Teev Tiam Yehauvas Kawg Siab Kawg Ntsws

1-3. Piav seb peb teev tiam Yehauvas “kawg siab kawg ntsws” li cas?

PEB sawvdaws puavleej yog neeg txhaum thiab muaj ntau zaus peb ua tau yuam kev. Peb zoo siab kawg li uas muaj tus nqe txhiv, Yehauvas thiaj tsis rau txim rau peb “raws li peb lub txim.” (Ntawv Nkauj 103:10) Yog peb txo hwjchim thiab ntxeev dua siab tshiab ces Yehauvas yuav zam tau peb tej kev txhaum. Yehauvas muaj lub siab zam xeeb, tiamsis yog peb tsis teev tiam nws “kawg siab kawg ntsws” ces nws yuav tsis txaus siab rau peb. (1 Vaj Keeb Kwm 28:9) Peb yog neeg txhaum xwb, peb yuav teev tiam Yehauvas kawg siab kawg ntsws li cas?

² Cia peb kawm txog Vajntxwv Axa thiab Vajntxwv Amaxiya nkawd. Phau Vajlugkub qhia tias ob tug vajntxwv no ua tau zoo raws li Vajtswv lub siab nyiam. Muaj zaum puav nkawd kuj ua tau yuam kev vim nkawd yog neeg txhaum. Tiamsis thaum kawg phau Vajlugkub hais tias Axa “lub siab tsis muaj ib qho chaw thuam li mus tag nws sim neej.” (2 Vaj Keeb Kwm 15:16, 17; 25:1, 2; Paj Lug 17:3) Txawm Axa yog neeg txhaum los, nws yeej teev tiam Yehauvas “kawg siab kawg ntsws.” (1 Vaj Keeb Kwm 28:9) Ua li, Amaxiya ne? Phau Vajlugkub qhia tias nws tsis ua li ntawd. Tom qab Amaxiya ntaus yeej Yehauvas cov yeeb ncuab, nws txawm coj haiv neeg ntawd tej dab mlom los teev tiam. (2 Vaj Keeb Kwm 25:11-16) Ob tug qauv no qhia tias tus uas teev tiam Yehauvas kawg siab kawg ntsws yog tus zoo li cas.

³ Tus uas teev tiam Yehauvas “kawg siab kawg ntsws” yeej hlub Yehauvas tiag thiab xav pe hawm nws mus ib txhis. Hauv phau Vajlugkub, lub siab piv txog dabtsi? Piv txog tej uas peb xav, tej uas peb nyiam, tej uas peb ntshaw, tej uas peb xav ua, thiab peb tus cwj pwm huvsi. Txawm peb yog neeg txhaum los, peb yeej teev tiam tau Yehauvas kawg peb lub siab lub ntsws. Peb teev tiam nws vim peb lub siab xib rau nws, tsis yog peb lam ua kom tas kevcai lossis vim lwm tus yuam peb.​—2 Vaj Keeb Kwm 19:9.

4. Hauv zaj no peb yuav kawm txog dabtsi?

⁴ Yuav kom peb paub teev tiam Vajtswv kawg siab kawg ntsws, cia peb kawm txog Vajntxwv Axa, Yehausafa, Hexekhiya, thiab Yauxiya. Lawv yog ib co vajntxwv ncaj ncees uas tau kav Yuda. Lawv yog neeg txhaum thiab ua tau yuam kev tiamsis Yehauvas tseem txaus siab rau lawv. Yehauvas suav tias lawv teev tiam nws kawg siab kawg ntsws. Ua cas Vajtswv ho txaus siab rau lawv? Peb yuav xyaum lawv li cas?

AXA LUB SIAB ‘YEEJ XIB RAU YEHAUVAS’

5. Thaum Axa sawv ua vajntxwv nws tau ua dabtsi?

⁵ Thaum ub 12 xeem Yixayee raug faib ua 2 lub Nceeg Vaj. Kaum xeem faib ua lub Nceeg Vaj Yixayee thiab 2 xeem ua lub Nceeg Vaj Yuda. Axa yog tus vajntxwv 3 uas sawv kav Yuda. Thaum nws ua vajntxwv nws muab tej dab mlom uas cov pejxeem teev tiam rhuav tshem thiab nws muab cov txivneej muag cev hauv lub tuam tsev ntiab tawm mus. Axa kuj muab nws pog tshem tawm tsis pub ua “poj vaj lawm, vim yog [nws pog] tau ua ib tug dab mlom qias vuab tsuab.” (1 Vajntxwv 15:11-13) Axa txhawb cov pejxeem kom nrhiav Yehauvas thiab mloog “txoj kevcai thiab nws tej lus nkaw.” Axa tau ua ntau yam los txhawb kev pe hawm tseeb.​—2 Vaj Keeb Kwm 14:4.

6. Thaum cov Khuj tuaj ntaus Yuda, Axa tau ua li cas?

⁶ Thaum Axa kav, tebchaws nyob tiaj tus tau 10 lub xyoos. Tiamsis tom qab ntawd cov neeg Khuj txawm tuaj tawm tsam lawv. Cov Khuj muaj tub rog coob heev txog 1 plhom leej thiab lawv caij 300 lub tsheb nees diam. (2 Vaj Keeb Kwm 14:1, 6, 9, 10) Axa ua li cas xwb? Nws tso siab plhuav rau Yehauvas. Nws thov kom Yehauvas pab lawv ntaus yeej cov Khuj. (Nyeem 2 Vaj Keeb Kwm 14:11.) Muaj tej lub caij uas Yehauvas tau pab nws haiv neeg ntaus yeej lawv cov yeeb ncuab txawm tias tus vajntxwv tsis mloog Yehauvas lus. Yehauvas tau ua li ntawd kom sawvdaws paub tias nws yog tus tseem Vajtswv. (1 Vajntxwv 20:13, 26-30) Tiamsis zaum no, Yehauvas pab nws haiv neeg vim Axa tso siab rau nws. Yehauvas thiaj teb Axa cov lus thov es pab lawv ntaus yeej rog. (2 Vaj Keeb Kwm 14:12, 13) Tom qab no Axa tau ua yuam kev loj heev. Axa tsis thov Yehauvas, tiamsis nws ho mus thov kom cov Alas tus vajntxwv pab nws. (1 Vajntxwv 15:16-22) Txawm tias Axa ua yuam kev los Yehauvas pom tias Axa yeej hlub Nws tiag. Yehauvas thiaj suav tias Axa “lub siab yeej xib rau [Yehauvas] mus tag sim neej.”​—1 Vajntxwv 15:14.

7, 8. Peb yuav xyaum Axa li cas?

⁷ Peb lub siab puas xib rau Yehauvas tiag? Peb puas teev tiam nws kawg siab kawg ntsws? Yuav kom peb paub, peb yuav tau ua zoo xav txog cov lus nug no: ‘Kuv puas mloog Yehauvas lus txhua lub sijhawm los yog kuv tsuas mloog thaum yoojyim rau kuv xwb? Kuv puas pab lub koom txoos kom dawb huv?’ Nco ntsoov Axa tus qauv. Tej zaum nyuaj heev rau Axa muab nws pog tshem tawm tsis pub ua poj vaj. Nws yuav tau ua siab tawv nws thiaj tshem tau nws pog. Yog peb tsev neeg ib tug lossis ib tug phoojywg twg ua txhaum loj, es ho raug rho tawm hauv lub koom txoos mus lawd, peb puas ua taus siab tawv li Axa? Los peb tseem yuav nrog nws ua ke li qub? Peb lub siab puas xib rau Yehauvas tiag?

⁸ Peb kuj raug ntau yam kev tawm tsam ib yam li Axa. Tej thaud peb yuav xav tias peb thev tsis taus lawm. Ib txhia raug cov menyuam thiab cov xibhwb tom tsev kawm ntawv thuam peb vim lawv yog Yehauvas ib tug Timkhawv. Lwm cov raug luag thuam vim lawv thov so haujlwm mus tej rooj sib txoos, lossis lawv tsis kam ua haujlwm ntau vim lawv xav ua Yehauvas tes dej num. Thaum peb raug tej no, cia peb xyaum Axa es tso siab rau Yehauvas. Peb yuav tau thov Yehauvas kom peb ua tau siab tawv, ua qhov ncaj qhov yog xwb. Yehauvas txhawb Axa lub zog li cas ces nws yuav txhawb peb lub zog ib yam li ntawd.

9. Peb yuav ua li cas Yehauvas thiaj zoo siab?

⁹ Axa tsis xav txog nws tus kheej xwb. Nws nrhiav kev los txhawb cov pejxeem kom “nrhiav [Yehauvas].” Peb yuav tau xyaum Axa es mus pab lwm tus los nrhiav Yehauvas thiab. Thaum peb rau siab ntso tshaj tawm txoj xov zoo ua rau Yehauvas zoo siab kawg li. Nws paub tias peb ua tes haujlwm no vim peb hlub nws thiab hlub tibneeg. Peb xav kom sawvdaws tau txojsia yav tom hauv ntej.

YEHAUSAFA NRHIAV YEHAUVAS

10, 11. Peb xyaum tau Yehausafa li cas?

¹⁰ Axa tus tub Yehausafa “taug nraim nws txiv Axa tus neev taw.” (2 Vaj Keeb Kwm 20:31, 32) Yehausafa kuj txhawb kom laj mej pejxeem pe hawm Yehauvas thiab. Nws txib neeg mus qhia hauv Yuda tej moos kom cov tibneeg paub “[Yehauvas] phau ntawv kevcai.” (2 Vaj Keeb Kwm 17:7-10) Nws tseem mus pem toj siab Efa-i, hauv koog tebchaws uas cov Yixayee kav, es coj cov pejxeem ntawd “rov los cuag [Yehauvas]” thiab. (2 Vaj Keeb Kwm 19:4) Yehausafa yog ib tug vajntxwv uas tau “nrhiav [Yehauvas] kawg siab kawg ntsws” tiag.​—2 Vaj Keeb Kwm 22:9.

¹¹ Niaj hnub no, Yehauvas xav kom tibneeg thoob qab ntuj los paub nws. Ua li peb puas nqua hu tibneeg los kawm txog Yehauvas? Txhua lub hlis peb puas lauj sijhawm mus qhia Vajlugkub? Peb puas xav mus qhia Vajlugkub rau tibneeg kom lawv los nrog peb teev tiam Yehauvas? Yog peb rau siab ntso tshaj tawm, Yehauvas yeej yuav pab kom peb nrhiav tau ib tug uas xav kawm Vajlugkub. Ua li peb puas thov Yehauvas pab thiab? Koj puas kam siv sijhawm los qhia kom ib tug los paub qhov tseeb? Yehausafa tau nrhiav kev los pab kom tibneeg rov los teev tiam Yehauvas dua. Ua li peb puas kam pab ib tug uas tseg tsis mus tshaj tawm lawd? Hauv lub koom txoos, cov txwj laus kuj mus xyuas mus pab cov uas tau raug rho tawm uas tej zaum twb tso lawv tej kev txhaum tseg lawm.

12, 13. (1) Thaum Yehausafa ntshai, nws ua li cas xwb? (2) Vim li cas ho zoo rau peb xyaum Yehausafa tus qauv?

¹² Thaum muaj yeeb ncuab tuaj ntaus Yuda, Yehausafa tso siab plhuav rau Yehauvas ib yam li nws txiv Axa tau ua. (Nyeem 2 Vaj Keeb Kwm 20:2-4.) Nws ntshai kawg li nws thiaj thov kom Yehauvas pab lawv. Thaum nws thov Yehauvas, nws yeej lees hlo tias lawv yuav ntaus tsis yeej lawv cov yeeb ncuab. Nws qhia rau Yehauvas tias lawv tws kev lawm tsis pom qab yuav ua txoj twg. Yehausafa tso siab tias Yehauvas yuav pab lawv xwb xwb li. Nws hais tias: “Peb lub qhov muag ntsia ntsoov rau koj xwb.”​—2 Vaj Keeb Kwm 20:12.

¹³ Muaj tej lub sijhawm peb yuav ntsib teeb meem thiab tsis pom qab yuav ua zaj twg. Tej zaum yuav ua rau peb txhawj ntshai ib yam li Yehausafa lawv. (2 Khaulee 4:8, 9) Zoo rau peb xyaum Yehausafa. Nws thov Yehauvas tab meeg cov pejxeem tias lawv qaug zog heev. (2 Vaj Keeb Kwm 20:5) Tus txiv tsev yuav xyaum Yehausafa li cas? Thaum nws tsev neeg raug kev nyuaj siab loj, zoo rau nws thov Yehauvas pab nws tsev neeg. Txhob txaj muag thov Yehauvas tab meeg koj tej metub menyuam. Ua li no lawv thiaj pom tias koj vam khom thiab tso siab rau Yehauvas tiag. Yehauvas tau pab Yehausafa li cas, ces nws yuav pab koj ib yam li ntawd.

HEXEKHIYA UA QHOV NCAJ

14, 15. Hexekhiya puas tso siab plhuav rau Yehauvas?

¹⁴ Hexekhiya yog ib tug vajntxwv uas “tuav rawv [Yehauvas].” Txawm tias nws txiv pe dab pe mlom thiab tso tau tus qauv tsis zoo rau nws xyaum los, nws tsis coj li ntawd. Hexekhiya tau “rhuav tshem tej chaw siab uas teev dab pov tseg thiab tsoo tej ncej dab thiab ntov tej ncej dab Asela pov tseg. Thiab nws tsoo tus nab tooj uas Mauxe ua” rau qhov cov Yixayee muab tus nab tooj ntawd coj los teev tiam. Hexekhiya yeej teev tiam Yehauvas kawg siab kawg ntsws. “Nws tuav rawv tej lus nkaw uas [Yehauvas] muab cob rau Mauxe.”​—2 Vajntxwv 18:1-6.

¹⁵ Thaum Hexekhiya tseem ua vajntxwv, cov Axilia tau tuaj ntaus Yuda. Axilia cov tub rog muaj zog thiab coob kawg li, lawv thiaj hem tias lawv yuav muab Yeluxalees rhuav tshem. Tus vajntxwv uas kav Axilia tseem thuam luag Yehauvas thiab hais kom Hexekhiya cia li zwm rau lawv. Lub caij ntawd txaus ntshai kawg li, tiamsis Hexekhiya tso siab plhuav rau Yehauvas. Nws thov kom Yehauvas pab lawv. Nws paub tias Yehauvas muaj hwjchim loj tshaj cov Axilia thiab yeej yuav cawm tau lawv dim. (Nyeem Yaxaya 37:15-20.) Vajtswv thiaj teb nws cov lus thov es tso ib tug tubtxib saum ntuj los tua Axilia cov tub rog tuag 185,000 leej.​—Yaxaya 37:36, 37.

16, 17. Peb xyaum tau Hexekhiya li cas?

¹⁶ Tom qab no Hexekhiya mob hnyav heev. Nws paub tias nws yuav nyob tsis ntev nws thiaj taij thov kom Yehauvas nco ntsoov qhov uas nws tau muab siab npuab Yehauvas. Nws thov kom Yehauvas pab nws. (Nyeem 2 Vajntxwv 20:1-3.) Yehauvas hnov Hexekhiya tej lus thov thiab kho nws zoo. Lub caij tamsim no Yehauvas tsis ua txujci kho peb tej mob lossis ua txujci kom peb muaj txojsia nyob ntev. Txawm li ntawd los, tseem zoo rau peb tso siab rau Yehauvas ib yam li Hexekhiya tau ua. Zoo rau peb thov Yehauvas ib yam li Hexekhiya tau thov no: “Au [Yehauvas], kuv taij thov koj nco txog tias kuv ua lub neej xib rau koj rau ntawm koj lub xubntiag kawg siab kawg ntsws.” Koj puas tso siab tias txawm koj muaj mob muaj nkeeg los, Yehauvas yuav saib xyuas koj?​—Ntawv Nkauj 41:3.

¹⁷ Peb yuav xyaum Hexekhiya li cas ntxiv thiab? Yog muaj tej yam los tab kaum lossis cuam tshuam tes haujlwm uas peb ua rau Yehauvas, peb yuav tsum muab yam ntawd tshem tawm. Zoo li niaj hnub no, coob leej ntau tus hwm thiab qhuas cov neeg nto moo cuag li lawv yog vajtswv. Txawm lawv twb tsis paub cov neeg nto moo ntawd los, lawv tseem xav coj ib yam li cov ntawd. Tej zaum ib txhia kuj niaj hnub nyeem txog cov neeg nto moo thiab saib lawv tej duab. Niaj hnub no, coob tus kuj nyiam siv tej vej xaij zeem phoojywg lossis lwm yam twj koos pis tawj nrog lwm tus tham hauv Is Taws Nej. Tej twj ntawd yeej zoo siv los tiv tauj peb cov phoojywg lossis peb cov nruab ze uas nyob deb. Tiamsis yog peb tsis ua zoo ces tej twj ntawd yuav noj tag nrho peb lub sijhawm. Tej zaum yog muaj coob tus nyiam peb daim duab ces peb yuav pib khav theeb. Lossis yog lwm tus ho tso tseg tsis caum peb lawd ces peb ho tu siab lossis chim rau lawv. Tsim nyog peb xyaum Povlauj, Akhila, thiab Plixila lawv. Phau Vajlugkub qhia tias Povlauj “rau siab ntso qhia txoj xov zoo.” Plixila thiab Akhila kuj mus tshaj tawm thiab qhia kom tibneeg “paub Vajtswv txoj kev zoo heev dua tuaj.” (Tubtxib Tes Haujlwm 18:4, 5, 26) Tsis yog lawv niaj hnub nrog luag tej sib nug moo seb lawv ua dabtsi, lossis nug txog cov tibneeg uas tsis teev tiam Yehauvas. Lawv tsuas tau hau ntsoov rau lawv tes haujlwm xwb. Zoo rau peb xav seb peb coj li cas. Xav txog cov lus no: ‘Kuv puas qhuas tibneeg cuag li lawv yog vajtswv? Puas yog kuv muab kuv lub sijhawm los ua tej yam uas tsis muaj qab hau xwb?’​—Nyeem Efexau 5:15, 16.

YAUXIYA MLOOG YEHAUVAS TEJ KEVCAI

18, 19. Peb yuav xyaum Yauxiya li cas?

¹⁸ Vajntxwv Yauxiya, uas yog Hexekhiya tus tub xeeb ntxwv, kuj mloog Yehauvas tej lus sam hwm “kawg siab kawg ntsws” thiab. (2 Vaj Keeb Kwm 34:31) Thaum nws tseem hluas, “nws pib nrhiav nws yawg koob Davi tus Vajtswv.” Ces thaum nws muaj 20 xyoo, nws pib rhuav tshem cov dab mlom hauv Yuda. (Nyeem 2 Vaj Keeb Kwm 34:1-3.) Yauxiya xav ua tej uas haum Yehauvas siab xwb. Nws kub siab teev tiam Yehauvas tshaj lwm tus vajntxwv Yuda. Thaum tus pov thawj hlob nrhiav tau Vajtswv txoj kevcai hauv lub tuam tsev, tus teev ntawv thiaj muab nyeem rau Yauxiya mloog. Tej zaum phau no yog phau uas Mauxe sau kiag! Thaum nyeem tag nrho, Yauxiya pom tias nws yuav tsum txhawb Yehauvas tes haujlwm ntxiv. Nws thiaj hais kom sawvdaws kub siab teev tiam Yehauvas. Thaum Yauxiya tseem muaj sia nyob, cov pejxeem thiaj “tsis tso [Yehauvas] uas yog lawv tej poj koob yawm txwv tus Vajtswv tseg.”​—2 Vaj Keeb Kwm 34:27, 33.

¹⁹ Cov hluas, cia li xyaum Yauxiya tus qauv. Siv sijhawm los tshawb nrhiav Vajlugkub koj thiaj paub Yehauvas zoo. Tej zaum Yauxiya paub txog Yehauvas rau qhov nws yawg uas yog Vajntxwv Manaxe tau qhia nws txog qhov uas Yehauvas zam nws yawg lub txim. Cov hluas, nco ntsoov tias hauv lub koom txoos thiab hauv nej tsev neeg, yeej muaj cov laus uas twb pom Yehauvas txhais tes los lawm. Siv sijhawm los nrog cov laus ua ke, lawv thiaj qhia tau tej uas lawv tau ntsib rau nej. Thaum Yauxiya paub lawm tias Yehauvas xav kom nws ua dabtsi, Yauxiya kub siab xyaum raws li ntawd tamsid. Thaum koj nyeem Vajtswv Txojlus, yuav ua rau koj xav xyaum raws li ntawd tamsim thiab. Yog koj ua li ntawd, koj yuav hajyam nrog Yehauvas sib raug zoo thiab koj yuav ua neej kaj siab dua. Koj yuav xav muab tej uas koj tau kawm coj mus qhia rau lwm tus. (Nyeem 2 Vaj Keeb Kwm 34:18, 19.) Thaum koj kawm phau Vajlugkub, tej zaum koj yuav pom tias muaj tej yam uas koj yuav tau xyaum ntxiv koj thiaj ua tau Yehauvas tes haujlwm zoo dua. Kavtsij xyaum tiag ib yam li Yauxiya tau ua.

TEEV TIAM YEHAUVAS KAWG SIAB KAWG NTSWS

20, 21. (1) Plaub tug vajntxwv Yuda no sib thooj li cas? (2) Hauv zaj tom ntej peb yuav kawm txog dabtsi?

²⁰ Plaub tug vajntxwv Yuda uas peb tau kawm tas los no, yeej hlub Yehauvas tiag lawv thiaj pe hawm nws tas lawv lub neej. Txawm cov yeeb ncuab zoo li cas tuaj ntaus lawv los, lawv yeej tso siab plhuav rau Yehauvas. Thaum kawg Yehauvas thiaj suav tias lawv tau teev tiam nws kawg siab kawg ntsws tiag.

²¹ Txawm 4 tug vajntxwv no yog neeg txhaum thiab lawv ua tau yuam kev los, Yehauvas tseem txaus siab rau lawv. Nws paub lawv lub siab thiab paub tias lawv yeej hlub nws tiag. Peb los kuj yog neeg txhaum thiab ua tau ntau yam yuam kev. Txawm li ntawd los, Yehauvas yeej yuav txaus siab rau peb yog peb teev tiam nws kawg siab kawg ntsws. Hauv zaj tom ntej peb yuav kawm seb 4 tug vajntxwv no tau ua yuam kev li cas, thiab lawv tus qauv pab tau peb li cas ntxiv.