Yuav Ua Li Cas Koj Thiaj Nyiam Thiab Kawm Tau Vajlugkub

Yausua nyeem txoj Kevcai; Yelikhau tej ntsa loog pob tag tshuav Lahaj tib lub tsev xwb; Yausua tsa tes mus saum ntuj thov Vajtswv

YAUSUA yuav tau coj cov Yixayee mus rau hauv lub tebchaws uas Yehauvas cog tseg rau lawv. Tes haujlwm no yuav tsis yoojyim, Yehauvas thiaj cuab Yausua zog tias: “Ua khov kho thiab ua siab loj siab tuab.” Yog Yausua nyeem thiab ua raws li Yehauvas txoj kevcai ces nws yuav paub txiav txim siab zoo thiab yuav vam meej.—Yausua 1:7, 8.

Peb nyob rau “lub sijhawm txom nyem nyuaj siab kawg.” (2 Timaute 3:1) Yog li ntawd, peb lub neej yuav tsis yoojyim. Tiamsis yuav ua li cas peb thiaj vam meej li Yausua? Peb yuav tau ua raws li tej uas Yehauvas hais rau Yausua. Peb yuav tsum nyeem phau Vajlugkub tsis tu ncua thiab siv tej ntawd los pab kom peb paub txiav txim siab zoo.

Tiamsis peb ib txhia tsis nyiam kawm lossis tsis paub xyov yuav kawm li cas. Txawm li ntawd los, qhov uas kawm Vajlugkub yog ib qho tseem ceeb heev. Lub ntsiab me “Xyaum Ua Li No” yuav muab tswvyim rau koj xwv koj thiaj nyiam thiab kawm tau Vajlugkub.

Tus sau nkauj hais tias: “Thov koj coj kuv mus raws li koj tej lus nkaw, rau qhov kuv zoo siab xyiv fab rau txojkev ntawd.” (Ntawv Nkauj 119:35) Thaum koj kawm Vajlugkub, koj kuj yuav zoo siab xyiv fab thiab. Koj yuav pom tias muaj ntau yam zoo heev nyob rau hauv phau Vajlugkub.

Txawm koj tsis coj ib haiv neeg li Yausua los, koj yeej muaj koj kev nyuaj siab. Yog li ntawd, rau siab ntso kawm thiab mloog Vajtswv Txojlus ib yam li Yausua tau ua. Yog koj ua li no, koj yuav txawj txiav txim siab zoo thiab yuav vam meej.

XYAUM UA LI NO

Thov Vajtswv ua ntej koj kawm. Phau Vajlugkub yog Yehauvas Txojlus. Tej uas nws sau cia rau hauv yog sau los pab koj. Yog li ntawd, thov Yehauvas kom nws pab koj nkag siab thiab nco tau tej uas koj nyeem. Thov kom nws pab koj ua raws nraim li tej uas koj kawm.—Exala 7:10.
Thaum koj nyeem Vajlugkub xav txog cov lus nug no: Cov nqe no qhia li cas txog Vajtswv Yehauvas? Cov nqe no txhawb lub ntsiab hauv phau Vajlugkub li cas? Kuv yuav muab cov nqe no coj mus pab lwm tus li cas?
Ua tib zoo xav txog tej uas koj nyeem. Tom qab koj nyeem ib nqes tas, ua tib zoo xav txog cov lus nug no: ‘Nqe no ua rau kuv xav li cas? Vim li cas kuv thiaj xav li ntawd? Kuv lub neej yav tas los puas mus raws li nqe no? Nqe no pab tau kuv tamsim no thiab yav tom ntej li cas? Kuv yuav muab phau Vajlugkub tej hauv paus ntsiab lus thiab tej lus qhuab qhia siv los pab kuv lub neej li cas?’ (Yauj 23:5; Ntawv Nkauj 49:3) Thaum koj kawm Vajlugkub ua tib zoo xav seb vim li cas muaj tej yam Yehauvas ho txwv tsis pub nws haiv neeg ua. Xav seb yog tus uas koj nyeem txog hauv phau Vajlugkub ho txiav txim siab ua lwm yam, nws lub neej yuav zoo li cas?—Kevcai 32:28, 29.
Muab xav tias koj nyob qhov ntawd. Ua tib zoo xav tias yog koj nyob kiag hauv zaj uas koj tabtom nyeem txog, koj yuav ntsib tej yam zoo li cas. Muab piv txwv li no: Thaum Yauxej cov tijlaug muab nws muag rau cov Yisama-ee, koj pom dabtsi xwb? Koj hnov dabtsi nrov, koj hnov dabtsi tsw? Yog koj yog Yauxej, koj yuav xav li cas? (Chiv Keeb 37:18-28) Thaum koj ua li no, tej uas koj kawm yuav raug koj siab dua.
Siv tej twj. Lub koom haum tau npaj ntau yam twj ua koj yam lus. Lawv npaj tej twj no los pab kom koj nyiam kawm Vajlugkub, tsis hais hauv Is Taws Nej lossis hauv ntaub hauv ntawv. Yog koj tsis paub siv tej twj no, tsis txhob txaj muag mus thov lwm tus pab koj. Watchtower LUB VEJ XAIJ TSHAWB NRHIAV VAJLUGKUB thiab Yehauvas Cov Timkhawv Phau Ntawv Tshawb Nrhiav Vajlugkub kuj yuav pab tau koj nrhiav seb phau Vajlugkub hais li cas txog tej ntsiab uas koj xav paub txog. Yog twb muaj phau New World Translation of the Holy Scriptures ua ib yam lus uas koj to taub, cia li kawm kom koj paub siv tej lus qhia ntxiv uas nyob tom qab. Nyob rau hauv ntu ntawd, koj yuav kawm txog cov neeg txheej thaud tej keeb kwm, tej tebchaws, seb lawv luj ub luj no li cas, thiab lwm yam.
Muab tej tseem ntsiab lus rov los xav. Tom qab koj kawm tas sim xav seb koj puas tseem nco tej uas koj nyuam qhuav kawm. Muab tej ntawd coj mus piav rau lwm tus mloog. Puas muaj tej yam uas siv tau mus qhia Vajlugkub? Thaum koj ua li no, koj yuav cim tau tej tseem ntsiab lus thiab yuav pab tau lwm tus.