Phau Vajlugkub Qhia Li Cas Txog Tej Xwm Txheej Uas Los Raug Lub Ntiaj Teb?
Phau Vajlugkub qhia li no
Vajtswv tsis yog tus ua kom muaj xwm txheej phem los raug lub ntiaj teb niaj hnub nim no. Thaum tib neeg raug xwm txheej, Vajtswv haj tseem yog tus txhawj txog lawv. Tshuav tsis ntev lawm xwb, Vajtswv lub Nceeg Vaj yuav rhuav tshem txhua yam kev txom nyem. Ua ntej lub sij hawm ntawd yuav los txog, Vajtswv nplig cov raug xwm txheej phem.—2 Kauleethaus 1:3.
Tej xwm txheej uas los raug lub ntiaj teb puas qhia tias peb nyob rau tiam kawg lawm?
Phau Vajlugkub pab puas tau peb npaj ua ntej muaj xwm txheej?
Vim li cas peb tso siab tau tias tej xwm txheej uas los raug lub ntiaj teb tsis yog Vajtswv rau txim rau tib neeg?
Nyob hauv phau Vajlugkub, Vajtswv tso tej xwm txheej cua daj cua dub los sis hluav taws los rau txim rau cov neeg phem. Qhov uas Vajtswv ua li ntawd, txawv ntawm tej xwm txheej phem uas los raug lub ntiaj teb niaj hnub nim no.
Xwm txheej cua daj cua dub, av qeeg, toj kub hnyiab, dej nyab los sis lwm yam yeej los raug txhua tus. Tiam sis phau Vajlugkub qhia tias thaum Vajtswv tso xwm txheej phem los rau txim rau tib neeg, nws tsuas ua kom los raug cov neeg phem xwb. Xws li thaum Vajtswv tso hluav taws los kub lub nroog Xaudoos thiab Kaumaulas puas tsuaj tag, nws cawm Lauj thiab nws ob tug ntxhais dim vim Lauj hwm Vajtswv. (Chivkeeb 19:29, 30) Vajtswv paub tej uas neeg xav hauv nruab siab, nws thiaj paub tias tus twg yog neeg phem neeg zoo.—Chivkeeb 18:23-32; 1 Xamuyees 16:7.
Peb tsis paub thaum twg yuav muaj xwm txheej phem los raug lub ntiaj teb. Tiam sis ua ntej Vajtswv tso ib yam xwm txheej phem los rau txim rau cov neeg phem, nws yeej xub ceeb toom lawv. Tus uas mloog Vajtswv cov lus ceeb toom yuav dim tau.—Chivkeeb 7:1-5; Mathais 24:38, 39.
Tib neeg kuj ua rau tej huab cua, tej dej, tej av yim huab phem tuaj. Lawv tsis txuag lub ntiaj teb, thiaj ua rau lub ntiaj teb puas tsus. (Tshwmsim 11:18) Thiab lawv ua vaj ua tsev nyob rau tej thaj chaw uas muaj tau av qeeg, dej nyab, los sis muaj cua daj cua dub. Yog li ntawd, tej uas tib neeg ua rov los raug lawv xwb, tsis yog Vajtswv rau txim rau lawv.—Pajlug 19:3.
Tej xwm txheej uas los raug lub ntiaj teb puas qhia tias peb nyob rau tiam kawg lawm?
Yeej qhia. Phau Vajlugkub qhia tias yuav muaj xwm txheej los raug lub ntiaj teb nyob rau lub sij hawm uas “lub sim ceeb yuav kawg,” los sis ‘lub sij hawm kawg.’ (Mathais 24:3; 2 Timautes 3:1) Yexus hais tias lub sij hawm uas peb nyob no “yuav muaj kev tshaib kev nqhis thiab av qeeg ib qho rau ib qho.” (Mathais 24:7) Tshuav tsis ntev lawm xwb, Vajtswv yuav rhuav tshem txhua yam kev txom nyem thiab tej xwm txheej phem huv si mus.—Tshwmsim 21:3, 4.
Vajtswv pab cov raug xwm txheej li cas?
Vajtswv muab nws Txoj Lus los txhawb lawv. Phau Vajlugkub qhia tias Vajtswv mob siab txog peb thaum peb raug txom nyem. (Yaxayas 63:9; 1 Petus 5:6, 7) Tsis tas li ntawd, phau Vajlugkub kuj qhia tias muaj ib hnub yuav tsis muaj xwm txheej phem ntxiv li lawm.—Mus saib “Cov nqe Vajlugkub uas txhawb tau cov raug xwm txheej.”
Vajtswv cov neeg pab cov raug xwm txheej. Cov ntseeg Vajtswv xyaum Yexus tus yam ntxwv. Phau Vajlugkub qhia tias Yexus “mus nplig cov neeg uas muaj kev lwj siab” thiab cov “uas muaj kev quaj ntsuag.” (Yaxayas 61:1, 2) Cov ntseeg Vajtswv kuj ua ib yam li ntawd thiab.—Yauhas 13:15.
Lawv kuj pab khoom noj khoom siv rau cov uas raug xwm txheej.—Tes Haujlwm 11:28-30; Kalatias 6:10.
Yehauvas Cov Tim Khawv mus pab kho vaj kho tsev rau cov uas raug cua daj cua dub nyob hauv lub pov txwv Puerto Rico
Phau Vajlugkub pab puas tau peb npaj ua ntej muaj xwm txheej?
Yeej pab tau. Phau Vajlugkub muaj tej hauv paus ntsiab lus uas pab tau peb. Xws li:
Peb yuav npaj li cas. Phau Vajlugkub hais tias, ‘Tus neeg paub qab hau pom tej xwm uas yuav los raug nws, nws txawm zam kev lawm.’ (Pajlug 22:3) Zoo rau peb npaj txhij ua ntej muaj xwm txheej. Peb npaj tau ib lub hnab nqa khiav thiab npaj peb tsev neeg kom paub tias yuav mus sib ntsib qhov twg thaum muaj xwm txheej.
Txoj sia tseem ceeb dua tej khoom ub khoom no. Phau Vajlugkub hais tias: ‘Thaum peb niam peb txiv yug peb los, peb yeej tsis coj ib yam dab tsi los. Thaum peb tuag peb yeej yuav coj tsis tau ib yam dab tsi mus thiab.’ (1 Timautes 6:7, 8) Thaum muaj xwm txheej phem, peb txhob khuv xim tej khoom ub khoom no. Nco ntsoov tias peb txoj sia muaj nqis tshaj tej khoom ntawd.—Mathais 6:25.