Tsiaj Puas Mus Saum Ntuj Ceeb Tsheej?
Phau Vajlugkub qhia li no
Ib puas tsav yam uas muaj sia nyob hauv ntiaj teb no, Vajtswv tsuas xaiv ib txhia tib neeg mus saum ntuj ceeb tsheej xwb. (Tshwmsim 14:1, 3) Cov neeg uas raug xaiv no yuav mus ua pov thawj thiab ua vaj ntxwv kav nrog Yexus. (Lukas 22:28-30; Tshwmsim 5:9, 10) Hos dua li lwm cov tib neeg uas tas sim neej lawm ces yuav raug tsa los nyob hauv lub ntiaj teb zoo zoo nkauj no.—Phau Ntawv Nkauj 37:11, 29.
Hais txog tsiaj, phau Vajlugkub tsis tau qhia tias lawv yuav mus saum ntuj ceeb tsheej. Yog vim li cas? Vim hais tias yuav kom “Vajtswv hu” ib tug twg mus saum ntuj ceeb tsheej, nws yuav tsum kawm txog Vajtswv, qhia txog nws txoj kev ntseeg, thiab ua raws li Vajtswv tej kev cai. (Henplais 3:1; Mathais 19:17; Yauhas 3:16; 17:3) Tsiaj ua tsis tau li ntawd. Vajtswv tsuas tsim kom tib neeg thiaj muaj rab peev xwm ua taus li ntawd xwb thiab nyob tau mus ib txhis.—Chivkeeb 2:16, 17; 3:22, 23.
Yuav kom ib tug twg tau mus saum ntuj ceeb tsheej, nws yuav tsum raug tsa tom qab nws tas sim neej. (1 Kauleethaus 15:42) Phau Vajlugkub hais ntau zaus txog txoj kev tsa cov tuag sawv rov qab los. (1 Vajntxwv 17:17-24; 2 Vajntxwv 4:32-37; 13:20, 21; Lukas 7:11-15; 8:41, 42, 49-56; Yauhas 11:38-44; Tes Hauj Lwm 9:36-42; 20:7-12) Tiam sis txhua zaus, tsuas yog hais txog tsa tib neeg xwb, tsis tau hais txog tsa tsiaj.
Muaj li cas rau cov tsiaj txhu tom qab lawv tuag lawm?
Phau Vajlugkub qhia tias tib neeg thiab tsiaj puav leej txawj ua pa. Lawv puav leej yog muab av puab thiab Vajtswv “tshuab siav tshuab pa” rau lawv ib yam nkaus.—Chivkeeb 1:24; 2:7; Teev Npe 31:28.
Phau Vajlugkub kuj qhia tias tib neeg thiab tsiaj txhu txawj tuag thiab rov mus ua av. (Khiav Dim 19:13) Thaum lawv tuag lawm ces tas li lawm xwb, tsis muaj txoj sia nyob qhov twg li lawm.—Tej Lus Qhia 3:19, 20.
Tsiaj txhu puas txawj ua txhaum?
Lawv tsis txawj, vim kev txhaum yuav tsum yog los ntawm qhov uas ib tug paub xav thiab paub ua tej yam uas txhaum Vajtswv tej kev cai. Yuav kom ib tug twg ua txhaum tau li no, nws yuav tsum paub cais qhov zoo ntawm qhov phem, tiam sis tsiaj txhu tsis paub cais li ntawd. Tsiaj tsuas paub ua raws li tej uas Vajtswv tsim kom lawv ua xwb. (2 Petus 2:12) Txawm lawv tsis paub ua txhaum los, lawv yeej txawj tuag.
Ua phem rau tsiaj txhu puas tau?
Tsis tau. Vajtswv tsa tib neeg los kav cov tsiaj txhu tiam sis tsis tau tso cai rau lawv ua phem ywj siab. (Chivkeeb 1:28; Phau Ntawv Nkauj 8:6-8) Vajtswv yeej txhawj txog tej yam uas muaj tshwm sim rau tsiaj txhu, tab txawm yog ib tug noog me me xwb los Vajtswv yeej paub tias muaj li cas rau nws. (Yaunas 4:11; Mathais 10:29) Vajtswv sam hwm kom cov uas teev tiam nws, tu tej tsiaj txhu kom zoo thiab ua tib zoo saib xyuas lawv.—Khiav Dim 23:12; 2 Kevcai 25:4; Pajlug 12:10.