xav kom peb ua neeg txo hwj chim thiab ntseeg nws ruaj nreeg. (Mikhas 6:8; 1 Kauleethaus 4:2) Nws tsis saib dej ua ntu neeg ua plhu tiam sis nws suav tias peb lub siab coj li cas. Yog li ntawd puas tsim nyog rau peb xav loj loj txog peb tus kheej uas Yehauvas twb tsis xav li ntawd? Tsis tsim nyog! Yog koj ua tau npaum li cas ces koj tsuas ua npaum li ntawd rau Yehauvas xwb. Xws li koj puas pab cob qhia tau cov hluas los sis txhawb tau cov laus? Koj puas txhawb tau ib tug twg tim ntsej tim muag, hauv xov tooj los sis ntaus ntawv mus txhawb nws? Yehauvas txaus siab heev yog koj ua tej yam uas koj ua tau thiab nws yuav foom koob hmoov rau koj! Nco ntsoov tias tseem tshuav ntau yam nyob rau hauv lub qab ntuj tshiab uas peb twb xav tsis txog yuav ua rau Yehauvas! Holis hais tias: “Kuv nco ntswb ntsoov tias kuv muaj ib txhis hauv lub qab ntuj tshiab los mus ua kuv tej hom phiaj rau Yehauvas.”
14. Dab tsi kuj ua tau rau peb tsis muaj kev zoo siab?
14 Xav txog yus tus kheej. Muaj ib txhia hais saum huab saum cua tias qhov ua rau yus zoo siab yog ua txhua yam kom haum yus siab. Lawv txhawb kom tib neeg ua tej yam lawv nyiam, mus yuav tej khoom ub khoom no thiab mus ncig teb chaws. Yehauvas yeej xav kom peb pom tej yam zoo zoo uas nws tsim hauv lub ntiaj teb no thiab yeej tsis txhaum yog tias peb mus ua tej ntawd. Tiam sis muaj coob leej ntau tus xam pom tias tej lawv mus ua ntawd yeej ua tsis tau rau kom lawv muaj kev zoo siab. Muaj ib tug tho kev npe hu ua Eva hais tias: “Thaum yus ua lub neej kom haum yus siab xwb mas yeej tsis muaj ib hnub uas yus yuav txaus siab rau yus lub neej li.” Yog peb ua txhua yam kom haum peb siab xwb ces thaum kawg peb yuav tu siab heev.
15. Peb khaws tau dab tsi los ntawm Vaj Ntxwv Xalaumoos lub neej?
15 Vaj Ntxwv Xalaumoos yog ib tug uas xav ua txhua yam kom haum nws siab tiam sis txog thaum kawg nws kuj tsis muaj kev zoo siab dab tsi. Nws thiaj li sim ntau txoj hau kev seb yam twg txaus nws siab, xws li noj tej zaub mov qab qab, mloog tej nkauj kho siab zim, thiab txhua yam uas nws lub siab ntshaw los nws yeej yuav tau los ua nws li. Txawm nws ua npaum li no los thaum kawg nws kuj tsis zoo siab dab tsi. Nws hais tias: “Lub qhovmuag ntsia npaumtwg los tsis txaus, thiab lub pobntseg mloog npaumtwg los tsis dhuav.” (Tej Lus Qhia 1:8; 2:1-11) Tib neeg xav tias yog lawv muaj nyiaj txiag ntau thiab ua neej ywj siab ywj ntsws ces lawv yeej yuav txaus siab rau lawv lub neej tiam sis txoj kev xav no tsuas zoo ib yam li cov nyiaj cuav. Thaum pom dheev tej nyiaj cuav mas zoo yam li muaj nuj nqis kawg tiam sis coj mus yuav tsis tau ib yam dab tsi kiag li.
16. Vim li cas pab lwm tus ho ua rau peb muaj kev zoo siab? (Saib cov duab.)
16 Dab tsi yuav pab kom peb rov qab muaj kev kaj siab? Yexus qhia peb tias “thaum yus pub rau luag, yus zoo siab dua li thaum luag pub rau yus.” (Tes Hauj Lwm 20:35) Muaj ib tug txwj laus npe hu ua Alekos hais tias: “Kuv nrhiav kev los mus ua me ntswb me ntsis pub rau lwm tus. Yog kuv yim muab rau lwm tus ces yim ua rau kuv zoo siab vim kuv tsis yog ua rau kuv tus kheej nkaus nkaus xwb.” Ua li koj ho ua tau dab tsi pub rau lwm tus? Yog koj pom ib tug twg ntsoos ntsoos, cia li mus nrog nws tham thiab txhawb nws lub zog. Tej zaum koj yuav kho tsis tau nws qhov teeb meem tiam sis qhov koj ua tau yog mloog nws piav, txawj xav, thiab qhia kom nws muab nws tej kev nyuaj siab tso rau Yehauvas. (Ntawv Nkauj 55:22; 68:19) Koj kuj pab kom nws nco ntsoov tias Yehauvas tsis tau tso nws tseg. (Ntawv Nkauj 37:28; Yaxayas 59:1) Tej zaud zoo rau koj ua qho yam zoo pub rau nws xws li nqa zaub nqa mov mus rau nws noj los sis coj nws mus taug kev ua si. Los sis koj kuj caw kom nws nrog koj mus tshaj tawm txoj xov zoo seb puas ua rau nws kaj siab tuaj. Cia Yehauvas siv koj mus pab lwm tus. Yog peb siv sij hawm mus pab lwm tus ces yuav ua rau peb muaj kev zoo siab tiag tiag!—Pajlug 11:25.
Tsis txhob xav txog tej yam koj ntshaw xwb tiam sis txhawj txog lwm tus thiab (Saib nqe 16)c
17. Yuav kom peb muaj taus kev zoo siab, peb yuav tau ua dab tsi? (Ntawv Nkauj 43:4)
17 Yog peb rau siab ntso kawm kom paub Yehauvas zoo ntxiv zuj zus ces peb yuav yim huab muaj kev zoo siab. Nyob rau hauv phau Vajlugkub qhia tias Yehauvas yog peb txoj “kev kaj siab.” (Nyeem Ntawv Nkauj 43:4.) Txawm peb muaj kev nyuaj siab ntxhov plawv hauv peb lub neej los peb yuav tsis txhawj tsis ntshai. Cia peb nco ntsoov vam khom Yehauvas vim nws yog tus uas chiv peb txoj kev kaj siab!—Ntawv Nkauj 144:15.
ZAJ NKAUJ 155 Peb Txojkev Kaj Siab Mus Ib Txhis
a Mus saib lub ntsiab “Yehauvas Yog Tus Pub Kev Kaj Siab.”
b Xws li mus saib lub vej xaij jw.org/hmn txog Denis (Dennis) thiab Ilinas Khitexes (Irina Christensen) lub neej hauv Pab Uas Ntaus Thawj Txoj Xov Xwm 5 Xyoo 2023.
c DAIM DUAB: Ib tug muam mus yuav khoom ntau ntau rau nws tus kheej tiam sis thaum nws yuav ib re paj rau tus muam laus ua rau nws zoo siab dua.