Yehauvas Cov Tim Khawv Xav Li Cas Txog Txoj Kev Sib Nrauj?
Yehauvas Cov Tim Khawv xav thiab coj raws nraim li tej uas phau Vajlugkub qhia thaum hais txog kev sib yuav thiab sib nrauj. Vajtswv yog tus rhawv txoj kev sib yuav, Nws ua li ntawd los twb yog vim Nws xav kom tus txiv neej thiab poj niam los sib sau ua neej thiab kom nkawd ua txij ua nkawm mus tag ib sim. Tsuas muaj tib txoj hau kev uas phau Vajlugkub tso cai rau sib nrauj xwb yog thaum ib tug twg mus ua plees ua yis.—Mathais 19:5, 6, 9.
Yehauvas Cov Tim Khawv pab cov txij nkawm uas muaj teeb meem li cas?
Yehauvas Cov Tim Khawv muaj kev pab li nram no:
Tej ntaub ntawv. Yehauvas Cov Tim Khawv tej ntaub ntawv muaj tej zaj uas pab tau cov txij nkawm kom ib leeg muab siab npuab rau ib leeg. Tab txawm tej khub lub neej twb yuav puas los yeej tseem pab tau. Xws li, zaj “Tuav Koj Txoj Kev Txij Nkawm Kom Ruaj Khov,” “Ib Tug Paub Zam Rau Ib Tug,” thiab “Ua Kom Koj Tus Txij Nkawm Rov Tso Siab Rau Koj” ua lus Askiv.
Tej kev sib txoos. Yehauvas Cov Tim Khawv muaj kev sib txoos txhua txhua lub lim tiam, muaj rooj sib txoos ib hnub thiab rooj sib txoos peb hnub. Tej kev sib txoos no muaj tej zaj lus qhia uas cov txij nkawm coj tau mus siv rau hauv lawv lub neej.
Cov txwj laus. Cov txwj laus hauv lub koom txoos yuav ntsib nrog khub txij nkawm uas xav tau kev pab. Thiab thaum cov txwj laus mus ntsib nrog khub txij nkawm ntawd, lawv tsuas siv Vajtswv txoj lus los pab xwb, xws li Efexus 5:22-25.
Puas yog cov txwj laus hauv lub koom txoos tso cai rau cov txij nkawm sib nrauj?
Tsis yog. Txawm cov txwj laus yog cov pab cov txij nkawm uas muaj teeb meem los lawv tsis muaj cai hais kom cov txij nkawm yuav tsum ua li cas rau li cas. (Kalatias 6:5) Txawm li cas los xij, nyob hauv phau Vajlugkub hais tias tus uas lam tau lam muab nws tus txij nkawm nrauj tsis raws cai tsis muaj cai mus yuav dua tus tshiab.—1 Timautes 3:1, 5, 12.
Yehauvas Cov Tim Khawv xav li cas txog txoj kev sib cais?
Phau Vajlugkub txhawb kom cov txij nkawm nyob ua ke, tab txawm lawv lub neej tsis mus raws li siab xav. (1 Kauleethaus 7:10-16) Ntau zaus thaum muaj teeb meem Cov Tim Khawv tsuas thov Vajtswv pab, coj raws li tej hauv paus ntsiab lub hauv phau Vajlugkub thiab ib leeg ua qhia tias hlub ib leeg ces twb pab tau lawv lawm.—1 Kauleethaus 13:4-8; Kalatias 5:22.
Txawm li ntawd los, Cov Tim Khawv ib txhia kuj txiav txim siab sib cais vim muaj tej teeb meem loj li nram no:
Ib tug txhob txwm tsis saib xyuas nws tsev neeg.—1 Timautes 5:8.
Raug ntaus sab heev.—Phau Ntawv Nkauj 11:5.
Ua kom tus txij nkawm txhob mloog Vajtswv lus los sis mus ua tsis tau Vajtswv tes hauj lwm. Xws li, yuam tuag ntig kom tus txij nkawm uas yog Yehauvas ib tug Tim Khawv hla Vajtswv tej kev cai. Thaum zoo li no tej zaum tus txij nkawm uas teev tiam Yehauvas thiaj txiav txim siab tias ntshe sib cais yuav zoo dua, yog nws xav “mloog Vajtswv lus dua li mloog neeg lus.”—Tes Hauj Lwm 5:29.