Vajtswv Txoj Kev Hlub Nyob Mus Ib Txhis

1-2. Cov kwv tij nkauj muam niaj hnub no raug kev nyuaj siab li cas?

MUAB xav hais tias ib lub nkoj tab tom raug ib nthw cua daj cua dub los ntaus. Lub nkoj yoj mus yoj los mas yuav tsum muaj ib qho dab tsi los tswj lub nkoj kom tus tus. Qhov uas tuav lub nkoj ntawd pab kom dej tsis txhob tshoob lub nkoj raws cov cua mus.

² Thaum koj tab tom raug ib qho kev nyuaj siab mas tej zaud koj yuav zoo ib yam li lub nkoj ntawd. Koj lub siab yuav ntxhov txoog ua ywj fab ywj fwj zoo yam li lub nkoj ntawd uas ntas mus ntas los. Muaj tej hnub koj yuav tso siab plhuav tias Yehauvas hlub thiab nrog nraim koj tiam sis muaj qho hnub koj yuav xav ntau ntau tias xyov Yehauvas puas quav ntsej txog tej uas koj raug. (Ntawv Nkauj 10:1; 13:1) Tej zaud cov kwv tij nkauj muam kuj hais tau qho lo lus los nplig koj siab tiam sis muaj tej hnub ces koj twb rov qab xav zoj tias xyov Yehauvas puas pab koj tiag. (Pajlug 17:17; 25:11) Tej zaud koj yuav xav tias ntshe Yehauvas saib koj tsis muaj nuj nqis dab tsi. Yog tias muaj tej uas zoo li hais no los raug koj, koj yuav ua li cas koj thiaj sawv ruaj khov khwb kho? Ua li cas koj thiaj paub tseeb tseeb tias Yehauvas hlub thiab txhawb nqa koj, thiab yuav ua li cas koj thiaj nco ntsoov li ntawd mus li?

3. “Txoj kev hlub nyob mus ibtxhis” uas hais hauv Ntawv Nkauj 31:7 thiab 136:1 yog li cas tiag, thiab vim li cas Yehauvas ho yog tus uas tso tau yam ntxwv zoo tshaj? (Saib daim duab.)

³ Ib qho uas yuav pab kom koj sawv ruaj khov khwb kho thaum raug kev sim siab yog nco ntsoov txog Yehauvas txoj kev hlub uas nyob mus ib txhis. (Nyeem Ntawv Nkauj 31:7; 136:1.) Sob lus uas hais tias “txoj kev hlub nyob mus ibtxhis” yog hais txog qhov uas ib tug npuab siab rawv rau ib tug mus li tsis txawj kawg. Tsis muaj ib tug twg tso tau yam ntxwv zoo tshaj Yehauvas thaum hais txog txoj kev hlub uas nyob mus ib txhis. Nyob hauv phau Vajlugkub piav tias nws yeej “puv npo txoj kev hlub uas nyob mus ib txhis.” (Khiav Dim 34:6, 7) Ntxiv ntawd phau Vajlugkub kuj hais tias: “Koj txojkev hlub muaj nplua mias rau cov uas hu thov koj.” (Ntawv Nkauj 86:5) Qhov no qhia tau tias Yehauvas yeej yuav tsis tso cov uas teev tiam nws tseg ib zaug li! Yog koj nco ntsoov li no ces yuav pab kom koj sawv taus ruaj khov khwb kho thaum koj raug kev sim siab.​—Ntawv Nkauj 23:4.

YEHAUVAS TXOJ KEV HLUB YOG TEJ PEB KAWM THAUM CHIV THAWJ

4. Piav seb tej koj kawm thaum chiv thawj hauv phau Vajlugkub yog dab tsi thiab vim li cas koj ntseeg ua luaj.

⁴ Ib qho ntxiv uas yuav pab kom koj tsis txhob xav tias Yehauvas tsis hlub koj lawm yog koj nco ntsoov tias thaum koj pib kawm Vajlugkub, koj twb kawm lawm tias Yehauvas hlub koj heev. Thaum koj pib kawm Vajlugkub ntawd, koj kawm tias Vajtswv lub npe hu ua Yehauvas, Yexus yog Vajtswv tus Tub, cov tuag tsis paub dab tsi, thiab lub ntiaj teb no yuav muab kho ua ib lub vaj kaj siab rau tib neeg nyob mus ib txhis. (Ntawv Nkauj 83:18; Tej Lus Qhia 9:5; Yauhas 3:16; Tshwmsim 21:3, 4) Tom qab koj kawm tag, puas muaj neeg txwv tau koj kom tsis txhob ntseeg li ntawd? Yeej tsis muaj leej twg li vim koj paub tias txhua yam koj kawm puav leej nyob hauv phau Vajlugkub. Yog li ntawd tsis txhob ua siab deb, Yehauvas yeej hlub koj thiab paub tias muaj koj, vim txoj kev hlub ntawd yog ib yam uas koj xub xub kawm thaum chiv thawj. Cia peb mus tham txuas ntxiv txog qhov no.

5. Piav seb ua li cas ib tug twg thiaj li tsis ntseeg tej yam uas tsis qhia raws li phau Vajlugkub lawm.

⁵ Thaum koj nyuam qhuav pib kawm Vajlugkub, dab tsi pab tau kom koj tsis txhob ntseeg tej yam uas tsis raws li phau Vajlugkub qhia? Tej zaud koj yuav muab tej uas koj ib txwm ntseeg coj los piv rau tej uas phau Vajlugkub qhia. Xws li yav thaud koj ntseeg tias Yexus yog Vajtswv. Tiam sis tom qab koj kawm Vajlugkub, koj mam paub tias Yexus tsis yog Vajtswv. Koj thiaj li tsis ntseeg li yav tag los lawm tiam sis koj ntseeg raws li qhov tshiab uas koj kawm tau. Ces tam sim no koj ntseeg tias Yexus yog “thawj tug uas Vajtswv tsim ua ntej ib puas tsav yam tib si” thiab nws yog “Vajtswv tib leeg Tub.” (Kaulauxis 1:15; Yauhas 3:18) Thaum xub thawj, tej kev ntseeg cuav yeej “cog ruaj cog khov” rau hauv koj nruab siab tiam sis tom qab koj paub qhov tseeb lawm ces koj kuj tsis ntseeg tej ntawd ntxiv.​—2 Kauleethaus 10:4, 5; Filipis 3:13.

6. Vim li cas koj ho tso siab tias Yehauvas “txoj kev hlub nyob mus ibtxhis”?

⁶ Zoo tib yam li thaum pib kawm Vajlugkub es koj hloov ntawd, thaum koj paub txog Yehauvas txoj kev hlub ces koj yuav pab kom koj hloov tib yam thiab. Xws li thaum raug kev sim siab, yog koj pib xav hais tias Yehauvas tsis hlub koj ces rov tshuaj koj tus kheej li no tias, ‘Kuv xav li no puas yog lawm?’ Muab qhov uas koj xav ntawd coj los piv rau cov lus nyob hauv Ntawv Nkauj 136:1. Vim li cas Yehauvas ho piav tias nws txoj kev hlub “nyob mus ibtxhis”? Vim li cas nws ho hais 26 zaug nyob rau hauv zaj nkauj ntawd? Vim Yehauvas txoj kev hlub uas nyob mus ib txhis yog ib yam uas nws cov tib neeg kawm thaum lawv pib kawm Vajlugkub thiab nws cov tib neeg yeej txaus siab hlo rau tej lawv kawm ntawd. Lub tswv yim uas qhia tias koj tsis muaj nuj nqis rau Yehauvas thiab Yehauvas tsis hlub koj ntawd yog ib qho uas tsis muaj tseeb. Tsis txhob mloog tej lus dag no ib yam li koj tsis mloog tej yam uas qhia tsis tseeb raws li phau Vajlugkub!

7. Piav seb cov nqe Vajlugkub twg qhia tias Yehauvas hlub koj.

⁷ Kuj muaj lwm nqe Vajlugkub qhia tias Yehauvas hlub peb heev. Xws li Yexus tau hais rau nws cov thwj tim tias: “Nej tseem muaj nqis dua tej noog tsev huv si.” (Mathais 10:31) Yehauvas hais rau nws cov tib neeg tias: “Kuv yuav txhawb kom nej muajzog thiab pab nej; Kuv sab tes xis uas muajyeej yuav puag rawv nej.” (Yaxayas 41:10) Yexus tsis tau hais tias ‘tej zaud nej muaj nqis dua,’ thiab Yehauvas tsis tau hais tias ‘tej zaud kuv yuav pab nej.” Tiam sis nkawd hais tias: “Nej tseem muaj nqis dua” thiab “Kuv yuav . . . pab nej.” Yog thaum twg koj raug kev sim siab es koj muaj ib lub siab hais rau koj tias xyov Yehauvas puas hlub kuv, tej nqe Vajlugkub zoo li hais tas los no yuav ua rau kom koj kaj siab thiab yuav pab kom koj nco ntsoov Yehauvas txoj kev hlub. Cov nqe Vajlugkub ntawd tsis yog lam hais kom tag dawb tag do xwb tiam sis yeej muaj tiag. Yog koj thov rau Yehauvas txog tej yam uas koj raug thiab ua tib zoo xav txog cov nqe Vajlugkub uas hais tas no ces koj yuav hais zoo li nyob hauv 1 Yauhas 4:16 tias: “Peb thiaj paub thiab ntseeg Vajtswv txoj kev hlub uas Nws muaj pub rau peb.”a

8. Yog tias muaj qee lub sij hawm koj pheej xav tias Yehauvas tsis hlub koj ces zoo rau koj ua li cas?

⁸ Koj yuav ua li cas yog tias muaj qee lub sij hawm koj tseem pheej xav tias Yehauvas tsis hlub koj? Yog muaj li no ces muab tej uas koj xav ntawd coj los piv rau tej uas koj paub. Tej yam uas yus lub siab xav zoo tsis txaus li tej yam muaj tseeb. Yehauvas txoj kev hlub uas hais nyob rau hauv phau Vajlugkub muaj tseeb. Yog peb xav ntau ntau ces cuag li peb xam tsis muaj tias Yehauvas muaj kev hlub.​—1 Yauhas 4:8.

XAV TXOG QHOV UAS YEHAUVAS “HLUB NEJ”

9-10. Nyob hauv Yauhas 16:26, 27, thaum Yexus hais tias “Leej Txiv hlub nej” yog hais li cas tiag? (Saib daim duab.)

⁹ Peb yuav paub Yehauvas txoj kev hlub tshaj qhov qub yog hais tias peb xav txog Yexus cov lus uas nws hais rau nws cov thwj tim tias: “Leej Txiv hlub nej.” (Nyeem Yauhas 16:26, 27.) Yexus tsis yog lam hais cov lus no kom ua rau nws cov thwj tim sov siab xwb. Sob lus ua ntej nqe ntawd qhia tias nws hais txog kev thov Vajtswv, tsis yog hais txog tej uas raug nws cov thwj tim siab.

¹⁰ Yexus hais rau nws cov thwj tim tias lawv yuav tsum thov Leej Txiv los ntawm nws lub npe, tsis yog rau nws. (Yauhas 16:23, 24) Zoo rau lawv paub txog tej no vim tom qab Yexus sawv rov los, lawv thiaj li tsis muaj lub siab xav thov rau nws. Yexus thiab lawv puav leej yog phooj ywg ces tej zaud lawv kuj yuav xav tias zoo rau lawv thov Yexus es Yexus mam li hais rau nws Txiv paub xwb. Tiam sis Yexus hais rau lawv kom tsis txhob muaj lub siab xav li no vim nws hais rau lawv li no tias: “Leej Txiv hlub nej.” Tej no yeej yog tej yam koj tau kawm txog thaum koj nyuam qhuav pib kawm Vajlugkub. Qhov uas koj kawm Vajlugkub ntawd pab tau kom koj paub thiab hlub Yexus. (Yauhas 14:21) Zoo ib yam li Yexus cov thwj tim, txawm koj paub thiab hlub Yexus los koj yeej thov tau Vajtswv vim nws hlub koj heev. Txhua zaus koj thov Vajtswv yeej qhia tau tias koj ntseeg tias Vajtswv hlub koj.​—1 Yauhas 5:14.

VIM LI CAS KOJ THIAJ XAV NTAU NTAU

11. Vim li cas Xatas ho zoo siab yog peb pheej xav tias Yehauvas tsis hlub peb?

¹¹ Vim li cas peb pheej xav ntau ntau txog tias Yehauvas tsis hlub peb? Tej zaud koj yuav teb ntua tias twb yog tim Xatas ua rau peb xav li ntawd. Xav li no kuj yog lawm thiab, tiam sis haj tseem tshuav qho yam. Xatas “nrhiav” nrhw kev los mus ua kom peb xav tias Yehauvas tsis hlub peb. (1 Petus 5:8) Xatas ua kom peb xav tias peb tsis tsim nyog tau tus nqi txhiv uas Yehauvas muab rau peb. (Henplais 2:9) Tiam sis yog peb xav li ntawd thiab muab Yehauvas tso tseg ces tsuas ua rau Xatas zoo siab xwb. Tiam sis qhov tseeb tiag, Xatas yog tus ua rau Yehauvas tsis hlub nws lawm. Nws ib lub “tswv yim dag” yog ua rau kom peb xav tias Yehauvas tsis hlub thiab tsis xav yuav peb lawm thiab. (Efexaus 6:11) Yog peb paub tias Xatas tab tom rhuav peb ces peb yuav yim huab siv zog “tawmtsam dab ntxwgnyoog.”​—Yakaunpaus 4:7.

12-13. Tej kev txaug kev txhaum uas peb tau ntawd ho ua rau peb xav tias Yehauvas tsis hlub peb li cas?

¹² Ib yam ntxiv uas ua rau peb xav tias Yehauvas tsis hlub peb yog peb yog noob txaug neeg txhaum. (Ntawv Nkauj 51:5; Loos 5:12) Kev txhaum ua rau tib neeg thiab Vajtswv txoj kev sib raug zoo tu ncua. Tsis tas li ntawd, kuj ua rau peb tej kev xav, lub siab ntsws, thiab peb txoj kev noj qab haus huv puas tag.

¹³ Kev txhaum ua rau peb xav mus rau qhov tsis zoo xwb, peb lub siab thiaj rov qab nkaug peb, peb muaj kev ntxhov siab, tsis tso siab rau lub neej, thiab txaj muag. Thaum peb ua txhaum, thiaj ua rau peb xav li hais tas los no. Tsis tas li ntawd, peb kuj xav li no vim thaum peb yug los peb yeej yog neeg txhaum. Kev txaug kev txhaum uas peb saws ntawd tsis raws li qhov uas Vajtswv tsim tib neeg thaum chiv thawj. (Loos 8:20, 21) Zoo ib yam li lub tsheb uas lub log dim pa lawm es tsav nkhaus nkhib nkhaus nkhuav, vim peb tej kev txhaum peb thiaj ua tsis tau lub neej raws li Vajtswv tsim peb los ua neeg nyob. Twb yog vim li no muaj tej lub sij hawm peb thiaj xav ntau ntau txog seb Vajtswv puas hlub peb. Yog thaum muaj li no peb yuav tau nco ntsoov tias Yehauvas “yog tus uas muaj hwjchim loj . . . thiab ua rawsli [nws] tej lus cogtseg rau cov neeg uas hlub [nws] thiab ua rawsli [nws] tej lus [sam hwm].”​—Nehemis 1:5.

14. Vim li cas qhov uas peb xav txog tus nqi txhiv pab tau kom peb tsis txhob xav hais tias Yehauvas tsis hlub peb? (Loos 5:8) (Saib lub ntsiab “Ceev Kom Tsis Txhob Raug ‘Kev Txhaum Dag-Ntxias.’”)

¹⁴ Tej lub sij hawm peb lub siab yuav nkaug peb tias peb tsis tsim nyog tau Yehauvas txoj kev hlub. Peb yeej tsis tsim nyog tau tiag tiam sis qhov uas peb tau ntawd mas yog ib qho zoo tshaj plaws li. Peb yeej ua tsis tau ib yam dab tsi es yuav txaus Yehauvas txoj kev hlub. Vim Yehauvas hlub peb, nws thiaj cia kom muaj tus nqi txhiv los mus daws peb lub txim txhaum ces nws thiaj zam tau peb lub txim. (1 Yauhas 4:10) Nco ntsoov tias Yexus los cawm cov tib neeg muaj txim, tsis yog nws los cawm cov neeg tsis muaj txim. (Nyeem Loos 5:8.) Txawm peb ua tsis tau ib yam dab tsi zoo tag nrho los Yehauvas tsis xav li cas. Thaum peb paub zoo zoo tias peb tej kev txhaum rov dag peb lub siab tias Yehauvas tsis hlub peb ces peb yuav tau kam tiag kom peb kov yeej txoj kev xav ntawd.​—Loos 7:24, 25.

TXHOB TSO YEHAUVAS TSEG

15-16. Yog peb npuab siab rau Yehauvas ces peb tso siab tau li cas, thiab yog vim li cas? (2 Xamuyees 22:26)

¹⁵ Yehauvas xav kom peb “muab siab npuab nws.” (2 Kevcai 30:19, 20) Yog peb ua li ntawd ces peb yuav pom tau tias nws yuav tsis tso peb tseg. (Nyeem 2 Xamuyees 22:26.) Yog peb muab siab npuab Yehauvas nraim ces nws yeej yuav pab peb thaum muaj ib yam twg los raug peb lub neej.

¹⁶ Zaj kawm no pab peb sawv khov kho thaum raug kev sim siab. Peb paub tias Yehauvas hlub peb heev thiab nws yeej yuav txhawb nqa peb vim nyob hauv phau Vajlugkub yeej hais li ntawd. Yog peb lub siab pheej nkaug tias nws tsis hlub peb ces peb yuav tau xav txog tej uas peb paub dua li tej yam uas peb xav xwb. Cia li ntseeg tej lus uas hais nyob hauv phau Vajlugkub tias Yehauvas txoj kev hlub nyob mus ib txhis.