Me Nyuam Thiab Tej Xov Tooj Ntawm Tes—Ntu 1: Puas Tsim Nyog Rau Kuv Tus Me Nyuam Muaj Xov Tooj?

Niaj hnub no, cov me nyuam yaus nyiam kov xov tooj heev.a Lawv kheev saib Is Taws Nej ib leeg hauv txaj. Yog koj cia koj tus me nyuam siv xov tooj nej yuav tau ceev faj li cas? Lub xov tooj puas pab tau nws thiab? Ib hnub no tsim nyog koj tus me nyuam siv xov tooj ntau npaum li cas?

• Yuav tsum nkag siab

• Nug koj tus kheej li no

• Yus yuav tsum paub qhia

Yuav tsum nkag siab

Lub Xov Tooj Pab Tau Koj Tus Me Nyuam Li Cas

• Tiv thaiv tau koj tus me nyuam thiab ua rau koj tso siab. Ib leej niam hu ua Npethanis (Bethany) muaj ob tug me nyuam uas tiav hluas lawm. Nws hais tias: “Niaj hnub nim no peb nyob rau lub qab ntuj uas muaj neeg phem coob heev, yog li ntawd tseem ceeb heev rau me nyuam hu tau lawv niam lawv txiv.”

  Muaj dua ib leej niam hu ua Khethalees (Catherine) kuj hais tias: “Koj siv tau tej lub app saib seb koj tus me nyuam dua twg lawm. Yog nws tsav tsheb los kuj qhia tau tias nws tsav ceev npaum li cas.”

• Pab tau me nyuam kawm ntawv. Ib leej niam hu ua Malis (Marie) hais tias: “Cov xib hwb kuj muab me nyuam tej ntaub ntawv xa hauv e-mail los sis xov tooj los rau lawv ua tom tsev. Thiab yog me nyuam tsis to taub qhov twg los, lawv hu nrog xib hwb tham los tau.”

Yuav Tau Ceev Faj Tej Yam Twg

• Siv xov tooj ntau dhau lawm. Cov hluas feem coob niaj hnub niaj hnub kov xov tooj xwb. Tiam sis cov niam txiv los kuj zoo tib yam nkaus, lawv kov xov tooj npaum li lawv nrog me nyuam tham lawm. Muaj tej yim zoo li ib tug tshawb fawb tau hais no: “Sawv daws koom ib lub tsev tiam sis cuag li twb tsis sib paub, nyias saib nyias lub xov tooj xwb twb tsis sib ntsia li.”b

• Tej duab los sis yeeb yaj kiab liab qab. Muaj neeg txhawb fawb tau tias ib hlis twg muaj tshaj li ib nrab cov hluas mus saib tej duab los sis yeeb yaj kiab liab qab. Ua cas ho muaj tau li ntawd? Rau qhov lawv siv tej xov tooj mus saib tej ntawd tau yooj yim heev. Ib leej txiv hu ua Viyees (William) muaj ob tug me nyuam uas twb tiav hluas lawm. Nws hais tias: “Txawm cov niam txiv tsis xav kom me nyuam mus saib tej duab liab qab los, yog lawv cia me nyuam kov xov tooj ces cuag li lawv qhib kev rau me nyuam mus saib ntag.”

• Tso tsis tau xov tooj tseg. Coob tus quav xov tooj heev, lawv tso tsis tau xov tooj li. Yog tsis muaj xov tooj ces lawv ntxhov siab hnyo xwb thiab tsis pom qab ua dab tsi li, ib txhia tseem ua kub ua no thiab. Cov niam txiv ib txhia pom tias thaum me nyuam siv xov tooj, me nyuam muaj tus cwj pwm tsis zoo li. Khamee (Carmen) hais tias: “Muaj tej thaud thaum kuv tus me nyuam tab tom kov xov tooj, es kuv muaj lus nrog nws tham, nws cia li ua qhov muag qauj les hais lus saib tsis taus kuv vim nws tsis xav kom leeg twg tab kaum nws.”

• Tseem tshuav lwm yam uas koj yuav tau ceev faj thiab. Tej zaum koj tus me nyuam tseem yuav raug thuam thiab muaj neeg xa lus dev lus npua los sis lawv tej duab liab qab thiab kom nws xa tej duab liab qab mus rau lawv. Tsis tas li ntawd xwb, tej zaum koj tus me nyuam tseem xeeb mob xeeb nkeeg vim nws tsuas khoov siv xov tooj thiab pw tsis txaus. Cov hluas ib txhia siv tej app uas npog tej uas lawv tsis xav kom niam txiv pom. Tej hom app no ua txuj zoo li lwm lub app xws li, lus app xam lej (calculator). Tiam sis hom app no muaj tej yam tsis zoo nyob rau hauv.

  Ib leej txiv hu ua Danyaus (Daniel) uas muaj ib tug ntxhais hluas hais tias: “Lub xov tooj ua rau koj tus me nyuam pom txhua yam hauv Is Taws Nej tsis hais yam zoo yam phem huv si.”

Nug koj tus kheej li no

• ‘Puas tsim nyog me nyuam muaj xov tooj?’

  Phau Vajlugkub hais tias: “Cov neeg ntse ua tib zoo xav lawv mam li ua.” (Pajlug 14:15) Nug koj tus kheej li no:

  ‘Puas muaj tej lub sij hawm uas kuv tus me nyuam ntsib teeb meem es yuav tau siv xov tooj thov kev pab? Kuv puas tau ua tib zoo xav tias yog muaj xov tooj yuav pab tau nws li cas tiam sis kuj yuav tau ceev faj li cas thiab? Yog tsis muaj xov tooj puas muaj lwm hom twj rau nws siv?’

  Ib leej txiv hu ua Thoj (Todd) hais tias: “Tej xov tooj dog dig los kuj ntaus tau ntawv thiab hu tau koj tus me nyuam. Tseem txuag tau nyiaj thiab.”

• ‘Kuv tus me nyuam puas tau paub tab txaus?’

  Phau Vajlugkub hais tias: “Tus neeg ntse tsuas ua qhov yog.” (Tej Lus Qhia 10:2) Nug koj tus kheej li no:

  ‘Kuv tus me nyuam tes hauj lwm puas ua rau kuv tso siab tau rau nws? Kuv puas tau nrog kuv tus me nyuam tham txog qhov no? Kuv tus me nyuam puas zais siab, xws li zais tsis pub kuv paub txog nws tej phooj ywg? Kuv tus me nyuam saib this vis, tej twj ntawm tes, los sis koos pis tawj li cas?’ Ib leej niam hu ua Xelenas (Serena) hais tias: “Tej twj muaj qab hau heev, tiam sis kuj phom sij thiab. Yog muaj teeb meem koj tus me nyuam puas ris tau tej teeb meem ntawd?”

• ‘Kuv puas txawj qhia me nyuam siv xov tooj?’

  Phau Vajlugkub hais tias: “Qhia me nyuam kom paub ua nws lub neej.” (Pajlug 22:6) Nug koj tus kheej li no:

  ‘Kuv puas txawj qhia me nyuam siv xov tooj thiab zam tej uas tsis zoo? Kuv puas paub kho lub xov tooj kom me nyuam thiaj mus saib tsis tau tej ntawd? Kuv puas paub qhia me nyuam saib thiab mloog tej yam zoo hauv xov tooj?’ Ib leej txiv hu ua Danyaus uas tau hais ua ntej no hais tias: “Kuv pom coob tus niam txiv cev xov tooj rau lawv cov me nyuam thiab cia lawv siv ywj siab.”

Ua cas ho tseem ceeb: Cov niam txiv yuav tsum qhia lawv cov me nyuam paub siv xov tooj. Phau ntawv uas qhia txog tib neeg tej cwj pwm hais tias: “Muaj ntau yam rau me nyuam saib hauv xov tooj lawv thiaj xav saib tas li. Yog li ntawd, cov niam txiv yuav tsum saib ntshis thiab cob qhia lawv.”