Nqes Tes Pab Ua Haujlwm Qhuas Yehauvas!

1, 2. (1) Elifa thiab Npida nkawd tau hais li cas txog peb tes haujlwm rau Vajtswv? (2) Yehauvas xav li cas txog tej uas cov txivneej ntawd tau hais rau Yauj?

PUAG thaum ub, muaj 3 tug txivneej tau mus nrog Vajtswv tus tub qhe Yauj tham. Ib tug hu ua Elifa uas yog neeg Themas. Nws nug Yauj tias: “Neeg muaj qabhau rau Vajtswv tau lov? Leejtwg ntse kuj tsuas muaj qabhau rau nws tus kheej xwb. Yog koj ua neeg ncaj ncees yuav txaus tus uas muaj hwjchim loj kawg nkaus lub siab lov? Yog koj ua neeg zoo kawg yuav muaj qabhau dabtsi rau nws?” (Yauj 22:1-3) Elifa xav tias neeg tsis muaj qabhau dabtsi rau Vajtswv. Muaj dua ib tug txivneej hu ua Npida uas yog neeg Su-a. Nws kuj xav tias tsis muaj ib zaug uas Vajtswv yuav suav tias noob neej ncaj ncees.​—Nyeem Yauj 25:4.

² Elifa thiab Npida xav kom Yauj ntseeg tias tej uas Yauj ua tsis muaj nqes dabtsi rau Yehauvas. Nkawd xav kom Yauj ntseeg tias Yehauvas tsuas saib peb tibneeg zoo li tej kab npauj, tej vaim, thiab tej kas xwb. (Yauj 4:19; 25:6) Puas yog nkawd txo hwjchim heev es nkawd thiaj hais li ntawd? Tsis yog. (Yauj 22:29) Yog peb nyob saum ib lub roob siab siab lossis nyob saum dav hlau ntsia tuaj rau ntiajteb, peb yeej pom tibneeg luaj li tej me kab me ntsaum xwb tiag. Qhov no ua rau peb pom tias Vajtswv yeej muaj hwjchim tshaj peb ntau pua npaug. Yog peb me npaum li ntawd, Yehauvas puas pom peb tes haujlwm muaj nqes? Nws yeej pom! Yehauvas thiaj ntuas Elifa thiab Npida nkawd. Nws kuj ntuas tus txivneej uas nrog nkawd ua ke hu ua Xaufa thiab. Yehauvas ntuas tias cov lus uas lawv hais rau Yauj tsis muaj tseeb. Yehauvas hais tias Yauj yog nws tus tub qhe, nws yeej txaus siab heev rau Yauj. (Yauj 42:7, 8) Yog li ntawd, txawm peb yog neeg txhaum xwb los, peb yeej “muaj qabhau rau Vajtswv.”

“KOJ PUB DABTSI RAU VAJTSWV?”

3. (1) Elihu tau hais li cas txog peb tes haujlwm rau Yehauvas? (2) Elihu tus nru lug yog li cas?

³ Thaum 3 tug txivneej ntawd tabtom nrog Yauj tham, tus tub hluas hu ua Elihu kuj nyob ntawd mloog thiab. Thaum lawv tham tas, Elihu mam li nug Yauj txog Yehauvas li no: “Yog koj ua ncaj ncees, koj pub dabtsi rau Vajtswv, thiab Vajtswv tau txais dabtsi ntawm koj txhais tes?” (Yauj 35:7) Puas yog Elihu xav yuam kev tias peb tes haujlwm tsis muaj nqes rau Vajtswv thiab? Tsis yog. Peb paub li ntawd rau qhov Yehauvas tsis ntuas Elihu zoo li nws tau ntuas Elifa, Npida, thiab Xaufa lawv. Ua li, Elihu tus nru lug yog li cas? Nws hais tias Yehauvas yog ib tug Vajtswv uas muaj txhij muaj txhua. Txawm peb pe hawm nws los, peb txhab tsis tau ib yam dabtsi ntxiv rau nws. Peb yuav tsum nco ntsoov tias tsis muaj qhov uas peb pab Vajtswv, tsuas muaj Vajtswv pab peb xwb. Vajtswv pab peb muaj peevxwm thiab muaj tswvyim ua tau tej haujlwm zoo. Thaum peb siv tej ntawd los pab lwm tus, Yehauvas zoo siab heev.

4. Thaum peb nqes tes pab lwm tus Yehauvas xav li cas xwb?

⁴ Thaum peb hlub thiab nqes tes pab cov uas pe hawm Yehauvas, twb zoo ib yam li peb ua rau Yehauvas lawm ntag. Paj Lug 19:17 hais tias: “Tus uas pub rau cov pluag kuj yog qev rau [Yehauvas], mas [Yehauvas] yuav pauj tej uas nws pub.” Yog li ntawd, Yehauvas yeej pom txhua zaus uas peb nqes tes pab ib tug twg. Txawm nws yog tus tsim ib puas tsav yam los, nws tseem suav tias qhov uas peb pub rau lwm tus yog peb qev rau nws ntag. Yehauvas thiaj pub nqe zog pauj peb tes haujlwm. Yexus qhia tias nws Txiv Yehauvas yeej ua li ntawd tiag.​—Nyeem Luka 14:13, 14.

5. Zaj no yuav pab cov uas tau xav li cas?

⁵ Yav thaum ub, Yehauvas tau txib nws tus tub qhe Yaxaya mus ua ib tes haujlwm tshwj xeeb heev. (Yaxaya 6:8-10) Yaxaya teb hlo tias: “Kuv nyob ntawm no, thov txib kuv mus.” Niaj hnub no, Yehauvas kuj xav txib tibneeg mus ua nws tes haujlwm li ntawd thiab. Yehauvas cov tibneeg txhiab txhiab tus kuj tau teb ib yam li Yaxaya thiab. Lawv thiaj zoo siab hlo mus pab ua Yehauvas tes haujlwm, tsis hais nyuaj npaum li cas thiab nyob rooj teb twg los xij. Tiamsis ib txhia ho xav li no: ‘Kuv yeej saib Yehauvas tes haujlwm rau nqe heev, tiamsis txawm kuv ua los yeej pab tsis tau npaum twg. Yog kuv tsis ua los, Yehauvas yeej yuav ua kom tiav.’ Koj puas tau xav li ntawd ib zaug li? Yog koj tau xav li ntawd ces Denpaula thiab Npala nkawd tus qauv yuav pab tau koj. Cia peb kawm seb thaum ub tau muaj li cas rau nkawd.

VAJTSWV PAB LAWV UA SIAB TAWV

6. Cov Yixayee txawv Yanpi cov tub rog li cas?

⁶ Npala yog ib tug tub rog Yixayee thiab Denpaula yog ib tug cev Vajtswv lus. Cov Khana-as tus vajntxwv Yanpi “ua nruj ua tsiv quab yuam” cov Yixayee tau 20 lub xyoos. Yanpi cov tub rog tsiv tsaim heev ua rau cov Yixayee ntshai tshee na twb tsis kav tawm hauv lawv tej tsev los. Yanpi pab tub rog muaj 900 lub tsheb nees hlau, tiamsis cov Yixayee twb tsis muaj tej cuab yeej ua rog zoo hlo li.​—Cov Thawj 4:1-3, 13; 5:6-8.a (Saib cov lus hauv qab taw qhia.)

7, 8. (1) Yehauvas hais kom Npala ua li cas? (2) Ua cas cov Yixayee thiaj ntaus yeej Yanpi pab tub rog? (Saib daim duab ntawm sab 27.)

⁷ Yog muab cov Yixayee piv rau Yanpi pab tub rog ces lawv yeej tsis muaj cuab kav ntaus yeej li. Tiamsis Yehauvas kom Denpaula mus cev lus rau Npala li no: “Cia li mus sau zog koj cov tub rog tuaj rau ntawm lub roob Thanpau. Cia li mus sau xeem Nathali thiab xeem Xenpuloo ib vam leej. Mas kuv yuav ntxias Xixela uas yog vajntxwv Yanpi tus thawj rog kom coj nws cov tub rog thiab nws cov tsheb ua rog tuaj ntsib koj ntawm tus dej Khisoo, thiab kuv yuav muab nws cob rau hauv koj txhais tes.”​—Cov Thawj 4:4-7.

⁸ Npala lawv thiaj xa xov mus hu neeg los ua tub rog li Yehauvas tau hais. Muaj 10,000 tus Yixayee tau nqes tes pab thiab tuaj sib sau rau ntawm lub roob Thanpau. Npala thiaj coj lawv mus ntaus rog hauv lub moos Tha-ana. (Nyeem Cov Thawj 4:14-16.) Yehauvas puas pab cov Yixayee? Nws yeej pab. Thaum lawv tabtom ntaus rog, Yehauvas tso nag los hlob kawg li ua rau av nkos heev. Yanpi cov tub rog tej tsheb nees thiaj zom av tag, cov Yixayee thiaj zoo ntaus lawv. Npala thiaj caum Xixela lawv cov tub rog tau 15 mais (24 kilumev) kev, mus txog ntua lub moos Halause Hakau-i. Xixela nrhiav kev khiav tiamsis nws lub tsheb nees zom av lawm. Nws thiaj dhia mus rau hauv Xanani uas nyob ze lub moos Khede. Hauv Xanani, nws txawm khiav mus nkaum hauv ib tug pojniam hu Ya-ee lub tsev ntaub. Xixela sab heev nws txawm tsaug zog looj hlias lawm. Ya-ee siab tawv kawg li nws cia li muab Xixela tua tuag kiag. (Cov Thawj 4:17-21) Yehauvas pab cov Yixayee ntaus yeej lawv cov yeeb ncuab lawm tiag!b (Saib cov lus hauv qab taw qhia.)

IB TXHIA KAM PAB IB TXHIA TSIS KAM

9. Cov Thawj 5:20, 21 qhia li cas ntxiv txog lub caij uas cov Yixayee ntaus Xixela lawv?

⁹ Yuav kom peb paub tias tau muaj tej yam zoo li cas tshwm sim ntxiv, peb yuav tau nyeem Cov Thawj tshooj 5. Cov Thawj 5:20, 21 hais tias: “Tej hnub qub saum ntuj kuj ua rog, tej hnub qub kuj tuaj saum ntuj ua rog rau Xixela. Tus niag dej Khisoo kuav lawv mus.” Nqe no yog txhais li cas? Puas yog cov tubtxib saum ntuj nqes los pab cov Yixayee ntaus rog? Puas yog Yehauvas tso tej pob zeb hnub qub poob los hauv ntiajteb? Phau Vajlugkub tsis qhia meej txog qhov no. Txawm li cas los, hnub ntawd Yehauvas tso nag los hlob heev ua rau Yanpi 900 lub tsheb nees zom av khiav tsis taus thiaj cawm tau nws haiv neeg dim. Cov Yixayee pab tub rog muaj 10,000 leej, tiamsis tsis muaj ib tug yuav hais tau tias nws yog tus ntaus yeej lawv cov yeeb ncuab. Cov Thawj 4:14, 15 thiaj hais 3 zaug tias Yehauvas yog tus ntaus yeej lawv cov yeeb ncuab.

10, 11. Ua cas lub moos Melau ho raug foom?

¹⁰ Cia peb kawm txog ib lub ntsiab ntxiv. Tom qab cov Yixayee ntaus yeej lawv cov yeeb ncuab lawd, Denpaula thiab Npala nkawd hu nkauj qhuas Yehauvas li no: “[Yehauvas] tus tubtxib saum ntuj hais tias, ‘Cia li tsawm foom Melau, cia li foom hnyav kawg rau cov neeg hauv lub moos ntawd vim yog lawv tsis tuaj pab [Yehauvas], tsis pab [Yehauvas] ua rog rau cov uas muaj zog.’”​—Cov Thawj 5:23.

¹¹ Tej zaum yeej muaj tseeb raws li cov lus tsawm foom txog Melau tiag, niaj hnub no thiaj tsis muaj leejtwg tshawb pom txog lub moos ntawd li. Ua cas lub moos ntawd ho raug foom? Peb tsis paub tseeb. Thaum ntawd twb muaj 10,000 tus tub rog nqes tes pab Denpaula thiab Npala nkawd. Cov neeg hauv Melau yuav tsum hnov xov txog tej no tiamsis lawv txhob txwm tsis kam mus pab. Lossis tej zaum Xixela twb khiav hla lub moos ntawd mus los lawv tsis pab ntes nws. Yog tau muaj li ntawd tiag, lawv yuav tsum ntes tau nws xwb! Tiamsis lawv tsis kam ua li ntawd. Lub moos Melau tsis kam txhawb Yehauvas lub hwjchim kav. Yog lawv nqes tes pab ces Yehauvas twb foom koob hmoov rau lawv lawm! Cov neeg hauv lub moos Melau tsis ua siab tawv li Ya-ee.​—Cov Thawj 5:24-27.

12. (1) Hauv Cov Thawj 5:9, 10, cov uas nqes tes pab txawv cov uas tsis kam pab li cas? (2) Tsim nyog peb tshuaj peb lub siab li cas?

¹² Hauv Cov Thawj 5:9, 10, peb pom tias 10,000 tus tub rog Yixayee tsis coj li cov uas tsis kam nqes tes pab. Denpaula thiab Npala thiaj qhuas “Yixayee cov thawj, thiab cov pejxeem uas xyiv fab xyiv yeem mus pab.” Lawv yeem hlo mus ntaus rog saum lub roob Thanpau ua zeb ua tsua, thiab hauv lub hav Khisoo uas muaj av nkos nki. Tiamsis cov uas tsis kam nqes tes pab, lawv xav ua “cov uas caij tej nees luav dawb.” Lawv muab tes haujlwm uas Yehauvas txib lawv ua saib qes dhau. Phau Vajlugkub thiaj hais tias lawv xav ua cov uas zaum saum tej “ntaub pua eeb nees” thiab cov uas “taug kev” mus tes dawb tes npliag vim lawv nyiam lub neej uas tau zoo nyob tso siab plhuav tsis xav nce zeb nce tsua. Twb tsim nyog lawv tu siab tias lawv tsis tau ua Yehauvas tes haujlwm. Vim lawv tsis kam mus ntaus rog, lawv thiaj tsis tau Yehauvas tej koob hmoov. Niaj hnub no, cia peb ua zoo tshuaj seb peb puas muaj lub siab xav nqes tes pab ua Vajtswv tes haujlwm.

13. Xeem Lunpee, Daj, thiab Asaw txawv xeem Xenpuloo thiab Nathali li cas?

¹³ Cov uas nqes tes pab ntaus rog yeej pom kiag tim ntsej tim muag thaum Yehauvas ua nws lub hwjchim tshwm rau nws cov yeeb ncuab pom. Lawv yeej ua tau timkhawv txog “qhov uas [Yehauvas] kov yeej” nws cov yeeb ncuab. (Cov Thawj 5:11) Tiamsis xeem Lunpee, Daj, thiab Asaw lawv tsis kam nqes tes pab ua rog. Lawv muab lawv tej nyiaj txiag, tej tsiaj txhu, thiab tej nkoj txwg saib hlob dua Yehauvas tes haujlwm. (Cov Thawj 5:15-17) Tsis yog txhua xeem yuav coj li lawv. Xeem Xenpuloo thiab Nathali “zoo siab tso nyog txojsia mus pab” Denpaula thiab Npala nkawd. (Cov Thawj 5:18) Tej qauv no qhia li cas rau peb niaj hnub no? Cia peb kawm ntxiv.

‘CIA LI QHUAS YEHAUVAS!’

14. Niaj hnub no, peb txhawb tau Yehauvas lub hwjchim kav li cas?

¹⁴ Niaj hnub no, Yehauvas tsis hu peb mus ua tub rog li txheej thaud lawm. Tiamsis nws hu peb mus tshaj tawm txoj xov zoo. Nws xav kom peb muaj lub siab tawv qhawv txhawb nqa nws lub hwjchim kav. Muaj tsheej plhom tus kwvtij nkauj muam, tsis hais tus laus tus hluas, tabtom nqes tes ua haujlwm puv ntoob rau Yehauvas. Ib txhia rau npe tho kev, ua haujlwm hauv Npe-ee, ua Tsev Nceeg Vaj, tu tej Tsev Rooj Sib Txoos, thiab tu tej tsev uas siv rau cov rooj sib txoos 3 hnub. Muaj cov txwj laus uas nqes tes pab cov Timkhawv uas cheem tsum kev kho mob thiab pab npaj tej rooj sib txoos 3 hnub. Txawm peb ua tes haujlwm twg los, Yehauvas yeej txaus siab heev thaum peb xyiv fab hlo yeem ua tes haujlwm ntawd. Nws yeej nco ntsoov txhua yam uas peb tau ua rau nws.​—Henplais 6:10.

15. Yuav ua li cas peb thiaj muaj siab ua Yehauvas tes haujlwm?

¹⁵ Peb yuav tsum tshuaj seb peb puas muaj siab ua Yehauvas tes haujlwm tiag. Xav li no: ‘Thaum ua Yehauvas tes haujlwm, puas yog kuv cia lwm tus tuaj qhov hnyav xwb? Puas yog kuv vuag ub vuag no thiab txhawj txog kev khwv noj khwv haus ntau xwb? Kuv puas muaj kev ntseeg thiab siab tawv npaum li Npala, Denpaula, Ya-ee, thiab 10,000 tus Yixayee, es muab tag nrho tej uas kuv muaj los ua Yehauvas tes haujlwm? Puas yog kuv tabtom npaj tias kuv yuav tsiv mus ua haujlwm nyob lwm lub nroog lossis lwm lub tebchaws kom kuv tsev neeg tau zoo dua? Yog kuv tabtom npaj li ntawd, kuv puas tau thov Yehauvas seb qhov ntawd puas ua nyuaj rau kuv tsev neeg thiab lub koom txoos?’c (Saib cov lus hauv qab taw qhia.)

16. Peb pub tau dabtsi rau Yehauvas?

¹⁶ Yehauvas pub tes haujlwm tshwj xeeb heev rau peb txhua tus ua. Nws cia peb txhawb nqa nws lub hwjchim kav! Txij thaum Adas thiab Eva nkawd lub caij los, Ntxwg Nyoog yeej nrhiav nrhw kev los ntxias kom peb tuaj nws tog. Tiamsis yog peb txhawb nqa Yehauvas lub hwjchim kav ces yuav qhia rau Xatas tias peb twb zwm rau Yehauvas txojkev kav lawm. Yog peb muaj kev ntseeg thiab muab siab npuab Yehauvas ces peb yuav kub siab lug ua nws tes haujlwm. Qhov no ua rau Yehauvas zoo siab heev. (Paj Lug 23:15, 16) Yehauvas thiaj muaj lus teb Xatas tej lus twv. (Paj Lug 27:11) Yog li ntawd, yam uas peb pub tau rau Yehauvas yog dabtsi? Yog qhov uas peb mloog nws lus. Yehauvas saib qhov ntawd rau nqe kawg li, thiab ua rau nws zoo siab xyiv fab.

17. Cov Thawj 5:31 qhia li cas txog yav tom hauv ntej?

¹⁷ Tshuav tsis ntev, txhua tus hauv ntiajteb yuav zwm rau Yehauvas txojkev kav lawm xwb. Peb tos ntsoov hnub ntawd! Peb yeej xav li zaj nkauj uas Denpaula thiab Npala nkawd tau hu no: “Au [Yehauvas], cia kom koj cov yeeb ncuab huvsi puam tsuaj ib yam nkaus li no. Cia tus uas nyiam koj zoo yam nkaus li lub hnub thaum uas tawm tuaj muaj hwjchim ci nplas.” (Cov Thawj 5:31) Thaum Yehauvas muab Xatas lub qab ntuj rhuav tshem lawd yuav muaj raws nkaus li zaj nkauj ntawd ntag! Thaum ntaus ntsuj rog Amakedoo, Yehauvas yuav tsis cheem tsum tibneeg nrog nws ntaus rog. Tiamsis phau Vajlugkub hais tias: “Sawv twjywm, thiab saib [Yehauvas] kov yeej rau nej.” (2 Vaj Keeb Kwm 20:17) Ua ntej hnub ntawd los txog, cia peb ua lub siab tawv qhawv kub siab lug txhawb nqa Yehauvas txojkev kav.

18. Yog peb xyiv fab hlo yeem ua Yehauvas tes haujlwm, yuav pab tau lwm tus li cas?

¹⁸ Denpaula thiab Npala nkawd hu nkauj qhuas Yehauvas tsis yog qhuas tibneeg. Nkawd hu tias: “Cia li qhuas [Yehauvas], rau qhov . . . cov pejxeem tau xyiv fab xyiv yeem pab.” (Cov Thawj 5:1, 2) Yog peb xyiv fab hlo yeem ua txhua yam haujlwm uas Yehauvas muab rau peb ua, kuj yuav ua rau lwm tus “qhuas [Yehauvas]” thiab!