Ntsuj Rog Amankedoos Yog Dab Tsi?
Phau Vajlugkub qhia li no
Ntsuj Rog Amankedoos yog hais txog ib ntsuj rog uas yog ntsuj rog zaum kawg ntawm Vajtswv thiab tej nom tswv hauv ntiaj teb no. Cov nom tswv thiab cov uas txhawb nqa lawv, yog cov uas tawm tsam Vajtswv niaj hnub no uas tsis kam zwm rau Vajtswv lub zwm ntxwv. (Phau Ntawv Nkauj 2:2) Ntsuj Rog Amankedoos no yuav rhuav tseg tib neeg tej tsoom fwv kom puas tsuaj tag mus.—Daniyees 2:44.
Lo lus “Amankedoos” tsuas tshwm tib zaug hauv phau Vajlugkub xwb uas nyob ntawm Tshwmsim 16:16. Tshwmsim qhia tias muaj “ib qhov chaw uas lus Henplais hu ua Amankedoos,” uas “txhua tus vajntxwv uas nyob hauv ntiajteb no” yuav “tuaj ua ke ua rog rau hnub tseemceeb uas Vajtswv tus uas muaj hwjchim loj kawg nkaus teem cia lawm.”—Tshwmsim 16:14.
Leej twg yuav tuaj ntau ntsuj rog Amankedoos? Yexus Khetos yuav coj cov tub rog saum ntuj ceeb tsheej mus ntaus yeej Vajtswv cov yeeb ncuab. (Tshwmsim 19:11-16, 19-21) Cov yeeb ncuab kuj yog hais txog cov uas tawm tsam Vajtswv txoj kev kav thiab saib tsis taus Vajtswv.—Exekees 39:7.
Puas yog yuav ua ntsuj rog Amankedoos nyob ntawm cov Teb Chaw Sab Hnub Tuaj (the Middle East)? Tsis yog. Ntsuj rog Amankedoos yuav muaj mus thoob plaws lub ntiaj teb, tsis yog yuav sib tua nyob rau ib qho chaw xwb.—Yelemis 25:32-34; Exekees 39:17-20.
Qee zaus kuj hais lo lus Amankedoos raws li cov lus Henplais hais “Hos–Mankedoos (Har Meghiddohnʹ), uas txhais tias “lub Roob ntawm Menkidaus.” Menkidaus yog ib lub nroog txheej thaum ub uas nyob hauv thaj tsam lub teb chaws Ixayees. Tej keeb kwm qhia tias tau muaj ntau ntsuj rog tshwm sim nyob rau ntawm thaj tsam ntawd, uas tej txhia ntsuj rog kuj muab sau tseg rau hauv phau Vajlugkub thiab. (Cov Thawjtswj 5:19, 20; 2 Vajntxwv 9:27; 23:29) Txawm li ntawd los, ntsuj rog Amankedoos tsis yog hais txog thaj chaw uas nyob ze lub nroog Menkidaus txheej thaum ub. Ntawm thaj chaw ntawd yeej tsis muaj ib lub roob loj loj nyob rau ntawd. Txawm yuav yog tag nrho lub Hav Yexelees los yeej tsis txaus rau tag nrho cov uas tuaj ua rog nrog Vajtswv ntawd nyob. Ces yog li ntawd, Amankedoos yog ntsuj rog zaum kawg uas yuav tshwm sim mus thoob plaws lub qab ntuj uas thaum tej teb chaws sib sau ua ke los tawm tsam Vajtswv.
Nyob rau lub sij hawm uas muaj ntsuj rog Amankedoos ho yuav zoo li cas? Thaum no peb tsis paub tias xyov Vajtswv yuav siv nws lub hwj chim li cas, tiam sis nws yeej yuav siv tej yam uas nws tau siv yav tag los lawm xws li lawg, av qeeg, dej nyab, hluav taws thiab lawj faj, xob tua, thiab kab mob. (Yauj 38:22, 23; Exekees 38:19, 22; Hanpakus 3:10, 11; Xakhaliyas 14:12) Vajtswv kuj yuav ua kom Nws cov yeeb ncuab tsis paub tom ntej tom qab ces lawv ib leeg yuav rov tua lawv ib leeg. Thaum ntawd, lawv yeej yuav paub tias twb yog lawv ua rog nrog Vajtswv xwb xwb li.—Exekees 38:21, 23; Xakhaliyas 14:13.
Lub ntiaj teb puas yuav puas tsuaj mus thaum muaj ntsuj rog Amankedoos? Peb lub ntiaj teb yeej yuav tsis raug puas tsuaj mus li rau qhov lub ntiaj teb yog noob neej lub chaw nyob mus ib txhis. (Phau Ntawv Nkauj 37:29; 96:10; Tej Lus Qhia 1:4) Amankedoos yuav tsis rhuav tshem tag nrho tib neeg mus, rau qhov Vajtswv yuav cawm ib co “neeg coob coob” uas teev tiam Nws.—Tshwmsim 7:9, 14; Phau Ntawv Nkauj 37:34.
Lo lus “lub ntiaj teb” tsis yog hais txog lub ntiaj teb xwb, tiam sis qee zaus phau Vajlugkub kuj siv los hais txog ib tsoom neeg phem uas tawm tsam Vajtswv thiab. (1 Yauhas 2:15-17) Vim li no, lub qab ntuj los sis “lub sim ceeb” no yuav kawg thaum txog Amankedoos.—Mathais 24:3
Thaum twg mam li txog Amankedoos? Thaum hais txog lub sij hawm uas muaj “kev txom nyem loj kawg nkaus li” rau thaum muaj ntsuj rog Amankedoos, Yexus hais tias: “Ntsig txog hnub ntawd thiab teev ntawd, tsis muaj leej twg paub. Txawm cov tub txib saum ntuj thiab Leej Tub los yeej tsis paub, tsuas yog Leej Txiv thiaj paub xwb.” (Mathais 24:21, 36) Tsis tag li ntawd, phau Vajlugkub kuj qhia tias ntsuj rog Amankedoos twb pib xyoo 1914 uas yog lub caij lub nyoog thaum Yexus pib kav lawm.—Mathais 24:37-39.