Thaum Twg Lub Qab Ntuj No Mam Kawg?

Phau Vajlugkub qhia li no

Yuav kom peb paub tias thaum twg lub qab ntuj no mam kawg, peb yuav tsum to taub seb thaum phau Vajlugkub siv lo lus “lub qab ntuj” yog hais txog dab tsi. Lo lus Kilis koʹsmos txhais tias “lub qab ntuj.” Lo lus no feem ntau hais txog lub qab ntuj neeg uas yog cov neeg tsis mloog Vajtswv lus thiab tsis ua raws li nws lub siab nyiam. (Yauhas 15:18, 19; 2 Petus 2:5) Muaj tej thaum, lo lus koʹsmos hais txog cov neeg uas ua raws li lawv txoj kev ntshaw thiab lawv lub siab xav xwb, es tsis coj raws li Vajtswv lub siab nyiam.​—1 Kauleethaus 7:31;1 Yauhas 2:15, 16.a

Thaum hais txog “lub qab ntuj kawg” yog hais txog dab tsi?

Lo lus “lub qab ntuj kawg,” uas tshwm nyob hauv ntau phau Vajlugkub, kuj yog hais txog lub sij hawm uas “lub sim ceeb yuav kawg.” (Mathais 24:3) Lo lus no tsis yog hais tias lub ntiaj teb los sis tag nrho noob neej yuav raug puas tsuaj mus. Tiam sis tsuas yog rhuav tshem cov neeg uas ua raws li lawv txoj kev ntshaw thiab lub siab xav, es tsis coj raws li Vajtswv lub siab nyiam xwb.​—1 Yauhas 2:17.

Phau Vajlugkub qhia tias ‘cov neeg lim hiam yuav raug muab txiav tawm mus’ kom cov neeg zoo thiaj tau nyob kaj siab lug hauv ntiaj teb. (Phau Ntawv Nkauj 37:9-11) Txoj kev puas tsuaj no yuav muaj tshwm sim rau lub caij uas muaj “kev txom nyem loj kawg nkaus,” uas yog thaum muaj ntsuj rog Amankedoos.​—Mathais 24:21, 22; Tshwmsim 16:14, 16.

Thaum twg lub qab ntuj no mam kawg?

Yexus hais tias: “Ntsig txog hnub ntawd thiab teev ntawd, tsis muaj leej twg paub. Txawm cov tub txib saum ntuj thiab Leej Tub los yeej tsis paub, tsuas yog Leej Txiv thiaj paub xwb.” (Mathais 24:36, 42) Nws hais ntxiv tias hnub ntawd yuav tsis los raws li nej lub siab xav, tiam sis “yuav los rau lub sij hawm uas nej tsis nco ceev faj.”​—Mathais 24:44.

Txawm tias peb tsis paub hnub ntawd thiab teev ntawd los, Yexus twb qhia lawm tias yuav muaj “pov thawj” qhia ua ntu zus tias peb nyob rau tiam kawg. (Mathais 24:44) Phau Vajlugkub qhia tias yog “lub sij hawm ntiaj teb kawg,” thiab “tiam kawg.”​—Daniyees 12:4; 2 Timautes 3:1-5.

Puas tshuav dab tsi nyob tom qab lub qab ntuj kawg?

Tshuav kawg. Lub ntiaj teb tseem yuav nyob li qub. Phau Vajlugkub qhia tias ‘lub ntiaj teb yuav nyob qhov ntawd tsis txav chaw li.’ (Phau Ntawv Nkauj 104:5) Thiab lub ntiaj teb tseem yuav muaj neeg nyob puv nkaus raws li phau Vajlugkub cog lus tseg: ‘Cov neeg ncaj ncees yuav ua cov kav lub [ntiaj teb], thiab nyob hauv lub [ntiaj teb] ntawd mus ib txhis li.’ (Phau Ntawv Nkauj 37:29) Vajtswv yuav ua kom muaj tiav raws li nws lub ntsiab rau lub ntiaj teb kom:

• Ua lub Vaj Kaj Siab.​—Yaxayas 35:1; Lukas 23:43.

• Nyob tso siab plhuav thiab vam meej.​—Mikhas 4:4.

• Sawv daws yuav zoo siab rau txhua yam uas lawv ua thiab ua neej muaj hauv paus hauv ntsis.​—Yaxayas 65:21-23.

• Tsis muaj kab mob kev nkeeg thiab tsis txawj laus li lawm.​—Yauj 33:25; Yaxayas 33:24