Puas Tsim Nyog Peb Koom Ib Txoj Kev Ntseeg Uas Qhia Muaj Chaw Txawb Chaw Rau?
Phau Vajlugkub teb li no
Yeej tsim nyog, rau qhov Vajtswv xav kom tib neeg tuaj sib txoos thiab pe hawm nws ua ke. Phau Vajlugkub hais tias: “Peb yuav tsum ua tib zoo xyuas saib peb yuav ua li cas ib tug thiaj txhawb tau ib tug lub zog kom ib tug txawj hlub ib tug thiab ib tug ua zoo rau ib tug. Sawvdaws yuav tsum tuaj ua ke mloog lus qhuab qhia tsis txhob tso tseg.”—Henplais 10:24, 25.
Yexus qhia tias cov uas raws nws qab yuav tau los ua ib pawg uas muaj kev sib koom siab. Nws hais rau lawv tias: “Yog nej ib leeg hlub ib leeg, sawvdaws thiaj yuav paub hais tias nej yog kuv cov thwjtim.” (Yauhas 13:35) Thawj txoj kev uas Yexus cov thwj tim qhia tau txoj kev hlub no yog thaum lawv mus sib txoos ua ke nrog cov uas ntseeg tib yam li lawv. Lawv yuav tau tsa kom muaj cov koom txoos es lawv thiaj li mus sib txoos tau thiab pe hawm tau Vajtswv ua ke tsis tu ncua. (1 Kauleethaus 16:19) Thaum kawg, lawv thiaj yuav sib sau tau los ua ib cuab kwv tij mus thoob qab ntuj.—1 Petus 2:17.
Yuav tau ua ntau dua qhov uas muaj npe hauv ib txoj kev ntseeg xwb
Thaum phau Vajlugkub qhia tias tib neeg yuav tsum tuaj pe hawv Vajtswv ua ke, qhov no txhais tsis tau tias yog lawv twb muaj npe ua ib tug tswv cuab hauv ib txoj kev ntseeg twg lawm ces Vajtswv yeej txaus siab rau lawv lawm. Yuav kom Vajtswv txaus siab, ib tug neeg yuav tsum coj raws li nws txoj kev ntseeg ntawd txhua txhua hnub. Piv txwv li no, phau Vajlugkub hais tias: “Txoj kevcai uas Vajtswv tus uas yog peb Leej Txiv suav hais tias yog txoj uas zoo thiab tseeb, txoj ntawd yog nej yuav tsum pab cov pojntsuam thiab cov menyuam ntsuag uas raug kev txomnyem quaj ntsuag. Thiab nej tsis txhob mus nrog neeg ntiajteb ua phem ua qias.”—Yakaunpaus 1:27.