CIA LI CEEV FAJ ZOV TOS!
Muaj 6 Plhom Leej Tau Tuag Vim Tus Kab Mob COVID—Phau Vajlugkub Hais Li Cas?
Lub koom haum World Health Organization los sis WHO tau tshaj tawm tias txij li lub 5 Hlis tim 23 xyoo 2022 los tau muaj li 6.27 plhom leej tau tas sim neej vim tus kab mob COVID-19. Tiam sis nyob rau lub 5 Hlis tim 5 xyoo 2022, WHO ho tshaj tawm hauv ib tsab xov xwm tias ntshe tib neeg tseem tuag coob tshaj ntawd thiab. Lawv hais tias nyob rau xyoo 2020 thiab 2021 “muaj txog li 14.9 plhom leej tau tuag vim tus kab mob COVID-19. Ib txhia tuag vim tau tus kab mob COVID hos ib txhia tuag vim mob lwm yam tiam sis mus cuag tsis tau kws kho mob vim tsev kho mob puv tas lawm.” Phau Vajlugkub puas tau hais li cas txog tej xwm txheej no?
Phau Vajlugkub hais tias yuav muaj kab mob kev nkeeg
Yexus tau hais tias “yuav muaj mob thoob plaws txhua qhov” nyob rau “tiam kawg” no.—Lukas 21:11; 2 Timaute 3:1.
Yexus cov lus faj lem tab tom muaj tiav niaj hnub nim no. Yog xav paub ntxiv mus nyeem zaj “Muaj Tej Pov Thawj Twg Qhia Txog “Hnub Kawg” los sis “Lub Sij Hawm Kawg”?”
Phau Vajlugkub muaj kev txhawb zog
“[Vajtswv] txhawb peb lub zog thaum peb raug txhua yam kev nyuaj siab.”—2 Kauleethaus 1:3, 4.
Phau Vajlugkub txhawb tau coob tus lub zog thaum muaj ib siab ob qeg. Mus nyeem ntxiv hauv ob zaj no, “Nyiaj Taus Kev Quaj Ntsuag—Dabtsi Yuav Pab Tau Koj Tamsim No?” thiab “Txojkev Zoo Tshaj Uas Pab Tau Cov Quaj Ntsuag.”
Phau Vajlugkub qhia tias dab tsi yuav kho tau tej teeb meem no
“Thov koj los kav. Thov kom txhua yam hauv ntiaj teb muaj tiav raws li koj lub siab nyiam ib yam li saum ntuj.”—Mathais 6:10.
Tshuav tsis ntev xwb “Vajtswv txoj kev kav” los sis nws lub Nceeg Vaj yuav los kho kom tsis “muaj leejtwg nroo hais tias, ‘Kuv muaj mob.’” (Malakaus 1:14, 15; Yaxayas 33:24) Mus saib zaj yeeb yaj kiab “Vajtswv Lub Nceeg Vaj Yog Dabtsi?” Zaj no yuav piav txog lub tseem fwv saum ntuj ceeb tsheej thiab tej uas lub tseem fwv ntawd yuav ua.
Peb caw koj los kawm ntxiv txog tej uas phau Vajlugkub qhia xwv thiaj pab tau koj thiab koj tsev neeg thiab kom nej tau txais tej koob hmoov uas Vajtswv tau cog tseg.